Siohwa ahpw mahsanihong Samuel: ‘Kohla ni imwen Sehsio. Emen nah pwutak ko me pahn uhd wiahla nanmwarki en Israel.’ Samuel eri kohla ni imwen Sehsio. Ni ahnsou me e kilangada nein Sehsi pwutak laudo, e medewe: ‘Mweinte ih mwahnakapw menet me Siohwa ketin piladahr.’ Ahpw Siohwa mahsanihong Samuel me kaidehn ih me e ketin piladahr. E mahsanih: ‘I kin kilang dahme mi nan en aramas mohngiong, kaidehn masliki.’

Sehsi pil kahrehdo nah pwutak wenemen teiko rehn Samuel. Ahpw Samuel ndaiong: ‘Siohwa sohte ketin pilada emen irail pwukat. Mie pil emen noumw pwutak?’ Sehsi ahpw sapengki: ‘Mie pil emen, Depit iei me keieu tikitik. E apwahpwalih nei pelin sihpw ko.’ Ni ahnsou me Depit kohdo, Siohwa mahsanihong Samuel: ‘Iei ih met!’ Samuel eri ale leho widekidiong pohn moangen Depito. E keiehdi ih me pahn uhd wiahla nanmwarki en Israel.

Ahnsou kis mwuri, mehn Israel kan mahmahweniong mehn Pilisdia kan oh kodon men me adaneki Kolaiad, me kin peikin irail. Ehuehu rahn, Kolaiad kin kapailoke mehn Israel kan. E werkilahng irail: ‘Kumwail kadarodo emen ohl me pahn peiong ie. Ma e kana, se pahn wiahla amwail lidu. Ma I kana, kumwail pahn wiahla at lidu.’

Depit ahpw leledo wasa me sounpei en mehn Israel ko kauwada imwarail impwal kan. E wahdo kenen rie pwutak ko me iang sounpei kanarail mwenge. E rongada Kolaiad oh nda: ‘I pahn peiong ih!’ Nanmwarki Sohl nda: ‘A ia duwen pwe kowe kisin pwutak emen.’ Depit sapengki: ‘Siohwa pahn ketin sewese ie.’

Sohl song kihong Depit en doadoahngki eh likoun mahwen ko, ahpw Depit nda: ‘I sohte kak pei doadoahngki met.’ Depit ahpw ale nah pahio de mehn koski takaio, oh kohdihla ni piletiko. E rikada kisin takai medendel limau oh kihong nan eh ehdo. Ih eri tang kolahng Kolaiad. Kodono werkilahng: ‘Nna keido kisin pwutak. I pahn wiahkinuhkala kenen menpihr en pahnlahng kan oh mahn lawalo kan.’ Depit sohte masepwehkada. E werkilahng Kolaiad: ‘Ke kodohn peikihong ie kedlahs oh ketieu pwoat, ahpw ngehi I kohkihdo ni mwaren Siohwa. Kaidehn kiht me ke mahmahweniong; Koht me ke mahmahweniong. Koaros me mi wasaht pahn kilang me Siohwa uhdahn manamansang kedlahs de ketieu pwoat. E pahn ketikihdiong kumwail pahn at manaman.’

Depit eri kihong ehu kisin takai nan nah pahio oh kapir uwen eh kak koaros. Pwehki sapwellimen Siohwa sawas, takaio pihrla oh irlongala nan temwen Kolaiado. Kodono ahpw pwupwudi oh mehla. Mehn Pilisdia ko eri tangpeseng. Ke kin likih Siohwa, duwehte Depit?

Mwurin Depit eh kemehla Kolaiad, Nanmwarki Sohl kihong ih en uhd wia kaunen nah sounpei kan. Depit kana nan mahwen tohto, oh e uhdahn ndandla. Ahnsou koaros me Depit kin pwurasang mahwen, lih akan kin kohieido kahkahlek oh kokoul ndinda: ‘Sohl kemehla meh kid, a Depit kemehla meh nen!’ Sohl eri tepida luwangki Depit oh men kemehla ih.

Depit kin mai en kesengki arp. Ehu rahno ni eh kesekesengki arp ong Sohl, nanmwarki menet katehki Depit ketieu pwoat. Depit ahpw sarek, oh ketieuo pa uhsang nin dihdo. Pak tohto mwurin mwo, Sohl kin songosong en kemehla Depit. Kedekedeo, Depit tangala oh rukula nan sapwtehno.

Sohl eri wahda nah sounpei 3,000 oh kohla rapahki Depit. Ih eri pedolong nan pwoaren paip me Depit oh nah ohl akan wie rukuruk ie. Nein Depit ohl akan ahpw mwengininginkihong: ‘Ih omw ahnsou mwahu en met en kemehla Sohl.’ Depit waila limwahn Sohl oh lekehsang imwin keimwen eh likouo. Sohl sehse me met wiawi. Mwurin mwo, Depit soansuwedkihda eh sohte kasalehda wahu ong nanmwarki me Siohwa ketin piladao. E sohte mweidohng nah ohl akan ren kemehla Sohl. E pil likweriong Sohl, nda me e kakete kemehla ih ni ahnsou mwahu me e ahnekio. Ia duwe, Sohl pahn wekidala eh madamadau ong Depit?

Soh. E pousehlahte rapahki Depit. Ehu pwohngo, Depit oh Apisai, me e pahn nainekio ahpw waila wasa me Sohl oh nah sounpei kan memeir ie. Apner nein Sohl sounsilasilo pil wie memeir. Apisai eri nda: ‘Iei ata ahnsou mwahu en met! Mweidohng ie ien kemehla.’ Depit eri sapengki: ‘Siohwa me pahn ketin kemehla. Kita wahdahte nah ketieuwo oh nah deupen pihlo oh kohkohla.’

Depit eri doudahla pohn nahna keren ehu me sallahng wasa me Sohl oh nah sounpei kan mi ie. E ahpw werkilahng irail: ‘Apner, dahme kahrehda ke sohte pere omw nanmwarkien? Ia nein Sohl deupen pihlo oh ketieuwo?’ Sohl ahpw rongada ngilen Depito oh nda: ‘Ke kakete kemeiehla ahpw ke sohte wia met. I ese me kowe me pahn uhd wiahla nanmwarki en Israel.’ Sohl eri pwurala ni tehnpeseo. Ahpw kaidehn en Sohl peneinei koaros kin kailongki Depit.