Iren Sawas kan ong Doaropwehn Kasukuhl ong Mihting en Mour oh Kalohk
January 4-10
SOAHNG KESEMPWAL KAN SANG MAHSEN EN KOHT | LIPAI 18-19
“Kolokol Tiahk Mwakelekel”
Ia Duwen Atail Kak Pere Kitail Sang Ehu Ahn Sehdan Lidip
Siohwa ketin mahsanihong mehn Israel ko duwen tiahk samin kan me wehi kan me kapilpene irail kin wia: “Kumwail dehr idawehn tiahk en . . . mehn Kenan kan, wasa I kahkahreikumwaillahng ie. . . . Ar tiahk kan kasaminelahr sapwarailo, iei me KAUN-O ketin kalokalokehki sahpwo.” Ong Koht sarawien Israel, mour en mehn Kenan kan uhdahn kasaut me kahrehda sapw me irail kousoan ie pil samin.—Lip. 18:3, 25.
Siohwa Kin Ketin Kahluwa Sapwellime kan
Kaun en wehi teikan kin ale kaweid sang aramas akan me arail erpit sohte unsek. Karasepe, kaunen mehn Kenan ko oh neirail aramas akan kin wia soahng suwed kan, me pil iangahki ngengngersuwed, ohl mwahuki ohl de lih mwahuki lih, eng rehn mahn akan, meirongkihla neirail seri, oh kaudokiong dikedik kan. (Lip. 18:6, 21-25) Oh kaunen Papilon oh Isip kan pil sohte ahneki kosonned me pid mwakelekel duwehte me sapwellimen Koht aramas akan ahneki. (Nemp. 19:13) Ahpw, sapwellimen Koht aramas akan kak kilang ia duwen arail kaun lelepek kan ar kin kangoange irail en kolokolete arail kaudok en kin mwakelekel, paliwararail en kin mwakelekel, oh soikala tiahk samin me pid wia nsenen pwopwoud. E sansal me Siohwa kin ketin kahluwa irail.
Dahme Koht Pahn Ketin Wiahiong me Suwed kan
Ia duwen irail kan me keptakaila oh sohte wekidala arail wiewia kan ahpw ngihtehtehki wiewia me suwed? Medewehla inou mehlel wet: “Aramas pwung—aramas lelepek—pahn kousoan nan sahpw wet.” (Lepin Padahk 2:21, 22) Solahr pahn mie manaman en aramas suwed kan. Nan soangen koasoandi meleilei wet, aramas peik kan pahn ekisekis saledekla sang irair en soh unsek me re sohsohki.—Rom 6:17, 18; 8:21.
Ire Kesempwal kan
“Ia Uwen Ei Poakohng Sapwellimomwi Kosonnedo!”
Keriaun pali en Kosonned en Moses me kin kasalehda duwen sapwellimen Koht nsenohki mour en sapwellime aramas akan iei pwung en ale luhwen wahnsahpw akan. Siohwa koasoanehdi me ni mehn Israel men pahn dolung wahn sapwe sang nan ah mwaht, irail kan me paisuwed pahn mweimweiong en rikpene dahme irail soundondol kan luhwehkihdi. Soumwet kan sohte pahn pelehsang wahnsahpw akan me mih ni keilen arail mwaht akan, oh re sohte pahn rikpene luhwen kreip de olip kan. Irail sohte kak rikida kapakap en krein kan me soundondol kan manokehla oh kihdihte nan mwahto. Met wia koasoandi limpoak ehu ohng aramas paisuwed kan, irail mehn liki kan, me sepwoupwou kan, oh liohdi kan. Ni mehlel, en rikpene luhwen wahnsahpw kan kin wia doadoahk laud, ahpw sang ni koasoandi wet, irail sohte anahne pekipek.—Lipai 19:9, 10; Deuderonomi 24:19-22; Melkahka 37:25.
January 11-17
SOAHNG KESEMPWAL KAN SANG MAHSEN EN KOHT | LIPAI 20-21
“Siohwa Ketin Katohrehla Sapwellime Aramas akan”
Paradais—ong Komwi?
Ahpw, mie mehkot me kitail sohte kak pohnsehsehla. Koht mahsanih ong mehn Israel akan: “Kumwail kapwaiada mehkoaros me I koasoanehdiong kumwail rahnwet. Kumwail eri pahn kak kotehla pillapo oh sapwenikihla sahpw me kumwail nektehn pedolong loale.” (Deuderonomi 11:8) Nan Lipai 20:22, 24, (NW) e koasoia sahpwohte: “Kumwail aramas akan en uhdahn kapwaiada ai kosonned akan koaros oh ai kopwung kan koaros oh kapwaiada, pwe sahpwo me I pahn wahdohng kumwail en kousoan loale en dehpa mwuhs kin kumwailla. Kahrehda I ndahiong kumwail: ‘Kumwail, amwail pwukoa, en sapwenkihla pwehlen wasa pwukat oh ngehi ai pwukoa en kihong kumwail en sapwenkihla, sahpw ehu me milik oh sukehn loangalap wie wudwudek.’” Ei, sapwenkihla Sapwen Inouo kin poasoankihda ma aramas kin ahneki nanpwungmwahu ong Siohwa Koht. Met pwehki mehn Israel akan sohte peikiong ih kahrehda Koht ketin mweidong mehn Papilon akan en kalowehiraildi oh wahirailahsang nan arail wasahn kousoan.
it-1-E 1199
Sohso
Sahpw sohte lipilipil me kohsang rehn aramas me sapweniki sahpwo eh mehla pahn kolahng me ahneki pwuhng nin duwen kadaudoke de irail me ahneki pwuhng en sapwenikihla; mehkot me kohsang rehn samarail mehn mahs kan de nin duwen sohso. Ire kesempwal en lokaiahn Ipru me kadoadoahk pid lepin lokaia (verb) na·chalʹ (noun, na·chalahʹ). Met kin pidada en ale de kihla sohso ehu de sapwen sohso, met kin kalapw wiawi sang sohso kan me re ale. (Nem 26:55; Ese 46:18) Verb ya·rashʹ kin kadoadoahk ekei pak oh kin wehwehki ‘pahn ale sohso,’ ahpw e kin kalapw wehwehki, “sapwenikihla” me weksang emen me pahn alehdi sohso. (Sen 15:3; Lip 20:24) E pil kin wehwehki “kihsang; kasarehla,” me pidada dahme sounpei kan kin wia. (Deu 2:12; 31:3, NW) Lokaiahn Krihs kan me kin pidada sohso kin pahrekiong lepin lokaia kleʹros, me uhdahno wehwehki “usuhs” ahpw uhd wehwehki “iang ahneki” oh met wehwehki “sohso.”—Md 27:35; Wi 1:17; 26:18, NW.
it-1-E 317 par. 2
Menpihr kan
Mwurin Nohliko, Noha kihda “menpihr mwakelekel” kei iangahki mahn akan nin duwen meirong ehu. (Sen 8:18-20) Mwurin mwo Koht ahpw ketin mweidada menpihr kan en kapatapatong nan kenen aramas akan mwenge, ihte ma re sohte pahn tungoale ntao. (Sen 9:1-4; pil kilang Lip 7:26; 17:13.) ‘Mwakelekel’ en ekei menpihr kan ahnsowo kasalehda ni sansal duwen ekei me mweimweiong meirongala; Paipel kasalehda, me ma mepwukat pahn wia mwenge kei, sohte ehu rehn menpihr kan “samin” lao lel ahnsou me Kosonned en Moseso kohda. (Lip 11:13-19, 46, 47; 20:25; Deu 14:11-20) Menpihr kan me kileldi ong kasarawi kan me “samin” sohte kasansalda mwahu nan Paipel. Ahpw, mendahki pali laud en me kileldi ko iei menpihr kan me kin kang uduk de me kin kohkohseli raparapahki mehkot, kaidehn irail koaros samin. (Kilang HOOPOE.) Kehkehlik keinepwi wet sohla manaman ahnsou me inou kapwo wiawihda, ni Koht eh ketin kasansalehiong Piter nan kaudiahl ehu.—Wi 10:9-15.
Ire Kesempwal kan
it-1-E 563
Lek kan
Ni oaritik Kosonned en Koht keinapwihdi leke uduk en paliwar kan pwehki me melahr kan. (Lip 19:28; 21:5; Deu 14:1) Kahrepen met iei me Israel wia pwihn en aramas sarawi ehu ong Siohwa, sapwellime aramas tohrohr kei. (Deu 14:2) Duwehte met, Israel pahn liksang soangen wiewia koaros me pidada dikedik en eni kan. Eri, en wia mwekid laud wet en mwahiei iangahki leke uduk en paliwar uhdahn sohte konehng aramas akan me uhdahn ese irair en me melahr akan iangahki koapworopwor en iasada. (Da 12:13; Ipr 11:19) Oh pil, en keinapwihdi kauwehla paliwar pahn kasalehda en mehn Israel kan ar wauneki sapwellimen Koht kepikipik, me duwehte paliweren aramas.
January 18-24
SOAHNG KESEMPWAL KAN SANG MAHSEN EN KOHT | LIPAI 22-23
“Kasarawien Pahr kan Wehweparail ong Kitail”
it-1-E 826-827
Kasarawien Keik me Sohte Doal Ihs
Tepin rahn en Kasarawien Keik me Sohte Doal Ihs wia kapokon sarawi ehu, e pil wia sapad ehu. Ni keriaun rahno, Nisan 16, kapakap en tepin wahnsahpw kan en parli, tepin wahnsahpw me mat nan Pilisdia, pahn wisikdohng samworo. Mwohn kasarawi wet sohte me pahn tungoale krein kapw, pilawa, de krein inihn me ahpwtehn dondolda. Samworo pahn patohwanda wahnsahpw pwukat ong Siohwa, ni karasaras e kamwakid kapakap en kreino kohwei kohdo, ni ahnsou me sihpw wol roson mwahu men me sounpar ehu eh meirongala nin duwen meirong isihs iangahki meirong en krein me wisekesengki leh oh meirong en wain. (Lip 23:6-14) Sohte mie kehkehlik en isik krein kan de pilawa amas sang krein ko pohn pei sarawio, me samworo kan kin wia mwuhr. Meirong en tepin wahnsahpw sohte kin wiawi ongete wehipokon de wehio ahpw koasoandi wet pil wiawihda ong ehuehu peneinei oh emenemen aramas me mie sapwe nan Israel en patohwanda eh meirong en kapingkalahngan erein ahnsoun kasarawi wet.—Eks 23:19; Deu 26:1, 2; Kilang FIRSTFRUITS.
Kesempwalpe. Tungoale keik me sohte doal ihs ni ahnsou wet pahrekiong kaweid kan me Moses alehdi sang Siohwa, nin duwen me kileldi nan Eksodus 12:14-20, me patehngete kehkehlik kesempwalo, nan iretikitik 19, (NW): “Sohte pilawa amas me karerla pahn dierek nan imwamwail kan erein rahn isuh.” Nan Deuderonomi 16:3, (NW), keik me sohte doal ihs kin adaneki “pilawahn lokolok,” oh mepwukat wia mehn kataman en ehuehu pahr ong mehn Suhs kan duwen ar mwadang mweselsang nan sapwen Isip (ni eh sohte itar ar ahnsoun doaloaiong ihs nan ar pilawa amas kan [Eks 12:34]). Eri re kin tamanda ahnsou me re lokolok oh kalidu me Israel pitsang, pil pein Siohwa ketin mahsanih, “pwe ken tamataman rahn me ke mweselsang sapwen Isip erein omw mour.” En pohnese ar saledek en ahnsowo nin duwen wehi ehu oh ar pohnesehki Siohwa nin duwen Soundoareparail uhdahn konehng mehn Israel kan ren wia keieun kasarawi laud siluh ko me re kin wia ehuehu pahr.—Deu 16:16.
it-2-E 598 par. 2
Pendekos
Mwomwen arail pahn koadoahke tepin wahn wihd me dondoldi pahn weksang tepin wahn parli kan. Eisek kis riaun pilawa amas mwahu sang wihd (4.4 L; 4 dry qt) iangahki ihs pahn umwda ni lopwon riau. Mepwukat pahn kohsang nan “amwail wasahn kousoan kan,” me wehwehki re pahn wia lopwon kei duwehte me kin wiawihda ong kenen tohnpeneinei ong ehuehu rahn a kaidehn ong doadoahk sarawi ehu. (Lip 23:17, NW) Meirong isihs kan oh meirong en dihp ehu pahn iangete met, oh nin duwen meirong en kaminimin ehu sihmpwul wol riemen. Samworo pahn kamwakid kohwei kohdo lopwon ko oh sihmpwul ko mwohn silangin Siohwa, e pahn kolada lopwon ko oh lepin sihmpwul ko oh kamwakid kohwei kohdo, kasalepen ar meirongki mepwukat mwohn silangin Siohwa. Mwurin lopwon ko oh sihmpwul ko ar meirongala, re pahn wiahla kenen samworo nin duwen meirong en kaminimin.—Lip 23:18-20.
Ke Kin Peipeiante Sapwellimen Siohwa Pwihn?
Sapwellimen Siohwa pwihn kin kangoange kitail en idawehn ahn Pohl kaweid: “Kitail nsenoh sawaspene ni kasalepen atail limpoak oh atail wiewia mwahu kan. Kitail dehr tokedihsang atail tiahk en pokonpene, duwen ekei ar kin epwehnki wia. A kitail nantihong kakehlaka nan kapehd en emenemen, pwe duwen amwail ese Rahnen Kaun-o kerendohr.” (Ipru 10:24, 25) Mehn Israel kan en mahs kin kalapw pokonpene pwehn kaudokiong Siohwa oh ale kaweid sang reh. Ehu soangen kapokon kaperen pwukat iei kasarawien impwal kan ni mwehin Nehmaia. (Eks. 23:15, 16; Neh. 8:9-18) Rahnwet, e pil kin mie mihting kan oh mihting tohrohr kan me kitail kin wia. Kitail anahne song iang towehda mihting pwukat koaros pwehki mihting pwukat kin sewese kitail en mihmi karanih Siohwa oh pil ahneki peren ni atail papah ih.—Taitus 2:2.
Ire Kesempwal kan
Kolokolete Omw Lelepek!
Ia duwen sapwellimen Koht ladu kan ar kin kasalehda lelepek? Sang arail poakohng Siohwa ni mohngiong unsek, oh met kin imwikihla arail kin ahnsou koaros kaperenda ih. Tehk ia duwen lepin lokaiao “lelepek” eh kin kadoadoahk nan ekei wasa nan Paipel. Ehu wehwehn lepin lokaia wet nan Paipel iei unsek, mwakelekel de sohte samin kis, de sohte ohla. Karasepe, mehn Israel kan kin meirongkihong Siohwa mahn kan, oh Kosonnedo nda me mahn kan en sohte samin kis rehrail. (Lip. 22:21, 22) Sohte mweimwei sapwellimen Koht aramas akan en meirongki mahn emen me nehtuk, sohte apali salenge, de apali mese; oh re sohte kak meirongki mahn emen me soumwahu. E kesempwal ong Siohwa me mahno pahn unsek, mwakelekel de sohte ohla. (Mal. 1:6-9) Kitail kak wehwehki dahme kahrehda Siohwa ketin nsenohki duwen unsek de sohte ohla. Ni atail kin pwainda mehkot, mehnda ma wahn tuhke, pwuhk, de dipwisoun doadoahk ehu, kitail sohte men ale ehu me mie pwoar laud de ekei wasa sohte mie ni dipwisowo. Kitail mwahuki ehu me unsek, mwakelekel de sohte ohla. Siohwa pil ketin sapwellimanki madamadauohte ong atail limpoakohng ih oh atail loalopwoat. Atail lelepek anahne unsek, mwakelekel de sohte ohla.
January 25-31
SOAHNG KESEMPWAL KAN SANG MAHSEN EN KOHT | LIPAI 24-25
“Pahr en Supilih oh Saledekla Ahnsou Kohkohdo”
it-1-E 871
Saledek
Koht en Saledek. Siohwa iei Koht en saledek. E ketin kapitala wehin Israel sang ar sensel nan Isip. E ketin mahsanihong irail me erein ar pahn kin peikiong sapwellime kehkehlik kan re pahn ahneki saledek. (Deu 15:4, 5) Depit koasoia duwen “saledeksang perki mehkot” nan imwen doulik en Serusalem kan. (Me 122:6, 7, NW) Ahpw, Kosonnedo koasoanehdi me ma aramas emen semwehmwehla e kak netikihla pein ih nin duwen lidu men pwe en kak apwalihala en ih oh eh peneinei anahn akan. Ahpw sang ni Kosonnedo, mehn Ipru menet pahn saledekla ni keisuhwen sounpar me e wie papahki. (Eks 21:2) Ni supiliho (me kin wiawi sounpar 50 koaros), saledek pahn kohda nan sahpwo, ong towe kan koaros. Lidu en Ipru koaros pahn saledekla, oh emenemen pahn pwuralahng sapwe.—Lip 25:10-19.
it-1-E 1200 par. 2
Sohso
Pwehki peneinei kin sapwanekihte sahpw ehu erein dih kan, sahpwo sohte kak netila kohkohlahte. Ni mehlel, netilahn sahpw, kin wiawi ihte pwehki wahnsahpw kan me sahpwo kin kapwarehda, pweinen netilahn sahpwo kin mi ni uwen erein sounpar kan lao lel Supilih me pahn wiawi mwuhr, ih ni ahnsowo me sahpw koaros pahn kapwurupwuriong me uhdahn sapweniki sahpwo ma sahpwo saik pweipweida sapahl de kapwurupwurla mwohn Supilih. (Lip 25:13, 15, 23, 24) Koasoandi wet pil pidada ihmw kan me sohte mi nan kahnimw kelpene kan, me wia kisehn wasa mohs kan. A duwen ihmw ehu me mi nan kahnimw kelpene, pwuhng en pwainda sapahl pahn manamante erein sounpar ehu sang ahnsowo me ihmwo netila, ni ahnsowo ihmwo pahn wiahla imwen aramas me pwaindao. A me pid ihmw kan me mi nan kahnimw en mehn Lipai kan, re pahn ahneki pwuhng en pwainda sapahl ihmw pwukat kohkohlahte pwehki mehn Lipai kan sohte iang sohsohki sahpw.—Lip 25:29-34.
it-2-E 122-123
Supilih
Ni ar kin peikiong Kosonned en Supilih, met kin doarehla tohnwehio ren dehr nsensuwedla duwehla sahpw tohto me kitail kin kilang rahnpwukat, me kitail kin kilang pwihn riau, me uhdahn kepwehpwe oh me uhdahn semwehmwe. Kamwahu kan ong emenemen aramas kin kakehlaka wehio, pwe sohte emen rehrail pahn paisuwedla oh luwetkihla ar sohte kak wiahda mehkot pwehki kahpwal en mwohni, ahpw irail koaros kak sawaskihda arail koahiek kan ong kamwahupen wehio. Ni Siohwa eh kin ketin kapaia wahn sahpwo oh ketikihda kasukuhl, oh ni Israel ar kin peik, re pahn paiekihda koperment unsek oh pweida mwahu me kaundahn Koht kelehpw kak ketikihda.—Ais 33:22.
Ire Kesempwal kan
w09-E 9/1 22 par. 4
Ma Ke Nsensuwedida
Ma mehn Israel men peiong ienge mehn Israel men oh kihsang pwoaren mese, Kosonnedo mweidada kalokolok me pwung pahrek. Ahpw, kaidehn aramas me lelohng kahpwalo de emen kisehn eh peneinei me pahn kaloke aramas me wiahda sapwungo. Kosonnedo nda me re pahn wahla kahpwal wet rehn irail me ahneki manaman kan—sounkopwung kan me pilipilda—ong kopwung me konehng. Pwehki me sapwungo eh nsenki wia met de eh wiewia lemei ong aramas emen, e kak ale soangen kalokolok ehu me pahn wia mehn kasukuhl kehlail ehu. Ahpw e pil pidada laudsang met.
February 1-7
SOAHNG KESEMPWAL KAN SANG MAHSEN EN KOHT | LIPAI 26-27
“Ia Duwen Omw Pahn Alehdi Sapwellimen Siohwa Kapai”
Soikala Mehkan me “Sohte Katepe”
Iaduwen “kepwehn sampah kan” kak wiahla koht emen? Karasepe, medewehla duwen takai ehu me mihmihseli nan mohs nan Israel en kawao. Takaio kak kadoadoahk ong wia ihmw de kehl. Ahpw ni pali teio, ma takaio pahn kadoadoahk ong wia “uhr takai” de “takai sukusukda,” eri takaio kak kahrehiong sapwellimen Siohwa aramas akan nan dihp. (Lip. 26:1) Duwehte met, kitail anahne mwohni oh mie ahl me konehng en doadoahngki mwohni. Kitail anahne mwohni pwehn momour, oh kitail kak doadoahngki mwohni ni pwung ong papah Siohwa. (Ekl. 7:12; Luk 16:9) Ahpw iaduwen ma kitail pahn mwohneki raparapahki mwohni sang atail doadoahk en Kristian, eri mwohni pahn wiahla atail koht. (Wadek 1 Timoty 6:9, 10.) Nan sampah wet, aramas tohto kin nohn kesempwaliki en alehdi kepwe kan, kahrehda kitail anahne tehk kanahieng ma kitail kin ahneki madamadau toupahrek me pid duwen ire wet.—1 Tim. 6:17-19.
it-1-E 223 par. 3
Lemmwin
Pwehki mwomwen Siohwa eh ketin doadoahngki Moses oh sapwellime wiewia kan ong ih, Moses kasalehda eh lemmwin mehlel (Lokaiahn Ipru, moh·raʼʹ) mwohn mesen sapwellimen Koht aramas akan. (Deu 34:10, 12; Eks 19:9) Irail me ahneki pwoson lemmwiki mehlel en Moses manaman. Re esehda me Koht kin ketin mahsen sang ih. Me pid sapwellimen Siohwa wasa sarawio, mehn Israel kan pil pahn lemmwiki. (Lip 19:30; 26:2) Met wehwehki re pahn kasalehda soangen lemmwin ehu ong wasa sarawio, ni ar kin wia soangen kaudok me Siohwa kin ketin kaweidki oh arail wiewia en pahrekiong sapwellime kehkehlik kan koaros.
w91-E 3/1 17 par. 10
“Sapwellimen Koht Popohl” en Pere Omw Mohngiong
Siohwa ketin mahsanihong wehio: “Ma kumwail pahn kin momourki ei kosonned akan oh kapwaiada ei koasoandi kan, I pahn kin kadaridiong kumwail keteu ni ahnsou mwahu, pwe sapwamwail kan en kin kihda wahnsahpw mwahu oh en kin mie wahntuhke kan. I pahn kihong kumwail popohl nan sapwamwail, kumwail pahn kin memeir oh sohte masak mehmen. I pahn karawansang nan sapwamwail kan mahn keper kan oh sohla mahwen pahn wiawi wasao. I pahn kin ieiang kumwail, I pahn wiahla amwail Koht, oh kumwail pahn wiahla nei aramas.” (Lipai 26:3, 4, 6, 12) Israel kak nsenamwahuki popohl ni ar sohte perki mehkot sang ar imwintihti kan, ahneki kepwe tohto oh ahneki nanpwungmwahu keren rehn Siohwa. Ahpw met pahn wiawi ihte ma re kapwaiada sapwellimen Siohwa Kosonnedo.—Melkahka 119:165.
Ire Kesempwal kan
it-2-E 617
Soumwahu Lusulus
Pahn Wiawi Pwehki Kesehla Kosonned en Koht. Wehin Israel alehdi kehkehlik me ma re kahng kolokol ar inou lap rehn Koht met pahn imwikihla eh pahn ketin ‘kadarala soumwahu lusulus nanpwungarail.’ (Lip 26:14-16, 23-25; Deu 28:15, 21, 22) Nan Paipel pwon, roson mwahu, sohte lipilipil ma ni paliwar de nanpwungmwahu rehn Siohwa, kin kohsang sapwellimen Koht kapai (Deu 7:12, 15; Me 103:1-3; Lep 3:1, 2, 7, 8; 4:21, 22; Kau 21:1-4), ahpw soumwahu kin kohsang dihp oh soh unsek. (Eks 15:26; Deu 28:58-61; Ais 53:4, 5; Md 9:2-6, 12; Soh 5:14) Eri e mehlel me nan ekei irair kan Siohwa Koht kin ahnsowohte oh mwadangete ketikihdo kalokolok ong aramas akan, duwehte tokutok me kowohng Miriam, Usaia oh Keasi (Nem 12:10; 2Kr 26:16-21; 2Na 5:25-27), e sansal me pali laud en ahnsou, soumwahu kan oh soumwahu lusulus kin wiawi oh sohte mehkot kak irehdi pwehki imwilahn wiewiahn dihp me aramas akan oh wehi kan kin wiahda. Re kin dolung dahme re padokedi; paliwararail kan kin lokolongki imwilahn arail wiewia sapwung kan. (Kal 6:7, 8) Me pid irail kan me kin uhd wia tiahk samin me pid wia nsenen pwopwoud, wahnpoarono koasoia me Koht “ketin mweidohng irail en wia soahng kan me kasaut oh kin kamwamwahlihala paliwararail kan . . . kin ale kalokeparail unsek me konehng arail wiewia suwed kan.”—Ro 1:24-27.
February 8-14
SOAHNG KESEMPWAL KAN SANG MAHSEN EN KOHT | NEMPE 1-2
“Siohwa Kin Ketin Koasoanehdi Sapwellime Aramas”
w94-E 12/1 9 par. 4
Wasa Pwung ong Sapwellimen Siohwa Kaudok nan Atail Mour
Ma ke mi powe duwehte menpihr kan oh kilengdiong kahnimpwal en mehn Israel kan nan sapwtehno, dahme ke pahn kilang? Impwal tohto ahpw soandi mwahu, impwal kan me irek kohwei me ele aramas silirar de tohtohsang kin mi loale, re nehnehpeseng koasoansoandi ni keinek siluh sallahng paliepeng, palieir, palimese oh palikapi. Ma ke pahn tehk kanahieng, ke pahn pil tehkada me mie pil ehu pwihn me mi karanih nanwerengen kahnimpwalo. Mwutumwut en impwal tikitik pahieu pwukat iei imwen peneinei en keinek en Lipai kan. Nanwerengen kahnimpwalo, wasa me kidikidkihla likou ehu, iei mehkot tohrohr ehu me kokouda. Met iei impwal en mihtingo, de “impwalo,” me “tohndoadoahk saman” en Israel kan kauwada nin duwen sapwellimen Siohwa koasoandi.—Nempe 1:52, 53; 2:3, 10, 17, 18, 25; Eksodus 35:10.
it-1-E 397 par. 4
Kahnimpwal
Uwen laud en kahnimpwal en mehn Israel ko uhdahn kalaimwun. Nempehn ohl me kileldiong mahwen, meh 603,550, patehng lih akan oh seri kan, me mah kan oh me ahneki kahpwal en paliwar kan, mehn Lipai 22,000, oh “pokon en ekei aramas” en mehn liki kan—ele koaros patpene meh 3,000,000 de tohtohsang. (Eks 12:38, 44; Nem 3:21-34, 39) Uwen laud en wasa me tohn kahnimpwal wet pahn audehla sohte sansal; madamadau kan ong uwen laud kin wekpeseng. Ni ahnsou me kahnimpwalo kokouda palio Seriko ni Wasa Patapat en Mohap, kawehwe kasalehda me e sangete “Ped-sesimod lellahng Apel-sidem.”—Nem 33:49, NW.
Ire Kesempwal kan
it-2-E 764
Kileldi
Kileldi ehu, me iei kileldien ahd oh kadaudok nin duwen keinek oh tohnihmw. Met pidada laudsang ihte wadawad en aramas de wadek kaunen peneinei kan. Kileldien wehi kan me mi nan Paipel kin wiawi ong soangen kahrepe kei, me duwehte ong daksis, ong pwukoahn sounpei, de (ong mehn Lipai kan) pwukoahn doadoahk kan nan wasa sarawio.
February 15-21
SOAHNG KESEMPWAL KAN SANG MAHSEN EN KOHT | NEMPE 3-4
“Pwukoahn Mehn Lipai kan”
it-2-E 683 par. 3
Samworo
Pahn Inou Lap en Kosonnedo. Ni ahnsou me mehn Israel ko wia lidu kei nan Isip, Siohwa ketin kasarawihong pein ih nein mehn Israel kan mesenih pwutak koaros ni ahnsou me e ketin kemehla nein mehn Isip kan mesenih kan ni kaeisek en kalokoloko. (Eks 12:29; Nem 3:13) Mesenih pwukat wiahla sapwellimen Siohwa, re pahn wia doadoahk tohrohr kan ong ih kelehpw. Koht kakete ketin idihada mesenih ohl pwukat koaros en Israel ren wia samworo kan oh sounapwalih wasa sarawio. Ahpw, e itarohng kupwure en ale ohl kan sang keinek en Lipai kan ong doadoahk wet. Pwehki kahrepe wet e ketin mweidohng wehio ren doadoahngki ohl en Lipai kan me wiliandi mesenih ohl en keinek 12 teiko (kadaudoken nein Sosep pwutak Epraim oh Manase wadawadedi nin duwen keinek riau). Ni ahnsoun wadawad en aramas, e sansal me mesenih 273 me sohte wia kadaudok en Lipai me sang sounpwong ehu kohda, tohtohsang ohlen Lipai kan, kahrehda Koht ketin kupwurki pweipwei sapahl en sekel limau ($11) sang emenemen ohl 273, mwohnio pahn uhd kowohng Aaron oh nah pwutak kan. (Nem 3:11-16, 40-51) Mwohn koasoandi en mwohni wet eh wiawihda, Siohwa ketin katohrehlahr ohl akan sang peneinei en Aaron sang keinek en Lipai ren wiahla pwihnen samworo nan Israel.—Nem 1:1; 3:6-10.
it-2-E 241
Mehn Lipai kan
Pwukoa kan. Mehn Lipai kan wiawihkihda peneinei siluh, sang nein Lipai pwutak kan Kerson (Kersom), Kohad oh Merari. (Sen 46:11; 1Kr 6:1, 16) Ehuehu peneinei pwukat alehdi ar wasa me karanih impwal sarawio nan sapwtehno. Peneinei en Aaron me kohsang mehn Kohad kan wiahda ar impwal mwohn impwal sarawio sallahng palimese. Mehn Kohad teiko wiahda ar impwal ko sallahng palieir, mehn Kerson kan sallahng palikapi oh mehn Merari kan paliepeng. (Nem 3:23, 29, 35, 38) En mehn Lipai kan doadoahk iei en kauwada oh kapwurepene oh wa impwal sarawio. Ni ahnsou me re pahn kin keseuda, Aaron oh nah pwutak kan kin kihdihsang kahdeng me katohrepeseng Wasa Sarawio oh Wasa Sarawiheo oh pwaindi kohpwahn inowo, pei sarawi ko oh dipwisou sarawi oh mehn doadoahk teikan. Mwuri mehn Kohad kan kin wahda mepwukat. Mehn Kerson kan kin wa lepin likou kan en impwalo, pweipwei kan, kahdeng kan, kahdeng kan en wasa kelpeneo oh sahl kan en impwalo (sansal me sahl kan en impwal sarawio), oh mehn Merari kan me pwukoahki apwalih lepin uhr kan, uhr kan, poahsoan kan, metehn katenge impwalo oh sahl kan (sahl kan ong wasa kelpene me kapil impwal sarawio).—Nem 1:50, 51; 3:25, 26, 30, 31, 36, 37; 4:4-33; 7:5-9.
it-2-E 241
Mehn Lipai kan
Ni mwehin Moseso mehn Lipai men me lelehr sounpar 30 pahn kakehr ale eh pwukoa kan ni unsek, me duwehte wa impwal sarawio oh dipwisawi kan ni ahnsou me re pahn keseuda. (Nem 4:46-49) Re kak wia ekei pwukoa kan sang ni ar sounpar 25, ahpw sansal me kaidehn doadoahk laud kan, me duwehte wa impwal sarawio. (Nem 8:24) Ni mwehin Nanmwarki Depito sounparo kohdi lel sounpar 20. Kahrepe me Depit kasalehda iei me impwal sarawio (me met tehnpas sarawio wiliandi) sohla pahn anahne wisikseli. Re sohla anahne wia ar pwukoa kan ni ar lel sounpar 50. (Nem 8:25, 26; 1Kr 23:24-26; kilang AGE.) Mehn Lipai kan anahne wehwehki mwahu Kosonnedo, irail me pahn kin kalapw wadek met mwohn wehi pokon oh padahngki met rehn aramas akan.—1Kr 15:27; 2Kr 5:12; 17:7-9; Neh 8:7-9.
Ire Kesempwal kan
Ken Loalokong—Lemmwiki Koht!
Sang ni Depit ah kin alehdi sapwellimen Siohwa sawas ni ahnsou en apwal, met kin kaloalehla ah lemmwiki Koht oh kakehlailihala ah likih ih. (Melkahka 31:22-24) Ahpw, nan irair dehde siluh, ahn Depit lemmwiki Koht kin tikitikla, oh met kin kahrehdo apwal laud. Me keieu kin pidada ah koasoanehdi Sapwellimen Siohwa Kohpwahn Inouo en wisiksang Serusalem pohn kuruma ah kaidehn pohn pwopwen ohlen Lipai kan nin duwen me Kosonned en Koht kin kaweidki. Ni ahnsou me Ussa, ohl me kahluwa kuruma, parok Kohpwahn Inouo pwe en dehr pwupwudi, e mehlahte wasao, pwehki eh “sohte wauneki kohpwao.” Ei, Ussa wiahda dihp laud, ahpw ni mehlel ahn Depit sohte wauneki sapwellimen Koht Kosonned me kahrehda kahpwal laud wet. Lemmwiki Koht kin wehwehki en wia duwehte dahme e ketin koasoanehdi.—2 Samuel 6:2-9; Nempe 4:15; 7:9.
February 22-28
SOAHNG KESEMPWAL KAN SANG MAHSEN EN KOHT | NEMPE 5-6
“Ia Duwen Omw Kak Alasang Nasaraid kan?”
it-2-E 477
Nasaraid
Mie iren kaweid siluh en soahng kan me keinapwdi ong irail me wiahda inoun kahula en wia Nasaraid men: (1) Re sohte pahn nim mehn kalitopw kan; re sohte pahn pil tungoale wahn tuhkehn kreip, mehnda ma e saik mah, de e mahla, de madekeng, de pil nim pilen mepwukat, mehnda ma e kapw, katikala, de e wiahla pinike. (2) Re sohte pahn lopuk piten moangerail kan. (3) Re sohte pahn sair paliwar mehla ehu, mehnda ma kisehrail me keren men—pahpa, nohno, riarail pwutak de serepein.—Nem 6:1-7.
Inoun Kahula Tohrohr kan. Aramas me wiahda inoun kahula tohrohr wet pahn “momour nin duwen Nasaraid men [me iei, inouda, katohrohrla] ong Siohwa” a kaidehn pwe aramas en kapinga irail pwehki ar kasalehda ar ahneki mour me liksang soahng tohto. Ahpw, “e sarawi ong Siohwa erein rahn akan koaros me e wia Nasaraid men.”—Nem 6:2, 8, NW; pil kilang Sen 49:26, NW, ntp.
Ahpw, sang koasoandi kan me kowohng Nasaraid kan, mie soahng tohrohr kan me pahrekiong oh wehwe tohrohr ong kaudok en Siohwa. Duwehte samworo lapalapo, pwehki pwukoa sarawi me e ahneki, e sohte pahn sair paliwar mehla, sohte lipilipil ma kiseh keren kan, pil duwehte Nasaraid men. Pwehki ar pwukoa kesempwal kan, samworo lapalapo oh samworo teikan, sohte mweimwei ren nim wain de sakau teikan ni ar pahn wia ar pwukoa sarawi kan mwohn silangin Siohwa.—Lip 10:8-11; 21:10, 11.
Patehng met, Nasaraid men (lokaiahn Ipru, na·zirʹ) “pahn kolokolete eh sarawi ni eh pahn mweidohng pitenmoange en reireila,” kilel wet pohn moange pahn kahrehiong koaros ren mwadangete kasawihada eh wia Nasaraid sarawi men. (Nem 6:5, NW) Lepin lokaiahn Ipruwohte na·zirʹ kadoadoahk ong me pid ‘kamwakele’ kreip kan erein rahnen Sapad sarawi oh pahr en Supilih. (Lip 25:5, 11) Oh pil e kaperen en ese ire mehlelo me mete patapat kohl me mi mwohn lisoarop en samworo lapalapo, perperkihda lepin lokaia kan “Sarawi iei sapwellimen Siohwa,” e adaneki “kilel en kasarawi [lokaiahn Ipru, neʹzer, me kohsang uhdahn lepin lokaiao na·zirʹ].” (Eks 39:30, 31, NW) Pil duwehte, lisoarop en kaun de nihn me nanmwarkien Israel keidi kan kin doadoahngki pil kin adaneki neʹzer. (2Sa 1:10; 2Na 11:12; kilang CROWN; DEDICATION.) Nan mwomwohdisohn Kristian wahnpoarono koasoia me pitenmoang reirei kowohng lih a kaidehn mehn koaduhpwel ehu. Met mehn kataman ehu ong liho me eh pwukoa weksang en ohlo; e pahn anahne pohnese eh pwukoahn uhpah pahn sapwellimen Koht koasoandi. Soangen koasoandi pwukat—me iei sohte sehkasang pitenmoang (ohl kan sohte kin wia met), liksang douluhl wain iangahki anahnepen en mwakelekel oh sohte saminla—katamankihong Nasaraid men me tohrohrala, kesempwalpen en liksang soahng keinapwi kan oh uhpah ni unsek kupwuren Siohwa.—1Ko 11:2-16; kilang HAIR; HEAD COVERING; NATURE.
Ire Kesempwal kan
w05-E 1/15 30 par. 2
Peidek kan Sang Sounwadawad kan
Ahpw, Samson, wia Nasaraid men ni ehu ahl tohrohr. Mwohn ipwidien Samson, sapwellimen Siohwa tohnlengo patohwanohng eh nohno: “Mwurin noumw pwutak en eh pahn ipwidi, ke sohte pahn sehkasang pitenmoange, pwe sang rahn me e pahn ipwidi, e pahn kasarawihong Koht oh wiahla Nasaraid men. Ih me pahn tapihada doadoahk en kapitala Israel sang mehn Pilisdia kan.” (Sounkopwung 13:5) Samson sohte wiahda inoun kahula en wia Nasaraid men. E wia Nasaraid men sang ni sapwellimen Koht koasoandi, oh e wia Nasaraid men erein eh mour. Me pid keinepwi en sair paliwar mehla ehu, met sohte pidada eh irairo. Ma ei oh e sapwungala sairada paliwar mehla ehu, a ia duwen eh pahn pwurehng wiahla Nasaraid men erein eh mour me tepisang ni eh ipwidio? Eri e sansal, me kehkehlik kan ong irail me wia Nasaraid men erein arail mour kin ekis weksang irail kan me sang ni pein nsenarail toukihda pein irail ren wia Nasaraid men.