Mie ohl emen me kin kaudokiong Siohwa nan sapwen Us. Ede Sohp. Ih ohl kepwehpwe men oh e ahneki peneinei laud ehu. E kin kadek oh sewese aramas semwehmwe kan, lih akan me arail pwoud melahr, oh seri kan me sohte arail pahpa nohno. Ahpw ia duwe, Sohp sohte pahn ahneki kahpwal kan pwehki eh kin wiewia dahme mwahu?

Sohp sehse me Sehdan me Tepil kin kilikilang ih. Siohwa mahsanihong Sehdan: ‘Ke kilangehr nei laduwo Sohp? Sohte emen nin sampah me duwehte ih. E kin rong ie oh wia dahme pwung.’ Sehdan sapengki: ‘Mehlel me Sohp kin peikiong komwi. Komw kin ketin pere ih oh kapaia ih. Komw ketikihongehr sahpw oh mahn akan. Ma komw pahn ketikihsang ih soahng koaros, e sohla pahn kaudokiong komwi.’ Siohwa mahsanih: ‘Ke kak kasonge Sohp. Ahpw e sohte mweimweiong uhk ken kemehla ih.’ Dahme kahrehda Siohwa ketin mweidohng Sehdan en kasonge Sohp? Pwehki e ketin kamehlele me Sohp sohte pahn lohdi.

Sehdan tepida kasongehki Sohp soangsoangen kahpwal tohto. Keieu e kadarala aramas ekei me adaneki mehn Sapea kan pwe ren pirapahsang nein Sohp kou oh dongki kan. Mwuri, kisiniei ehu kemehla nein Sohp sihpw koaros. Pil pwihnen aramas ehu me adaneki mehn Kaldea kan pirapahsang nah kamel kan. Ladu kan me kin apwahpwalih mahn ako pil kamakamala. Mwuri, kahpwal ehu me keieu suwed wiawi. Nein Sohp seri ko koaros mehla ni ahnsou me ihmw me re kamakamadipw loaleo pwupwudiong pohrail koaros. Sohp uhdahn nsensuwedla, ahpw e sohte uhdihsang kaudokiong Siohwa.

Sehdan men kalaudehla en Sohp eh lokolok, eri e kahrehiong ohla kan en pwarada wasa koaros ni paliweren Sohp. Sohp ahneki medek laud. E sehse dahme kahrehda soahng pwukat koaros wiewiawikihong ih. Mendahki met, Sohp kin kaudokiongete Siohwa. Koht mwahngihier soahng pwukat koaros, oh e uhdahn ketin kupwurperenkihda Sohp.

Mwurin mepwukat Sehdan kadarala ohl silimen pwe ren kasonge Sohp. Irail ndaiong ih: ‘Mwein ke dipada ke ahpw song en ekihla. Koht ketin kalokaloke iuk.’ Sohp nda: ‘I sohte wiahda mehkot sapwung.’ E ahpw tepida medemedewe me Siohwa me ketin kahrehiong ih nan kahpwal pwukat, oh e nda me Koht kin kupwur sapahrek ong ih.

Ohl pwulopwul men me adaneki Elihu nennenlahte wie rongorong arail koasoakoasoi. Mwuri e tepida koasoi oh nda: ‘Dahme kumwail koaros ndahn me sapwung. Siohwa lapalapasang dahme kitail ese. E sohte kak ketin wia dahme suwed. E kin ketin mwahngih soahng koaros oh sewese aramas nan arail kahpwal kan.’

Mwuri Siohwa eri mahseniong Sohp, mahsanih: ‘Ke mi ia ni ahnsou me I wiahda nanleng oh sampah? Dahme kahrehda ke nda me I kin kupwur sapahrek? Ke kin koasoi ahpw ke sohte wehwehki dahme kahrehda soahng kan kin wiewiawi.’ Sohp kasalehda me e sapwung oh nda: ‘I sapwungala. I rongehr duwen komwi, ahpw met I uhdahn eselahr komwi. Sohte mehkot apwal ong komwi. Komw kupwurmahkikihong ie dahme I koasoia.’

Ni ahnsou me kasongosongo imwisekla, Siohwa pwurehng ketikihong en Sohp roson oh ketikihong ih soahng kan laudsang dahme e ahneki mahso. Sohp mour werei oh nsenamwahu. Siohwa ketin kapaiahda Sohp pwehki e kin rong ih mendahki ma e apwal. Ke pahn duwehte Sohp oh pousehlahte kaudokiong Siohwa, mendahki dahme pahn wiawi?

Nan Isip, en Seikop peneinei kan adanekihla mehn Israel. Mwurin Seikop oh Sosep ara mehla, emen Parao kapw me uhd tepida kaunda. E perki me men Israel kan pahn kehlailasang mehn Isip kan. Eri Parao menet wiakihla mehn Israel kan lidu kei. E kin idingkihong irail ren wiahda takain wiahda ihmw kan oh ren doadoahk laud nan mwaht akan. Ahpw ni mehn Isip ko ar idingkihong irail ren kalaudehla arail doadoahk, mehn Israel ko wie tohtohlahte. Pwehki Parao sohte pwungki met, e koasoanehdi me seri pwelel pwutak en Israel koaros me pahn ipwidi pahn kamakamala. Ke kak medewehla ia uwen mehn Israel ko ar masepwehkada?

Lihen Israel men me adaneki Sokoped naineki kisin pwutak kaselel men. Pwehn doarehla kisin pwutako, e kihdiong ih nan kopwou ehu oh ekihla kopwouwo nan pelien ahlek ehu ni keilen Pillap Nail. Rien kisin pwutako serepeino, Miriam, mihmihte wasao pwehn kilang dahme pahn wiawi.

Nein Parao serepeino kohdohng duhdu ni pillapo oh kilangada kopwouwo. Nan kopwouwo e kilangada kisin seri men me wie sengiseng, oh e poakepoakehda serio. Miriam eri idek reh: ‘E soh mwahu ma I kohla rapahkihda emen lih pwehn apwalihong komwi serien?’ Ni ahnsou me nein Parao serepeino nda ei, Miriam kahrehdo uhdahn en serio nohno, Sokoped. Nein Parao serepeino ndaiong liho: ‘Ale seri pwelel menet oh apwalihada ong ie, I ahpw pahn pwainohng uhk.’

Ni ahnsou me serio laudla, Sokoped wahdohng ih rehn nein Parao serepeino, me pwekada oh kihong ede Moses oh apwalihada nin duwen pein nah. Moses kekeirda nin duwen nein nanmwarki pwutak oh e kak ahneki soahng koaros me e mwahuki. Ahpw Moses sohte manokehla Siohwa. E ese me ih uhdahn mehn Israel men ahpw kaidehn mehn Isip men. Oh e pilada en papah Siohwa.

Ni ahnsou me Moses sounpar 40, e pilada en sewese kiseh aramas akan. Ni ahnsou me e kilangada mehn Isip men eh kemekeme mehn Israel men, Moses kemehte mehn Isipo kemehla. Ih eri ekihla paliweren mehn Isipo nan pihko. Ni ahnsou me Parao esehda met, e song en kemehla Moses. Ahpw Moses tangala nan sapwen Midian. Wasao Siohwa ketin sewese ih.