Mie kahnimw ehu me karanih Papel me adaneki Ur. Wasao aramas akan kin kaudokiong koht tohto likin Siohwa. Ahpw mie ohl emen nan Ur me kin kaudokiong Siohwa kelehpw. Ede Eipraam.

Siohwa mahsanihong Eipraam: ‘Kohkohlahsang imwomwen oh rehn kisehmw kan, oh kohla nan sahpw me I pahn kasalehiong uhk.’ Koht eri ketin inoukihong: ‘Ke pahn wiahla wehi laud ehu, oh I pahn wia soahng mwahu kan ong aramas tohto nan sampah pwon pwehki kowe.’

Eipraam sehse ia wasa me Siohwa pahn ketin kadaralahng ih ie, ahpw e likih Siohwa. Eri Eipraam, eh pwoud Sara, eh pahpa Tera, oh Lohd nein rien Eipraam, kihpene arail kepwe kan oh ni peik tapiada arail seiloak reirei.

Eipraam sounpar 75 ni ahnsou me ih oh eh peneinei lella nan sahpw me Siohwa kupwurki irail en kilang. Wasao adaneki sapwen Kenan. Wasao Koht mahseniong Eipraam oh wiahda inou wet: ‘Sahpwet pwon me ke kilang, I pahn kihong noumw seri kan.’ Ahpw Eipraam oh Sara mahlahr oh sohte neira seri. Eri ia duwen Siohwa eh pahn ketin kapwaiada sapwellime inou?

Eipraam oh Sara wie pwopwoudkier sounpar tohto. Ira kohkohlahsang imwara ihmw kaselel nan Ur oh uhd kousoan nan ihmw likou. Ahpw Sara sohte kaulimki met pwehki e likih Siohwa.

Sara uhdahn men naineki seri, kahrehda e ndaiong Eipraam: ‘Ma Akar ei laduwo mie nah seri, serio kak duwehte pein nei.’ Kedekedeo, Akar nainekihda pwutak emen. Ede Ismael.

Sounpar tohto mwurin mwo, ni ahnsou me Eipraam sounpar 99 oh Sara sounpar 89, mie aramas silimen me mwemweitla rehra. Eipraam luke irail en kohdo kommoal pahn tuhke ehu oh iang ih mwenge. Ke ese ihs irail ako me mwemweitla reho? Irail tohnleng kei! Irail padahkihong Eipraam: ‘Pahr kohkohdo ni soangen ahnsou wet, kowe oh omw pwoud pahn nainekihda pwutak emen.’ Sara rongorong irail sang nan ihmw likowo. E kouruhr oh medemedewe: ‘I pahn kak naineki seri mendahki ei mahlahr?’

Sounpar ehu mwuri, Sara neitikiehdi pwutak emen, duwehte me sapwellimen Siohwa tohnleng ko inoukihda. Eipraam eri kihong ede Aisek, me wehwehki “Kouruhr.”

Ni ahnsou me Aisek ele sounpar limau, Sara tehkada me Ismael kin kapailoke ih. E men pere nah pwutako, eri e kohla rehn Eipraam oh peki en kadarala Akar oh Ismael. Ni tapio, Eipraam sohte men wia met. Ahpw Siohwa mahsanihong Eipraam: ‘Rong Sara. I pahn apwalih Ismael. Ahpw ei inou kan pahn pweida rehn Aisek.’