IREN MEHN KASUKUHL 17

Soangen Irair Dah kan me Sises Sapwellimanki?

Me kin print

Ni atail kin sukuhlki dahme Sises mahsanih oh ketin wia nin sampah, kitail kin diarada irair kan me kak kahrehiong kitail en men kompoakepahnkihla ih oh Semeo, Siohwa. Ia ekei soangen irair kaselel pwukat? Oh ia duwen atail kak kahlemengih Sises nan atail mour?

1. Ni soangen ahl dah kan me Sises duwehkihte Semeo?

Sises kin patopato rehn Seme limpoako nanleng oh sukusukuhl sang reh erein sounpar lik kei. Pwehki met, e kin ketin pehm, medewe oh mwekid duwehte semeo. (Wadek Sohn 5:19.) Ni mehlel, Sises kin ketin kahlemengih irair en Semeo ni unsek me kahrehda e mahsanih: “Mehmen me kilangieier pil kilangehr Sahmo.” (Sohn 14:9) Ni omw sukuhlki duwen sapwellimen Sises irair kan, ke pahn esehla mwahu duwen Siohwa. Karasepe, Sises eh kin ketin poakehla aramas akan kin kasalehda duwen Siohwa eh ketin nsenohkin uhk.

2. Ia duwen Sises eh ketin kasalehda me e kin poakohng Siohwa?

Sises mahsanih: “Pwe sampah en ese me I poakohng Sahmo, I kin wia nin duwen Sahmo eh ketin kehkehlingkihong ie I en wia.” (Sohn 14:31) Ni ahnsou me Sises ketiket nin sampah, e ketin kasalehda me e uhdahn poakohng Semeo ni eh kin peikiong ih mendahte ma e apwal. Sises pil ketin perenki koasoia duwen Semeo oh sewese meteikan ren kompoakepahnkihla Ih.—Sohn 14:23.

3. Ia duwen Sises eh ketin kasalehda me e kin poakohng aramas akan?

Paipel mahsanih me Sises kin ketin “perenkihda aramas akan koaros.” (Lepin Padahk 8:31) E ketin kasalehda soangen limpoak wet ni eh kin kangoange oh sewese aramas akan ni soh roporop. Soahng kapwuriamwei kan me e kin ketin wiahda sohte kin kasalehdahte sapwellime manaman ahpw met pil kin kasalehda eh kin poakehla aramas akan. (Mark 1:40-42) E kin ketin kadekohng aramas koaros oh sohte kin lipilipilki emen. Koaros me ahneki mohngiong mehlel me kin rong sapwellime mahsen kan kin nsenamwahu oh ahneki koapworopwor. Sises kupwurki lokolok oh pwoula pwehki eh ketin poakohng aramas akan koaros. Ahpw e kin uhdahn ketin poakohng irail kan me kin idawehn sapwellime padahk kan.—Wadek Sohn 15:13, 14.

KALAUDEHLA OMW ESE MET

Kalaudehla omw esehla Sises. Oh medewe ia duwen omw kak kasalehda limpoak oh kadek sapan duwehte Sises.

4. Sises kin ketin poakohng Semeo

En Sises mehn kahlemeng kin padahkihong kitail ia duwen atail kak kasalehda me kitail poakohng Koht. Wadek Luk 6:12 oh Sohn 15:10; 17:26. Mwurin omw wadek ehuehu iren Paipel, koasoiapene peidek wet:

Ia duwen atail kak kahlemengih Sises oh kasalehda me kitail poakohng Siohwa?

Sises ketin loulou. — Sises ketin poakohng Semeo nanleng oh kin kalapw patohong ih ni kapakap

5. Sises kin ketin nsenohki aramas akan

Sises kin ketin nsenohki aramas teikan laudsang pein ih. Pil ni ahnsou me e kin ngirala, e kin ketin doadoahngki eh ahnsou oh kehl pwehn sewese aramas akan. Wadek Mark 6:30-44, oh mwuri koasoiapene peidek pwukat:

Dahme Sises ketin wia me kasalehda eh kin ketin nsenohki aramas teikan?—Kilang iretikitik 31, 34, 41 oh 42.
Dahme kamwakid Sises en ketin sewese aramas akan? —Kilang iretikitik 34.
Pwehki Sises kin ketin kahlemengih sapwellimen Siohwa irair kan, dahme mepwukat padahkihong uhk duwen Siohwa?
Dahme kitail kak wia pwe kitail en kak kahlemengih Sises me kin ketin nsenohki aramas teikan?

Sises ketin katungoale aramas kid kei ni eh ketin katohtohwehla lopwon en pilawa limau oh kisin mwahmw riakis. Tohnpadahk ko nehkpeseng mwenge ko rehn ohl, lih oh seri kan.

6. Sises kin ketin kadek

Mendahki Sises sohte sapwellimanki soahng tohto, e kin ketin ehukihong meteikan dahme e sapwellimanki. E kin ketin padahkihong kitail en pil kin kadek. Wadek Wiewia 20:35, oh mwuri koasoiapene peidek wet:

Nin duwen me Sises mahsanih, ia duwen atail kak peren?

Kilang KISIN KASDO, oh mwuri koasoiapene peidek wet.

KISIN KASDO: “There Is More Happiness in Giving”—Excerpt (4:00)

Mehnda ma kitail sohte ahneki kepwe de naineki mwohni tohto, ia duwen atail kak kisikise meteikan?

Ke ese met?

Paipel kin padahkihong kitail en kapakapohng Siohwa ni mwaren Sises. (Wadek Sohn 16:23, 24.) Ni atail kin wia met, kitail kin kasalehda me kitail kalahnganki dahme Sises ketin wiadahr pwe kitail en kak kompoakepahnkihla Siohwa.

EKEI ARAMAS KIN NDA: “Koht sohte kin ketin nsenohki atail lokolok kan.”

Sises kin ketin duwehte Semeo ni soahng koaros. Ia duwen sapwellime wiewia kan eh kin kadehdehda me Siohwa kin ketin nsenohkin kitail?

DAHME KE SUKUHLKIER

Sises kin ketin poakohng Siohwa oh pil aramas akan. Pwehki Sises ketin duwehte Semeo, ni omw kalaudehla omw esehla Sises, omw esehla Siohwa pil pahn laudla.