Moses oh Aaron kohla padahkihong Parao rohng pwoatet sang rehn Koht: ‘Ma ke sohte kadarala nei aramas akan, I pahn kadarodo loahng kan nan sahpwet.’ Mwuten loahng kan ahpw kadirehla imwen mehn Isip kan, koaros me kepwehpwe oh semwehmwe kan. Sahpwo pwon direkihla loahng. Ahpw sohte loahng nan sapwen Kosen, wasa me mehn Israel ko kin kousoan ie. Sang kapahieun kalokolok, mehn Isip kante me kin lokolongki. Parao peki rehn Moses: ‘Menlau peki rehn Siohwa en ketikihsang loahng pwukat oh kumwail kak kohkohla.’ Ahpw ni ahnsou me Siohwa ketikihsang loahng pwukat, Parao wekidala eh madamadau. Ia duwe, Parao pahn kak wekila pwehki dahme wiawihong ih?

Siohwa mahsanih: ‘Ma Parao sohte pahn kadarala nei aramas akan, nein mehn Isip mahn akan pahn soumwahuda oh mehla.’ Mwurin rahno, mahn akan tepida mehla. Ahpw nein mehn Israel ko mahn akan sohte mehla. Ahpw Parao pil keptakaite, oh e sohte men mweidirailla.

Mwuri Siohwa mahsanihong Moses en pwurala rehn Parao oh sipedadawohng pehs nan wehwe. Pehso ahpw wiahla pwelpar oh mwarakseli wasa koaros oh mwerediong pohn mehn Isip kan koaros. Pwelparo kahrehiong mehn Isip kan oh neirail mahn akan kens kamedek ni paliwararail kan. Mendahki met, Parao sohte men kadarala mehn Israel ko.

Siohwa pwurehng kadarala Moses rehn Parao pwehn padahkihong rohng pwoatet: ‘Ke pil kahngete kadarala nei aramas akan? Lakapw keteu aihs takai pahn mwerediong pohn sahpwet.’ Mwurin rahno, Siohwa ketin kadaridi keteu aihs takai, nansapwe, oh kisiniei. Met wia melimel me keieu suwed me lelohng Isip. Tuhke oh wahnsapw koaros ohla, ahpw me mi nan Kosen ko sohte ohla. Parao eri nda: ‘Peki rehn Siohwa en kauhdi met! Kumwail ahpw pahn kak kohkohla.’ Ahpw ni ahnsowohte me Siohwa ketin kauhdi met, Parao wekidala eh madamadau.

Moses eri nda: ‘Met loukust kan pahn kangala soangen tuhke koaros me luwehdi sang ni melimelo.’ Loukust rar kei ahpw kangala soahng koaros me luwehdi nan mwaht akan oh tuhke kan. Parao peki rehn Moses: ‘Menlau peki rehn Siohwa en ketikihsang loukust pwukat.’ Ahpw pil mwurin Siohwa eh ketikihsang loukust kan, Parao pil kepkeptakaite.

Siohwa ahpw mahsanihong Moses: ‘Kapahdawei pehmwen pahnlahng.’ Ni ahnsowohte, rotorot mosul pa tepida kipehdi wasao. Erein rahn siluh, mehn Isip kan sohte kak kilang mehkot de emen tohrohr. Mehn Israel kante me mie marain nan imwarail kan.

Parao eri ndaiong Moses: ‘Kowe oh noumw aramas akan kakehr kohkohla. Ihte kumwail kihdi noumwail mahn akan.’ Moses ahpw sapengki: ‘Se anahne wahda nait mahn akan pwe sen kak meirongkihong at Koht.’ Parao uhdahn lingeringerda. E werkihong: ‘Kohkohweisang mwohi! Ma I pwurehng kilang uhk, I pahn kemeiukala.’

Moses inoukihong Parao me e sohte pahn song en pwurehng tuhwong ih. Ahpw mwohn eh pahn kohkohla, e ndaiong Parao: ‘Ni lukepen pwong, mesenih koaros en Isip, sang nein Parao pwutak lel nein ladu kan pwutak, pahn mehla.’

Siohwa mahsanihong mehn Israel ko ren wia mwengehn soutik tohrohr ehu. E mahsanih: ‘Kemehla emen sihpw de kuht me sounpar ehu, oh kihong ekis ntahn mahno ni amwail wenihmw kan. Karangada uduko pohn kisiniei, oh kang seliehki pilawa sohte doal ihs. Kumwail pwuhriong nan amwail likoun seiloak oh sandel kan, oh onopadahng mwesel. Pwohng wet I pahn kasaledengkumwailla.’ Ke kak medewehla uwen peren me mehn Israel ko ahneki?

Sapwellimen Siohwa tohnleng men kohla ni ihmw koaros nan Isip ni lukepen pwong. Mesenih kan mehla nan ihmw kan me sohte mie nta ni arail wenihmw kan. Ahpw tohnlengo daulih ihmw kan me mie nta ni wenihmw kan. Emen seri sang nan peneineien Isip koaros, me kepwehpwe oh semwehmwe iang mehla. Ahpw sohte emen nein mehn Israel ko seri me mehla.

Nein Parao pwutako pil iang mehla. Parao solahr kakohng met. Ni ahnsowohte e ndaiong Moses oh Aaron: ‘Kumwail mwesel. Kohkohlahsang wasaht. Kohla oh kaudokiong amwail Kohto. Wahda noumwail mahn akan oh kohkohla!’

Maramo mat nipwongo me mehn Israel ko kaparieisang nan Isip. Re koasoansoandi nin duwen peneinei oh kadaudok kan ni ar mwesel kohwei. Ohl en Israel meh 600,000 ahpw pil mie lih oh seri tohto. Aramas tohto teikan pil iangirailda pwe ren pil kak iang kaudokiong Siohwa. Mehn Israel ko saledeklahr!

Irail pahn kin wia mwengehn soutik tohrohr wet sounpar koaros, pwe ren tamataman ia duwen Siohwa eh ketin kapitirailla. Met adaneki Pahsohpa.