Ni ahnsou me lipoahrok en Israel riemeno kohla ni kahnimw en Seriko, ira mihmi ni imwen lih emen me adaneki Reap. Nanmwarkien Seriko esehda met oh kadarala sounpei kei ni imwen Reap. E karukehla lipoahrok riemeno pohn pwelengen ihmwo oh kadarala sounpei ko ehu wasa tohrohr. Ih eri ndaiong lipoahrok riemeno: ‘I pahn sewese kumwa pwehki I ese me Siohwa kin ketin ieiang kumwail oh me kumwail pahn kalowehdi sahpwet. Menlau inoukihong ie me kumwail pahn kapitala ei peneinei.’

Lipoahrok ko eri ndaiong Reap: ‘Se inoukihda me sohte emen tohn omw peneinei pahn kamakamala.’ Ira pil nda: ‘Pirehiong ehu sahl weitahta ni omw wenihmwtoken, oh omw peneinei pahn pitila.’

Reap eri kadaridi lipoahrok riemeno ni sahl ehu sang ni eh wenihmwtoko. Ira kohdahla pohn nahna ko oh rukuruk wasao rahn siluh mwohn ara pwurala rehn Sosua. Eri mehn Israel ko kotehla Pillap Sordan oh onopadahng en alehdi sahpwo. Seriko iei tepin kahnimw me re kalowehdi. Siohwa mahsanihong irail ren kapar pidpidakih kahnimwo pak ehu nan ehuehu rahn ong rahn weneu. Ni keisuhn rahno, irail kapar pidpidakih kahnimwo pak isuh. Samworo ko eri peuk neirail sowi kan, oh sounpei ko weriwer ni ngihl laud uwen me re kak. Kehl en kahnimwo ahpw pwupwudi! Ahpw imwen Reap me mi pohn kehlo mihmihte oh sohte pwupwudi. Reap oh eh peneinei pitila pwehki Reap likih Siohwa.

Rohng en dahme wiawihong Seriko kohpeseng nan wehi teikan nan Kenan. Nanmwarki en wehi pwukat medewedahr ren ehupene oh peiong mehn Israel kan. Ahpw mehn Kipeon kan wiahda ehu koasoandi tohrohr. Irail likawihada likou tok kei oh kohla rehn Sosua oh ndaiong: ‘Se kohdohsang wasa doh. Se rong duwen Siohwa oh soahng koaros me e ketin wiahiong kumwail nan Isip oh Mohap. Inoukihda me kumwail sohte pahn mahweniong kiht, oh se pahn wiahla noumwail lidu.’

Sosua kamehlele irail oh pwungkihda me e sohte pahn mahweniong irail. Mwurin rahn siluh, e diarada me irail sohte kohdohsang wasa doh. Irail kohsang sapwen Kenan. Sosua eri idek rehn mehn Kipeon kan: ‘Dahme kumwail pitihkinkit?’ Irail eri sapeng nda: ‘Pwehki se masangkumwail! Se ese me Siohwa amwail Koht kin ketin peikin kumwail. Menlau dehr kemeikihtala.’ Sosua kolokolete eh inowo oh mweidohng irail en momourte.

Mwurinte mwo, nanmwarki en Kenan limen oh neirail sounpei ko kolahng uhwong mehn Kipeon kan. Sosua oh nah sounpei ko alialu nipwongo pwon pwehn kapitirailla. Mahweno eri mwadangete tepida nimenseng en mwurin rahno. Mehn Kenan ko ahpw tepida tangpeseng. Wasa koaros me re tangala ie Siohwa kin ketin kamwerediong pohrail aihs takai. Sosua eri patohwan peki rehn Siohwa en ketin kauhdi ketipino. Dahme kahrehda e patohwanohng Siohwa en ketin wia met mendahki ketipino eh saikinte pak ehu uhdi? Pwehki Sosua kin likih Siohwa. Ketipino sohte kihrla rahno pwon lao mehn Israel ko kalowehdi nanmwarki kan en Kenan oh neirail sounpei kan.