-
Seikop Alehdi Pwuhng en SohsoMehn Kasukuhl kan me Ke Kak Sukuhlkihsang Paipel
-
-
IREN MEHN KASUKUHL 12
Seikop Alehdi Pwuhng en Sohso
Aisek sounpar 40 ni ahnsou me e pwoudikihda Repeka. E uhdahn poakohng ih. Kedekedeo, ira nainekihda seri riemen, mpwer en pwutak ehu.
Pwutak laudo adaneki Esau, oh me tikitiko adaneki Seikop. Esau perenki mihmiseli likin ihmw oh e mai en koledi mahn akan. Ahpw Seikop perenki mihmihte ni imwarailo.
Nan rahn pwuko, pwutak laud kan me kin alehdi pali laud en sahpw oh mwohni ni ahnsou me arail pahpa kan kin mehla. Met adaneki sohso. Nan en Aisek eh peneinei, sapwellimen Siohwa inou kan me e ketin wiahda ong Eipraam kin wia kisehn sohso. Esau sohte nohn kesempwalki inou pwuko, ahpw Seikop ese me re inenen kesempwal.
Ehu rahno Esau pwurodo ni imwarailo oh e uhdahn pwangada sang ni eh kesikesik mahnseli rahn ehu pwon. E nedada pwohn mwenge iou me Seikop wiewia oh e nda: ‘I men mwenge! Kihdo mahs kenei ekis uduk weitahtahn!’ Seikop sapengki: ‘I pahn, ahpw inoukihong ie mahs me ke pahn kihong ie ahmw sohso.’ Esau nda: ‘I sohte katapanki ei sohso! Ke kak ahnekihla. Ihte I men mwenge.’ Ia duwe, ke leme met wia elen loalokong ehu ong Esau en wia? Soh douluhl. Esau kisakiskihla mehkot me uhdahn kesempwal ongete dahl en uduk ehu.
Ni ahnsou me Aisek mahlahr, iei ahnsowo me e pahn kapaiahda pwutak laudo. Ahpw Repeka sewese Seikop, pwutak tikitiko, en alehdi kapaio. Ni ahnsou me Esau diarada met, e uhdahn lingeringerda oh e pilahnehda en kemehla ah mpwero. Aisek oh Repeka men pere Seikop, eri ira ndaiong: ‘Kohla oh mihmi rehn Lapan rien omw nohno, lao Esau meleileidi.’ Seikop rong kaweid en eh pahpa oh nohno oh kohkohla pwehn doarehla eh mour.
“Pwe ia pahn katepehiong aramas, ma e pahn sapwenikihla sampah pokon, e ahpw katihasang uhdahn eh mour? Dahme emen kak kihda pwe en pwurehng eh mour?”—Mark 8:36, 37
-
-
Seikop oh Esau NanpwungmwahulaMehn Kasukuhl kan me Ke Kak Sukuhlkihsang Paipel
-
-
IREN MEHN KASUKUHL 13
Seikop oh Esau Nanpwungmwahula
Siohwa ketin inoukihong Seikop me e pahn pere ih duwehte eh ketin pere Eipraam oh Aisek. Seikop kousoanla nan wasa ehu me adaneki Aran, wasa me e pwopwoudida ie, ahneki peneinei laud, oh kepwehpwehla mehlel.
Kedekedeo Siohwa mahsanihong Seikop: ‘Pwurala ni uhdahn omw wasa.’ Eri Seikop oh eh peneinei tapiada arail seiloak reirei pwehn pwuralahng eh wasao. Ni arail seiseiloak kohla pohn ahlo aramas ekei kohdo rehn Seikop oh ndaiong: ‘Riomw ohlo Esau kohkohdo, oh ohl 400 me iang ih!’ Seikop perki me Esau pahn men wiahiong ih oh eh peneinei mehkot suwed. E kapakapkihong Siohwa: ‘Menlau doareiesang riei ohlo.’ Mwurin rahno Seikop kadarala eh kisakis ong Esau. E kisekisehki sihpw, kuht, kou, kamel, oh ahs tohto.
Nipwongo, ni ahnsou me Seikop wie kelekelehpw, e kilangada tohnleng men! Tohnlengo pa tepida poadoarohng ih. Ira poadopoador lao lel nimenseng. Mendahki Seikop eh medeklahr, e sohte men uhdi. Tohnlengo mahsanih: ‘Pweisang ie.’ Ahpw Seikop nda: ‘Soh, I sohte pahn lao ke pahn kapaiaiehda.’
Tohnlengo eri kapaiahda Seikop. Met Seikop esehier me Siohwa sohte pahn ketin mweidohng Esau en wiahiong ih mehkot suwed.
Nimensengo Seikop ahpw kilangla wasa doh oh kilangada Esau eh kohkohdo iangahki ohl 400 ko. Seikop eri tiengla mwohn eh peneinei oh poaridi mwohn rie ohlo pak isuh. Esau tangalahte pwoalehdi Seikop. Pirieno ahpw tepida sengiseng oh ira nanpwungmwahula. Ia omw madamadau duwen sapwellimen Siohwa pepehm ong mwomwen Seikop eh kamwahwihala kahpwalo?
Mwurin mwo Esau pwuralahng ni imweo, oh Seikop pil pwurala eh wasao. Seikop naineki pwutak 12. Adarail kan iei Reupen, Simion, Lipai, Suda, Dan, Napdali, Kad, Aser, Isakar, Sepulon, Sosep, oh Pensamin. Siohwa ketin doadoahngki emen rehrail, Sosep, pwehn doarehla sapwellime aramas akan. Ke ese ia mwomwe? Kitail pahn kilang.
“Kumwail poakohng amwail imwintihti kan oh kapakapki me kin kalokei kumwail, pwe kumwail en wiahla sapwellimen Sahm me ketiket nanleng.”—Madiu 5:44, 45
-