Mwurin Adam oh Ihp ara kohkohlahsang nan mwetuwel en Ihden, ira nainekihda seri tohto. Tepin neira pwutak, Kain, wiahla sounsapwasapw men, oh keriemen en neira pwutak, Eipel, wiahla sounsilepen sihpw men.

Ehu rahno Kain oh Eipel wiahda meirong ong Siohwa. Ke ese dahkot meirong? Met wia kisakis ehu ong Koht. Siohwa kupwurperenki en Eipel meirongo, ahpw e sohte kupwurki en Kaino. Met kahrehda Kain en uhdahn lingeringerda. Siohwa eri mahsanihong Kain me eh lingeringer kak kahrehiong ih en wiahda mehkot suwed. Ahpw Kain sohte rong.

Kain eri ndaiong Eipel: ‘Kita kohla nan mohso.’ Ni ara wie kelekelehpw nan mohso, Kain sohpeiongete rie pwutako oh kemehla. Dahme Siohwa pahn ketin wiahiong met? Siohwa ketin kaloke Kain ni eh kadarala ih dohsang eh peneinei. Kain sohla mweimwei en pwurodo.

Mie mehkot me kitail sukuhlkihsang met? Kitail kakete tepida lingeringer ma soahng kan me kitail men en wiawi sohte pweida. Ma kitail pehm me lingeringer wie lalaudla nan loalatail, de ma meteikan kilang atail lingeringer oh ndaiong kitail me e keper, kitail anahne mwadangete wekidala oh kaunda atail pepehm kan mwohn eh pahn uhd kaunda kitail.

Pwehki Eipel poakohng Siohwa oh kin wiahda me mwahu, Siohwa pahn ketin tamataman ih ahnsou koaros. Koht pahn ketin kamourada Eipel ni ahnsou me E pahn ketin wiahiong sampah en wiahla paradais ehu.

Kedekedeo, dirala aramas nin sampah. Pali laud en irail suwed. Pil ekei tohnleng kan nanleng suwedla. Irail kohsang arail wasahn kousoan nanleng oh kohdihdo sampah. Ke ese dahme kahrehda irail wia met? Pwe irail en kak alehda paliwar en aramas oh pwoudikihda lih akan.

Tohnleng pwukat oh lih akan nainekihda pwutak kan. Pwutak ko laudla oh inenen kehlail oh kin tiahk suwed. Irail kin kamedekih aramas akan. Siohwa sohte kak ketin mweidohng soahng wet en pousehlahte wiawi. Eri e ketin koasoanehdi en kasohrehla aramas suwed kan nan nohlik ehu.

Ahpw mie ohl emen me weksang irail. E poakohng Siohwa. Ede Noha. Mie eh pwoud oh nah pwutak silimen, Sehm, Ahm, oh Saped, oh nah pwutak ko koaros pwopwoud. Siohwa mahsanihong Noha en wiahda warihmw lapala ehu pwe ih oh eh peneinei en kak pitsang Nohliko. Warihmw duwehte lapalahn koakon ehu me kak peipeiseli pohn pihl. Siohwa pil mahsanihong Noha en kahrehlong mahn tohto nan warihmwo pwe irail en pil kak iang pitila.

Noha mwadangete tepida wiahda warihmwo. Noha oh eh peneinei wiewiahki warihmwo erein sounpar 50. Irail wia soahng koaros me Siohwa mahsanihong irail pwehn wiahda warihmwo. Erein ahnsowo, Noha kin padahkihong aramas ako duwen Nohliko. Ahpw sohte me men rong ih.

Eri e lelehr ahnsou me irail pahn pedolong nan warihmwo. Kitail pahn kilang dahme wiawi mwurin met.