Moses koukousoan nan Midian erein sounpar 40. E pwopwoudida oh nainekihda seri. Ehu rahno ni eh apwahpwalih nah sihpw kan karanih Nahna Sainai, e kilangada mehkot kapwuriamwei. Kisin tuhke pwoat wie lullul ahpw e sohte roangala! Ni Moses eh keila pwehn kilang, e rongada ngihl ehu sang nan tuhkeo me mahsanih: ‘Moses! Ke dehr keido met. Kihsang omw suht kan pwehki ke kesikesihnen wasa me sarawi.’ Siohwa me ketin mahmahsen ni eh ketin doadoahngki tohnleng men.

Moses masepwehkada kahrehda e perehla meseo. Ngihlo mahsanih: ‘I kilangehr mehn Israel kan ar wie lokolok. I pahn kapitirailsang mehn Isip kan oh kahreiraillahng nan sahpw kaselel ehu. Kowe me pahn kahluwa nei aramas akan sang nan Isip.’ Ia duwe, met sou kapwuriamwei ong Moses?

Moses eri idek: ‘Dahme I pahn nda ni aramas ako ar pahn idek rehi ihs me kadariehla?’ Koht ketin sapeng mahsanih: ‘Ndaiong irail me Siohwa, Koht en Eipraam, Koht en Aisek, oh Koht en Seikop me kadaruhkewei rehrail.’ Moses eri nda: ‘Ia duwen ma aramas ako sohte men rong ie?’ Siohwa ketikihong ih mehn kadehde me E pahn ketin sewese ih. E mahsanihong Moses en kesehdiong nah sokono nan pwehlo. Ahnsowohte sokono pa wiahla sineik men! Ni Moses eh pwekada ikin sineiko, e pwurehng wiahla sokon pwoat. Siohwa eri mahsanih: ‘Ni ahnsou me ke pahn wiahda kilel wet, e pahn kasalehda me ngehi me kadaruhkewei rehrail.’

Moses eri nda: ‘I me soakoahiek en koasoakoasoi.’ Siohwa eri ketin inoukihong ih: ‘I pahn padahkihong uhk dahme ke pahn nda, oh I pahn kadarewei riomw ohl Aaron pwehn seweseiuk.’ Pwehki eh ese me Siohwa pahn ketin ieiang ih, Moses kahrehda eh pwoudo oh nah pwutak ko oh pwurala Isip.

Mehn Israel kan idihdiong ren doadoahk laud nin duwen lidu kei. Siohwa ketin kadarala Moses oh Aaron rehn Parao pwehn padahkihong rohng pwoatet: ‘Kadarala nei aramas akan pwe ren kaudokiong ie nan sapwtehno.’ Parao sapeng ni aklapalap oh nda: ‘I sohte katapanki dahme Siohwa mahsanih, oh I sohte pahn kadarala mehn Israel kan.’ Eri Parao ahpwte kalaudehla arail doadoahk. Siohwa pahn ketin kaloke Parao pwehn padahkihong ih mehkot. Ke ese ia duwen eh ketin wia met? E pahn ketin kadarala Kalokolok Eisek ko nan Isip. Siohwa eri mahsanihong Moses: ‘Parao sohte men rong ie. E pahn mihmi ni Pillap Nail ni menseng. Kohla reh oh padahkihong me pilen pillap Nail pahn wiahla nta pwehki eh sohte mweidohng nei aramas akan ren kohkohla.’ Moses peikiong oh kohla rehn Parao. Parao kilang Aaron eh poakiheki nah sokono pillap Nail oh pilen pillapo eh wiahla nta. Pillapo eri tepida pwohsuwedida, mwahmw akan mehla, oh sohla pihl en nimpil sang nan Nail. Ahpw Parao pil kahngete kadarala mehn Israel ko ren kohkohla.

Mwurin rahn isuh, Siohwa ketin pwurehng kadarala Moses rehn Parao pwehn padahkihong rohng pwoatet: ‘Ma ke sohte kadarala nei aramas akan, Isip pahn direkihla kairu.’ Ahpw Parao sohte kadarala mehn Israel ko. Aaron eri kauwada nah sokono, kairu kan ahpw kadirehla nan sahpwo. Aramas akan diarada kairu kan nan imwarail, nan dewerail kan, oh nan neirail dahlen mwenge kan. Wasa koaros mie kairu! Parao ndaiong Moses en peki rehn Siohwa en kauhdi kalokolok wet. Parao inoukihda me e pahn kadarala mehn Israel ko. Eri Siohwa ketin kauhdi kalokoloko, oh mehn Isip ko ahpw kihpene kairu mehla ko oh wiahda koasoakoasoak tohto. Sahpwo ahpw tepida pwohsuwedida. Ahpw Parao pil saikinte men mweidala aramas ako ren kohkohla.

Siohwa eri mahsanihong Moses: ‘Aaron anahne poakiheki nah sokono nanpwel, oh pwelpar kan pahn wiahla kisin mahn tikitik me kin keikei.’ Ahnsowohte kisin mahn tikitik pwukat mihla wasa koaros. Ekei nein Parao aramas ako ndaiong ih: ‘Kalokolok wet kohsang rehn Koht.’ Ahpw, Parao pil saikinte men kadarala mehn Israel ko.