Iren Sawas kan ong Doaropwehn Kasukuhl ong Mihting en Mour oh Kalohk
March 5-11
SOAHNG KESEMPWAL KAN SANG MAHSEN EN KOHT | MADIU 20-21
“Mehmen me Men Lapalap Rehmwail, E Pahn Papah Meteikan”
nwtsty-E kilel oh kisin kasdo kan
Wasahn Netinet
Ekei wasahn netinet kan, duwehte me sansalda wasaht, kin mi ni keilen ahl. Sounetinet kan kin kalapw kihdiong kepwe tohto pohn ahl akan kahrehda e kin perehla wasahn alu. Tohn wasao kak pwainda soahng kan me re kalapw doadoahngki nan ihmw, kepwehn mwenge, oh dipwisou kilahs pweilaud kan, pil iangahki wahnsahpw me ahpwtehn dondoldi. Pwehki sohte ais pwoks, aramas akan anahne kohla wasahn netinet kan ehuehu rahn pwehn pwainda arail anahn kan. Wasao sounpwainda kepwe men kak rong rohng kan me irail sounkawiliali kan oh sounmwemweit kan wahdo, seri kan kak mwadong, oh irail me sohte arail doadoahk kan kak awih ren alahlda. Nan wasahn netinet, Sises ketin kamwahwihala me soumwahu oh Pohl kin kalohk. (Wi 17:17) Weksang met, sounkawehwehn kosonned oh Parisi aklapalap ko kin men aramas en kin tehk irail oh rahnmwahwih irail nan wasahn netinet pwukat.
nwtsty-E mehn onop kan ong Md 20:20, 21
inen nein Sepedi ko: Me iei, en wahnpoaron Seims oh Sohn nohno. Nin duwen me pwuhken Mark kasalehda, Seims oh Sohn me kohla rehn Sises. E sansal me ira me wia pekipeko, ahpw ira doadoahngki ara nohno, Salome, en wia pekipeko. Salome ele Sises pahn nohnohki (aunt).—Md 27:55, 56; Mr 15:40, 41; Soh 19:25.
emen ni palimaun, a emen ni palimeing: Wasaht pali koaros kasalehda wahu oh pwuhng en kaunda, ahpw wasahn wahu keieu laud kin ahnsou koaros mi palimaun.—Me 110:1; Wi 7:55, 56; Ro 8:34.
nwtsty-E mehn onop kan ong Md 20:26, 28
sounpapah: De “ladu.” Paipel kin kalapw doadoahngki lepin lokaiahn Krihk di·aʹko·nos pwehn kawehwehda emen me sohte kin uhdihsang papah meteikan ni aktikitik. Lepin lokaiao kadoadoahk pwehn kawehwehda Krais (Ro 15:8), sounpapah de ladu kan en Krais (1Ko 3:5-7; Kol 1:23), sounsawas kan (Pil 1:1; 1Ti 3:8), iangahki ladun nan ihmw kan (Soh 2:5, 9) oh tohndoadoahk en koperment kan (Ro 13:4).
Raparapahki Soahng Kesempwal kan Sang Mahsen en Koht
(Madiu 21:9, NW) Oh pokon me tieng mwowe oh pil irail ko me ideidawehn ih wie weriwer ndinda: “Komw kalahngan ketin doarehla Nein Depit! Meid pai me ketido ni mwaren Siohwa! Komw kalahngan ketin doarehla ih, komwi me ketiket wasa ileile!”
nwtsty-E mehn onop ong Md 21:9, NW
Kalahngan ketin doarehla: Ni lokaiahn Krihk, “Hosanna.” Lepin lokaiahn Krihk wet kohsang lokaiahn Ipru ehu me wehwehki “doarehla, se kapakapki” de “doarehla, menlau.” Wasaht lepin lokaia wet kadoadoahk ong pekipek ehu ong Koht ong komourala de kana; e pil kak kawehwehdi “menlau, ketikihda komour ong.” Kedekedeo, e wiahla lepin lokaia ong kapakap oh kaping. Lepin lokaiahn Ipruwo me dierek nan Me 118:25, wia kisehn Melkahkahn Hallel me re kin kalapw koulki erein ahnsoun Pahsohpa. Ihme kahrehda, lepin lokaia pwukat mwadangete kohda nan arail madamadau nan erein ahnsou wet. Ehu ahl me Koht ketin sapengala kapakap wet iei ni eh ketin kaiasada Sises sang mehla. Nan Md 21:42, pein Sises ketin mahsanih dahme kileldi nan Me 118:22, 23 oh doadoahngki pwehn kasalehda Mesaia.
Nein Depit: Koasoi wet kasalehda ar pohnese peneinei me Sises kohsang ie oh sapwellime pwukoa nin duwen Mesaia me inoupe mie.
jy-E 244 par. 4-6
Tuhke Pik Ehu Kadoadoahk Pwehn Padahngki Iren Mehn Kasukuhl Duwen Pwoson
Ahpw dahme kahrehda Sises ketin kahrehiong tuhkeo en mengila? E ketin kasalehda kahrepeo ni eh mahsanih: “Kumwail en ese pwe ma kumwail pahn kin pwoson oh sohte peikasal, kumwail kak wiahda soahng me I wiahiong tuhke pwoatet; a kaidehkte met, pwe kumwail pil kak ndaiong nahna wet, ‘Keiweisang men oh pein keseiukowohng nansed,’ eri, e pahn pweida. Pwe ma mie amwail pwoson, kumwail pahn ale mehkoaros me kumwail pahn kin peki nan amwail kapakap akan.” (Madiu 21:21, 22) E ketin pwurehng kasalehda ireo me e mahsanih mwoweo duwen pwoson eh kak kamwakid nahna pwoat.—Madiu 17:20.
Eri sang ni eh ketin kahrehiong tuhkeo en mengila, Sises ketikihda iren mehn kasukuhl ehu ong anahn en pwoson Koht. E mahsanih: “Mehkoaros me kumwail pahn peki nan amwail kapakap akan, kumwail pwoson me kumwail pahn ale, e ahpw pahn pweiong kumwail.” (Mark 11:24) Met wia mehn kasukuhl kesempwal ehu ong sapwellimen Sises tohnpadahk kan koaros! E uhdahn konehng wahnpoaron ko, pwehki kahpwal kan me re pahn lelohng ni ahnsou keren. Ahpw pil mie ehu mehkot me kadokepene nanpwungen tuhke pik me mengilao oh irair en pwoson.
Duwehte tuhke piko, wehin Israel ahneki mwekid widing ehu. Aramas en wehi wet mi nan inou lap ehu rehn Koht, oh irail kakete mwomwehda me re kin idawehn sapwellime Kosonnedo. Ahpw, wehio pwon kasalehda me re sohte pwoson oh sohte kin kapwarehda wah mwahu. Irail pil soikala sapwellimen Koht Ohlo! Kahrehda, ni eh ketin kahrehiong tuhke piko en mengila, Sises ketin kasalehda ia pahn imwilahn wehi wet me sohte wah oh sohte pwoson.
March 12-18
SOAHNG KESEMPWAL KAN SANG MAHSEN EN KOHT | MADIU 22-23
“Peikiong Kehkehlik Keieu Kesempwal Riauo”
nwtsty-E mehn onop ong Md 22:37
mohngiong: Ni lepin lokaia wet eh kin kadoadoahk ong ni karasaras, e kin wehwehki mas loalen aramas. Ahpw ni eh mahsanih duwen “mohngiong” iangahki “mour” oh “lamalam,” e kin pidadahte en aramas emen eh pepehm kan oh ineng kan. Lepin lokaia siluh me kadoadoahk wasaht (mohngiong, mour, oh lamalam) sohte wekpeseng douluhl; re kin dokpene oh kasansalehda ahl me keieu kehlail oh anahn en poakohng Koht ni unsek.
mour: De “mour unsek.”
lamalam: Me iei, koahiek en madamadau. Aramas emen anahne doadoahngki eh madamadau pwehn esehla Koht oh kalaudehla eh poakohng ih. (Soh 17:3; Ro 12:1) Lepin lokaia pwukat kohsang Deu 6:5, oh ni lokaiahn Ipru, iren Paipel wet doadoahngki lepin lokaia siluh, ‘mohngiong, mour, oh kehl.’ Ahpw, nan pwuhken Madiu ni lokaiahn Krihk, lepin lokaia “lamalam” me kadoadoahk a kaidehn “kehl.” Ele mwein mie kahrepe kei me kahrehda ar doadoahngki lepin lokaia kan wekpeseng. Keieu, mendahki palien Paipel en Ipru mahso sohte uhdahn lepin lokaia ong “lamalam,” wehwehn lepin lokaia wet kin kalapw pwarada ni lokaiahn Ipru ong “mohngiong.” Ma lepin lokaia wet kin kadoadoahk ong karasaras e kin wehwehki mas loalen aramas, iangahki eh madamadau, pepehm kan, wiewia kan, oh kahrepen eh wiewia kan. (Deu 29:4; Me 26:2; 64:6; kilang mehn onop me pid duwen mohngiong nan iretikitik wet.) Pwehki kahrepe wet, wasa me palien Paipel ni lokaiahn Ipru doadoahngki lepin lokaia “mohngiong,” Septuagint en Krihk kalapw doadoahngki lepin lokaia me wehwehki “lamalam.” (Sen 8:21; 17:17; Lep 2:10; Ais 14:13) Ele pil ehu kahrepe me kahrehda Madiu doadoahngki lepin lokaiahn Krihk ong “lamalam” a kaidehn “kehl” ni eh koasoia duwen Deu 6:5, iei pwehki lepin lokaiahn Ipru me kawehwehdi “kehl” kak wehwehki kehl en paliwar oh koahiek en madamadau de loalokong. Sohte lipilipil mehnia me pwung, madamadau pwukat me kin dokpene nanpwungen lepin lokaiahn Ipru oh Krihk ele kak sawas en kawehwehda dahme kahrehda sounnting en Rongamwahu ko sohte doadoahngki lepin lokaiakohte ni ar doadoahngki ire kan sang Deuderonomi.
nwtsty-E mehn onop Md 22:39
Me keriaun: Nan Md 22:37, en Sises ketin sapengala Parisio kileldi, ahpw met Sises ketin daulih keieun peideko oh mahsanih keriaun kehkehliko (Lip 19:18), e padahngki me kehkehlik riauo uhdahn dokpene oh me mouren Kosonnedo pwon oh padahk en Soukohp ko kin poahsoandahsang kehkehlik ko.—Md 22:40.
mehn mpomw: Lepin lokaiahn Krihk wet ong “mpomw” (lokaiahn krihk, “emen me keren”) pil kak wehwehki laudsang irail kan me kin mi karanih iuk. E kak wehwehki ong irail kan me kin pehsepene.—Lu 10:29-37; Ro 13:8-10.
nwtsty-E mehn onop ong Md 22:40
Kosonnedo . . . Soukohp ako: “Kosonnedo” kin wehwehki pwuhken Paipel sang Senesis lel Deuderonomi. “Soukohp ako” kin wehwehki pwuhken kokohp en Palien Paipel ni Lokaiahn Ipru. Ahpw, ni lepin lokaia pwukat ar kin wiahkintehieu pwarada, ira kak pidada Palien Paipel ni Lokaiahn Ipru pwon.—Md 7:12; 22:40; Lu 16:16.
poahsoanen: Lepin lokaia wet ni lokaiahn Krihk uhdahn wehwehki “en kolokolete,” oh wasaht e kin kadoadoahk ni karasaras me wehwehki “en poahsoanda sang; en poahsoankihda.” Ihme kahrehda Sises mahsanih me kaidehn ihte Kosonned en Kehkehlik Eiseko ahpw Palien Paipel ni Lokaiahn Ipru pwon poahsoankihda limpoak.—Ro 13:9.
Raparapahki Soahng Kesempwal kan Sang Mahsen en Koht
nwtsty-E mehn onop ong Md 22:21
kihong Sihsar dahme en Sihsar: Sapwellimen Sises pasapeng wet, oh pil koasoi riau me pahrekpene nan Mr 12:17 oh Lu 20:25, iei ihte wasa me sapwellime mahsen me pid kaunen wehin Rom ntingdi. Soahng kan me “en Sihsar” duwehte pwain pweinen doadoahk en koperment oh kasalehda wahu oh uhpah me konehng kowohng irail me ahneki pwuhng en kaun.—Ro 13:1-7.
A ong Koht mehkan me sapwellimen Koht: Met kin pidada en aramas emen kaudok ni mohngiong unsek, limpoak en mour unsek, oh peik ni loalopwoat unsek.—Md 4:10; 22:37, 38; Wi 5:29; Ro 14:8.
nwtsty-E mehn onop ong Md 23:24
kihsang kisin amwin wel kis ahpw kin kadallehla kamel men: Mehn Israel kan ese me amwin wel kis oh kamel iang kisehn mahn me keieu tikitik oh keieu lapala me samin. (Lip 11:4, 21-24) Sises ketin doadoahngki lokaiahn karasaras ni eh mahsanih me kaunen pelien lamalam ko sihpihda nimarail kan pwe re de saminla ong kaudok sang amwin wel men, ahpw re kin uhdahn pohnsehsehla soahng kesempwal kan en Kosonnedo, wiewia ehu me duwehte kadallehla kamel men.
March 19-25
SOAHNG KESEMPWAL KAN SANG MAHSEN EN KOHT | MADIU 24
“Pepehd Erein Imwin Rahn akan”
it-2-E 279 par. 6
Limpoak
En Emen Limpoak Kak Loula. Ni Sises Krais eh mahsanihong sapwellime tohnpadahk ko duwen soahng kan me mi mwohrail, e ketin kasalehda me limpoak (a·gaʹpe) en me tohto me kin kose me re pwoson Koht pahn loula. (Md 24:3, 12) Wahnpoaron Pohl koasoia duwen met, me pahn wia kasalepen ahnsou apwal akan me pahn kohdo, me aramas akan pahn “poakohng mwohni.” (2Ti 3:1, 2, NW) Ihme kahrehda, e sansal, me aramas emen kak sohla tehk ire mehlel pwung kan oh limpoak mehlel me e tepin ahnekio kak sohrala. Met kasansalehda kesempwalpen en kaukaule kapwaiada oh kakairada limpoak sang doudouloale Mahsen Koht oh kaiahnehki emen en mour pahrekiong sapwellime kaweid kan oh ire mehlel kan.—Ep 4:15, 22-24.
Ke Kin Kapwaiada Ahmw Pwukoah Koaros Ong Koht?
5 Sises Krais mahsanih duwen ahnsou apwal akan: “Ketidohn Nein-Aramas pahn duwehte me wiawiher ni mwehin Nohao. Pwe nin duwen aramas ako ar pereperen kamakamadipw ni rahn ako mwohn nohlik lapalapo, ohl oh lih akan wiewia pwopwoud lao lel rahn me Noha pedolong nan warihmwo; re ahpw sasairki nohliko, e lao komwopwirailla koaruhsie; ih duwen me pahn wiawi, ni ahnsou me Nein-Aramas pahn pwarodo.” (Madiu 24:37-39) Kaidehn mehkot sapwung en kamakamadipw ni toupahrek, oh pwopwoud iei koasoandi ehu me Koht pein koasoanehdi ong aramas akan. (Senesis 2:20-24) Ahpw, ma kitail pahn kilang me kitail kin keieu mwohniki anahn akan en sampah, e soh konehng kitail en peki sawas ni kapakap? Siohwa kak sewese kitail en rapahki mahs Wehio, wia dahme pwung, oh kapwaiada atail pwukoah ong Koht.—Madiu 6:33; Rom 12:12; 2 Korint 13:7.
jy-E 259 par. 5
Wahnpoaron ko Peki Kilel Ehu
E mahsanih me sapwellime tohnpadahk ko pahn anahne tetehk, mwasamwasahn, oh onohnop. Sises ketin kasalehda kesempwalpen met ni eh doadoahngki pil ehu karasaras: “Kumwail en ese pwe ma kaunen peneinei ehu pahn ese ahnsou de awa me lipirap emen pahn kodohn pirap nan imwe, e sohte pahn meirla, pwe e pahn pepehd oh mwasamwasahn pwe lipirapo de kohdo wehdpeseng imweo. Iei me kumwail en pil onohnop ahnsou koaros, pwe Nein-Aramas pahn ketido ni awa me kumwail pahn sasairki.”—Madiu 24:43, 44.
Raparapahki Soahng Kesempwal kan Sang Mahsen en Koht
nwtsty-E mehn onop ong Md 24:8
medek en neitik: Lepin lokaiahn Krihk wet uhdahn wehwehki medek laud ehu erein ahnsoun neitik. E kadoadoahk wasaht pwehn wehwehki pwunod, medek oh lokolok, ele duwehte medek en neitik, kahpwal kan oh lokolok kan me kokohpdahr pahn tohtohla oh laudla oh reireila erein mwohn kahn kamakam kowahlap me sansalda nan Md 24:21.
nwtsty-E mehn onop ong Md 24:20
ni ahnsoun pou: Keteu laud, lapake, oh lemwulemwur nan wehwe erein ahnsowo pahn apwal en seiloak oh apwal en rapahkihda mwenge oh wasahn rukula.—Esr 10:9, 13.
rahnen Sapad: Nan sahpw kan duwehte Sudia, soahng kan me keinapwidi sang ni kosonned en Sapad pahn apwal ong aramas emen en seiloak reirei oh wa kepwe kan; pil, ewen kelen kahnimw kan kin ritidi erein rahnen Sapad.—Kilang Wi 1:12 oh App. B12.
March 26–April 1
SOAHNG KESEMPWAL KAN SANG MAHSEN EN KOHT | MADIU 25
“Kumwail Eri Mwasamwasahn”
Raparapahki Soahng Kesempwal kan Sang Mahsen en Koht
Utung ni Loalopwoat Irail kan me Wia Rien Krais
7 Rahnwet, kitail wehwehkihla mwahu karasaras en sihpw oh kuht ko. Kitail ese me “Nein-Aramas,” de “Nanmwarkio,” iei Sises. Irail kan me wia rien Nanmwarkio iei irail kan me keikihdi sapwellimen Koht manaman oh pahn iang Sises ketin kakaun nanleng. (Rom 8:16, 17) “Sihpw kan” oh “kuht kan” iei aramas akan sang wehi koaros. Re pahn pakadeikda kerenlahng imwin kahn kamakam kowahlapo me pahn kereniong tepida. Oh kitail ese me Sises pahn ketin kadeikada aramas akan sang ni mwomwen arail wiewia ong me keidi kan me mihmihte nin sampah. Kitail uhdahn kalahnganki me erein sounpar kan me dower powe, Siohwa kin ketin sewese kitail en wehwehkihla karasaras wet oh karasaras teikan nan Madiu irelaud 24 oh 25!
“Kumwail Iei Kompoakepahi”
16 Ma ke kin koapworopworki en mour nin sampah pahn kaundahn sapwellimen Koht Wehio, ia duwen omw kak kasalehda omw kompoakepahnki rien Krais kan? Kitail pahn tehk ahl siluh. Keieu, sang ni atail iang doadoahk en kalohk ni mohngiong unsek. Krais kehkehlikihong rie kan en kalohki rongamwahwo nin sampah pwon. (Mad. 24:14) Ahpw, e pahn apwal ong rien Krais kan me luwehdi nin sampah rahnwet en kapwaiada pwukoa wet ma sohte sawas sang iengerail sihpw teikan. Ni mehlel, ehuehu ahnsou me emen kisehn sihpw teikan kin iang wia doadoahk en kalohk, e kin sewese rien Krais kan kapwaiada kehkehlik kesempwal wet. Krais oh pwihn en ladu lelepek oh loalokong kin kalahnganki mehlel wiewia wet pwehn kasalehda atail kompoakepahnki irail.
17 Keriau en ahl me sihpw teikan kan kak sewese rien Krais kan iei sang ni arail kihda sawas en mwohni pwehn utungada doadoahk en kalohk. Sises ketin kangoange irail kan me kin idawehn ih en wiahda kompoakparail sang arail “dipwisoun sampah kan.” (Luk 16:9) Met sohte wehwehki me kitail kak pwain Sises oh Siohwa en ketin wiahla kompoakepatail. Ahpw, ni atail doadoahngki atail dipwisou kan pwehn utungada sapwellimen Siohwa Wehio oh doadoahk en mwomwohdiso kan nan sampah, kitail kin kadehdehda atail limpoak oh me kitail kompoakepahnki ira, kaidehn ni lokaiahte ahpw “ni atail wiewia kan” oh mehlel. (1 Sohn 3:16-18) Kitail kin kihda soangen sawas en mwohni ni atail kin iang doadoahk en kalohk, duwehte pwainda kahs ape. Kitail pil kin toukihda sawas en mwohni ong doadoahk en kauwada oh apwalih atail wasahn kaudok, oh ong doadoahk en kalohk me kin wiawi nin sampah pwon. Mehnda ma atail sawas kin tikitik de laud, Siohwa oh Sises kin ketin kalahnganki mehlel atail perenki kihkihwei.—2 Kor. 9:7.
18 Kesiluh en ahl me kitail koaros kin kadehde me kitail kompoakepahn Krais iei sang ni atail kapwaiada kaweid en elder kan nan mwomwohdiso. Krais ketin idihada ohl pwukat ni eh ketin doadoahngki sapwellimen Koht manaman. (Ep. 5:23) Wahnpoaron Pohl ntingihdi: “Kumwail peikiong amwail sounkaweid akan oh kapwaiada ar kosonned kan.” (Ipru 13:17) Ekei pak, kitail kin diarada me e apwal en peikiong kaweid kan en Paipel me elder kan kihong kitail. Ele kitail ese duwen arail soh unsek kan oh met kak kahrehiong kitail en kilangwohng arail kaweid ni ahl sapwung. Ahpw Krais, me wia tapwin mwomwohdiso, kin kupwurki doadoahngki ohl soh unsek pwukat. Eri, mwomwen atail mwekidki manaman me re ahneki kin pidada atail kompoakepahnki Krais. Ni atail kin pohnsehsehla sapwung kan en elder kan oh perenki idawehn arail koasoandi kan, kitail kin kadehdehda atail limpoak ong Krais.