1, 2. Irair dahieu me sounapwalih me kin seiloak kan diarada nan mwomwohdiso tohto?

SOUNAPWALIH me kin seiloako pahn kaimwiseklahr eh mihting rehn pwihn en elder kan. Ni eh kilang pohn masarail ko, e inenen poakepoakehda sounsilepe pwukat me kin doadoahk laud, ekei uhdahn mah kakete wia eh pahpa. Ahpw, miehte ehu iren kapwunod me e men kasalehda, ih eri idek rehrail, “Riei ko, dahme kumwail wiadahr me pid amwail en kaiahne meteikan pwe ren katohtohla arail pwukoa nan mwomwohdiso?” Elder ko tamataman me erein sounapwalih me kin seiloako eh mwemweitdo mwoweo, e kangoange irail en tehkada mwahu duwen arail en kaiahne meteikan. Emen elder ko eri nda, “Ni mehlel, se sohte nohn wia met.” Elder ko koaros pil pwungki.

² Ma kowe emen elder, ke kak wehwehki dahme wiawi nan mihtingo? Uhdahn. Sounapwalih me kin seiloak kan nan sampah pwon tehkada me nan mwomwohdiso tohto, soahng tohto anahne wiawi pwehn kaiahne brother kan, me pwulopwul de me mah, pwe ren sewese apwalih mwomwohdiso. Met kihda kahpwal ehu. Dahme kahrehda?

3. (a) Ia duwen Paipel eh kasalehda kesempwalpen kaiahne meteikan, oh dahme kahrehda kitail koaros anahne esehla met? (Menlau kilang nting tikitik kan.) (b) Dahme kahrehda ekei elder kan kin apwalki kaiahne meteikan?

³ Nin duwen sounsilepe men, ke uhdahn pohnese me omw kin kaiahne emen uhdahn kesempwal.a Ke ese me anahnepen brother tohto kin laud pwe mwomwohdiso kan en kehlail oh pwe mwomwohdiso kapw kan en wiawihda. (Wadek Aiseia 60:22.) Ke pil ese me Mahsen en Koht kin kangoange iuk ken “padahkihong aramas teikan.” (Wadek 2 Timoty 2:2.) Mendahki met, ele ke diarada me e apwal en wia met, duwehte elder ko me kitail koasoiapene mwoweo. Mwurin omw kin apwalihala anahn en omw peneinei, kapwaiada omw pwukoa kan nan omw doadoahk en mwohni, wia pwukoa kan nan mwomwohdiso, oh pil soahng teikan me ke anahne wiahda ni karuwaru, e kin mwomwen me solahr ahnsou me luwehdi pwe ken kaiahne meteikan nan mwomwohdiso. Pwehki met, kitail pahn koasoiapene ia kesempwalpen en kihda kaiahn ong meteikan.

KAIAHN WIA MEHKOT ME KEIEU ANAHN

4. Dahme kahrehda ekei elder kin kihla ahnsoun kaiahn en wiawi ehu ahnsou tohrohr?

⁴ Dahme kakete wia kahrepe ehu me ekei elder kan ele apwalki koasoanehdi ahnsou pwe ren kaiahne meteikan? Ele ekei kin medewe: ‘En kaiahne meteikan kesempwal, ahpw e sohte nohn karuwaru duwehte pwukoa teikan nan mwomwohdiso me uhdahn sohte kak awih. Ma I anahne kihla ahnsoun kaiahn ong ehu ahnsou tohrohr, mwomwohdiso pahn mwamwahute.’ Mehlel me mie pwukoa tohto me ke anahne apwalihala ni ahnsou karuwaru, ahpw ma ke kihla ahnsoun kaiahn ong ehu ahnsou tohrohr, irair mwahu en mwomwohdiso kak mihla nan keper.

5, 6. Dahme kitail kak sukuhlkihsang karasaras en soundake sidohsao oh eh kin kilangwohng eh pahn apwalih misihn en sidohsao? Ia duwen karasaras wet eh kadoadoahk ong kaiahn me kin wiawi nan mwomwohdiso?

⁵ Medewehla karasaras wet: Soundake sidohsa men ele ese me en apwalih mwahu were sidohsa oh pwe misihno en kak wie tangatang, e anahne kaukaule wilianda oil en sidohsao. Ahpw, ele e medewe me met sohte nohn karuwaru duwehte eh kin anahne audehda kahs en sidohsao. Met pwehki ma e sohte audehda sidohsao, sidohsao pahn sohte pwand uhdi. Ele e medewe: ‘Ma sohte ei ahnsou en wilianda oilo, misihn en sidohsao pahn wie tangatangte, mwein ong erein ahnsou kis.’ Ahpw ia keperpen met? Ma soundake sidohsao kin pwurepwurehng kihla ahnsoun apwalihala misihn en sidohsao ong ehu ahnsou, ehu rahn sidohsao pahn uhdi oh sohla kak tang. Ma met wiawi, e pahn doadoahngkihla ahnsou oh mwohni laud pwehn kamwahwihala sidohsao pwe sidohsao en kak pwurehng tangatang. Dahme kitail sukuhlkihsang met?

⁶ Elder kan kin apwalih pwukoa kesempwal tohto me re anahne wiahda ni karuwaru; pwe ma soh, mwomwohdiso pahn kakete lelohng kahpwal. Eri, duwehte soundake sidohsao nan karasaraso me kin tehk mwahu en pwurepwurehng audehki kahs wereo, elder kan anahne “pilada dahme keieu mwahu [“kesempwal,” NW].” (Pil. 1:10) Ahpw, ekei elder kan kin uhdahn kedirepwkihla arail tetehk pwukoa kan me karuwaru me ele kahrehda ren sohla nsenohki kaiahne meteikan, ni karasaras, duwehte apwahpwalih misihn en sidohsao. Ahpw ma elder kan kin kihla ahnsoun kaiahn me anahn ong ehu ahnsou, ehu rahn e pahn sohla itar brother koahiek kan nan mwomwohdiso me pahn apwalihala soahng koaros me anahne wiawi.

7. Ia duwen atail en kilangwohng elder kan me kin kihong ahnsou en kaiahne meteikan?

⁷ Eri, e sansal me kitail en dehr medemedewe me kaiahn sohte nohn kesempwal. Elder kan me kin kilikilangla mwowe oh doadoahngki mwahu arail ahnsou pwehn kaiahne brother kan me sohte nohn koahiek kin wia sounpapah loalokong kei oh wia kapai laud ong mwomwohdiso pwon. (Wadek 1 Piter 4:10.) Ia duwen mwomwohdiso eh kin paiekihda?

KIHONG AHNSOU ONG KAIAHN WIA ELEN LOALOKONG

8. (a) Soangen madamadau oh irair dah kan me kin kamwakid elder kan en kaiahne meteikan? (b) Pwukoa kesempwal dahieu me elder kan me keseula wasa kan me mie anahn laud ong sounkalohk ahneki? (Menlau kilang koakon me oaralape “Pwukoa Kesempwal Ehu.”)

⁸ Pil elder kan me keieu koahiek anahne pohnese ni aktikitik me ni arail mahmahla, pwukoa kan me re kak wia ong mwomwohdiso pahn ekisekis tikitikla. (Maika 6:8) Irail pil anahne ni mehlel medemedewe me “paisuwed kin lelohng aramas koaruhsie” oh met ele kak kahrehda wekidekla ieu me sohte kasikpe en wiawihong arail koahiek en apwalih pwukoa kan nan mwomwohdiso. (Ekl. 9:11, 12; Seims 4:13, 14) Eri sang arail kin nsenohki mehlel epwel mwahu en sapwellimen Siohwa sihpw kan, elder kan me kin kilikilangla mwowe kin ehukihong brother pwulopwul kan ni ahnsou me konehng duwen arail koahiek me re alehdi sang arail kin papah erein sounpar tohto.​—Wadek Melkahka 71:17, 18.

9. Dahme pahn wiawi ahnsou kohkohdo me kahrehda kaiahne meteikan uhdahn kesempwal?

⁹ Ia pil ehu kahrepe me elder kan me kin kaiahne meteikan wia kapai ehu ong mwomwohdiso? Re kin kakehlakahda mehn perepe mwahu en mwomwohdiso. Ia duwen? Ahn elder kan arail nannanti en kaiahne meteikan kin imwikihla brother tohto me pahn sewese mwomwohdiso en tengeteng oh miniminpene, kaidehn ihte ong ahnsou wet ahpw keieu ong ahnsou apwal akan me pahn kohdo erein kahn kamakam kowahlapo. (Esek. 38:10-12; Maika 5:5, 6) Kahrehda, elder kan, se peki kumwail en koasoanehdi en wiahkihla ahnsoun kaiahn mehkot me kumwail kin kalapw wia nan amwail doadoahk en papah rahnwet.

10. Pwehn ahneki ahnsoun kaiahne meteikan, dahme elder men ele anahne wia?

¹⁰ Ei mehlel, se wehwehki me omw kin doadoahngki ahnsou laud pwehn apwalih pwukoa kesempwal kan nan mwomwohdiso ele kin kahrehiong uhk ken pehm me ke sohla kakohng. Kahrehda, ele ke anahne doadoahngki ekis en ahnsou ko pwehn kaiahne meteikan. (Ep. 5:16) Omw wia met pahn wia elen loalokong.

KAUNOPADA IRAIR KAN ME PAHN MWAHU ONG OMW PAHN WIA KAIAHN

11. (a) Iren sawas dah kan sang elder kan nan sahpw teikan me pid kaiahn me kitail men esehla? (b) Nin duwen me Lepin Padahk 15:22 kasalehda, dahme kahrehda e pahn mwahu ong kitail en tehkpene iren sawas kan sang elder teikan?

¹¹ Me keren, peidek kohwong pwihn en elder ehu me kin pweida mwahu ni arail sewese brother kan ren kalaudehla arail papah Siohwa duwen dahme re kin wia ni arail kaiahne meteikan.b Mendahki irair en brother pwukat uhdahn wekpeseng, kaweid me re kihda kereniong duwepenehte. Dahme met kasalehda? E kasalehda me kaiahn me poahsoankihda Paipel kin mwahuwong tohnsukuhl kan “wasa koaros nan mwomwohdiso kan,” duwehte me wiawi ni mwehin wahnpoaron Pohl. (1 Kor. 4:17) Eri, nan iren onop wet oh iren onop en mwuhr, kitail pahn koasoiapene ekei iren sawas kan me elder pwukat kihda. (Lep. Pad. 15:22) Pwehn mengei ong koaros, iren onop pwukat pahn doadoahngki lepin lokaia “sounpadahk” ong irail kan me kin kihda kaiahn, oh “tohnsukuhl” ong irail kan me kin ale kaiahn.

12. Dahme sounpadahk men anahne kaunopada, oh dahme kahrehda?

¹² Sounpadahk men anahne kaunopada irair kan me pahn mwahu ong eh pahn wia kaiahn. Duwehte soun mwetuwel men eh kin wiahiong pwehlo en mwuterekla mwohn eh pahn padokedi war kan, ih pil duwen sounpadahk men eh anahne kaunopada mohngiong en tohnsukuhl men mwohn eh pahn kasukuhliong mehkot kapw. Eri ia duwen sounpadahk kan ar kin kaunopada irair kan me pahn mwahu ong ar pahn kaiahne meteikan? Sang ni arail idawehn koasoandi ehu me duwehte dahme soukohp en mahs men wia. Dahme soukohp menet wia?

13-15. (a) Pwukoa dahieu me soukohp Samuel alehdi? (b) Ia duwen Samuel eh kapwaiada eh pwukoa? (Menlau kilang tepin kilel.) (c) Dahme kahrehda elder kan pahn men esehla koasoipen Paipel wet duwen Samuel rahnwet?

¹³ Rahn ehu, daulih sounpar 3,000 samwalahro, Siohwa ketin mahsanihong soukohpo Samuel me mahlahr: “Lakapw, soangen ahnsou wet, I pahn kadarewohng uhk ohl emen me kisehn kadaudok en Pensamin; keiehdi pwe en wiahla kaunen nei aramas akan en Israel.” (1 Sam. 9:15, 16) Samuel wehwehkihda me eh pwukoahn sounkaweid imwiseklahr oh me Siohwa ketin idihada ih en keiehdi emen me pahn wiliandi. Ele Samuel medewe, ‘Ia duwen ei kak kaunopada ohl menet ong eh pwukoa?’ Ih eri medewehda oh koasoanehdi dahme e pahn wia.

¹⁴ Rahno mwuri, ni Samuel eh kilangada Sohl, Siohwa ketin padahkihong soukohpo: “Ien ohl me I ndaiong uhk duwe.” Samuel eri wia dahme eh koasoanehdio. E luke Sohl en iang ih mwenge nan pere laud ehu. Ih eri kihong Sohl oh nein Sohl laduwo ira en mwohd ni moangen tehpelo oh kamwengehki Sohl uduk me sounkuko katohrehla ong Sohl oh ndaiong: “Tungoale, pwe I wie nekinekidohng uhk pwe ke en tungoale ahnsou wet.” Mwuri, Samuel oh Sohl eri kohdihla ni imwen Samuelo, koasoakoasoi ni ara alialu kohla. Samuel men isaneki soangen ahnsou mwahwo mwurin ara mwenge mwahu oh ara alialu kohla. Eri e luke Sohl en iang ih kohdahla pohn pwelengen imweo. Samuel pousehlahte koasoakoasoiong Sohl lao ira meirla. Mandahsang rahno, Samuel keiehdi Sohl, metik, oh pil kihong ekei kaweid. Mwurin mwo, e kadarala Sohl, oh Sohl onopadahngehr dahme pahn wiawi.​—1 Sam. 9:17-27; 10:1.

¹⁵ Mehlel, en keiehdi emen pwehn wiahla sounkaweid en wehi ehu sohte duwehte en kaiahne brother men en wiahla elder de sounsawas men nan mwomwohdiso. Mendahki met, elder kan rahnwet kak ale ekei kaweid mwahu sang dahme Samuel wia. Kitail pahn tehkpene meh riau.

SOUNPADAHK ME PERENKI KASUKUHL OH PIL WIA KOMPOAKEPAH MEHLEL

16. (a) Ia ahn Samuel eh pepehm ni mehn Israel kan ar peki en mie arail nanmwarki? (b) Soangen madamadau dah me Samuel kasalehda ni eh kapwaiada eh pwukoa en keiehdi Sohl?

¹⁶ Perenki kasukuhl, kaidehn ni mehnseiren. Ni Samuel eh tepin rongada me mehn Israel kan men en mie arail nanmwarki, e nsensuwedkihla oh pehm me aramas ako soikala ih. (1 Sam. 8:4-8) Ni mehlel, e uhdahn sohte men wia dahme aramas ako men en wia, kahrehda pak siluh Siohwa anahne ketin mahsanihong ih en rong irail. (1 Sam. 8:7, 9, 22) Mendahki met, Samuel sohte mweidohng pepehm en lingeringer de mwakar ong ohl me pahn wiliandi ih en kekeirda nan eh mohngiong. Ni Siohwa eh ketin mahsanihong ih en keiehdi Sohl, soukohpo peikiong, kaidehn ni mehnseiren pwehki met wiahte pwukoa ehu, ahpw e perenki wia met pwehki eh limpoak.

17. Ia duwen elder kan rahnwet ar kin alasang madamadau en Samuel, oh ia duwen arail kin paiekihda met?

¹⁷ Duwehte Samuel, elder koahiek kan rahnwet kin kasalehda kadek ong irail kan me re kin kaiahne. (1 Pit. 5:2) Soangen elder pwukat sohte kin pweieksang pwukoa en kaiahne meteikan. Re sohte perki ma ekei pwukoa me re ahneki nan mwomwohdiso kakete kohwong tohnsukuhl ko. Sounpadahk kadek pwukat kin kilangwohng tohnsukuhl ngoang kan, kaidehn pwe irail en siai ong, ahpw nin duwen me kin ‘iang irail doadoahk.’ Re pil kin kilangwohng tohnsukuhl ko nin duwen kisakis kesempwal kei ong mwomwohdiso. (2 Kor. 1:24; Ipru 13:16) Oh ia uwen sounpadahk kadek pwukat ar kin paiekihda ni arail kilang duwen tohnsukuhl pwukat ar doadoahngki arail koahiek pwehn wia kamwahu ong mwomwohdiso!​—Wiewia 20:35.

18, 19. Ia duwen elder men eh kak kaunopada mohngiong en tohnsukuhl men? Dahme kahrehda eh wia met uhdahn kesempwal?

¹⁸ Wia kompoakepah mwahu men, kaidehn ihte sounpadahk men. Rahno me Samuel tuhwongada Sohl, e kakete ale pwoatol en leho oh mwadangete widekihong pohn moangen Sohl oh kadarala ih nin duwen nanmwarki kapw men me keidier ahpw uhdahn sohte onopada mwahu. Ni kadek, Samuel kihong ahnsou pwehn ekisekis kaunopada ahn Sohl eh mohngiong. Ihte mwurin ara tungoale mwenge mwahu, koasoakoasoi alialu kohla oh kommoaldi mwahu me soukohpo pehm me ahnsou lelehr en keiehdi Sohl.

¹⁹ Pil duwehte, sounpadahk men rahnwet anahne tapiada kaiahn sang eh kihong ahnsou en kaunopada irair kan oh nanpwungen ih oh tohnsukuhlo en soanamwahu. Kahk kan me elder men kin wia pwehn kaunopada soangen nanpwungmwahu me e ahneki rehn tohnsukuhlo nan ehu wasa pahn weksang irair en sahpw teikan. Met kin poahsoankihda irair oh tiahk en wasao. Ahpw sohte lipilipil wasa ke mi ie, ma kowe elder soupisek men me kin koasoanehdi ahnsou ong tohnsukuhl men, e kin mwomwen me ke ndindaiong ih, “I kesempwalkin uhk.” (Wadek Rom 12:10.) Mendahki ke sohte ndahla lepin lokaia pwukat, tohnsukuhl ngoang kan wasa koaros pahn uhdahn wehwehki mwahu oh uhdahn kalahnganki omw wiewiao.

20, 21. (a) Ia duwen omw pahn kawehwehda sounpadahk men me kin pweida mwahu? (b) Dahme kitail pahn koasoiapene nan iren onop en mwuhr?

²⁰ Elder kan, tamataman me sounpadahk men me kin pweida mwahu iei emen me sohte kin ihte perenki kasukuhlih emen ahpw e pil kin poakohng aramaso me e kin kaiahne. (Pil kilang Sohn 5:20.) Tohnsukuhl men kak mwadang esehda dahme kesempwal rehn sounpadahko oh met kin uhdahn kamwakid mwomwen tohnsukuhlo eh kin kilangwohng kasukuhl me e kin ale. Ihme kahrehda, elder kan, ni amwail kin kihda kaiahn, wia kompoakepah mwahu men, kaidehn ihte sounpadahk men.​—Lep. Pad. 17:17; Sohn 15:15.

²¹ Mwurin elder men kin kaunopada mohngiong en tohnsukuhl men, e men padahkihong tohnsukuhlo koahiek kan me e anahne esehla. Soangen wiepe dah kan me eldero kak doadoahngki? Kitail pahn koasoiapene met nan iren onop en mwuhr.

1. (a) Dahme sapwellimen Koht ladu kan kin ahnsou koaros ese duwen kaiahn, oh ia duwen met eh dokedoke rahnpwukat? (b) Dahme kitail pahn koasoiapene nan iren onop wet?

SAPWELLIMEN Koht aramas akan kin ahnsou koaros ese me kaiahn kin sewese emen en pweida mwahu. Karasepe, Eipram kapokonepene nah “ohl loalopwoat [“kaiahndahr,” NW] kan” me pweida nan arail mahweno oh kapitala Lohd. (Sen. 14:14-16) Ni mwehin Nanmwarki Depit, sounkoul kan “kaiahndahr” ni arail kin koulki koul en kaping ong Siohwa. (1 Kron. 25:7, NW) Rahnpwukat, kitail anahne pelianda Sehdan oh eh sampah. (Ep. 6:11-13) Kitail pil anahne doadoahk laud pwehn kapinga Siohwa sang ni atail padahkihong meteikan duwen mwareo. (Ipru 13:15, 16) Duwehte sapwellimen Koht ladu kan mahs, kitail anahne kaiahndahr pwe kitail en kak pweida. Nan mwomwohdiso, Siohwa ketikihongehr elder kan pwukoa en kaiahne meteikan. (2 Tim. 2:2) Wiepe dah kan me ekei elder kin doadoahngki pwehn kaiahne brother kan en apwalih sapwellimen Siohwa aramas akan?

KAKEHLAKAHDA AHN TOHNSUKUHLO EH POAKOHNG SIOHWA

2. Mwohn elder men eh pahn padahkihong tohnsukuhl men wiepe kapw ehu, dahme eldero ele pahn men wia, oh dahme kahrehda?

² Kitail kak karasahiong elder men soun mwetuwel men. Mwohn eh pahn padokedi war kan, soun mwetuwelo ele anahne kapatahiong pwehlo koiasi pwe tuhkeo en keirda oh kehlailla. Ni ahlohte, mwohn elder men eh pahn padahkihong tohnsukuhl men wiepe kapw ehu, ele e men ehukihong tohnsukuhlo ekei kaweid de ire mehlel kan en Paipel me pahn sewese en kaunopada pwehn doadoahngki dahme e sukuhlki.​—1 Tim. 4:6.

3. (a) Ia duwen elder men eh kak doadoahngki sapwellimen Sises mahsen nan Mark 12:29, 30 ni eh koasoakoasoiong tohnsukuhl men? (b) Ia duwen kapakap en elder men eh kak kamwakid tohnsukuhl men?

³ E kesempwal en wehwehki ia duwen padahk mehlel eh kin kamwakid madamadau oh pepehm en tohnsukuhlo. Pwehn wia met, ele ke kak idek reh ia duwen eh inoukihong Siohwa eh mour eh kamwakid pilipil kan me e kin wiahda nan eh mour. Peidek wet kak kahrehda amwa pahn koasoiapene ia duwen atail kak papah Siohwa sang mohngiongitail unsek. (Wadek Mark 12:29, 30.) Ele kumwa pil men kapakap oh peki rehn Siohwa en ketikihong brothero sapwellime manaman me brothero anahne ong eh kaiahn. Ni brothero eh rong omw kapakapki ih, met pahn uhdahn kamwakid ih en wia laudsang mwoweo.

4. (a) Kihda mehn kahlemeng kan sang nan Paipel me kak sewese tohnsukuhl men en kekeirda. (b) Mehn akadei dahieu me elder kan anahne ahneki ni arail kin kaiahne meteikan?

⁴ Ni omw tepin tepida kaiahne emen, e mwahu en koasoia duwen koasoipen Paipel kan me sewese tohnsukuhlo en kilang kesempwalpen en kin iang sawas, wia emen me aramas kin koapworopworki oh pil aktikitik. (1 Nan. 19:19-21; Neh. 7:2; 13:13; Wiewia 18:24-26) Irair kaselel pwukat kin uhdahn kesempwal ong tohnsukuhlo, duwehte koiasi eh kin mwahu ong pwehl. Irair pwukat pahn sewese tohnsukuhlo en kekeirda mwadang. Emen elder sang France me ede Jean-Claude nda me eh mehn akadei ni eh kin kihda kaiahn iei en sewese tohnsukuhlo en wiahda pilipil loalokong kan me poahsoankihda kaweid kan oh ire mehlel kan en Paipel. E nda: “I kin rapahki ahnsou kan me se kak wadekpene iren Paipel ehu pwehn ‘kapehdpeseng’ pwoaren mesen tohnsukuhlo, pwe en kilang ‘soahng kapwuriamwei kan’ nan sapwellimen Koht mahsen.” (Mel. 119:18) Ia pil ekei ahl me ke kak doadoahngki pwehn kakehlakahda tohnsukuhl men?

SEWESE KIHDA MEHN AKADEI KAN OH KAHREPE KAN

5. (a) Ia uwen eh kesempwal en koasoiaiong tohnsukuhl men duwen mehn akadei kan ni eh kin papah Siohwa? (b) Dahme kahrehda elder kan anahne kaiahnehda irail kan me pwulopwulte? (Menlau kilang nting tikitik kan me kileldi.)

⁵ Idek rehn tohnsukuhlo ia eh mehn akadei kan ni eh kin papah Siohwa. Ma sohte eh mehn akadei, sewese ih en wiahda ehu me e kak kapwaiada. Kasalehda ngoang ni omw padahkihong ih duwen mehn akadei ehu me ke wiadahr oh ia uwen omw peren ni ahnsou me ke kapwaiada. Wiepe wet mengei oh e kin doadoahk. Victor, emen elder oh pioneer nan Aperika, nda: “Ni ahnsou me I pwulopwul, emen elder idek rehi ekei peidek duwen ei mehn akadei kan. Peidek ko sewese ie en tepida medemedewe mwahu duwen ei doadoahk en kalohk.” Elder koahiek kan nda me e kesempwal en kaiahnehda brother kan ni arail pwulopwulte, mwein ni arail sounpar eisek samwa. Ke kak kihong irail ekei doadoahk nan mwomwohdiso me konehng arail sounpar. Ma brother kan kaiahnda ni arail pwulopwulte, e kak sewese irail en medemedewehte arail mehn akadei kan pil ni ahnsou irail laudla oh lelohng soahng tohto me kakete kerempwa irail.​—Wadek Melkahka 71:5, 17.a

6. Wiepen kaiahn dahieu me Sises ketin doadoahngki pwehn kaiahne meteikan?

⁶ Pwehn kamwakid tohnsukuhlo en iang sawas, ke anahne wia laudsang en ihte padahkihong ih dahme en wia. Ke pil anahne kawehwehda dahme kahrehda e kesempwal en wia met. Sounpadahk Lapalapo, Sises, mahsanihong sapwellime wahnpoaron ko ren kalohk. Ahpw keieu e ketin padahkihong irail dahme kahrehda irail en peikiong. E mahsanih: “Manaman koaros en nanleng oh sampah mweimweiongieier. Kumwail eri kohwei wasa koaros oh padahkihong tohn wehi kan koaros.” (Mad. 28:18, 19) Ia duwen omw kak alasang wiepen kaiahn wet me Sises ketin doadoahngki?

7, 8. (a) Ia duwen elder kan rahnpwukat ar kak alasang wiepen kaiahn me Sises ketin doadoahngki? (b) Ia uwen eh kesempwal en kapinga tohnsukuhl men? (c) Iren sawas dah kan me kak sewese elder kan en kaiahne meteikan? (Menlau kilang koakon me oaralape “Ia Duwen Omw Pahn Kaiahne Meteikan.”)

⁷ Ni omw peki rehn brother men en wia ekei doadoahk, kawehwehiong ih sang nan Paipel dahme kahrehda doadoahko kesempwal. Ni omw wia met, ke kin padahkihong ih en wia soahng kan pwehki kaweid kan de ire mehlel kan me poahsoankihda Paipel ahpw kaidehn ihte kosonned kei. Karasepe, ma ke peki rehn brother men en kin apwalih mwahu wasahn pedolong en Wasahn Kaudoko pwe en mwakelekel oh sohte keper en alu, ele ke kak kasalehiong ih Taitus 2:10. Kawehwehda ia duwen eh doadoahko pahn kalinganahla atail padahki duwen rongamwahu en Wehio. Pil ehu, idek rehn tohnsukuhlo en medemedewe duwen me mah kan nan mwomwohdiso oh ia duwen eh wia doadoahko pahn sewese irail. Soangen koasoakoasoipene wet kin kihda kaiahn me pahn sewese tohnsukuhlo en medemedewe duwen aramas akan laudsang en medemedewe kosonned kan. Ni eh kin kilang duwen brother oh sister kan arail paiekihda eh doadoahko, e pahn peren pwehki e kin papah meteikan.

⁸ Pil tehk mwahu en kapinga tohnsukuhlo pwehki eh kin doadoahngki omw iren sawas kan. Ia uwen eh kesempwal en wia met? Duwehte pihl eh kin sewese kisin tuhke pwoat en kekeirda oh kehlail, ni omw kin kapinga tohnsukuhl men, ke kin sewese ih en kekeirda nan eh kin papah Siohwa.​—Pil kilang Madiu 3:17.

PIL EHU KAHPWAL

9. (a) Dahme kahrehda e kakete apwal elder kan me mi nan ekei sahpw kepwehpwe kan en kaiahne meteikan? (b) Dahme kahrehda ekei brother pwulopwul kan sohte kin mwohneki papah Koht nan arail mour?

⁹ Elder kan me mi nan sahpw kepwehpwe kan ele apwalki kangoange brother kan me sounpar 20 samwa de 30 samwa me papidaislahr en kalaudehla arail iang sawas nan mwomwohdiso. Nan mpen sahpw 20, elder koahiek kan kasalehda dahme kahrehda re kamehlele me ekei brother pwulopwul sohte kin kalaudehla arail sewese mwomwohdiso. Pali laud en elder pwukat nda me ni ahnsou me ekei brother pwukat pwulopwul, arail pahpa nohno ko sohte kin kangoange irail en wiahda mehn akadei kan nan arail papah Siohwa. Oh ni ekei brother pwulopwul kan ar kin men kalaudehla arail iang sawas, arail pahpa oh nohno ko kin kangoange irail en wiahda mehn akadei kan me pidada sukuhl laud de doadoahk en mwohni. Eri re sohte kin mwohneki papah Koht nan arail mour.​—Mad. 10:24.

10, 11. (a) Ia duwen elder men eh kak ekisekis sewese brother men en wekidala eh elen madamadau? (b) Iren Paipel dah kan me elder men kak doadoahngki pwehn kamwakid brother men, oh dahme kahrehda? (Menlau kilang nting tikitik kan me kileldi.)

¹⁰ Ma brother men sohte mwomwen perenki kalaudehla eh iang sawas nan mwomwohdiso, met pahn anahne doadoahk laud oh pil kanengamah en wekidala en brothero eh elen madamadau. Ahpw met kak wiawi. Soun mwetuwel men kak sewese kisin tuhke pwoat en kekeirda inen ni eh pahn ekisekis kainene lukepen tuhkeo. Ni ahlohte, ke kak ekisekis sewese brother men en kilang me e anahne wekidala eh madamadau duwen eh pahn ale pil pwukoa teikan nan mwomwohdiso. Ahpw ia duwen?

¹¹ Kihong ahnsou ken wiahla kompoakepahn brothero. Padahkihong ih me mwomwohdiso kin anahne ih. Eri, ehu rahn, mwohndi oh mweidohng ih en medewe duwen ekei iren Paipel kan me kak sewese ih en medemedewe duwen eh inou ong Siohwa. (Ekl. 5:4; Ais. 6:8; Mad. 6:24, 33; Luk 9:57-62; 1 Kor. 15:58; 2 Kor. 5:15; 13:5) Song en sair eh mohngiong ni omw idek peidek kan duwehte: ‘Dahme ke inoukihong Siohwa ni ahnsou me ke inoukihong ih omw mour? Ia omw madamadau duwen sapwellimen Siohwa pepehm ni ahnsou me ke papidaisla?’ (Lep. Pad. 27:11) ‘Ia ahn Sehdan pepehm?’ (1 Pit. 5:8) Iren Paipel pwukat inenen manaman oh kak kamwakid mohngiong en brothero.​—Wadek Ipru 4:12.b

TOHNSUKUHL KAN, KADEHDEHDA AMWAIL LELEPEK

12, 13. (a) Soangen madamadau dah me Elisa kasalehda nin duwen tohnsukuhl men? (b) Ia duwen Siohwa eh ketin katingih Elisa pwehki eh lelepek?

¹² Brother pwulopwul kan, mwomwohdiso kin anahne amwail sawas! Soangen madamadau dah me pahn sewese iuk en pweida nan omw papah Siohwa? Pwehn diarada pasapengo, kitail koasoiapene dahme wiawi nan mour en Elisa, me wia tohnsukuhl men mahs.

¹³ Mpen sounpar 3,000 samwalahro, soukohp Elaisa luke Elisa me pwulopwul en wiahla eh sounsawas. Elisa mwadang pwungki oh ni lelepek wia soangen doadoahk tikitik kan ong soukohpo. (2 Nan. 3:11) Elaisa kaiahnehda Elisa mpen sounpar weneu. Mwuhr, ni en Elaisa eh doadoahko nan Israel pahn kereniong nek, Elaisa padahkihong nah sounsawaso me e kak uhdihsang papah ih. Ahpw Elisa nda pak siluh: “I sohte pahn tohrohrasang uhk.” Elisa koasoanehdi teng en mihte rehn eh sounpadahko ni uwen me eh kak. Oh Siohwa ketin katingih Elisa pwehki eh lelepek ni eh ketin mweidohng en kilang elipip ehu wahsang Elaisa.​—2 Nan. 2:1-12.

14. (a) Ia duwen tohnsukuhl kan rahnwet ar kak alasang Elisa? (b) Dahme kahrehda e uhdahn kesempwal ong tohnsukuhl kan en lelepek?

¹⁴ Nin duwen tohnsukuhl men, ia duwen omw kak alasang Elisa? Mwadang ale pwukoa kan, pil pwukoa tikitik kan. Tamataman me omw sounpadahko iei kompoakepahmw. Padahkihong me ke kin kalahnganki dahme e kin wiahiong uhk oh kasalehiong me ke men pousehlahte ale kasukuhl sang reh. Keieu kesempwal, ken kin lelepek ni omw apwalih omw pwukoa. Dahme kahrehda? Ni omw kadehdehda me ke lelepek oh wia emen me aramas kin koapworopworki, elder kan kak kamehlele me Siohwa ketin kupwurki ken ahneki pil pwukoa teikan nan mwomwohdiso.​—Mel. 101:6; wadek 2 Timoty 2:2.

WAUNEKI ELDER KOAHIEK KAN

15, 16. (a) Ia duwen Elisa kasalehda eh wauneki eh sounpadahko? (Menlau kilang tepin kilel.) (b) Dahme kahrehda soukohp teikan likih Elisa?

¹⁵ Koasoipen Elisa pil kasalehda me e kesempwal ong brother kan rahnpwukat ren wauneki elder koahiek kan. Mwurin Elaisa oh Elisa mwemweit rehn pwihn en soukohp ehu nan Seriko, ira kohla ni Pillap en Sordan. “Elaisa eri kihsang eh likou puhpo, limpene, oh poakihki pihlo. Pihlo ahpw pwalpeseng.” Ira eri keid pohn ngalangalo kotehla Sordan, oh “usehla ara koasoi ni ara kohkohla.” Elisa uhdahn rong kanahieng soahng koaros me eh sounpadahko nda oh doulahte ale kasukuhl sang reh. Elisa sohte medewe me e ese soahng koaros. Elipipo eri wahsang Elaisa oh Elisa pwurala ni Pillap en Sordano. Ih eri poakihki pihlo ahn Elaisa likou puhpo oh nda: “Ia KAUN-O, Koht en Elaisa?” Pihlo pil pwurehng pwalpeseng.​—2 Nan. 2:8-14.

¹⁶ Ke tehk me keieu en manaman me Elisa wiahda uhdahn duwehte kaimwiseklahn manaman me Elaisa wiahda? Dahme met padahkihong kitail? Elisa sohte medewe me pwehki met e ahneki manaman, e anahne wia soahng kan me weksang dahme Elaisa kin wia. Ahpw, sang ni eh doadoahngki soangen wiepe kohte me Elaisa kin doadoahngki, Elisa kasalehda me e wauneki eh sounpadahko. Met sewese soukohp teikan en likih Elisa. (2 Nan. 2:15) Elisa papah nin duwen soukohp men erein sounpar 60 oh Siohwa ketikihong ih manaman en wiahda manaman tohtohsang me Elaisa wiahda. Ia mehn kasukuhlo ong tohnsukuhl kan rahnpwukat?

17. (a) Ia duwen tohnsukuhl kan rahnpwukat ar kak alasang madamadau en Elisa? (b) Ni ahnsawi, ele ia duwen Siohwa eh pahn ketin doadoahngki tohnsukuhl lelepek kan?

¹⁷ Ni omw alehdi pwukoa teikan nan mwomwohdiso, dehr leme me ke anahne wia soahng kan ni ahl me uhdahn weksang dahme kin wiawi mwoweo. Tamataman, kahrepen wekidekla kan kin wiawi iei pwehki mie anahn ehu nan mwomwohdiso de mie kaweid ehu sang sapwellimen Siohwa pwihn. Dehr wiahda wekidekla kan ihte pwehki ke men wia. Sang ni eh pousehlahte doadoahngki wiepe kan me Elaisa doadoahngki, Elisa sewese soukohp teikan en likih ih oh e pil kasalehda eh wauneki eh sounpadahko. Ni ahlohte, ma ke pousehlahte doadoahngki wiepe kan me poahsoankihda Paipel me omw sounpadahk ko kin doadoahngki, ke kin kasalehda omw wauneki elder koahiek kan, oh riomw Kristian kan pahn kin likih iuk. (Wadek 1 Korint 4:17.) Ahnsou me omw koahiek kin wie lalaudla, ke pahn doadoahngki wekidekla kan me kak sewese mwomwohdiso en idawehn sapwellimen Siohwa pwihn, me kin ahnsou koaros mwekimwekid kohwei. Oh ni ahnsawi, Siohwa ele pahn ketin sewese iuk en wia pwukoa kan me laudsang dahme omw sounpadahk ko kin wia, duwehte eh ketin sewese Elisa.​—Sohn 14:12.

18. Dahme kahrehda e kesempwal en kaiahne brother kan nan mwomwohdiso rahnwet?

¹⁸ Se koapworopworki me iren sawas kan nan iren onop wet oh pil iren onop en mwoweo pahn kamwakid elder tohto ren kihong ahnsou en kaiahnehda brother kan. Oh se pil koapworopworki me brother koahiek kan en perenki ale kaiahn oh doadoahngki dahme re sukuhlki pwehn apwalih sapwellimen Siohwa aramas akan. Kaiahn pahn kakehlakahda mwomwohdiso kan nan sampah pwon oh pil pahn sewese emenemen kitail en kolokolte atail lelepek erein ahnsou kesempwal ehu me pahn kohdo.