Iren Sawas kan ong Doaropwehn Kasukuhl ong Mihting en Mour oh Kalohk
MARCH 7-13
SOAHNG KESEMPWAL KAN SANG MAHSEN EN KOHT | 1 SAMUEL 12-13
“Aklapalap Kin Kahrehong Aramas en Namenekla”
Aklapalap Kin Kahrehong Aramas En Namenekla
17 Ma kitail sohte pahn tehk kanahieng wasaht, wiewia kan en Sohl pahn mwomwen pwung ong kitail. Pwe ni ahnsowo, sapwellimen Koht aramas akan mih “nan apwal mehlel” oh rerrerki ar masapwehk. (1 Samuel 13:6, 7) E sohte sapwung en tiengala mwowe en wia mehkot ni ahnsou me konehng. Ahpw kitail anahne tamanda, me Siohwa kak wadek mongiongatail kan oh dehdehkihla loalatail kan. (1 Samuel 16:7) Ihme kahrehda, e kilangada irair akan duwen Sohl me sohte ntingihdi nan Paipel. Karasepe ieu, Siohwa mwein kin mwahngih me Sohl kin soh-kanengamah pwehki aklapalap. Mwein Sohl kin nsensuwed pwe mendahki ih nanmwarki en Israel pwon, e anahne awiawih soukohp mahlahr men me kin pwand en pwarodo reh! Ahpw sohte lipilipil ia kahrepe, e sansal me Sohl lemeleme me pwehki Samuel kin pwand en pwarodo reh, eri Sohl lemeleme me met kin kihong ih pwung en pein wiahda dahme e men wia oh sohte anahne kapwaiada kaweid me kohwong ih. Met imwkihla dah? Eri, Samuel sohte kapinga ahn Sohl wiewia kan en tiengala mwowe. Ahpw, e lipwoare Sohl: “Omwi wehi sohte pahn werei . . . pwehki omwi sapeikiong Siohwa.” (1 Samuel 13:13, 14) Met pwurehng wiawi, aklapalap kin kahrehong kanamenek.
Siohwa Ketin Kesempwalki Omw Peik
8 Poadopoad en Paipel me pid duwen Nanmwarki Sohl kin kalaudehla kesempwalpen peik. Nin tepio, Sohl wia kaun aktikitik men, ‘e wiahkin ih aramas tikitik.’ Ahpw, mwuhr, aklapalap oh madamadau sapwung tepida kamwekid eh pilipil kan. (1 Samuel 10:21, 22; 15:17) Ehu ahnsou, Sohl pahn kohwong tuhwong mehn Pilisdia kan nan mahwen. Samuel padahkiong nanmwarkio en awih lao e kohdo en wiahda meirong ong Siohwa, oh kihong Sohl kaweid kan. Ahpw, Samuel sohte mwadang kohdo ni ahnsou me Sohl kasik, oh aramas akan tepida kohkohpeseng. Ni ahnsou me Sohl kilangada met, e tepida “wiahda meirong isihso.” Met inenen kansensuwedih Siohwa. Ni ahnsou me Samuel leledo, nanmwarkio kapwukoahkin meteikan eh sapeik, oh nda me pwehki Samuel me pwand, e ‘wiahkihda meirong’ en isihso pwehn kansenamwahuwih Siohwa. Ong Nanmwarki Sohl, en wiahda meirongo kesempwal sang peikiong kaweid me e alehda en awihki Samuel en wiahda meirongo. Samuel padahkiong ih: “Tiahk en kupwuropwon ehu me komw ketin wiadahr. Komw sohte kapwaiada koasoandi me KAUN-O, omwi Koht, ketikihong komwi.” Pwehki ah sapeik ong Siohwa, e sohlahr kupwurki Sohl en wia nanmwarki men.—1 Samuel 10:8; 13:5-13.
Ire Kesempwal kan
Ke Pahn Idawehn Sapwellimen Siohwa Kaweid Limpoak?
15 Ia duwe, mehn Israel ko medewe me re kak likih nanmwarki men laudsang Siohwa? Ma iei, eri re idawehn soahng kan me sohte uhdahn mehlel. Pwehki ar kin kamehlele mehkot me sohte uhdahn mehlel, e mengei ong irail ren tepida kamehlele soahng likamw teikan sang rehn Sehdan. Karasepe, Nanmwarki kan kak kahrehiong irail en pwongih dikedik kan. Soun pwongih dikedik kan kin medewe me re kak likih koht pwukat me wiawihkihda tuhke oh takai pwehki ar kak kilang oh doahke. Re sohte kin likih Siohwa Koht me soh sansal oh me ketin kapikada mehkoaros. Ahpw Pohl kasalehda me dikedik kan iei soahng kan “me sohte uhdahn mie.” (1 Kor. 8:4) Irail sohte kak kilang, rong, nda de wia mehkot. E pahn sohte katepen atail kaudokiong dikedik kan pwehki atail kak kilang oh doahke irail. Dikedik kan sohte kin sewese aramas. Irail sohte uhdahn mehlel oh me kin likih irail pahn “duwehla dikedik en eni kan.”—Mel. 115:4-8.
MARCH 14-20
SOAHNG KESEMPWAL KAN SANG MAHSEN EN KOHT | 1 SAMUEL 14-15
“Peik Kin Mwahusang Meirong”
Siohwa Ketin Kesempwalki Omw Peik
4 Pwehki Siohwa ketin kapikada soahng koaros, e ketin sapwellimaniki kepwe kan koaros me kitail ahneki. Ma ih duwen met, mie mehkot me kitail kak kihong ih? Ei, kitail kak kihong ih mehkot me inenen kesempwal. Dahme kitail kak kihong ih? Kitail kak diarada pasapeng sang kaweid wet: “Samwa, ke en loalokongla, I ahpw pahn kin pereperen; e pahn mie ei pasapeng ong mehmen me pahn kauwei ie.” (Lepin Padahk 27:11) Kitail kak kihong Koht atail peik. Mendahki kitail kin mih nan soangsoangen irair kan, sang ni atail peik, emenemen kitail kak kihda pasapeng ong ahn Sehdan me Tepil karaun likamw me dene aramas akan sohte pahn kak kolokol arail lelepek ong Koht ma re pahn lelong kahpwal akan. Ia uwen laud en pwais wet!
it-2 521 par. 2
Peik
Sohte wiliepen peik, ma emen sohte peik e sohte kak ale sapwellimen Koht kupwuramwahu. Duwehte me Samuel ndaiong Nanmwarki Sohl: “Mehnia tiahk me KAUN-O kin ketin kupwurperenki, rehn peik de kisakis oh meirong? Eri, peik [ni lokaiahn Ipru, rong] me mwahusang mehlel meirongkihong sihpw me keieu kaselel kan.” (1Sa 15:22) En sapeik iei en soikala mahsen en Siohwa, en kasalehda me emen sohte uhdahn kamehlele, likih de pwoson mahseno oh wasa me mahseno pwilisang ie. Kahrehda me kin sapeik kin duwehte me kin kosetipw de doadoahngki dikedik kan. (1Sa 15:23; pil kilang Ro 6:16.) Ma emen nda me e pwungki mehkot ehu, e pahn sohte katepen met ma sohte wiewia iang; en sohte mwekidki kin kasalehda sohte kamehlele de sohte wauneki wasa me kaweid kan kin kohsang ie. (Md 21:28-32) Irail akan me kin itarkihte rongorong oh pwungkihte sapwellimen Koht padahk mehlel kan nan ar madamadau, ahpw sohte kin kapwaiada dahme irail anahne wia, kin pitipitihki pein irail madamadau sapwung oh sohte kin alehdi kapai. (Sei 1:22-25) Sapwellimen Koht Ohlo kasansalehda me mendahki irail kan me kin wia soangen kehkehlik pwuko, ahpw e sansal me re kin wia mepwukat ni ahl sapwung de kahrepe sapwung, re sohte mwahn pahn pedolong nan Wehio oh Koht pahn ketin soikirailla douluhl.—Md 7:15-23.
Ire Kesempwal kan
it-1 493
Pepehm en Poakehla
Lohdiong pepehm en poakehla ni met eh kin uhwong kupwuren Koht kak imwikihla kahpwal laud kan. Met sansalda sang dahme wiawihong Nanmwarki Sohl. E lelehr ahnsoun kapwaiada sapwellimen Koht kadeik en kemehla mehn Amalek kan. Ih irail me tepin uhwong mehn Israel ko mwurin ar mweselsang Isip ahpw mehn Israel ko sohte wiahiong irail mehkot. Sohl alehdi kehkehlik en dehpa poakeirailla. Pwehki eh lohdi pahn kasongosong en nah aramas ako, e sohte idawehn sapwellimen Siohwa kehkehliko ni unsek. Kahrehda, Siohwa ketin soikala Sohl en wia nanmwarki. (1Sa 15:2-24) Aramas emen me kin uhdahn wehwehkihla sapwellimen Siohwa ahl pwung kan oh kin mwohneki eh loalopwoatohng Ih kak pere ih sang sapwung oh luhssang kupwuramwahu en Koht, duwehte me wiawihong Sohl.
MARCH 21-27
SOAHNG KESEMPWAL KAN SANG MAHSEN EN KOHT | 1 SAMUEL 16-17
“Mahwen Wet Iei Sapwellimen Siohwa”
Mahwen Wet Iei Sapwellimen Siohwa
Depit kamehlelehiong Sohl me e kak wia met ni eh padahkihong duwen dahme e wiahiong laion men oh pehr men. Ia duwe, e susuweiki? Soh. Depit ese dahme kahrehda e kana nan pei riau ko. E koasoia: “KAUN-O ketin doareiesang laion kan oh pehr kan; e pil pahn ketin doareiesang mehn Pilisdia menet.” Sohl eri ahpw kamehlelehda, oh koasoia: “Eri, me mwahu! Kohwei, oh KAUN-O en ketin ieiang uhk.”—1 Samuel 17:37.
Ke men ahneki pwoson duwehte Depit? Eri, tehk me ahn Depit pwoson sohte wiahte ouraman ehu. E pwoson eh Koht pwehki dahme e ese oh dahme e lelohng. E ese me Siohwa wia Sounsilepe limpoak men oh Sounkapwaiada inou kan. Ma kitail men ahneki soangen pwoson wet, kitail anahne pousehlahte sukuhlki duwen Koht en Paipel. Ni atail kin momourki dahme kitail kin sukuhlki, kitail pil pahn diarada imwila mwahu me pahn kakehlakahda atail pwoson.—Ipru 11:1.
Mahwen Wet Iei Sapwellimen Siohwa
Leledo rahnwet, ahn Depit mwekid uhdahn wia kasalepen pwoson laud ehu. Nna song medewehla mwahnakapwo eh werkilahng Kolaiad: “Ke kohkodohng peikihong ie kedlahs, oh ketieu laud oh pil ketieu tikitik, a ngehi I pahn peikihong uhk mwaren KAUN-O, Wasa Lapalap, Koht en karis en Israel kan, me ke peliandahr.” Depit wehwehki me ahn aramas manaman oh dipwisoun mahwen kan sohte uhdahn kesempwal. Kolaiad kasalehda eh mwamwahliki Siohwa Koht, oh Siohwa pahn ketin wia mehkot ong met. Nin duwen me Depit koasoia, mahwen wet iei sapwellimen Siohwa.—1 Samuel 17:45-47.
Depit pohnese uwen lapalahn Kolaiad oh nah dipwisoun mahwen kan. Ahpw Depit sohte mweidohng mepwukat en kamasak ih. E sohte wiahda sapwung me Sohl oh nah sounpei kan wiahda. Depit sohte kapahrekiong ih Kolaiad. Ahpw e kin kapahrekiong Kolaiad ong Siohwa. Kolaiad reireiki piht duwau elep (2.9 m), e kin kilengdiong ohl teikan, ahpw kapahrekiong ih ong Kaunepen lahng oh sampah, ia uwen eh laud? Ni mehlel duwehte aramas sohte lipilipil, e duwehte kisin ketitik kan, ni soangen irair wet e wia emen me Siohwa ketin onopadahngehr en kasohrehla!
Mahwen Wet Iei Sapwellimen Siohwa
Rahnwet, sapwellimen Koht ladu kan sohte kin iang pidada mahwen. E sohla kin wiawi rahnpwukat. (Madiu 26:52) Ahpw kitail anahne alasang en Depit eh pwoson. Duwehte ih kitail anahne kamehlele me Siohwa ketin mie, oh ihte Koht me kitail en papah oh wauneki. Ekei pak kitail kin pehm me kitail sohla kakohng atail kahpwal kan, ahpw atail kahpwal kan tikitik ma kitail kapahrekiong sapwellimen Siohwa kehl me sohte imwi. Ma kitail pilada Siohwa nin duwen atail Koht oh kitail pwoson ih duwehte me Depit wia, eri sohte uhwong, oh sohte kahpwal, me pahn kamasak kitail. Sohte mehkot laud me kak powehdi sapwellimen Siohwa kehl!
Ire Kesempwal kan
it-2 871-872
Sohl
Mwurin met oh mwurin Depit eh keidi pwehn uhd wiahla nanmwarkien Israel, ih ahnsowo me sapwellimen Siohwa manaman sohla ieiang Sohl. Sang ahnsowo kohla “Siohwa ketin mweidohng irair suwed ehu nan eh madamadau en kin kamasak ih.” Sang ni eh ketikihsang Sohl sapwellime manaman, Siohwa ketin kahrehiong irair suwed ehu en tiada powe, kihsang en Sohl madamadau en popohl oh kahrehiong en ahneki pepehm oh madamadau sapwung. En Sohl sapeikiong Siohwa kin kasalehda mohngiong oh madamadau suwed, me sapwellimen Koht manaman sohte kin kihong Sohl kehl en pelianda. Ahpw pwehki Siohwa ketin mweidohng “irair suwed” en wiliandi sapwellime manaman oh kamasak Sohl, ire wet kak nda “Siohwa ketin mweidohng irair suwed ehu,” kahrehda nein Sohl ladu ko koasoiahki met nin duwen “Koht ketin mweidohng irair suwed ehu.” Emen nein Sohl sounpapah ko kangoangehki en lukehdo Depit en wia nah sounkeseng pwehn kin kameleileidi ih ni ahnsou me ‘irair suwedo’ kin kapwunode ih.—1Sa 16:14-23; 17:15, NW.
MARCH 28–APRIL 3
SOAHNG KESEMPWAL KAN SANG MAHSEN EN KOHT | 1 SAMUEL 18-19
“Aktikitikte ni Omw Kin Pweida”
Likih Sapwellimen Koht Ngehn Ni Atail Kin Lelohng Wekidekla Kan Nan Mour
4 Ahnsou keren, sounsilepen sihpw menet pahn ndandla nan ah wehi. Ilek kohwong ih en kin papah nanmwarkio oh kesengiong ih. E kemehla Kolaiad, kodon lemei men me irail sounpei mai kan en Israel kin masak en pil tuhwong ih. Depit eri pilipilda en wia kaun en sounpei ko oh irail eri kalowehdi mehn Pilisdia kan. Aramas akan kin poakohng ih. Irail kin wiahda koul kan me kin kapinga ih. Emen sapwellimen nanmwarki Sohl sounkaweid ko kin kasalehda me Depit sohte ihte “ese kesengki arp” ahpw ih pil “ohl dengngan men, sounpei kommwad, kadek lokaia, oh paliwarmwahu.”—1 Samuel 16:18; 17:23, 24, 45-51; 18:5-7.
Kilang Wekpeseng en Aramas
6 Ekei aramas kin aklapalapala pwehki re masamwahu, ndand, samanih koul oh keseng, kehlail, oh meteikan kin wauneki irail. Depit kin ahneki soangen koahiek pwukat koaros, ahpw e kin wia aramas aktikitik men erein eh mour. Karasepe, ni ahnsou me Depit kemehla Kolaiad, Nanmwarki Sohl nda me Depit kak pwoudikihda nah serepeino. Ahpw Depit nda: “Ihs ngehi oh ei peneinei pwe I en pwoudiki sapwellimen nanmwarki serepein?” (1 Sam. 18:18) Dahme sewese Depit en kolokolete eh aktikitik? E ese me soangen irair kaselel, koahiek, oh pwais kan me e ahneki kin kohsang en Koht eh ketin aktikitik oh ketin tehk ih. (Mel. 113:5-8) Depit wehwehki me soahng mwahu koaros me e ahneki kohsang rehn Siohwa.—Pil kilang 1 Korint 4:7.
7 Duwehte Depit, sapwellimen Siohwa aramas akan rahnwet kin song en aktikitik. E kin sair mohngiongitail ni atail ese me pein Siohwa, Wasa Lapalahpie, kin ketin aktikitik. (Mel. 18:35) Kitail kin song en doadoahngki mahsen pwukat: “Kumwail en limpoak ong me mi nan apwal akan, kadek, mpahi oh karakarahk, aktikitik oh kanengamah.” (Kol. 3:12) Kitail pil ese me limpoak sohte kin “aklapalap de pohnmwahso.” (1 Kor. 13:4) Ni meteikan ar kin kilang me kitail kin aktikitik, irail pil kakete men esehla Siohwa. Duwehte ohl pwopwoud men kak karanihala Siohwa pwehki wiewia mwahu en eh pwoud Kristiano, aramas akan kak pil karanihala Koht pwehki ar kilang sapwellimen Koht ladu kan ar kin kasalehda aktikitik.—1 Pit. 3:1.
Ire Kesempwal kan
it-2 695-696
Soukohp
Mendahki re kin idihdida sang ni sapwellimen Siohwa manaman, e sohte sansal ma soukohp kan kin pousehlahte koasoakoasoi sang ni kaweidpen manamano. Ahpw, sapwellimen Koht manaman me kin ‘ti pohrail’ ni ahnsou kei, pwe ren kasalehda rohng kan me anahne pakairda. (Ese 11:4, 5; Mai 3:8) Met kin uhdahn kamwakidirailda oh kahrehiong ren koasoi. (1Sa 10:10; Ser 20:9; Ei 3:8) Re kin wia soahng kan me sohte kalapw wiawi ahpw pil arail koasoi oh wiewia kin kehlail oh arail pepehm kin uhdahn kapwuriamwei. Ele met kasalehda ekei wehwehn emenemen irail kin “wiewia mwomwen soukohp kei.” (1Sa 10:6-11; 19:20-24, NW; Ser 29:24-32; kilang Wi 2:4, 12-17; 6:15; 7:55.) Arail kin uhdahn poadidi oh kin ni eimah ngoangki arail pwukoa mweinele kin kahrehiong arail wiewia en ehusoahng oh mwomwen sahliel ong meteikan, duwehte kaunen sounpei ko ar kilengwohng emen soukohpo ni ahnsou me Sehu keidi. Ahpw ni ar esehda me ohlo soukohp men, kaunen sounpei ko kamehlelehla douluhl eh rohngo. (2Na 9:1-13; kilang Wi 26:24, 25.) Ni ahnsou me Sohl pwakipwakih Depit, sapwellimen Koht manaman kahrehiong en ‘wiewia mwomwen soukohp men,’ ih eri kapwuhrasang eh likou ko oh ‘erein rahno pwon oh pil pwohngo pwon e wonohn kilisou,’ e sansal me ih ahnsowo me Depit pitila. (1Sa 19:18–20:1) Met sohte wehwehki me soukohp kan kin kalapw kilisouda, pwe dahme Paipel kin kasalehda weksang met. Nan karasepe riau me kileldi, mie kahrepen soukohpo eh kilisouda, pwehn kasalehda mehkot me pid eh kokohpo. (Ais 20:2-4; Mai 1:8-11) E sohte sansal kahrepen Sohl eh kilisouda, ma en kasalehiong pein ih me e wiahte aramas emen, me eh likoun nanmwarki kohsang, me sohte eh kehl en uhwong sapwellimen Siohwa pwuhng en kaunda oh manaman de soangen kahrepe teikan.
APRIL 4-10
SOAHNG KESEMPWAL KAN SANG MAHSEN EN KOHT | 1 SAMUEL 20-22
“Ia Duwen Omw Kak Wia Kompoakepah Mwahu”
Kakehlakahda Nanpwungmwahu Rehn Meteikan Mwohn Imwio Leledo
18 Rahnwet, riatail Kristian kan kin lelohng soangsoangen kahpwal kan. Karasepe, me tohto kin lokolongki kahpwal kan en melimel, rerrer en sahpw de iloak laud ape de kahpwal kan me pein aramas kahrehda, duwehte mahwen de ohlahn nan wehwe ape. Ni met eh wiawi, ekei kitail ele kak kasamwo kompoakepatail pwukat ong imwatail. Ele ekei kak sawaskihda mwohni. Ahpw kitail koaros kak peki rehn Siohwa en ketin sewese riatail Kristian kan. Ma kitail esehda me emen riatail mworusala, ele kitail kin sehse dahme kitail pahn nda de wia. Ahpw kitail koaros kak sawas. Karasepe, kitail kak kihong atail ahnsou ong kompoakepatailo. Kitail kak rong kanahieng ni ahnsou me e koasoakoasoi. Oh kitail kak ehukihong ih iren Paipel ehu me kitail perenki me pahn kansenamwahwihala ih. (Ais. 50:4) Dahme keieu kesempwal iei ken mi rehn kompoakepahmw kan ni ahnsou me re anahne ken mi rehrail.—Wadek Lepin Padahk 17:17.
Momourki Sapwellimen Siohwa Kosonned akan
7 Koht ketin kasik kitail en wia kompoakepah mehlel kei. (Lep. Pad. 17:17) Nein nanmwarki Sohl pwutak Sonadan wiahla kompoakepahn Depit. Ni ahnsou me Sonadan rongada me Depit kemehla Kolaiad, “Sonadan, inenen poakepoakehla Depit duwehte eh poakohng pein eh mour.” (1 Sam. 18:1, 3) Sonadan kehsehki Depit ni ahnsou me Sohl men kemehla ih. Mwurin ahn Depit tangasang Sohl, Sonadan tuhwong ih oh wiahda inou ehu reh. Sohl kereniong kemehla Sonadan pwehki e koasoiong ih duwen Depit, ahpw ira pwurehng tuhpene oh katamanki emenemen ara inou. (1 Sam. 20:24-41) Ni kaimwiseklahn ara tuhpene, Sonadan kangoangehki Depit “duwen eh Koht eh ketin sinsile.”—1 Sam. 23:16-18.
Kolokol Kompoakepah Mwahu kan nan Sampah Sempoak Ehu
11 En loalopwoat. Solomon ntingihdi: “Kompoakepah kan kin kasalehda ar limpoak ahnsou koaros. Ia katepen eh mie kompoakepahmw ma e sohte seweseiuk ni ahnsou apwal?” (Lep. Pad. 17:17) Ni eh ntingihdi mahsen pwukat, Solomon mwein medemedewe duwen nanpwungmwahu en eh pahpa Depit oh Sonadan. (1 Sam. 18:1) Nanmwarki Sohl men nah pwutak Sonadan en wiahla nanmwarkien Israel. Ahpw Sonadan pwungki me Siohwa ketin piladahr Depit en wiahla nanmwarki. Weksang Sohl, Sonadan sohte kin peirin ong Depit. E sohte kin lingeringerkihda kaping kan me kohwong Depit, oh pil sohte kamehlele karaunlikamw me Sohl kin wiahda duwen Depit. (1 Sam. 20:24-34) Ke kin duwehte Sonadan? Ni ahnsou me kompoakepatail kan ale pwais nan mwomwohdiso, kitail kin iang irail perenda? Ni ahnsou me irail lelohng kahpwal kan, kitail kin kamweit oh sewese irail? Ma emen koasoiaiong kitail mehkot suwed duwen kompoakepatail men, kitail kin mwadang kamehlele? De duwehte Sonadan, kitail kin loalopwoat uhki kompoakepatail kan?
Ire Kesempwal kan
Ire Kesempwal akan Sang Nan Pwuhken Samuel Keieu
21:12, 13. Siohwa kin ketin kasik kitail en doadoahngki atail kehl en madamadau oh koahiek kan en kamwahuwihala irair apwal akan nan mour. E ketikihong kitailehr sapwellime Mahsen sarawi, me kin sewese kitail en doadoahngki atail loalokong oh kehl en madamadau en wiahda pilipil mwahu kan. (Lepin Padahk 1:4) Kitail pil kalahnganki sawas en Kristian elder kan.
APRIL 18-24
SOAHNG KESEMPWAL KAN SANG MAHSEN EN KOHT | 1 SAMUEL 23-24
“Awiawih Siohwa ni Kanengamah”
Likih Sapwellimen Koht Ngehn Ni Atail Kin Lelohng Wekidekla Kan Nan Mour
8 Ahpw, Depit sohte mwahu wia mehkot suwed ong Sohl. Depit kasalehda pwoson oh kanengamah ni e kin mendahkihla oh mweidohng mehkoaros nin limen Siohwa. Mwurin Nanmwarki Sohl eh ketieilahsang nan pwoaren paipo, Depit likwerih oh mahsanih: “Kauno [“Siohwa,” NW] en ketin kadeikada ihs rehta me sapwung! En ketin kalokehkin komw wiewiahiong ie, pwe ngehi I sohte pahn wia mehkot suwed ong komwi.” (1 Samuel 24:12) Mendahki e wehwehki me Sohl me sapwung, Depit sohte kin men dupukiong ih soahng kan me kin wiaiong ih, de pil lokaia lemei ong ih de pil kauwe ih. Pak kei, Depit pil koledi pein ih sang en pein dupuk suwed kan. E kin mweidohng Siohwa en kapwungala mehkoaros.—1 Samuel 25:32-34; 26:10, 11.
Omw Irair kan Kin Kaunda Omw Mour?
Iren mehn kasukuhl kesiluh iei en pahsan Siohwa a kaidehn en doadoahngki wiepe kan me sohte kohsang Mahsen en Koht pwe en wekidala irair apwal me kitail mi loale. Tohnpadahk Seims ntingihedi: “Kumwail eri kanahieng pwe amwail kanengamah ni ahnsou apwal en poatopoatete oh unsekla, pwe pein kumwail en unsengkihla mehlel oh sohte pahn anahne mehkot.” (Seims 1:4) Ni atail kin mweidohng kasongosong kan en wiawi oh sohte kin doadoahngki wiepe kan me sohte kohsang mahsen en Koht pwe en kauhdi mepwukat, eri kitail kin mweidohng atail kanengamah en “poatopoatete oh unsekla.” Eri atail pwoson pahn kin lelohng songosong oh kamwakelada, oh eh kehl pahn sansalda. Sosep oh Depit kin ahneki soangen kanengamah wet. Ira sohte kin doadoahngki wiepe ehu me Siohwa sohte kupwurki. Ahpw ira wiahda dahme keieu mwahu ong irair me ira mi loale. Ia uwen kapai laud me ira alehdi pwehki ara pahsan Siohwa! Siohwa ketin doadoahngki ira koaros pwe ira en doare oh kahluwa sapwellime aramas akan.—Senesis 41:39-41; 45:5; 2 Samuel 5:4, 5.
Kitail pil kak lelohng irair kan me pahn kasongosongih kitail en kin rapahki wiepe kan me sohte kohsang mahsen en Koht. Karasepe, ke kin pahtoula pwehki omw saikinte diar emen me ke men pwoudiki? Ma iei, dehr mweidohng kasongosong kan en kahrehda ken sapeikiong sapwellimen Siohwa kehkehlik me pid en pwoudikihte emen Kristian. (1 Korint 7:39) Mie apwal nan omw mouren pwopwoud? Sawaspene ni ahnsou apwal akan ahpw dehr dukula pahn madamadau en sampah me kin kangoange tohrohrpeseng oh mweipeseng. (Malakai 2:16; Episos 5:21-33) Mie omw kahpwal en apwalih peneinei pwehki apwal en mwohni? Pahsan Siohwa kin pidada atail en soikala wiewia kan me kitail sohte nohn ese ma e suwed, de wiepe kan me kin uhwong kosonned pwe ken alehki mwohni. (Melkahka 37:25; Ipru 13:18) Kitail koaros anahne doadoahk laud pwe en wia uwen me kitail kak nan irair kan me kitail mi loale oh nantihong wia mehkan me Siohwa pahn ketin kapaiahkin kitail. Ni atail kin wia met, kitail en koasoanehdi teng en pahsan Siohwa pwe en ketikihong kitail kaweid kan me keieu mwahu.—Maika 7:7.
Ire Kesempwal kan
Dehr Mweidohng Mehkot en Irekumwailsang Kisakiso
11 Ma kitail doadoahk laud pwehn uhdahn ahneki limpoak oh kadek, kitail sohte pahn mwadangete tepida peirin. Mahsen en Koht mahsanih: “Limpoak me kanengamah oh kadek; e sohte kin peirin.” (1 Kor. 13:4) Pwehn tehk mwahu me kitail en dehr peirin, kitail anahne kilangwohng irairo nin duwen me Siohwa kin ketin wia. Kitail anahne kilangwohng riatail Kristian kan nin duwen kakon en war ehu, me iei mwomwohdiso. Paipel mahsanih: “Ma kakon en war ehu kin medekla, kakon koaros kin iang medekla, ma kakon ehu kin ale kaping, kakon koaros kin iang paieki kapingo.” (1 Kor. 12:16-18, 26) Ma mehkot mwahu wiawihong emen riatail Kristian, kitail pahn perenkihda ih, ahpw kaidehn peirinkihda ih. Medewehla mehn kahlemeng mwahu en nein nanmwarki Sohl pwutak, Sonadan. Sonadan sohte peirinki Depit ni ahnsou me Depit pilipilda pwehn wiahla nanmwarki ah kaidehn ih. E pil kangoange oh utungada Depit. (1 Sam. 23:16-18) Ia duwe, kitail kak duwehte Sonadan me kin kadek oh limpoak?
APRIL 25–MAY 1
SOAHNG KESEMPWAL KAN SANG MAHSEN EN KOHT | 1 SAMUEL 25-26
“Ke Kin Pwurur en Mwekid?”
ia 78 par. 10-12
E Mwekid ni Elen Loalokong
10 Dahme sounpei pwerisek ko kin wiahiong sounsilepen sihpw ko? E pahn mengeiong irail en kin pirapahla sihpw kan ahpw re sohte kin wia met. Weksang met, irail kin pere nein Napal pelin mahn ko oh ladu kan. (Wadek 1 Samuel 25:15, 16.) Sihpw kan oh sounsilepen sihpw kan kin lelohng keper tohto. Mahn keper tohto, oh irepen palieir en Israel uhdahn karanih irail kahrehda pwihnen aramas mwersuwed kan sang sahpw teikan oh sounpirap kan kin kalapw kamasak irail.
11 Ele met wia pwukoa apwal ehu en apwalih ohl ako koaros oh kamwenge irail nan sapwtehno. Eri, ehu rahno Depit kadarala sounkair ehk rehn Napal pwehn peki sawas. Depit pilada ahnsowo ni elen loalokong. Ahnsowo iei ahnsoun sehk wunen sihpw kan, iei ahnsou me aramas akan kin kalapw kadek oh kamadipw. Depit pil pilada eh koasoi kan ni keneinei ni eh doadoahngki lokaia kadek oh wahu kan. Dahme Napal sapengki?—1 Sam. 25:5-8.
12 Napal uhdahn lingeringerda! “E ahpw kasaroweiraildi,” ih met me pwutako kawehwehiong Apikail dahme wiawi nin tepin parakrapo. Napal lehkohng irail oh kaulimkihong irail me e sohte men ehukihong irail kene pilawa, nime pihl, oh uduk kan me e lekehdier. E kin kepitki Depit nin duwen aramas emen me sohte kesempwal oh e nda me e duwehte ladu men me tangatangasang eh kaun. En Napal madamadau ele duwehte en Sohl, me kin kailongki Depit. Ira koaros sohte ahneki sapwellimen Siohwa madamadau. Koht ketin poakohng Depit oh e kin ketin kilengwohng ih kaidehn nin duwen ladu men me kin uhwong, ahpw nin duwen nanmwarkien Israel ni ahnsou kohkohdo.—1 Sam. 25:10, 11, 14.
ia 80 par. 18
E Mwekid ni Elen Loalokong
18 E pein pwukoahki en apwalihala kahpwalo oh peki mahk rehn Depit. Ni mehlel e pohnese me eh pwoudo pweipwei nin duwen me wehwehn edeo kasalehda. Ele e kasalehda me e sohte pahn konehng soangen aramas me duwehte Depit en karakarahkala pwehn lipwoare soangen ohl menet. E kasalehda eh likih Depit nin duwen wiliepen Siohwa, e pohnese me Depit kin mahwenki sapwellimen Siohwa pali. E pil kasalehda me e ese sapwellimen Siohwa inou me pid Depit eh pahn wiahla nanmwarki, pwehki e koasoia: “KAUN-O pahn . . . ketin kasapwiladahng komwi nanmwarkien Israel.” E pil doula peki rehn Depit en dehr wia mwekid ehu me pahn kakerehdi nta de me ele kak kahrehiong ih en “kupwur toutoukihla” mwuhr, e sansal me e koasoakoasoia duwen kauwehla nsenmwakelekel. (Wadek 1 Samuel 25:24-31.) Eh koasoi kadek kan kamwakid Depit!
Ire Kesempwal kan
ia 80 par. 16
E Mwekid ni Elen Loalokong
16 Ia duwe, met wehwehki me Apikail kin uhwong en eh pwoudo pwuhng en wia tapwin peneinei? Soh; tamataman me en Napal mwekid suwedo uhwongada sapwellimen Siohwa ladu keidio, mwekid ehu me kak imwikihla kamakamalahn aramas tohto me sohte diparail nan en Napal peneinei. Ma Apikail sohte mwekid, ia duwe, e sou pahn pil iang pwukoahkihdi dahme eh pwoudo wiahdao? Nan soangen irair wet, e anahne uhpah eh Kohto mwohn eh pahn uhpah eh pwoudo.