Mwurin Sosua eh kakahluwa sapwellimen Siohwa aramas akan ong sounpar tohto, e mehla ni eh sounpar 110. Erein eh wie momour, mehn Israel kan kin kaudokiong Siohwa. Ahpw mwurin Sosua eh mehla, irail tepida kaudokiong dikedik kan, duwehte me mehn Kenan kan kin wia. Pwehki mehn Israel ko sohte kin idawehn Siohwa, e ketin mweidohng nanmwarki en Kenan me adaneki Sapin en kahpwalihala arail mour. Aramas ako peki sawas sang rehn Siohwa. Siohwa eri ketikihong irail emen kaun kapw, Parak. E pahn sewese aramas ako ren pwurodohng rehn Siohwa.

Depora, lih soukohp men, ileklahng Parak en kohdo reh. Mie rohng ehu ong Parak sang rehn Siohwa: ‘Ale ohl 10,000, oh kohla tuhwong nein Sapin sounpei kan ni kisin piletik en Kison. Wasao ke pahn kalowehdi Sisera, nein Sapin kaunen sounpeio.’ Parak eri ndaiong Depora: ‘I pahn kohla ahpw ihte ma ke pahn iang ie.’ Depora eri sapeng nda: ‘I pahn iang uhk kohla. Ahpw ken ese me kaidehn kowe me pahn kemehla Sisera. Siohwa ketin mahsaniher me lih emen me pahn kemehla Sisera.’

Depora eri iang Parak oh nah sounpei ko kohdahla pohn Nahna Tapor pwe ren kaunopada ong mahwen. Ni ahnsou me Sisera rongada duwen met, e kihpene were werennansapw kan oh nah sounpei ko nan patapat en wahwo. Depora eri ndalahng Parak: ‘Rahnwet iei rahn me Siohwa pahn ketin kahrehiong uhk ken kana.’ Parak oh nah ohl 10,000 ko ahpw tangedihsang nin nahnao pwehn tuhwong oh peiong nein Sisera sounpei kehlail kan.

Siohwa eri ketin kahrehiong piletik en Kison en lapakehda. Weren Sisera werennansapw akan tengala nan pwelmatak ko. Sisera ahpw lussangete pohn were werennansapwo oh tang. Parak oh nah sounpei kan ahpw kalowehdi nein Sisera sounpei ko, ahpw Sisera pitila! E tang oh rukula nan impwal en lih emen me adaneki Sael. Liho eri kanimpilehki Sisera milik oh pwainkihdi pilangkes ehu. Ih eri meirla pwehki eh pwangada. Sael eri waila limwahn ohlo oh pasurdiong metehn ihmw likou ehu pohn moangen Sisera. Ih eri mehla.

Parak ahpw kohdo oh raparapahkiseli Sisera. Sael ahpw pedoisang nan eh impwalo oh ndaiong: ‘Keilongodo loalet. I pahn kasalehiong uhk ohl me ke raparapahkien.’ Parak ahpw pedolongala oh kilangada Sisera eh melahr. Parak oh Depora ahpw koulki koul en kaping ong Siohwa pwehki eh ketikihong mehn Israel kan kana ni ar powehdi ar imwintihti kan. Eri e ahpw miehla popohl rehn mehn Israel ko erein sounpar 40.

Ni erein ahnsou ehu mie apwal en mwenge wiawi nan Israel, lihen Israel men me adaneki Naomi iangih eh pwoudo oh neira pwutak riemeno keseula nan sapwen Mohap. Mwuhr en Naomi pwoudo mehla. Nah pwutak ko pwoudikihda lihen Mohap riemen, Rud oh Orpa. E kansensuwed pwehki kedekedeo nein Naomi pwutak ko pil mehla.

Ni ahnsou me Naomi rongada me sohla apwal en mwenge nan Israel, e medewehda en pwurala eh wasahn kousoano. Rud oh Orpa ahpw iangih mweselda, ahpw erein arail alialu kohwei pohn ahlo, Naomi ndaiong ira: ‘Kumwa wia lih pwopwoud mwahu kei ong nei pwutak ko oh wia nei serepein mwahu kei. I men kumwa en pwurehng pwopwoudida. Kumwa pwurala nan amwa wasahn kousoano Mohap.’ Lih ako ahpw sapengki: ‘Se poakepoakeiuk! Se sohte men kohkohsang uhk.’ Naomi kin pwurepwurehng ndaiong ira en pwurala. Kedekedeo, Orpa me pwurala, ahpw Rud mihmihte. Naomi ndaiong ih: ‘Orpa pwuralahr rehn kiseh ko oh eh koht akan. Iangih pwurala ni imwomwo rehn omw nohno.’ Rud ahpw sapengki: ‘I sohte pahn kohkohsang uhk. Kisehmw kan iei kisehi, oh omw Koht iei ei Koht.’ Ia omw madamadau, ia en Naomi pepehm ni ahnsou me Rud nda met?

Rud oh Naomi lella nan Israel ni ahnsoun dolung parli eh tepida. Ehu rahno, Rud kohlahng rikpene parli kan me pwupwusang soundolung kan nan mwaht en ohl emen me adaneki Pohas, me eh nohno Reap. Pohas rong me Rud iei lihen Mohap men me loalopwoatongete Naomi oh mihmihte reh. E padahkihong nah tohndoadoahk kan ren kihdi ekei wahn parli kan nan mwahto pwe Rud en kak rikpene.

Ni soutiko, Naomi ahpw idek rehn Rud: ‘Ahn ihs mwaht me ke doadoahk loale rahnwet?’ Rud ahpw sapengki: ‘Mwaht en ohl emen me adaneki Pohas.’ Naomi eri ndaiong: ‘Pohas kisehn ei pwoudo. Iang peinakapw teikan doadoahkte nan eh mwahto. Ke sohte pahn lelohng mehkot keper wasao.’

Rud ahpw pousehlahte doadoahk nan en Pohas mwahto lao ahnsoun dolung parli imwisekla. Pohas tehkada me Rud kin doadoahk laud oh wia lih mwahu men. Nan ahnsou ko, ma ohl emen mehla oh sohte nah pwutak, emen kiseh pahn kin pwoudikihda liho. Eri Pohas ahpw pwoudikihda Rud. Ira nainekihda pwutak emen me adaneki Oped, me mwuri wiahla en Nanmwarki Depit pahpa kahlap. Kompoakepahn Naomi kan perenkihda met. Irail nda: ‘Keieu, Siohwa ketikihong uhk Rud, me uhdahn kin mwahuong uhk, oh met ke wiahier nohno kahlap en kisin pwutak men. Kaping en kohwohng Siohwa.’