Iren Sawas kan ong Doaropwehn Kasukuhl ong Mihting en Mour oh Kalohk
© 2022 Christian Congregation of Jehovah’s Witnesses
JANUARY 2-8
SOAHNG KESEMPWAL KAN SANG MAHSEN EN KOHT | 2 NANMWARKI 22-23
“Dahme Kahrehda Ke Anahne Aktikitik?”
w00 9/15 29-30
Sosaia me Aktikitik Alehdi Kupwuramwahu en Siohwa
Irail kan me kin onehda sapahl tehnpas sarawio kin sangkenei oh doadoahk laud. Sosaia uhdahn kalahngankihong Siohwa me tohndoadoahk pwukat kin kamwahwihala wasa ohla kan me ekei seme mehn mahs suwed ko kauwehla ni tehnpesen Koht. Ni doadoahko eh wiewiawi, Sapan ahpw wahdo rohng ehu. Dahieu mwo? E wahdo doaropwe limilimpene ehu. E kawehwehda me Samworo Lapalap Ilkaia diarada “pwuhken Kosonned en KAUN-O, Kosonned me Koht ketikihong Moses.” (2 Kronikel 34:12-18) E diarada doaropwehn Kosonnedo me tepin wiawihda.
Sosaia uhdahn men rong mahsen koaros nan pwuhko. Ni Sapan eh wadek, nanmwarkio eri song kilang ia duwen ehuehu kehkehlik ko ar pidada ih oh aramas ako. E uhdahn mwekidki duwen pwuhko eh kasansalehda kaudok mehlel oh eh kohpada kalokolok oh kalipilipala me pahn lelohng aramas ako ma re iangala pelien lamalam likamw. Ni eh wehwehkihda me aramas ako sohte kin kapwaiada ekei sapwellimen Koht kehkehlik kan, Sosaia eri tehrpeseng eh likou ko oh ruwesehki Ilkaia, Sapan oh meteikan: ‘Re en patohla oh esehdo kupwur en KAUN-O nan pwuhk wet. Pwe engieng en KAUN-O ong kitail me inenen laud, pwehki atail pahpa kahlap ko ar sohte peikiong mahsen kan en nan pwuhk wet.’—2 Nanmwarki 22:11-13; 2 Kronikel 34:19-21.
w00 9/15 30 par. 2
Sosaia me Aktikitik Alehdi Kupwuramwahu en Siohwa
Nein Sosaia meninkeder ko ahpw kohla rehn Ulda lih soukohpo nan Serusalem oh pwurekihdo rohng ehu. Ulda koasoia mahsen en Siohwa, me kasalehda kahpwal kan me kileldi nan pwuhk me ahpwtehn dierekdao pahn lelohng wehio me kesehla kaudok mehlel. Ahpw, Sosaia sohte pahn kilangedi kahpwalo, pwehki e aktikitikla mwohn silangin Siohwa Koht. E pahn mehla oh seridi ni meleilei.—2 Nanmwarki 22:14-20; 2 Kronikel 34:22-28.
Ire Kesempwal kan
Sohte Lipilipil Ia Mwomwen Ahmw Tikida, Ke Kak Pweida Mwahu Nan Ahmw Mour
Mendahki irair suwed me e mih loale ni ahnsou me e tikitik, Sosaia kin wia dahme mwahu mwohn silangin Siohwa. Ah kaunda me inenen pweida mwahu me kahrehda Paipel en mahsanih: “Sohte nanmwarki men mwowe me peikiong Kauno [“Siohwa,” NW] duwehte Sosaia, sang ni kupwur unsek, ngene unsek, oh kehl unsek, oh peikiong Kosonned en Moseso; pil sohte emen mwuri me duwehte.”—2 Nanmwarki 23:19-25.
Ia uwen Sosaia wia karasepen kangoang ong irail ko me mihla nan irair suwed ni ahnsou me re tikitik! Dahme kitail kak sukuhlikihsang ah mehn kahlemeng mwahu? Dahme sewese Sosaia en pilada ahl me pwung oh kolokolete?
JANUARY 9-15
SOAHNG KESEMPWAL KAN SANG MAHSEN EN KOHT | 2 NANMWARKI 24-25
“Kolokol Omw Pepehm en Karuwaru”
Sapwellimen Siohwa Rahn En Kadeik Kerendohr!
2 Sapwellimen Sepanaia kokohp kan kin kalaudehla en ohl pwulopwulo, Sosaia, en wehwehki duwen kesempwalpen en kihsang kaudok samin nan sapwen Suda. Ahpw, en nanmwarki song en kihsang kaudok likamw sang sahpwo, sohte kihsang douluhl dahme suwed rehn aramas ko de tomwki dipen ah pahpa kahlap, nanmwarki Manasa me “kadirehla Serusalem ki ntahn aramas mwakelekel kan.” (2 Nanmwarki 24:3, 4; 2 Kronikel 34:3) Sapwellimen Siohwa rahn en kadeik uhdahn pahn leledo.
Ire Kesempwal akan Sang nan Pwuhken Seremaia
Pahro iei 607 B.C.E. Sedekaia mihmi nan pahr kaeisek ehun sounpar ah wiewiahkiher nanmwarki. Nanmwarki Nepukadnesar en Papilon wia mahmahwenkihongehr Serusalem ki sounpwong 18. Ni keisuhwen rahn, ni kelimaun sounpwong, ni kaeisek duwaun sounpar en kaundahn Nepukadnesar, Nepusaradan, kaunen soun pisilei, ‘pedolong’ de leledohng Serusalem. (2 Nanmwarki 25:8) Ele mwein sang ni ah kahnimw en ihmw likou kan likin kelen kahnimw en Serusalem, Nepusaradan lipilipoahrokih kahnimwo oh wiewia pilahn akan ohng me e pahn wia. Mwurin rahn siluh, ni kaeisek en sounpwong, e ‘pedolong’ nan Serusalem. Oh “kelen kahnimwo langada.”—Seremaia 52:7, 12.
Ire Kesempwal kan
Ire Kesempwal akan Sang Nan Pwuhken Nanmwarki Keriau
24:3, 4. Pwehki ahn Manase dihpkihda nta, Siohwa “sohte ketin mweidohng mahk en kohwong” Suda. Koht ketin wauneki ntahn irail akan me sohte diparail. Kitail kak koapworopworki me Siohwa pahn ketin ikih ntahn me soh diparail akan oh pahn kauwehla me kakerehdi ntahn irail pwukat.—Melkahka 37:9-11; 145:20.
JANUARY 16-22
SOAHNG KESEMPWAL KAN SANG MAHSEN EN KOHT | 1 KRONIKEL 1-3
“Paipel—Pwuhk Mehlel Ehu A Kaidehn Pwuhken Soai”
w09 9/1 14 par. 1
Adam oh Ihp—Ira Uhdahn Mie?
Karasepe, medewehla kairekdien mehn Suhs en mahs ko me kileldi nan Paipel nan Keieun Kronikel irelaud 1 lel 9 oh nan Rongamwahu en Luk irelaud 3. Oaritikpen kairekdien peneinei en mahs pwukat lel dih 48 oh 75. Luk kilelehdi peneinei en Sises Krais, a Kronikel kilelehdi peneinei en nanmwarki oh samworo kan en wehin Israel. Kairekdi riau pwukat koaros kasalehda eden aramas ndand kan me duwehte Solomon, Depit, Seikop, Aisek, Eipraam, Noha oh Adam. Ahd koaros me kileldi nan kairekdi riau pwukat kasalehda aramas akan me uhdahn mie, oh Adam me tepin aramas me ntingdi nan kairekdi pwukat koaros.
Noha oh Nohliko—Poadopoad Mehlel Ehu, Kaidehn Soai Pwoat
Wasa riau nan Pwuhk Sarawi duwen ireirekidien peneinei kin kadehde me Noha uhdahn emen aramas me momour nin sampah. (1 Kronikel 1:4; Luk 3:36) Esra oh Luk, ira koaros kin wia sounnting kei me kin wiahda roporop mwahu ni ara kin kileledi duwen ireirekidien peneinei kan. Luk kasalehda me Sises kohsang nan kadaudok en Noha.
Adam oh Ihp—Ira Uhdahn Mie?
Karasepe, medewehla padahk en pweinen pweipwei sapahlo me aramas tohto me kin kohla sarawi kin kesempwalki. Nin duwen me padahk wet kasalehda, Sises Krais ketikihda sapwellime mour nin duwen aramas unsek men en wia pweinen pweipwei sapahl ehu pwehn kapitala aramas akan sang diparail kan. (Madiu 20:28; Sohn 3:16) Kitail ese me pweinen pweipwei sapahl iei pweipwei ehu me kin pahrekiong mehkot de pwainda sapahl mehkot me salongala. Ihme kahrehda Paipel kawehwehda Sises “nin duwen pweinen pweipwei sapahl ehu.” (1 Timoty 2:6) Pahrekiong dah? Paipel sapengala met: “Duwen koaros ar kin mehla pwehki Adam, ih pil duwen koaros ar pahn iasada pwehki Krais.” (1 Korint 15:22) Mour unsek me Sises ketin tounmeteikihla pwehn pwainda sapahl aramas peik kan pahrekiong mour unsek me Adam kasalongehla pwehki tepin dihpo nan Ihden. (Rom 5:12) E sansal me, ma Adam sohte mie, pweinen pweipwei sapahl me Krais toukihda pahn sohte katepe.
Ire Kesempwal kan
it-1 911 par. 3-4
Kairekdien Eden Peneinei
Eden Lih akan. Ekei pak eden lih akan kin pwarada nan kairekdien eden peneinei, pwehki kahrepe kan nan poadopoad. Senesis 11:29, 30 koasoia duwen Sarai (Sara), e sansal me kahrepeo iei pwehki kadaudok me inoudahro pahn kohsang reh a kaidehn rehn emen en Eipraam pwoud kan. Ele eden Milka pil pwarada wasao pwehki ih me en Repeka nohno kahlap, Repeka en Aisek pwoud, pwehki Aisek sohte pahn pwoudikihda emen sang wehi teikan, Repeka kohsang kisehn peneinei en Eipraam. (Sen 22:20-23; 24:2-4) Ketura, eden lih me pwoudikihda Eipraam mwuhr pwarada nan Senesis 25:1. Met kasalehda me Eipraam pwurehng pwopwoudida mwurin Sara eh mehla oh e ahnekihte kehl en kaparapar daulih sounpar 40, sang ahnsowo me Siohwa ketin kapwurehiong ira kehl wet ni manaman. (Ro 4:19; Sen 24:67; 25:20) Met pil kasalehda mehn Media oh keinek teikan en Arepia wia kisehn peneinei en Israel.
Eden Lia, Resel oh en Seikop pekehi kan kileldi, iangahki seri kan me re naitikihedi. (Sen 35:21-26) Met sewese kitail en wehwehki dahme Koht kin ketin wiahiong seri pwukat mwuhr. Ih soangen kahrepe wet me kahrehda kitail kin kilang ekei eden lih akan kin iang ntingdi nan kairekdien eden peneinei. Ni sohso eh kin kohwong lih akan, adarail kan kin kakete ntingdi. (Nem 26:33) Ni mehlel, irair en Damar, Reap oh Rud me tohrohr. Nan ehuehu ahnsou ko, mie mehkot kapwuriamwei me kahrehiong lih pwukat ar mihla nan kairekdien eden peneinei en Mesaia, Sises Krais. (Sen 38; Ru 1:3-5; 4:13-15; Md 1:1-5) Ekei wasa kan me koasoia duwen lih akan me mi nan kairekdien eden peneinei kileldi nan 1 Kronikel 2:35, 48, 49; 3:1-3, 5.
JANUARY 23-29
SOAHNG KESEMPWAL KAN SANG MAHSEN EN KOHT | 1 KRONIKEL 4-6
“Dahme Ei Kapakap kan Kin Kasalehda Duwen Ngehi?”
w10 10/1 23 par. 3-7
Sounkaronge Kapakap
Sapes wia aramas emen me kin kesempwalki kapakap. E tepikihda eh kapakapo ni eh peki sapwellimen Koht kapai. Ih eri wia pekipek siluh me kasalehda me e ahneki mohngiong me diren pwoson.
Keieu, Sapes patohwanohng Koht: ‘Komw ketin kalaudehla sapwei.’ (Iretikitik 10) Ohl waun menet sohte kin adihasang de noahroke sapwen meteikan. Eh pekipek ngidingid wet ele kin pidada aramas a kaidehn sahpw. Mweinele e peki en ketin kalaudehla sapwe ni popohl pwehn mie wasahn kousoan ong aramas tohto me kin kaudokiong Koht mehlelo.
Keriau, Sapes peki nin limen Koht en ieiang ih. Ni karasaras nin limen Koht kin dokedoke manaman, me e kin ketin doadoahngki pwehn sewese sapwellime tohnkaudok kan. (1 Kronikel 29:12) Pwe Sapes en alehdi pekipeki wet me e wia sang nan eh mohngiong, e kin kilengwohng Koht me nin lime kan sohte mwotomwot ong irail kan me kin pwoson ih.—Aiseia 59:1.
Kesiluh, Sapes kapakapki: ‘Komw ketin doareiesang me suwed koaros me kak kahrehiong ie medek.’ Mahsen wet “me kak kahrehiong ie medek” ele kasalehda me Sapes sohte kapakapki en pitsang kahpwal ahpw en dehr nsensuwedla de lohdi pahn soahng suwed kan.
En Sapes kapakap ko kasalehda eh kin nsenohki kaudok mehlel oh eh kin pwoson oh likih Sounkaronge kapakapo. Ia duwen Siohwa eh ketin mwekidki met? Ire wet imwikihla mahsen kan: “Koht eri kupwure oh ketikihiong dahme e patohwan pekio.”
Ire Kesempwal kan
Ire Kesempwal akan Sang Nan Pwuhken Kronikel Keieu
5:10, 18. Nan rahn akan en Nanmwarki Sohl, keinek kan me mih pali mesehn Sordan kalowehdi mehn Akar kan mendahki keinek pwukat arail tohtohki pak riau laudsang tohtohn aramas en keinek pwukat. Met pwehki aramas kommwad kan nan keinek pwukat kin likih Siohwa oh kin kehliki sapwellime sawas. Kitail en likih unsek Siohwa ni arail wia atail mahwen en ngehn pelipelian atail imwintihti kan me ngeder sang kitail.—Episos 6:10-17.
JANUARY 30–FEBRUARY 5
SOAHNG KESEMPWAL KAN SANG MAHSEN EN KOHT | 1 KRONIKEL 7-9
“Sang ni Sawas en Siohwa Ke Kak Kapwaiada Pwukoa Apwal kan”
Ire Kesempwal akan Sang Nan Pwuhken Kronikel Keieu
9:26, 27. Sounsilepen wenihmw en Lipai kan kin ahneki pwukoa kesempwal ehu. Irail me kin kol kih en pedolong ong nan wasa sarawi en imwen kaudoko. Irail wiahdahr kadehdepen arail wia aramas likilik oh kin lelepek ong langahda wenihmw akan ni ehu ehu rahn. Kitail pil ale irair en likilik ong pwukoa doadoahk en rapahki aramas akan nan atail wasahn kalohk oh sewese irail en pedolong ong nan sapwellimen Siohwa kaudok. Kitail soh pil anahne kadehde me kitail aramas likilik oh me koapworopwor kak kohwong kitail duwehte sounsilepen kehl mehn Lipai kan?
w11 9/15 32 par. 7
Ke Kak Duwehte Pineas ni Omw Lelohng Kahpwal kan?
Pineas ahneki pwukoa laud ehu nan Israel mahso; ahpw ni eh kin eimah, ahneki dehde mwahu oh likih Koht, e kin kak powehdi soahng apwal kan. Oh Siohwa kin kupwurperenki Pineas eh kin nsenohki mwomwohdisohn Koht. Sounpar 1,000 samwa mwuri, Esra ntingihedi: “Pineas nein Eleasar-KAUN-O en ketin ieiang ih!-ih me apwahpwalih irail ehu ahnsou.” (1 Kron. 9:20) Irail kan me kin tiengla mwowe nanpwungen sapwellimen Koht aramas akan rahnwet en alasang met ahpw, ni mehlel, Kristian koaros me kin papah ih ni loalopwoat en alasang met.
Ire Kesempwal kan
Koul ong Siohwa!
6 Ei, ni eh ketin doadoahngki sapwellime soukohp kan, e ketin kaweid sapwellime tohnkaudok kan en kapingahki ih koul. Sounkoul kan sang keinek en samworo kan sohte kin iang wia pwukoa kan me mehn Lipai teikan anahne wia pwe ren kak ahneki ahnsou mwahu en ntingihada oh pil sohngada koul kan.—1 Kron. 9:33.
FEBRUARY 6-12
SOAHNG KESEMPWAL KAN SANG MAHSEN EN KOHT | 1 KRONIKEL 10-12
“Kakehlaka Omw Ineng en Wia Kupwuren Koht”
“Komw Ketin Padahkihong Ie Duwen Ei Pahn Kapwaiada Kupwuromwien”
12 Pil mie mehkot me kitail kak sukuhlki sang mwomwen ahn Depit wiewia. Depit wehwehki ia duwen eh pahn doadoahngki ire mehlel kan oh men kapwaiada nan eh mour. Ire mehlel ehu kak sewese kitail en wiahda pilipil mwahu oh sewese kitail en wehwehki ia sapwellimen Siohwa madamadau ong irair ehu. Duwehte me Depit wia, kitail kin kalapw sukuhlki ire mehlel ehu sang ehu sapwellimen Siohwa kosonned kan. Karasepe, ehu rahno Depit nda me e men nim “pihl sang ni pwarer me mi ni ewen kelen Pedleem.” Ahpw Pedleem mi pahn kaundahn mehn Pilisdia kan. Nein Depit ohl silimen mweidala arail mour oh kohla nan kahnimwo pwehn ale pihlo. Ahpw Depit sohte men nim pihlo. E “wudekihla pwehn meirongkihong KAUN-O.” Dahme kahrehda? Depit nda: “I sohte kak nim pihlet! Pwe e pahn rasehng me I nimala ntahn ohl pwukat me pangalahr ar mour!”—1 Kron. 11:15-19.
13 Depit ese me Kosonnedo koasoia me nta anahne kakerkerdi ong Siohwa oh sohte me pahn kang. E pil wehwehki dahme kahrehda kaweid wet mi nan Kosonnedo. Depit ese me “mour kin mihmi ni nta.” Ahpw pihl met, kaidehn nta. Dahme kahrehda Depit sohte nim pihlo? E wia met pwehki e sukuhlki ire mehlel ehu sang nan kosonnedo me pid nta. E sukuhlki me Siohwa kin ketin kilangwohng nta nin duwen mehkot kesempwal. Pwehki ohl pwukat kakete mehla ni arail song en ale pihlo, Depit medewe me en nim pihlo pahn kasalehda eh sohte wauneki ntahn ohl ako me kesempwal. E sohte nim pihlo ahpw e pilada me e anahne wudekihdi nan pwehlo.—Lip. 17:11; Deud. 12:23, 24.
Mweidohng Sapwellimen Koht Kosonned oh Ire Mehlel kan en Kaiahne Kadeikpen Loalomw
5 Ma kitail men sapwellimen Koht kosonned kan en sewese kitail, kitail anahne wia laudsang en ihte wadek de ese ia wehwehn. Kitail anahne poakohng oh wauneki kosonned pwukat. Paipel mahsanihong kitail: “Kumwail tatki me suwed, oh kesempwalki dahme mwahu.” (Eimw. 5:15) Ahpw ia duwen atail kak wia met? Kitail anahne sukuhlki en kilangwohng soahng kan duwehte Siohwa eh kin ketin kilangwohng soahng kan. Medewehla duwen met. Medewehla me ke sohte kin meir mwahu, oh omw toahkteo ndaiong uhk ken kang mwenge me mwahu ong omw roson, eksersais, oh wiahda wekidekla kan nan omw mour. Ke idawehn eh kaweid, oh e pweida mwahu! Ia pahn omw pepehm ong kaweid me toahkteo kihda?
6 Ni ahlohte, Sounkapikpatail ketikihong kitail kosonned kan pwehn pere kitail sang imwila suwed en dihp oh pil en kamwahwihala elen atail mour. Karasepe, Paipel padahkihong kitail me kitail en dehr likamw, pirap, wia tiahk samin me pid nsenen pwopwoud, kasalehda tiahk lemei, de wia sohte lipilipil soahng kan me pid wunahni. (Wadek Lepin Padahk 6:16-19; Kaud. 21:8) Ni atail pehm imwila mwahu kan sang atail peikiong Siohwa, atail limpoak ong ih oh sapwellime kosonned kan kin laudla.
Ire Kesempwal kan
it-1 1058 par. 5-6
Mohngiong
Papah ni “Mohngiong Unsek.” Mohngiong en aramas kin anahne pwon pwehn kak doadoahk mwahu, ahpw mohngiong ni karasaras kak tohrohrpeseng. Depit kapakapki: “Komw ketin sewese ie I en lemmwiki mwaromwi ni mohngiong unsek,” oh met kasalehda me mohngiong en aramas kak tohrohrkipeseng eh pepehm kan oh dahme e kin masak. (Me 86:11, NW) Soangen aramas menet kakete ‘soaloalopwoat’—sohte nohn ngoangki kaudokiong Koht. (Me 119:113; Kau 3:16) Aramas emen pil kak “ahneki mohngiong riau” (ni lokaiahn Ipru, mohngiong ehu oh mohngiong ehu), e kin songosong en papah soumas riemen de koasoia ehu mehkot ahpw pil medemedewe ehu mehkot tohrohr ni widing. (1Kr 12:33; Me 12:2; NW) Sises ketin kasalehda eh angiangih soangen mwalaun me kin mohngiong riau.—Md 15:7, 8.
Emen me kin songosong en kaperenda Koht anahne dehr kin soaloalopwoat de ahneki mohngiong riau ahpw e anahne papah ih ni mohngiong unsek. (1Kr 28:9) Met kin anahne nanti laud pwehki mohngiong me keper oh kin inenwohngete me suwed. (Ser 17:9, 10; Sen 8:21) Dahme kak sewese kitail en kolokolete mohngiong unsek iei: kapakap sang nan mohngiong (Me 119:145; Kou 3:41), kaukaule onopki Mahsen en Koht (Esr 7:10; Lep 15:28), kin ngoangki iang kalohki rongamwahwo (pil kilang Ser 20:9), oh patehng irail kan me ahneki mohngiong unsek ong Siohwa.—Pil kilang 2Na 10:15, 16.
FEBRUARY 13-19
SOAHNG KESEMPWAL KAN SANG MAHSEN EN KOHT | 1 KRONIKEL 13-16
“Peikiong Kaweid Kin Imwila Pweida”
Ke Kin Wia Peidek Wet: “Ia Siohwa?”
12 Mwurin Kohpwahn Inou me kapwurpwuralahn Israel oh e mihmih ni erein sounpar tohto nan Kiriath-jearim, Nanmwarki Depit kupwurki kohpwahn inouo en wisiklahng Serusalem. E koasoipene rehn kaun akan en aramas oh mahsanih me Kohpwahn Inou pahn wisiklahng Serusalem ‘ma irail pahn pwungki oh ma iei kupwur en [Siohwa].’ Ahpw e sohte tehk mwahu pwen kak wehwehki mwahu duwen dahme Siohwa kupwurki duwen irair wet. Ma e wia met, irail sohte pahn ale Kohpwahn Inouo oh kihdahng pohn kuruma pwoat. Mehn Lipai Kohathite kan pahn kihdahng pohn poupwe kan, nin duwen Koht kin ni sansal ketin kaweidkin irail en wia. Edetehn Depit kin kalapw kapakap ong Siohwa, ahpw, ni ahnsowo e sohte wia met ni ahl me konehng. Imwikihla wiewia wet me inenen suwed. Depit ni ahnsou mwuhr koasoia: “Siohwa atail Koht, ketin kalokehkin kiht at sohte kin rapahki ih nin duwen me konehng.”—1 Kronikel 13:1-3; 15:11-13; Nempe 4:4-6, 15; 7:1-9.
Ke Kin Wia Peidek Wet: “Ia Siohwa?”
13 Ni ahnsou me mehn Lipai kan kapaikada Kohpwahn Inouo sang ni imwen Obed-edom lel Serusalem, irail koulki koul ieu me Depit wiadahr. E pil koasoia duwen mehn kataman wet: “Kumwail patohdo rapahki sawasapamwail rehn Kauno [“Siohwa,” NW], oh kaudokiong ahnsou koaros. Kumwail tamanda manaman kapwuriamwei kan me e ketin wiadahr.”—1 Kronikel 16:11, 12.
Ire Kesempwal kan
Kaudokiong Siohwa, Nanmwarki Poatopoat
14 Depit wahdo Serusalem kohpwahn inowo. Rahno uhdahn kaperen oh mehn Lipai ko koulkihong Siohwa koul en kaping pwoat oh kasalehda ire kesempwal pwukat me kileldi nan 1 Kronikel 16:31: “Kumwail lohkiong wehi koaros me KAUN-O iei [“wiahla,” NW] nanmwarki.” Ahpw pwehki Siohwa iei Nanmwarki poatopoat, ia duwen eh ketin wiahla Nanmwarki ahnsowo? Siohwa ketin wiahla Nanmwarki ni eh kin ketin doadoahngki sapwellime manaman en kaunda de ni eh ketin idihada emen pwehn wiliandi ih. Atail wehwehki ia duwen Siohwa eh ketin wiahla Nanmwarki uhdahn kesempwal. Mwohn Depit mehla, Siohwa ketin inoukihong me eh kaunda pahn pousehlahte kohkohla. E ketin mahsanih: “I pahn kasapwilada emen kadaudokomw kan pwe en wiahla nanmwarki oh kakehlakahla sapwellime wehi.” (2 Sam. 7:12, 13) Inou wet pweida ahnsou me ‘kadaudok’ en Depito pwarada mwurin sounpar 1,000 samwa. Ihs ih oh iahd me e pahn ketin wiahla Nanmwarki?
FEBRUARY 20-26
SOAHNG KESEMPWAL KAN SANG MAHSEN EN KOHT | 1 KRONIKEL 17-19
“Kolokol Omw Peren Mendahki Soahng Kansensuwed kan”
Tehk Kamwahu Kan En Sapwellimen Siohwa Pwihn
DEPIT en Israel en mahs iei emen me inenen ndand me koasoiepe pwarada nan Pwuhk en Ipru kan. Sounsilepen sihpw, soun melkahka, soukohp oh nanmwarki menet, kin likih Siohwa Koht ni unsek. Ahn Depit nanpwung mwahu oh keren rehn Siohwa kin kamwekid ih en ahneki ineng en men kauwada tehnpas ohng Koht. Soangen tehnpas wet me pahn wia poahsoan en kaudok mehlel nan Israel. Depit wehwehki me koasoandi en kokou tehnpas en tehnpaso pahn wahdo peren oh kapai ohng sapwellimen Koht aramas akan. Depit eri koulki: “Meid pai irail kan me komwi ketin pilada, me komwi ketikiniraildo pwe re en kin kousoan nan mwoalomwi sarawi. Se pahn nsenamwahukihla soahng mwahu kan en nan tehnpasomwi sarawi, kapai kan en Tehnpasomwi Sarawio.”—Melkahka 65:4.
Diar Peren nan Omw Pwais kan
11 Duwehte met, kitail kak kalaudehla atail peren sang ni atail kin poadidiong wia pwukoa sohte lipilipil me kitail ahneki nan sapwellimen Siohwa doadoahk. Ken “soupisengkihla” doadoahk en kalohko, oh doadoahk laud nan mwomwohdiso. (Wiewia 18:5; Ipru 10:24, 25) Kaunopada mwahu ong mihting kan pwe ken kak kihda pasapeng kangoang kan. Kesempwalki omw pwukoahn padahk de kamwomwada nan mihting en wihk kan. Ma brother kan peki omw sawas en wia pwukoa ehu nan mwomwohdiso, ken mwadangala oh kasalehda me irail kak likih iuk. Dehr medewe me pwukoa ehu me ke ahneki sohte kesempwal oh me ke sohte anahne wiahda ahnsou ong. Nantihong ken koahiekla nan omw doadoahko. (Lep. Pad. 22:29) Ma ke uhdahn doadoahk laud ong Siohwa, ke pahn wiahla kompoakepah mwahu men oh ke pil pahn uhdahn peren. (Kal. 6:4) E pil pahn mengei ong uhk en iang perenda ni meteikan ar alehdi pwukoa ehu me ke men alehdi.—Rom 12:15; Kal. 5:26.
Ire Kesempwal kan
Kitail Uhdahn Poakohng Samatailo, Siohwa
Ia Duwe, Siohwa Kin Ketin Tehk Ie?
Mie pak me ke kin pein idek rehmw peidek wet, ‘Mie aramas lik lik kei nin sampah, eri ia kahrepen Siohwa en ketin tehk ie?’ Mie aramas tohto me kin idek peidekohte. Nanmwarki Depit ntingihedi: “Maing KAUN, dahkot aramas pwe komwi en kin ketin tehk; dahkot aramas, pwe komwi en ketin kupwukupwure?” (Mel. 144:3) Depit kamehlele me Siohwa uhdahn ketin mwahngih duwen ih. (1 Kron. 17:16-18) Sang sapwellime Mahsen oh sapwellime pwihn, Siohwa ketin kamehlelehiong uhk me e kin ketin tehk duwen omw kin poakohng ih. Tehk ekei ire kan nan Mahsen en Koht me kak seweseiuk en kamehlele met:
• Siohwa ketin mwahngih duwen kowe mwohn omw ipwidi.—Mel. 139:16.
• Siohwa ketin mwahngih dahme mi nan mohngiongomw, oh e ketin mwahngih dahme ke kin medemedewe.—1 Kron. 28:9.
• Siohwa kin ketin karonge ehuehu omw kapakap kan.—Mel. 65:2.
• Omw wiewia kan kak kaperenda de kansensuwedihada kupwuren Siohwa.—Lep. Pad. 27:11.
• Siohwa ketin kahrehda ken karanihala ih.—Sohn 6:44.
• Ma ke mehla, Siohwa ketin mwahngih soahng koaros duwen kowe me kahrehda e pahn kak ketin kaiasuhkada. E pahn ketin pwurehng ketikihong uhk paliwar oh madamadau kapw ehu me pahn duwehte me ke ahneki ahnsouwet. Mwomwomw de dahme ke kin tamataman pahn duduwehte.—Sohn 11:21-26, 39-44; Wiewia 24:15.
FEBRUARY 27–MARCH 5
SOAHNG KESEMPWAL KAN SANG MAHSEN EN KOHT | 1 KRONIKEL 20-22
“Sewese me Pwulopwul kan Ren Pweida”
Likihong Ohl Lelepek kan Mepwukat
8 Wadek 1 Kronikel 22:5. Ele Depit medewe me Solomon saikinte onopadahng kaweid doadoahk kesempwal wet. Tehnpaso anahne “lingan oh ndand,” ahpw Solomon “pwulopwul oh soakoahiek.” Ahpw Depit ese me Siohwa pahn ketin sewese Solomon en wia doadoahk tohrohr wet. Eri Depit wia uwen eh kak koaros pwehn sewese ih kaunopada ong doadoahk laud wet.
Likihong Ohl Lelepek kan Mepwukat
7 Depit uhdahn men kauwada tehnpas en Siohwa, eri mwein e uhdahn nsensuwedla. Ahpw e utungte doadoahk me nah pwutako Solomon pahn wia. Depit sewese koasoanehdi tohndoadoahk kan oh kihpene mete, prons, silper, kohl, oh tuhke kan. E sohte pwunodki ihs me pahn adamwahukihla kokoudahn tehnpaso, me mwuhr adanekihla tehnpesen Solomon. Ahpw, e kangoange Solomon ni eh nda: “Eri, samwa, KAUN-O omw Koht en ketin ieiang uhk, oh en ketin kapwaiada sapwellime inou me pid kokoudahn ehu tehnpas ong ih.”—1 Kron. 22:11, 14-16.
Pahpa Nohno kan, Kumwail Kin Sewese Noumwail Seri kan en Kekeirda Pwe Ren Papidaisla?
14 Elder kan kak utungada dahme pahpa nohno kan kin wiewia sang arail lokaia kangoang kan ni ahnsou me irail kin koasoia duwen mehn akadei kan nan sapwellimen Siohwa doadoahk. Emen sister tamanda ahnsou me Brother Russell koasoiong ih ni eh sounpar weneu. Sistero nda, “E doadoahngki minit 15 pwehn koasoiong ie duwen ei mehn akadei kan en papah Siohwa.” Ia imwilahn met? Mwuhr, sistero wiahla pioneer men, oh e wia pioneer men daulih sounpar 70! E uhdahn sansal me lokaia kangoang kan kin kak kamwakid mouren emen. (Lep. Pad. 15:23) Elder kan pil kak luke pahpa nohno kan oh neirail seri kan ren iang sewese doadoahk kan en Wasahn Kaudok. Re kak kihong seri ko en wia soahng kan me konehng arail sounpar oh koahiek.
15 Ia duwen meteikan nan mwomwohdiso ar kak sawas? Re kak kasalehda arail nsenohki me pwulopwul kan ni ahl me konehng. Karasepe, ke kak rapahki soahng kan me kasalehda me me pwulopwul kan kin karanihala Siohwa. Ia duwe, mie seri men me kin kihda pasapeng mwahu ni mihting kan, de mie eh padahk de kamwomwada nan prokram en mihting en nan wihk? E kalohk ong emen nan sukuhl, de e wiahda dahme pwung ni eh lelohng kasongosong en wia mehkot sapwung? Ma ei, mwadang ndaiong ih me dahme e wiahdao uhdahn mwahu! Kitail kak akadeiong en koasoiong me pwulopwul kan mwohn oh mwurin mihting kan. Ni atail wia met, seri kan pahn pehm me irail wia kisehn ‘pokon en sapwellimen Siohwa aramas akan.’—Mel. 35:18.
Ire Kesempwal kan
Ire Kesempwal akan Sang Nan Pwuhken Kronikel Keieu
21:13-15. Siohwa pahngokihong tohnlengo en uhdi sang ah kihda kalokolok pwehki E ketin kupwurohkihla apwal me lelohng Sapwellime aramas akan. Ni mehlel, “sapwellime mah me ngederenie.”