Mie pak me ke medewehda en wadek Paipel ahpw sohte wia met pwehki omw pepehm kan duwehte dahme sansalda powe? Aramas tohto kin masak wadek Paipel. Ahpw ia duwen ma ke esehda me Paipel kak sewese kalaudehla omw ahneki mour nsenamwahu? Oh ia duwen ma ke esehda me mie soahng kan me ke kak wia pwehn kalaudehla omw perenki wadek Paipel? Ke pahn men tehk dahme Paipel kak padahkihong uhk?

Tehk dahme ekei koasoia ni ahnsou me re tepida wadek Paipel oh diarada me e kin wahdo kapai ong irail.

Ezekiel, me sounpar 20 samwa, koasoia: “Rahn teio, I duwehte emen me kin tangahki sidohsa ahpw sehse ia wasa e kohkohla ie. Ahpw wadek Paipel seweseie en ahneki mour me mie katepe. E audaudki kaweid mwahu kan me I kak doadoahngki ehuehu rahn.”

Frieda, pil sounpar 20 samwa, kawehwehda: “I kin wia emen me kin mwadang en lingeringerda. Ahpw pwehki ei kin wadek Paipel, I sukuhlkihdi mwomwen ei pahn kin kaunda ei pepehm kan. Met kahrehiong meteikan en perenkihla ehuong ie, kahrehda e tohtohlahr kompoakepahi met.”

Lih emen me sounpar 50 samwa me adaneki Eunice koasoiahki duwen Paipel, “Paipel kin sewese ie en wiahla aramas mwahu men oh wekidala ei wiewia kan me sohte nohn mwahu.”

Nin duwen irail sounwadawad pwuko oh me rar teikan sukuhlkihdier, wadek Paipel kak seweseiuk en mourki mour nsenamwahu. (Aiseia 48:17, 18) Patehng soahng teikan, e kak seweseiuk en (1) wiahda pilipil mwahu, (2) wiahda kompoakepah mehlel kan, (3) powehdi pwunod kan, oh (4) mwahusang koaros, sukuhlki duwen Koht mehlel. Kaweid en Paipel pwilisang rehn Koht, eri ke sohte kak koluhkihla ma ke idawehn. Koht sohte kin ketikihda kaweid suwed kan.

Me kesempwalo iei ken tepida wadek. Mehn sawas mwahu dah kan me kak kamengeila omw tapiada wadek oh kalaudehla omw perenki wadek Paipel?

Wiepe dah me pahn seweseiuk en perenki omw wadawad en Paipel oh paiekihda laud? Tehk iren sawas limau pwukat me pweidahier rehn me tohto.

Pilada wasa me mwahu. Song en diarada wasa ieu me meleilei. Katikala soahng kan me pahn kerempwa iuk pwe ken kak medemedewehte dahme ke wadek. Wasa me marain oh kansenamwahu ele kak seweseiuk en paiekihda laud omw wadawad.

Ahneki madamadau pwung. Pwehki Paipel pwilisang rehn Samatail me ketiket nanleng, ke pahn keieu paiekihda ma omw madamadau pahn rasehng seri men me onopadahng ale kasukuhl sang rehn eh pahpa limpoak men. Ma mie omw madamadau sapwung me ke kin ahneki ong Paipel, song en kihsang pwe Koht en kak ketin padahki iuk.​—Melkahka 25:4.

Kapakap mwohn omw wadek. Paipel kin audaudki sapwellimen Koht madamadau kan, eri e sohte kapwuriamwei me kitail anahne sapwellime sawas pwehn wehwehki. Koht ketin inoukihda en ketikihong “[“sapwellime manaman,” NW] irail kan me kin peki reh.” (Luk 11:13) Manaman wet kak seweseiuk en wehwehki sapwellimen Koht madamadau. Kedekedeo, e pahn ritingada omw madamadau pwehn koledi soahng “rir kan en kupwur en Koht.”​—1 Korint 2:10.

Wadek pwehn wehwehki. Dehr wadek pwehn kanekehlahte pwuhko. Medemedewe dahme ke wadwadeko. Pein idek rehmw soangen peidek kan me duwehte mepwukat: ‘Soangen irair dah kan me I kilang rehn aramaso me I wadewadek duwe? Ia duwen ei kak doadoahngki met nan ei mour?’

Koasoanehdi mehn akadei kan. Pwehn paiekihda omw wadawad en Paipel, koasoanehdi en sukuhlki mehkot me uhdahn pahn kamwahwihala omw mour. Ele ke kak wiahda mehn akadei kan me duwehte mepwukat: ‘I men kalaudehla ei sukuhlki duwen Koht.’ ‘I men kamwahwihala pein ngehi, wiahla ohl pwopwoud de lih pwopwoud mwahu men.’ Mwuri kowe eri pilada ire kan sang nan Paipel me pahn seweseiuk en lel omw mehn akadei kan.a

Iren sawas limau pwukat pahn seweseiuk en tapiada wadek Paipel. Ahpw ia duwen omw pahn kak kalaudehla omw perenki wadek Paipel? Iren mwurin met pahn kihda ekei iren sawas kan.

E kasangat? De e kansenamwahu? Dahme ke kin medewehiong duwen wadawad en Paipel? E kin pidada mwomwen omw kin wia omw wadawad. Eri kitail pahn tehkpene dahme ke kak wia pwehn kalaudehla omw perenki wadek Paipel.

Pilada ehu kawehwehn Paipel me aramas en rahnpwukat pahn wehwehki oh me likilik. Ele ke sohte pahn perenki wadek pwuhk ehu me mie soangen lepin lokaia apwal tohto de lepin lokaia me sohla kadoadoahk, me ke sohte wehwehki loale. Eri rapahkihda ehu Paipel me kin doadoahngki lepin lokaia me mengei en wehwehki, me pahn sair omw mohngiong. Ahpw, pil ni ahnsowohte, ke anahne tehk kanahieng ma e kawehwehdi ni pwung.a

Doadoahngki dipwisou kapw en rahnpwukat. Rahnwet Paipel sohte wiawihkihdahte pwuhk ahpw e pil mi nan dipwisou kan me kak doadoahngki internet. Ke kak wadek ekei Paipel nan online de download nan noumw computer, tablet, de cell phone ong wadawad. Soangen dipwisou pwukat mie soahng kei loale kak kahrehda ken mwadang rapahkihda ekei iren Paipel nan oaralap me ke wadewadeko de kapahrekiong ekei kawehwehn Paipel kan. Ma ke perenki rong sang wadek, mie ngilen wadawad en Paipel me wiawidahr. Aramas tohto kin perenki rongorong wadawad en Paipel ni ahnsou me re kin ieiang mehn peidaid kan, ni ahnsou me re wie lopwolopw, de wiewia soangen doadoahk teikan. Ke seu song wiepe ehu me pahn mwahuong uhk?

Doadoahngki mehn onop en Paipel kan. Mehn onop en Paipel kan kak seweseiuk en paiekihda laud omw wadek Paipel. Mie map en sahpw kan nan Paipel, me pahn seweseiuk en diarada sahpw kan me ke wadekada nan omw wadawad oh pahn kamwakid uhk en kamehlele. Ire kan me duwehte me mi nan Kahn Iroir wet de wasa ehu nan jw.org website me nda “Bible Teachings”, kak seweseiuk en tehk wehwehn wasa tohto nan Paipel.

Wekidala mwomwen omw kin wia omw wadawad. Ma omw kin wadek Paipel sang ehu irelaud lel ehu irelaud kin mwomwen kasangat, ke seu kalaudehla omw perenki wadawad ni omw pahn tepikihda ire ieu me uhdahn pahn kamwakid uhk? Ma ke men rapahkihda aramas ndand kan nan Paipel, ke kak song wadek duwen irail. Wiepe ehu ong mwomwen omw pahn wadek duwen aramas akan nan Paipel mi nan kisin koakon me nda, “Rapahki Nan Paipel Pwehn Esehla Aramas akan Loale.” De ele ke men wadek Paipel sang ni oaralap de wadek duwen keirekdien soahng kan me wiawi. Ke seu song wia ehu soangen wiepe pwukat?

Paipel sohte duwehte pwuhk teikan. E audaudki kaweid kan sang rehn Sounkapikpatail. (2 Timoty 3:16) Kaweid kan loale kak kamwakid kitail laud. Ni mehlel, Paipel mahsanih: “Mahsen en Koht wie momour oh manaman.” (Ipru 4:12) E ahneki manaman en kamwahwihala atail mour ni ahl riau, iei kihda kaweid nan atail mour ehuehu rahn nan ahnsou wet oh sewese kitail en esehla Koht oh sapwellime inou kan.​—1 Timoty 4:8; Seims 4:8.

Kamwahwihala omw mour ahnsou wet. Paipel kak sewese kamwahwihala pein omw kahpwal kan. E kin kihda kaweid mwahu kan duwen ire pwukat pah.

• Nanpwungmwahu rehn meteikan.​—Episos 4:31, 32; 5:22, 25, 28, 33.

• Omw pepehm oh omw roson mwahu.​—Melkahka 37:8; Lepin Padahk 17:22.

• Tiahk mwahu kan.​—1 Korint 6:9, 10.

• Soahng kan me ke ahneki.​—Lepin Padahk 10:4; 28:19; Episos 4:28.a

Pwopwoud pwulopwul ehu nan Eisia uhdahn kalahnganki kesempwalpen kaweid en Paipel kan. Duwehte pwopwoud kapw tohto, ira kin anahne nannanti pwehn ahnla emenemen oh esehla saledek en koasoipene. Ahpw ira tepida kapwaiada dahme ira kin wadeksang nan Paipel. Ia imwilahn met? Vincent, ohl pwopwoudo, koasoia: “Dahme I wadek nan Paipel sewese ie en powehdi kahpwal kan ni elen limpoak nan at pwopwoud. At kapwaiada kaweid en Paipel kan kahrehiong kiht en ahnekipene mour nsenamwahu.” Eh pwoudo, Annalou, pwungki met oh koasoia: “Wadewadek mehn kahlemeng kan nan Paipel uhdahn sewesei kiht. Met I pehm peren oh nsenamwahu nan at pwopwoud oh ong at mehn akadei kan nan at mour.”

En esehla duwen Koht. Likin dahme Vincent ndahki duwen pwopwoud, e pil koasoia: “Sang ni ei kin wadek Paipel, I pehm me I uhdahn karanihala Siohwa met sang mahs.” Dahme Vincent koasoia kin pid ire kesempwal ehu, iei me Paipel kak seweseiuk en esehla Koht. Ni omw pahn wia met, ke sohte ihte pahn paiekihda sapwellime kaweid kan ahpw ke pil pahn diarada me ke kak esehla ih nin duwen kompoakepahmw men. Oh ke pahn kilang me e kin ketin kasalehda oaritik kan duwen ahnsou kohkohdo me pahn kaselel, ahnsou ehu me ke pahn kak perenki “mouro me uhdahn mour mehlel” me pahn mihmi kohkohlahte. (1 Timoty 6:19) Met iei mehkot me sohte ehu pwuhk tohrohr kak kasalehda.

Ma ke koasoanehdi en wadek Paipel oh kin kaukaule wia met, ke pil kak alehdi soangen kamwahu ko, me iei e pahn kamwahwihala omw mour met oh esehla Koht. Ahpw, ni omw wadek Paipel, ele ke pahn kin medewe peidek tohto. Oh ma ke wia met, tamataman mehn karasepe mwahu en ohlen Idiopiao me momour sounpar 2,000 samwalahro. Mie eh peidek tohto duwen Paipel. Ni ahnsou me peidek kohieng ma e wehwehki dahme e wadwadeko, e sapengki: “Ia duwen ei pahn kak wehwehki, ma sohte me pahn kawehwehiong ie?”b Mwurin mwo e men ale sawas sang emen me koahiek en padahngki Paipel, iei Pilip emen tohnpadahk en Sises mahso. (Wiewia 8:30, 31, 34) Ni soangen ngoangohte, ma ke men kalaudehla omw wehwehki Paipel, se luke iuk en peki onop en Paipel nan online nan www.jw.org de ntinglahng adres me karanih iuk, me kileldi nan makasihn wet. Ke pil kak koasoiong emen Sounkadehdehn Siohwa me karanih komwi de mwemweitla Wasahn Kaudok en Sounkadehdehn Siohwa kan nan omw wasa. Ke seu ale ehu Paipel rahnwet, oh mweidohng en kaweid uhk ong mour nsenamwahu?