Emen nein Seikop pwutak tikitik ko iei Sosep. Rie me laud ko kin kilang me arail pahpao kin kesempwalki ih. Ia omw madamadau duwen arail pepehm ong met? Irail kin peirinki Sosep oh kailongki. Ni ahnsou me Sosep ouramankihda ouraman kei me mwomwen ehu soahng, e koasoiaiong rie pwutak ko. Irail medewe me ouraman ko wehwehki me irail pahn poaridiong ih ehu rahn. Arail kailongki ih ahpwte pil laudla!

Ehu rahno rien Sosep ko apwahpwalih sihpw kei limwahn kahnimw en Sekem. Seikop eri kadarala Sosep pwehn tehk ia irarail. Rie ko kilengla wasa doh oh kilangada eh kohkohdo oh ndapene nanpwungarail: ‘Ien sounouramano, e kohkohdo. Nna, kitail kemehla!’ Irail eri parokedi oh kesehdiong nan pwoar loal ehu. Ahpw Suda, emen rie pwutak ko, nda: ‘Kumwail dehr kemehla! Kitail netikihla nin duwen lidu men.’ Irail ahpw netikihla Sosep ni mwohni silper 20 ong sounnet en Midian kan me kohkohlahng Isip.

Rien Sosep pwutak ko eri kaduhdi eh likowo nan ntahn kuht men, oh kadarala likowo rehn arail pahpao, oh nda: ‘Kaidehn ahn noumw pwutako eh likowo met?’ Seikop ahpw medewehiong me mahn lawalo men me kemehla Sosep. E uhdahn nsensuwedla. Sohte emen kak kansenamwahwihala.

Sosep netila nan Isip nin duwen lidu ong ohl kesempwal men me adaneki Podipar. Ahpw Siohwa kin ketin sewese Sosep. Podipar kilang me Sosep kin wia doadoahk mwahu oh me e wia emen me likilik. Sohte pwand Podipar kihong ih en apwalih soahng koaros me e ahneki.

En Podipar pwoudo tehkada me Sosep uhdahn masamwahu oh kehlail. Ehuehu rahn e kin peki rehn Sosep en wendi reh. Dahme Sosep pahn wia? E kin kahng wia met oh nda: ‘Soh! Met sapwung. Ei soumaso kin likih ie oh kowe eh pwoud. Ma I wendi rehmw, I pahn wiahda dihp ong Koht!’

Ehu rahno ahn Podipar pwoudo song en idingkihong Sosep en wendi reh. E koledi ahn Sosep likowo, ahpw Sosep uhdahte tangasang. Ni ahnsou me Podipar pwurala ni imwarailo, eh pwoudo ndaiong me Sosep lidere ih. Podipar uhdahn lingeringerda, oh kesehlong Sosep nan imweteng. Ahpw Siohwa sohte ketin manokehla Sosep.

Erein Sosep eh mihmi nan imweteng, Parao, nanmwarkien Isip ouramankihda ouraman kei me sohte emen kak kawehwehda. Emen nah ladu ko padahkihong me Sosep kak kawehwehiong ih wehwehn eh ouraman ko. Ni ahnsowohte Parao ndahng ren ekerodo Sosep.

Parao eri idek reh: ‘Ke kak kawehwehda ei ouraman pwukat?’ Sosep ndaiong Parao: ‘E pahn diren mwenge nan Isip sounpar isuh, mwurin mwo e pahn uhdahn apwal en mwenge sounpar isuh. Pilada emen me loalokong en kihpene mwenge pwe noumw aramas akan en dehr duhpekla.’ Parao sapeng: ‘I piluhkada! Kowe me pahn keriaun lapalap nan Isip!’ Ia duwen Sosep eh ese wehwehn en Parao ouraman ko? Siohwa me ketin sewese Sosep.

Erein sounpar isuh ko, Sosep kihpene oh nekidala mwenge kan. Mwurin mwo mie lehk lapalap nan sampah pwon, duwehte me Sosep ndao. Aramas akan kohdohsang wasa koaros pwehn pwainda mwenge rehn Sosep. Eh pahpao, Seikop, rongada me mie mwenge nan Isip, eri e kadarala nah pwutak ehk pwehn pwainda kanarail mwenge.

Nein Seikop pwutak ko kohla rehn Sosep. Sosep mwadangete kasawihada irail. Ahpw rie pwutak ko sehse me Sosep mwo. Irail poaridiong ih, duwehte me Sosep ouramankihda ni ahnsou me e pwulopwulo. Sosep men ese ma rie pwutak ko kin kailokte. Eri e ndaiong irail: ‘Kumwail lipoahrok kei. Kumwail kohdohng diarada wasa luwet kan en sahpwet.’ Irail nda: ‘Soh! Kiht pirien 12 sang Kenan. Emen riat ko mehla, oh me keieu tikitiko mihmi rehn at pahpao.’ Sosep eri nda: ‘Kumwail wahdohng ie riamwail me tikitiko, oh I ahpw pahn kamehlelei kumwail.’ Irail eri pwurala imwarailo rehn arail pahpao.

Ni ahnsou me e pwurehng nek kenen peneineio mwenge, Seikop pwurehng kadarala nah pwutak ko Isip. Ahnsou wet irail wahda Pensamin, riarail me tikitiko. Pwehn kasonge rie pwutak ko, Sosep ekihla kep silper ehu nan ahn Pensamin ehdo oh kapwukoahki rie pwutak ko koaros me irail pirapahsang. Ni ahnsou me nein Sosep ladu ko kilangada kepo nan ahn Pensamin ehdo, rie pwutak ko pwuriamweikihla. Irail peki rehn Sosep en kaloke irail a kaidehn Pensamin.

Met Sosep esedahr me rie ko wekilahr. Sosep solahr kak kolokol eh pepehm. Ih eri tepida sengiseng oh nda: ‘Ngehi riamwail pwutak Sosep. Ei pahpao momourte?’ Rie ko inenen pwuriamweila. Ih eri ndaiong irail: ‘Kumwail dehr nsensuwedki dahme kumwail wiahiongieo. Koht ketin kadariehdo wasaht pwe ien doarehla amwail mour. Nna kumwail mwadang pwurowei oh wahdo ei pahpao wasaht.’

Irail eri pwurala ni imwarailo pwehn padahkihong arail pahpao rohng mwahwo oh wahla ih Isip. Eri Sosep oh eh pahpao pwurehng koukousoanpene, mwurin sounpar tohto me ira sohte tuhpene.