Iren Sawas kan ong Doaropwehn Kasukuhl ong Mihting en Mour oh Kalohk
JANUARY 3-9
SOAHNG KESEMPWAL KAN SANG MAHSEN EN KOHT | SOUNKOPWUNG 15-16
“Pangala Emen—Ia Uwen Eh Suwed!”
Pangala Emen—Kilelepen Imwin Rahn akan!
4 Keieun mehn kahlemeng suwed iei lih mwersuwed Dilehla me Sounkopwung Samson poakepoake. Samson men kahluwa sapwellimen Koht aramas akan ren mahweniong mehn Pilisdia. Ele kaun en mehn Pilisdia limmeno ese me Dilehla sohte kin poakohng oh loalopwoatohng Samson. Re nda me re pahn kihong ih mwohni laud ma e padahkihong irail dahme kin kihong Samson kehl laud pwe ren kak kemehla. Dilehla pwungki met pwehki eh noahrok. Ahpw mendahki e kin nantihong diarada dahme kin kihong Samson kehl, pak siluh e sohte pweida. E kin songosong “idihdek rahn koaros kahrepen eh kehlailo.” Kahrehda, “Samson eri pwangahkihda eh lidiliderehki.” Ih eri ndaiong me pitenmoange ko sohte kin seiseisang oh ma e seiseisang, e pahn sohla kehlail. Ni eh esehda met, Dilehla ekerodo emen en sehkasang pitenmoangen Samson ko ni eh wie memeir pohn neh ko. Ih eri mweidala Samson rehn eh imwintihti ko pwe ren wia dahme re mwahuki. (Sounkopwung 16:4, 5, 15-21) E inenen suwed dahme e wiao! Pwehki eh noahrok, Dilehla pangala emen me kin poakohng.
Ire Kesempwal akan Sang Nan Pwuhken Sounkopwung kan
14:16, 17; 16:16. Kapwunodehki aramas teio ki sengiseng de pek ketiket kak kauwehla nanpwungamwa.—Lepin Padahk 19:13; 21:19.
Pangala Emen—Kilelepen Imwin Rahn akan!
15 Ia duwen irail me pwopwoud kan ar kak kakehlaka arail loalopwoatohng arail pwoud? Mahsen en Koht mahsanih: “Rapahki omw peren rehn serepein [de pwutak] me ke pwoudiki” oh “dadaurete omw peren ong lih [de ohl] emen me ke poakohng.” (Lep. Pad. 5:18; Ekl. 9:9) Ni ara mahmahla, ira anahne wia soahng koaros me ira kak pwehn kolokol ara nanpwungmwahu en kehlail ni paliwar oh pepehm. Ia wehwehn met? Pwopwoud ehu anahne kerenpene sang ni ara kin kadekpene, apwalih anahn en emenemen, oh kihong ahnsou ong emenemen. Ira anahne nantihong perehla ara mouren pwopwoud oh nanpwungmwahu rehn Siohwa. Pwe ira en wia met, ira anahne onopkihpene Paipel, kaukaule doadoahkpene nan kalohk, oh kapakapkipene sapwellimen Siohwa kapai kan.
KOLOKOLETE OMW LOALOPWOATOHNG SIOHWA
16 Mie irail kan nan mwomwohdiso me wiahda dihp laud oh ale peneu kehlail “pwe irail en kak ahneki pwoson kehlail.” (Taitus 1:13) Pwehki arail wiewia kan oh sohte men koluhla, ekei anahne piskenla. Met sewese irail me kapwaiada kaiahn wet ren kamwahwihala arail nanpwungmwahu rehn Koht. (Ipru 12:11) Ia duwen ma emen omw peneinei de kompoakepahmw piskenla? Dahme kitail kin wia nan soangen irair wet pahn kasalehda ma kitail kin loalopwoatohng aramaso de Koht. Kitail anahne loalopwoatohng Siohwa. E kin ketin mahmahsanih ma kitail kin idawehn sapwellime kaweid en dehr werekiong emen me piskenla sohte lipilipil ihs ih.—Wadek 1 Korint 5:11-13.
Ire Kesempwal kan
w05 3/15 27 par. 6
Samson Kana Sang ni Sapwellimen Siohwa Kehl!
Samson kin medemedewehte eh pwukoa, iei en peiong mehn Pilisdia kan. Kahrepen eh mihmi nan imwen lihen netiki paliwaro nan Kasa iei en peiong sapwellimen Koht imwintihti kan. Samson anahne wasahn pweidi nan kahnimw en eh imwintihti ko, oh e kak diar met nan imwen lihen netiki paliwere men. Samson sohte medemedewe en wia tiahk samin. E kohkohsang ni imwen liho ni lukepen pwong oh poarehng ewen kelen kahnimwo oh uhr riau ko, oh kapaikada mepwukat kohdahla pohn kadoken nahna ehu limwahn Epron, me dohki mwail 37 samwa [60 km]. Met wiawi sang ni kupwuren Koht oh sapwellime kehl.—Sounkopwung 16:1-3.
JANUARY 10-16
SOAHNG KESEMPWAL KAN SANG MAHSEN EN KOHT | SOUNKOPWUNG 17-19
“Sapeikiong Sapwellimen Koht Kosonned Kin Imwikihla Kahpwal”
it-2 390-391
Maika
1. Ohlen Epraim men. Maika kihsang eh nohnou mwohni silper 1,100 oh e kauwehla kawaluhn Kosonned Eisek ko. (Eks 20:15) Ni ahnsou me Maika wehkada oh kapwurehdo mwohni ko, eh nohnou nda: “I pahn kasarawihong KAUN-O nei mwohni kat, pwe ei keriao de lelohng nei pwutaket. E pahn doadoahkohng ni mehn wiahda mwomwen tuhkehn dikedik en eni me pahn kidikidki silper. Eri, met I pahn kapwurehiong uhk mwohni silper kat.” Liho eri ale mwohni silper 200 oh wahla rehn sounsuk mete men, e “wiahkihda mwomwen dikedik en eni” oh sansal mete ehu, mwurin mwo mepwukat kohdiong nan imwen Maika. Maika me ahneki imwen dikedik kan, wiahda ihpod ehu oh derapim oh kihong emen nah pwutak ko en wia nah samworo. Mendahki koasoandi wet me e wiahda mwomwen pahn kawauwih Siohwa, met uhdahn sohte pwung, pwe e kauwehla kehkehlik en keinapwidi en kaudokiong dikedik en eni (Eks 20:4-6) oh sohte wauneki sapwellimen Siohwa koasoandien kaudok. (Sk 17:1-6; Deu 12:1-14) Mwuhr Maika kahrehla Sonadan nan imweo, emen kadaudok en nein Moses pwutako Kersom, pwehn wiahiong mehn Lipai pwulopwul menet en wia nah samworo. (Sk 18:4, 30) Ni sapwung, Maika nsenamwahukihla met oh nda: “Eri, met nan eh mieier nei samworo, I eseier me KAUN-O pahn ketin kupwure ie.” (Sk 17:7-13) Ahpw Sonadan kaidehn kadaudok en Aaron oh pil e sohte warohng wia pwukoahn samworo, met ahpwte kalaudehla en Maika sapwungo.—Nem 3:10.
it-2 391 par. 2
Maika
Mwurinte mwo, Maika oh ohl ekei ahpw pwakihala mehn Dan kan. Ni eh koanoairaildi oh re idek reh dahme sapwung, Maika ahpw nda: “Kumwail wahsang ei samworo oh ale koht kan me I wiahda oh kohkohla! Eri, dahme ahi me pahn luhwehdi?” Mehn Dan ko eri ndaiong Maika me ma e pahn ideidawehn irail oh akiakipwung ong irail re pahn peiong. Eri ni Maika eh kilang me mehn Dan ko kehlailsang nah pwihno e pwurala ni imweo. (Sk 18:22-26) Mwurin mwo, mehn Dan ko ahpw kauwehla oh isikala Lais, oh kauwada arail kahnimw nan sahpwo. Sonadan oh nah pwutak kan wiahla samworo kei ong mehn Dan kan, oh re koasoanehdi dikedik ko me Maika wiahda pwe ren kaudokiong, ahpw tehnpas en Koht mehlelo [impwal sarawio] mihmihte nan Sailo.—Sk 18:27-31.
Ire Kesempwal kan
Kawehwehn Paipel Ehu me Kin Kamwakid Aramas
6 Rahnwet, pil mie mehn kadehde laud me kitail anahne doadoahngki mwaren Siohwa. Kawehwehn Paipel kapw, New World Translation me wiawihda pahr 2013, kin doadoahngki mwaren Koht pak 7,216. Met wehwehki pak 6 tohtohsang kawehwehn mwoweo. Meh limau kapatapatohng pwehki mwaren Koht dierek nan Dead Sea Scroll kan me kohpeseng ni ahnsou kan me kerendo. Meh limau pwukat dierek nan 1 Samuel 2:25; 6:3; 10:26; 23:14, 16. Me kaweneuo, me mi nan pwuhken Sounkopwung 19:18, kapatapatohng pwehki ar kasawih mwahu doaropwehn mahs kan en Paipel.
JANUARY 17-23
SOAHNG KESEMPWAL KAN SANG MAHSEN EN KOHT | SOUNKOPWUNG 20-21
“Pousehlahte Kalelapak Rehn Siohwa”
w11 9/15 32 par. 2
Ke Kak Duwehte Pineas ni Ahnsou me Ke Mi nan Apwal?
Mwurin ohlen Kipea kan sang kadaudok en Pensamin ar angkehlailih oh kemehla en ohlen Lipaio pekehio, keinek teikan ahpw mahweniong mehn Pensamin kan. (Sounkopwung 20:1-11) Re kapakap oh peki sapwellimen Siohwa sawas mwohn mahweno ahpw re lohdi pak riau, sansal me tohto irail mehla. (Sounkopwung 20:14-25) Ia duwe, re pahn medewe me ar kapakap kan sohte katepe? De Siohwa uhdahn ketin kupwurki mahsanih ia duwen ar pahn mwekidki sapwung me wiawio?
w11 9/15 32 par. 4
Ke Kak Duwehte Pineas ni Ahnsou me Ke Mi nan Apwal?
Dahme kitail kak sukuhlkihsang met? Ekei kahpwal kan kin mihmihte nan mwomwohdiso mendahki en elder kan ar kin nannanti oh kapakapki sapwellimen Koht sawas. Ma met wiawi, e pahn mwahu elder kan en tamanda sapwellimen Sises mahsen ko: “Kumwail pousehlahte peki, kumwail ahpw pahn ale; kumwail pousehlahte rapahki, kumwail ahpw pahn diar; kumwail pousehlahte letelet, e ahpw pahn ritidahng kumwail.” (Luk 11:9) Mehnda ma kapakap ehu mwomwen pwand en pasapengla, sounapwalih kan kak kamehlele me Siohwa pahn ketin sapeng ni ahnsou me e ketin koasoanehdi.
Ire Kesempwal kan
w14 5/1 11 par. 4-6
Ke Kin Ese Duwen Met?
Ia duwen mehn mahs kan ar kin doadoahngki pahi nan ahnsoun mahwen?
Depit doadoahngki pahi pwehn kemehkihla kodono Kolaiad. Mweinele Depit esehla doadoahngki met ni ahnsou me e wia silepen sihpw men ni eh kisin pwutak.—1 Samuel 17:40-50.
Mie kilel en mehn Isip oh Asiria kan ni mwehin Paipel me kasalehda neirail kesik pahi kan. Tehtehn pei wet kin mie kilin kou de mweinlikou ehu me sahl riau kin pirapiriong. Sounkesiko kin kihong nan pahio takai medendel de pwonopwon ehu me uwe ins riau lel siluh (cm 5 lel 7) oh mweinele toutouki ouns duwau (250 g). Eri e pahn kapir pahio pohn moangeo oh kadarala ehu sahl ko, me kahrehiong takaio en pihrla ni kehlail oh inen.
Nan Middle East mie me weirada pwehl kan oh diarada takai en pahi tohto sang ni mahwen en mahs kan. Sounpei koahiek kan mweinele kin kesingkihla takai kan ni uwen mwail 100 lel 150 nan awa ehu (km/h 160 lel 240). Semen kan sapwungki me uwen dei en pahi duwehte kesik arep pwoat, ahpw pahi uhdahn pil keper.—Sounkopwung 20:16.
JANUARY 24-30
SOAHNG KESEMPWAL KAN SANG MAHSEN EN KOHT | RUD 1-2
“Kasalehda Limpoak Loalopwoat”
Alasang Kompoakepahn Siohwa Keren kan
5 Ahn Rud peneinei ko mi Mohap. E kak pwurala rehrail, oh re kak apwalih ih. E ese aramas ako, oh pil ese lokaia oh tiahk en Mohap. Naomi sohte kak inoukihong Rud mepwukat nan Pedleem. Oh Naomi perki me e sohte pahn kak diar ahn Rud pwoud de eh wasahn kousoan. Eri e ndaiong Rud en pwurala Mohap. Nin duwen me kitail kilangehr, Orpa “pwuralahngehr rehn eh peneinei oh eh koht.” (Rud 1:9-15) Ahpw Rud pilada en dehr pwurala rehn eh aramas ako oh arail koht likamw ko.
Alasang Kompoakepahn Siohwa Keren kan
6 E mwomwen me Rud sukuhlki duwen Siohwa sang eh pwoudo de sang Naomi. E sukuhlki me Siohwa sohte ketin duwehte koht kan en Mohap. E poakohng Siohwa oh ese me Siohwa ketin warohng eh limpoak oh kaudok. Eri Rud wiahda pilipil mwahu ehu. E ndaiong Naomi: “Kisehmw kan iei kisehi; oh omw Koht iei ei Koht.” (Rud 1:16) Mohngiongitail kin mwekidkihda atail medewehla limpoak me Rud ahneki ong Naomi. Ahpw laudsang met iei limpoak me Rud ahneki ong Siohwa. Limpoak wet pil kamwakid Pohas me mwuhr kapingahki Rud eh ‘rapahki eh wasahn ruk pahn limen Siohwa.’ (Wadek Rud 2:12, NW.) Lepin lokaia kan me Pohas doadoahngki ele katamankihong kitail duwen mwomwen kisin menpihr kis eh kin rapahki perepe pahn pehnpihr en eh nohno. (Mel. 36:7; 91:1-4) Ni ahlohte, Siohwa ketikihong Rud perepe mwahu oh katingih pwehki eh pwoson. Sohte kahrepe ehu me Rud en koluhkihla eh pilipilo.
Ire Kesempwal kan
Ire Kesempwal akan Sang Nan Pwuhken Rud
1:13, 21—Siohwa kin ketin kansensuwedihala Naomi oh kahrehiong en lelohng paiohla? Soh, oh Naomi sohte ikidiki me Koht ketin wiahda mehkot sapwung. Ahpw, ah madamadau ong dahme wiawihiong ih, e medemedewe me Siohwa ketin keriahla ih. Kahrehda, e kin nsensuwed oh sohla koapworopwor.
JANUARY 31–FEBRUARY 6
SOAHNG KESEMPWAL KAN SANG MAHSEN EN KOHT | RUD 3-4
“Wiahda oh Kolokol Adamwahu”
w12 10/1 22 par. 5
“Lih Mwahu Men”
Pohas koasoi ni lokaia kadek, ni ngihl me kansenamwahwihala Rud. Pohas eri sapeng nda: “KAUN-O en ketin kupwuramwahwihiuk, nei serepein. Omw wiewia mwahu ahnsou wet kasalehda omw kin nsenohki omw peneinei laudsang me ke wiahiong Naomi, inen omw pwoudo; pwehki ke sohte raparapahki mwahnakapw emen, me kepwehpwe de semwehmwe.” (Rud 3:10) Eh keieun wiewia mwahu kin pidada ahn Rud eh limpoak loalopwoat ni eh iang Naomi pwuralahng Israel oh apwahpwalih ih. Keimwiseklahn wiewia mwahu iei me ahpwtehn wiawio. Pohas tehkada me lih pwulopwul duwehte Rud ele pahn mengei en diarada eh pwoud nanpwungen ohl pwulopwul kan, mehnda ma e kepwehpwe de semwehmwe. Ahpw, e men wia mwahu kaidehn ongete Naomi ahpw pil ong en Naomi pwoud melahro, pwehn kadakadaurete eden ohl mehlao nan sapweo. E sohte apwal en kilang dahme kahrehda Pohas mwekidki ahn lih pwulopwul menet eh soh roporop.
w12 10/1 23 par. 1
“Lih Mwahu Men”
Ia uwen eh kansenamwahu ong Rud ni eh kin medemedewe dahme Pohas koasoia, me aramas koaros ese ih nin duwen “lih mwahu men”! Ni mehlel eh kin ngoangki esehla Siohwa oh papah ih me kin kahrehda adamwahuo. E pil kin kasalehda kadek laud oh nsenohki Naomi oh nah aramas akan. E kin ngoangki esehla soahng kan oh tiahk kan me e sohte kin ese. Ma kitail kin kahlemengih en Rud pwoson, kitail pahn song en wauneki meteikan, mwomwarail oh arail tiahk kan ni mehlel. Ma kitail kin wia met, kitail pil pahn diarada me kitail kin wiahda adamwahu.
w12 10/1 24 par. 3
“Lih Mwahu Men”
Pohas eri pwoudikihda Rud. Mwurin mwo, kitail wadek: “KAUN-O ahpw ketin kupwuramwahwihala Rud, ih eri liseianda, oh kaipwidi pwutak emen.” Lihen Pedleem kan kapaiahda Naomi oh kapinga Rud pwehki eh kin mwahuong Naomi mwahusang eh pahn naineki pwutak isimen. Mwuhr, kitail sukuhlki me nein Rud pwutako wiahla kadaudok en Nanmwarki lapalapo Depit. (Rud 4:11-22) Mwuri, Sises Krais wiahla kadaudok en Depit.—Madiu 1:1.
Ire Kesempwal kan
w05 3/1 29 par. 3
Ire Kesempwal akan Sang nan Pwuhken Rud
4:6—Ni ahl dah me sounpwain sapahl men kak kauwehla eh sohso sang ni eh pwainda sapahl sahpw? Keieu, ma emen semwehmwehla oh anahne netikihla eh sapwen sohso, sounpwain sapahl men pahn anahne kihda pweinen sahpwo ni uwe ieu me pahn koasoandi sang erein sounpar kan me luhluhwe lao lel ni sounpar en Supilih me kohkohdo. (Lipai 25:25-27) Ni eh wia met e pahn katikala uwen pweinen sapweo. Oh pil ma Rud nainekihda pwutak emen, pwutako me pahn sohsohki sahpw me pweipweida sapahlo a kaidehn en sounpwainda sapahlo peneinei keren kan.
FEBRUARY 7-13
SOAHNG KESEMPWAL KAN SANG MAHSEN EN KOHT | 1 SAMUEL 1-2
“Kapakapohng Siohwa Sang nan Mohngiong”
ia 55 par. 12
E Kapakap ong Koht Sang nan Eh Mohngiong
12 Ana wiahda mehn kahlemeng mwahu ong sapwellimen Koht ladu koaros me pid kapakap. Ni kadek Siohwa ketin luke sapwellime aramas akan ren kin saledek en koasoiong ih, ni soh peikasal ren kasalehiong ih arail pwunod kan duwehte seri men eh kin koasoiong pahpa de nohno limpoak men me e likih. (Wadek Melkahka 62:8; 1 Deselonika 5:17.) Wahnpoaron Piter ntingihedi mahsen kansenamwahu pwukat duwen kapakap ong Siohwa: “Patohwanohng ih amwail pwunod akan koaros, pwehki eh kin ketin nsenohkin kumwail.”—1 Pit. 5:7.
w07 3/15 16 par. 4
Ia Duwen Ana Eh Diar Popohl
Dahme kitail kak sukuhlkihsang mepwukat koaros? Ni atail kin kapakapkihong Siohwa duwen atail pwunod kan, kitail kak patohwanohng ih atail pepehm oh kapakap sang nan atail mohngiong. Ma kitail sohte kak kamwahwihala kahpwalo a kitail mweidohng kahpwalo nin lime kan. Sohte ehu ahl me mwahusang met.—Lepin Padahk 3:5, 6.
Ire Kesempwal kan
Ire Kesempwal akan Sang Nan Pwuhken Samuel Keieu
2:10—Dahme kahrehda Ana kapakapki Siohwa en “ketikihong kehl ong sapwellime nanmwarki” ni ahnsou me sohte nanmwarki nan Israel? Kosonned en Moses kohpada me Wehin Israel pahn inengihada pilada aramas en wia arail nanmwarki. (Deuderonomi 17:14-18) Ni ahnsou me Seikop pahn kereniong mehla, e kohpada: “Suda pahn kolokol sokon en nanmwarki, manaman en kaunda wasa pahn mihmiehte rehn kadaudoke kan.” (Senesis 49:10) Oh pil, Siohwa mahsanihki duwen Sara—me wia nohno kahlap en mehn Israel akan: “Sang rehn kadaudoke kan, nanmwarki kei pahn pwarada.” (Senesis 17:16) Eri, e sansal me Ana wie kapakapki duwen nanmwarki men me pahn kohdo mwuhr.
FEBRUARY 14-20
SOAHNG KESEMPWAL KAN SANG MAHSEN EN KOHT | 1 SAMUEL 3-5
“Siohwa Kin Ketin Nsenohki Aramas”
Me Keieu Manaman Ahpw Kin Ketin Nsenohki Aramas akan
3 Samuel tepida papah ni tehnpas sarawio ni ahnsou me e wia kisin pwutak men. (1 Sam. 3:1) Ehu pwongo, mwurin e meirlahr, mehkot kapwuriamwei wiawi. (Wadek 1 Samuel 3:2-10.) E rong emen likwerih edeo. Samuel medewe me Samworo Lapalapo, Ilai, me likwerih ih. Ni peik, e pwourda oh tangala rehn Ilai oh nda: “Komw me eker ieo; eri, iet ngehi, maing.” Ahpw Ilai ndaiong: “I sohte eker uhk.” Mwurin soahng wet wiawi pak riau mwurin mwo, Ilai esehda me Koht me ketin eker Samuel. Eri Ilai ndaiong Samuel dahme e pahn nda ma met pwurehng wiawi, oh Samuel peikiong. Dahme kahrehda Siohwa sohte ketin padahkihong Samuel sangete ni tapio me Ih me ketin eker ih? Paipel sohte mahsanih duwen met. Ahpw Siohwa kakete ketin wia met pwehki e ketin nsenohki ahn Samuel pepehm kan.
Me Keieu Manaman Ahpw Kin Ketin Nsenohki Aramas akan
4 Wadek 1 Samuel 3:11-18. Sapwellimen Siohwa Kosonned kehkehlikihong seri kan en wauneki me mah kan, ahpw mehlel irail kan me ahneki manaman. (Eks. 22:28; Lip. 19:32) Eri e apwal en medewehla kisin pwutak men duwehte Samuel en pirida nimenseng, kohla rehn Ilai, oh ni eimah padahkihong duwen sapwellimen Koht kadeik kehlail ong ih. Paipel padahkihong kitail me Samuel “masak kasalehiong Ilai audepen kaudiahlo.” Ahpw, Koht ketin kasalehda ni sansal ong Ilai me Ih me ketin eker Samuel. Pwehki met, Ilai padahkihong Samuel en dehr ekihsang ih dahme Koht ketin mahsanih. Samuel peikiong oh “padahkihong Ilai mehkoaros.”
Ire Kesempwal kan
Ire Kesempwal akan Sang Nan Pwuhken Samuel Keieu
3:3—Samuel uhdahn kin meir nan Wasa me Keieu Sarawio? Soh, e sohte kin. Samuel wia mehn Lipai men me wia kisehn peneinei me sohte kin iang wia samworo mehn Kohad. (1 Kronikel 6:33-38) Pwehki met, e sohte mweimweiong en “pedolong oh keidohng limwahn dipwisou sarawi pwukat.” (Nempe 4:17-20) Samuel kak ihte pedolong nan wasao me likin pere sarawi ko (tabernacle courtyard). Eri, ih wasao me e kin meir ie. E sansal me Ilai pil kin pweidi wasakis likin pere sarawi ko. Lepin mahsen “wasa sapwellimen Koht Kohpwahn Inowo mihmi ie” e dehde me e kin koasoakoasoia nan wasa kan me Impwal Sarawio mihmi ie.
FEBRUARY 21-27
SOAHNG KESEMPWAL KAN SANG MAHSEN EN KOHT | 1 SAMUEL 6-8
“Ihs me Amwail Nanmwarki?”
it-2 163 par. 1
Wehin Koht
Re Peki Nanmwarki Men. Kereniong sounpar 400 ahnsou me mehn Israel kan mweselsang Isip oh dauliher sounpar 800 ahnsou me sapwellimen Koht inou lapo wiawihda rehn Eipraam. Mehn Israel kan peki ren ahneki nanmwarki me pahn kahluwa irail, pwe ren duwehte wehi teikan me mie ar nanmwarki. Ar pekipeko kahrehiong ar soikala Siohwa me ketin wia ar nanmwarki. (1Sa 8:4-8) Mehlel, ni pwung aramas ako kasik Koht en ketin kauwada wehi ehu me pahrekiong sapwellime inou ong Eipraam oh Seikop, me kileldier mwoweo. Mie kahrepe kei me re ahneki koapworopwor wet pwehki en Seikop kokohpo mwohn eh mehla me pid duwen Suda (Sen 49:8-10), pwehki sapwellimen Siohwa mahsen ko ong mehn Israel ko mwurin ar seiloak sang Isip (Eks 19:3-6), pwehki me pid inou lap en Kosonnedo (Deu 17:14, 15), oh pil kisehn mahsen ko me Siohwa ketin kahrehiong Palaam en koasoia (Nem 24:2-7, 17). En Samuel nohno lelepek Ana kasalehda koapworopwor wet nan kapakap. (1Sa 2:7-10) Ahpw, Siohwa saikinte ketin kasalehda ni unsek sapwellime “rir sarawi” me pid Wehio oh iahd me e pahn kokouda de pil ia mwomwe oh pil ihs me pahn wiahda koperment wet—ma e pahn mi nin sampah de nanleng. Kahrehda mwekid en aklapalap ieu me aramas ako wia ni ar ngihtehtehki ren ahneki nanmwarki men.
E Dadaurete Mendahki Eh Nsensuwedla
Tehk dahme Siohwa ketin sapengki Samuel ni ahnsou me e patohwanohng ih kahpwalo ni kapakap: “Rong mehkoaros me aramas akan pahn ndaiong uhk. Pwe kaidehk kowe me re soikalahr, pwe ngehi me re soikalahr I en dehr wia ar nanmwarki.” Ia uwen met eh kansenamwahu ong Samuel ahpw ia uwen suwed en ar koasoi ko me re patohwanohng Koht Wasa Lapalahpie! Siohwa ketin mahsanihong sapwellime soukohpo en katamankihong mehn Israel kan soahng laud kan me re pahn anahne wiahda ma re ahneki nanmwarki men. Ni Samuel eh wia met, aramas ako ngihtehtehki: “Soh! Se uhdahn anahne emen nanmwarkien.” Pwehki e kin peikiong eh Kohto ahnsou koaros, Samuel eri kohla oh keiehdi nanmwarki me Siohwa ketin piladahro.—1 Samuel 8:7-19.
Sapwellimen Siohwa Elen Kaunda Pweidahr!
9 Poadopoad kin kasalehda mehlelpen dahme Siohwa ketin panawihekin irail. Mehn Israel kan arail mi pahn kaundahn nanmwarki men kin kihong irail kahpwal laud kan, ahpw mehlel ma nanmwarki menet sohte kin lelepek. Ni atail kin medewe duwen mehn Israel kan, e sohte kapwuriamwei me erein ahnsou werei koperment en aramas me sehse Siohwa sohte kak en wahdo imwila mwahu. Mehlel, ekei soun politik kan kin peki rehn Koht en ketin kapaiada arail nannanti en wahdo nsenamwahu oh epwel mwahu. Ahpw ia duwen Koht eh pahn ketin kapaiada irail kan me sohte kin uhpah sapwellime elen kaunda?—Mel. 2:10-12.
Ire Kesempwal kan
Dahme Kahrehda Kitail En Papidaiskihla?
13 Kitail anahne wiliakapwala mwohn atail pahn papidaisla oh wiahla Sounkadehdehn Siohwa kan. Wiliakapwala iei wiewia ehu me pein emen pahn nsenkihda en wia oh eh pilipil pahn kohsang nan mohngiong unsek en idawehnla Krais Sises. Aramas pwukat kin kesehla arail wiewia sapwung kan en mahs, oh irail kin nantiong en wia dahme Koht kin kupwurki. Nan Paipel, lepin lokaia kan ni lokaiahn Ipru oh Krihk me kin pid wiliakapwala kin wehwehki pwurodohng. Wiewia wet kin kasansalehda me emen sohlahr kin wia sapwung kan ahpw kin sohpeiwong Koht. (1 Nanmwarki 8:33, 34) Ma emen pahn wiliakapwala, e pahn “wia soahng kan me pahn kasalehda me [e koluhla].” (Wiewia 26:20) Met kin wehwehki me kitail pahn tangasang kaudok likamw, kapwaiada sapwellimen Koht kosonned akan, oh kaudok ong Siohwa kelepw. (Deuderonomi 30:2, 8-10; 1 Samuel 7:3) Wiliakapwala kin wehwehki atail madamadau kan, mehn akadei kan, oh pein atail irair akan pahn wekidekla. (Esekiel 18:31) Kitail kin “pwurodohng” ni ahnsou atail irair akan en aramas kapw kin uhd wiliandi atail irair suwed akan.—Wiewia 3:19; Episos 4:20-24; Kolose 3:5-14.
FEBRUARY 28–MARCH 6
SOAHNG KESEMPWAL KAN SANG MAHSEN EN KOHT | 1 SAMUEL 9-11
“Nin Tapio Sohl Kin Aktikitik oh Mpahi”
Iang Omw Koht Kekeid ni Aktikitik
11 Medewehla dahme wiawihong Nanmwarki Sohl. Ni tapio, e wia aramas aktikitik men. E pohnese dahme e kak wia oh sohte kak wia, oh e pil pweiek en ale pwukoa teikan. (1 Sam. 9:21; 10:20-22) Ahpw mwuhr, e tepida aklapalapala oh kin wia soahng kan me e sohte ahneki pwuhng en wia. E tepida aklapalapala mwurinte e wiahla nanmwarki. Ehu pak, e sohla kanengamah nin doken eh awiawih soukohp Samuel. E sohte ni aktikitik likih me Siohwa pahn ketin sewese aramas ako, ahpw e wiahda meirong isihs ehu mendahki eh sohte ahneki pwuhng en wia met. Pwehki met, Siohwa sohla ketin kupwurperenki Sohl oh kedekedeo e sohla nanmwarki. (1 Sam. 13:8-14) E wia elen erpit ma kitail sukuhlkihsang mehn kataman wet oh dehr wia soahng kan me kitail sohte ahneki pwuhng en wia.
Ia Duwen Atail Kak Kolokol Irair en Tounmetei?
8 Mehn kahlemeng en Nanmwarki Sohl wia mehn kataman ehu ong kitail duwen roporop eh kak kauwehla atail irair en tounmetei. Ni Sohl eh tepida wia nanmwarki men, e kin aktikitik oh pohnese eh soh itar kan. (1 Sam. 9:21) “Nin duwen emen me sehsehlahr lokaia,” e pilada ni aktikitik en sohte kaloke ekei mehn Israel ko me kauwe eh kaunda mendahki arail pelianda manaman me Koht ketikihong ih. (1 Sam. 10:27, NW) Nanmwarki Sohl mweidohng sapwellimen Koht manaman en kaweid ih ni eh kahluwa mehn Israel kan oh mahweniong mehn Amon kan oh kana. Mwurin mwo, e kasalehda ni aktikitik me Siohwa kelehpw me warohng ale kaping pwehki arail kana.—1 Sam. 11:6, 11-13.
w95 12/15 10 par. 1
Mehn Ammon kan—Aramas me Dupungki Kadek Kailok
Mehn Ammon kan pwurehng dupungki sapwellimen Siohwa kadek ong ni kailok. Siohwa sohte ketin pohnsehsehla ar kamasak mehn Israel ko. “Ni Sohl eh rongada met, ngenen Koht eri tiada powe, e ahpw engiengkihda kowahlap.” Sang pahn kaweidpen sapwellimen Koht manaman, Sohl kihpene karis en sounpei 330,000 me kalowehdi mehn Ammon kan oh me malaulau me luhwehdi oh re tangpeseng.—1 Samuel 11:6, 11.
Ire Kesempwal kan
Ire Kesempwal akan Sang Nan Pwuhken Samuel Keieu
9:9—Dahme kesempwal ni mahsen wet “soukohp en rahnwet, mahs re kin adaneki ohl sarawi”? Mahsen pwukat kin ele kasalehda me ni ahnsou me soukohp akan kin lapalapala nan mwehin Samuel oh pil nan mwehin nanmwarki kan en Israel, lepin lokaia kan “ohl sarawi” sohla doadoahk ahpw uhd weliankihdi lepin lokaia “soukohp.” Samuel wiahla tepin soukohp.—Wiewia 3:24.