Mehn Israel ko pwurehng sohpeisang Siohwa oh kaudokiong koht likamw akan. Ni ahnsou me mehn Amon ko mahweniong oh peiong mehn Israel kan, koht likamw ko sohte wia mehkot pwehn sewese irail. Sounpar tohto, mehn Israel ko kin wie lokolok. Irail ahpw patohwanohng Siohwa: ‘Maing se dipadahr. Komw menlau doareikitasang aht imwintihti kan.’ Mehn Israel ko eri kauwehla neirail sansal ko oh pwurehng tepida kaudokiong Siohwa. Siohwa sohte kupwurki mahsanih ar kin wie lokolok.

Sounpei men me adaneki Sepda pilipilda pwehn kahluwa mehn Israel ko mahweniong mehn Amon kan. Sepda ahpw patohwanohng Siohwa: ‘Ma komw pahn sewese sen kana nan mahwen wet, I inoukihong komwi me ni ahnsou me I pahn pwurala ni imweio, I pahn patohwanohng komwi tepin aramas me pahn pedoisang nan ihmwo pwehn tuhwong ie.’ Siohwa eri ketin karonge en Sepda kapakapo oh ketin sewese ih en kana nan mahweno.

Ni ahnsou me Sepda pwurala ni imweo, tepin aramas me pedoi pwehn tuhwong ih iei nah serepeino, ihte nah seri en mwo. Nah serepeino wie kahkahlek oh kesekesengki dampwurin. Dahme Sepda pahn wia ni ahnsowo? E tamanda eh inowo oh nda: ‘Nei serepein! Ke kauwelahr mohngiongi! I wiahdahr inou ong Siohwa. Pwehn kapwaiada inowo, I anahne kadaruhkala pwe ken papah nan wasahn kaudoko nan Sailo.’ Ahpw nah serepeino ndaiong ih: ‘Ipa, ma ke wiadahr inou ong Siohwa, ke anahne kapwaiada. Ihte me I pahn peki iei ma I kak iang kompoakepahi kan kohdahla pohn nahna kan erein sounpwong riau. Mwurin mwo I ahpw pahn kohla papah nan wasahn kaudoko.’ Nein Sepda serepeino eri ni lelepek wie papah nan wasahn kaudoko erein eh mour. Sounpar koaros, kompoakepah kan kin kohla mwemweit reh nan Sailo.

Samworo Lapalap Ilai naineki pwutak riemen me kin papah nin duwen samworo kei ni wasahn kaudoko. Adara iei Opni oh Pineas. Ira sohte kin peikiong sapwellimen Siohwa kosonned kan, oh ara wiewia ong aramas akan uhdahn suwed. Ni ahnsou me mehn Israel ko kin wahdo arail mehn meirong ong Siohwa, Opni oh Pineas kin kihsang kanara uduk me keieu mwahu. Ilai rong duwen dahme nah pwutak ko kin wiewia, ahpw e sohte wia mehkot. Ia duwe, Siohwa pahn ketin mweidohng met en wiewiawihte?

Mendahki Samuel eh pwulopwul sang Opni oh Pineas, e sohte kahlemengih ira. Siohwa kin kupwurperenki Samuel. Ni eh wie memeir ehu pwohngo, e ahpw rongada ngihl ehu me liklikwerih edeo. E pwourda oh tangala rehn Ilai, oh nda: ‘Iet ngehi maing!’ Ahpw Ilai sapengki: ‘I sohte likwerihiuk. Pwurala meir.’ Samuel eri pwurala nan deweo. Ahpw e pil pwurehng rongada ngihl me liklikweriho. Ni kesilipak en ahnsou me Samuel rongada ngihlo, Ilai ahpw esehda me Siohwa me mahmahseniong Samuel. E ndaiong Samuel ma e pwurehng rongada ngihlo, e pahn nda: ‘Maing Siohwa, komw ketin mahsen. Sapwellimomwi ladu patohwan rongorong.’

Samuel eri pwurehng pwurala nan deweo. E ahpw rongada ngihlo: ‘Samuel! Samuel!’ Ih eri sapeng: ‘Komw ketin mahsen, pwe sapwellimomwi ladu patohwan rongorong.’ Siohwa ahpw mahsanihong: ‘Ndaiong Ilai me I pahn kaloke ih oh eh peneinei. E ese me nah pwutak ko kin wiewia soahng suwed kan ni ei tehnpaso, ahpw e sohte wia mehkot.’ Mandahn rahno Samuel ahpw ritingada wenihmw en wasahn kaudoko, nin duwen me e kalapw wia. E masak padahkihong samworo lapalapo dahme Siohwa mahsanihong ih. Ahpw Ilai ekerodo oh idek reh: ‘Nei pwutak, dahme Siohwa mahsanihong uhk? Ndaiong ie soahng koaros.’ Samuel eri ndaiong Ilai soahng koaros.

Ni Samuel eh wie kekeirda, Siohwa kin ketin pousehlahte sewese ih. Nan sahpwo pwon, mehn Israel koaros ese me Siohwa ketin piladahr Samuel en wia soukohp men oh sounkopwung men.