Keinek eisek en wehin Israel ko ahneki nanmwarki suwed tohto, ahpw Eihap pil emen me keieu suwed. E pwoudikihda lih suwed men me kin kaudokiong Paal. Eden lih menet iei Sesepel. Eihap oh Sesepel kadirehkihla sahpwo kaudok en Paal oh kemehla sapwellimen Siohwa soukohp kan. Dahme Siohwa ketin wia? E ketin kadarala soukohp Elaisa pwehn kihong Eihap rohng pwoat.

Elaisa ndaiong Nanmwarki Eihap me pwehki eh wiewia suwed kan, e pahn sohla keteu nan Israel. Erein sounpar siluh samwa, wahntuhke kan sohla keirda oh aramas ako duhpekla. Mwuhr Siohwa ketin pwurehng kadarala Elaisa rehn Eihap. Nanmwarkio ahpw ndaiong: ‘Kowe sounwiahda kahpwal! Kowe me pwukoahki mepwukat koaros.’ Elaisa ahpw sapengki: ‘Kaidehn ngehi me kahrehda eh sohla keteu. Kowe me kahrehda pwehki omw kin kaudokiong Paal. Kitail pahn wia mehkot pwehn kadehdehda dahme mehlel. Kapokonepene tohn wehio oh soukohp en Paal koaros pohn Nahna Karmel.’

Aramas ako ahpw pokonpene pohn nahnao. Elaisa eri nda: ‘Kumwail kainenehla amwail lamalam. Ma Siohwa me Koht mehlel, a kumwail idawehn. Ahpw ma Paal me Koht, a kumwail idawehn. I luke kumwail en iang wia met. Soukohp en Paal 450 ko pahn kaunopada arail mehn meirong oh likweriong arail koht, oh I pahn kaunopada ei mehn meirong oh likweriong Siohwa. Mehmen me pahn sapeng ni eh pahn kadarodo kisiniei iei ih me Koht mehlel.’ Aramas ako eri pwungkihda.

Soukohp en Paal ko ahpw kaunopada arail mehn meirong. Rahn ehu pwon irail likilikweriong arail kohto: ‘Paal, sapeng kiht!’ Ni ahnsou me Paal sohte sapeng irail, Elaisa ahpw tepida wiahki mehn kemenkouruhr Paal. E nda: ‘Kumwail likwerih ni ngihl laud uwen amwail kak koaros. Mweinte e wie memeir, oh emen anahne kohla pangenda ih.’ Ni eh soutikpenehr, soukohp en Paal kan wie likilikwerte. Ahpw sohte pasapeng ehu leledo.

Elaisa eri kihdiong eh meirong ko pohn pei sarawio oh wudekiong pihl powe. Ih eri kapakap: ‘Maing Siohwa, komw kupwurkalahngan oh kasalehiong aramas pwukat me komwi me Koht mehlel.’ Ni ahnsowohte, Siohwa ketin kadaridi kisiniei sang nanleng oh isikada meirongo. Aramas ako ahpw weriwerki ndinda: ‘Siohwa me Koht mehlel!’ Elaisa ahpw nda: ‘Dehr mweidohng soukohp en Paal kan ren tang!’ Rahnohte, soukohp en Paal 450 ko kamakamala.

Ni ahnsou me kisin pelien depwek pwarada pohn sehdo, Elaisa ahpw ndaiong Eihap: ‘Melimel ehu kohkohdo. Kaunopada weromw kurumahn, oh kohkohla ni imwomwo.’ Nan wehwe ahpw tepida rotorotkihla depwek, kisinieng wie ipihpseli, oh keteu laud tepida mweredi. Eri, mwurin ahnsou werei keteu pil pwurehng mweredi. Eihap tangahki were kurumao ni uwen marahra me e kak. Pwehki sapwellimen Siohwa sawas, Elaisa tang marahrahsang kurumao! Ahpw en Elaisa kahpwal ko koaros sohla? Kitail pahn kilang.

Sesepel rongada dahme wiawihong soukohp en Paal ko, oh e uhdahn lingeringerkihda. E kadaralahng Elaisa rohng pwoat: ‘Lakapw, ke pahn kamakamala duwehte soukohp en Paal ko.’ Elaisa ahpw masepwehkada douluhl oh tangala nan sapwtehno. Ih eri kapakap: ‘Siohwa, I solahr kakohng met. Mweidohngiehte ien mehla.’ Elaisa uhdahn pwangada, ih eri meirla pahn tuhke pwoat.

Tohnleng men ahpw pangenda oh ni kadek ndaiong: ‘Pwourda oh mwenge.’ Elaisa eri kilangada lopwon en pilawa ehu pohn takai karakar kei oh deupen pihl ehu. E ahpw mwenge, nimpil oh pwurala meir. Tohnlengo ahpw pwurehng pangenda oh ndaiong: ‘Mwenge. Ke anahne kehl ong omw seiloak.’ Elaisa ahpw pil pwurehng mwenge. Ih eri seiloangki rahn 40 oh pwohng 40, lao e lella pohn Nahna Orep. Wasao Elaisa doulong nan pwoaren paip ehu pwehn meir. Ahpw Siohwa mahsanihong ih: ‘Elaisa, dahme ke wiewia wasaht?’ Elaisa ahpw sapeng: ‘Mehn Israel ko kauwelahr ar inou ong komwi. Irail kauwehla sapwellimomwi pei sarawi kan oh kemelahr sapwellimomwi soukohp kan. Met irail pil songosong en kemeiehla.’

Siohwa ahpw mahsanihong: ‘Kohla oh kesihnenda pohn nahnao.’ Keieu, kisinieng laud ehu pa ipidohte daulih pwoaren paipo. Mwuri, mie rerrer en sahpw ehu oh kisiniei ehu. Mwurin mwo, Elaisa rongada ngihl ehu me wawai oh meleilei. Ih eri perehkihla meseo eh likoun likio oh kesihnenda likin pwoaren paipo. Siohwa eri keinemwe reh dahme kahrehda e tang. Elaisa ahpw sapengki: ‘Ngehite me luhwehdi.’ Ahpw Siohwa mahsanihong ih: ‘Ke sohte kelekelehpw. Mie meh 7,000 nan Israel me kin kaudokiongiehte. Kohla oh idihada Elisa nin duwen soukohp men pwehn wilianuhkedi.’ Ni ahnsowohte, Elaisa ahpw kohla wia dahme Siohwa mahsanihong ih en wia. Ia duwe, ke medewe me Siohwa pahn pil ketin seweseiuk ni ahnsou me ke kin wia dahme e kupwurki ken wia? Ei, e pahn. Kitail pahn kilang dahme wiawi erein eh sohte keteu nan Israel.