Kompoakpatail Kan Anahne Poakohng Koht

KOMPOAKPATAIL kan iei aramas akan me kitail kin men koasoiong oh mihmi rehrail. Ahpw e kesempwal en kompoakepahnki me pwung kan. Ihs me ke leme me kak wia kompoakpatail me keieu mwahu?— Iei Siohwa Koht.

Kitail kak uhdahn wia kompoakepahn Koht?— Paipel mahsanih me Eipraam, ohl emen me momour mahsieo, kin wia kompoakepahn Siohwa. (Seims 2:23) Ke ese ia kahrepen eh wia kompoakepahn Siohwa?— Paipel mahsanih me Eipraam kin peikiong Koht. E pil kin peik mehnda ma dahme e pahn wiao kin apwal ong ih. Eri, ma kitail men wia kompoakepahn Siohwa, kitail anahne wia dahme kin kaperenda ih duwehte me Eipraam oh Sounpadahk Lapalapo kin ketin wia ahnsou koaros.​—Senesis 22:1-14; Sohn 8:28, 29; Ipru 11:8, 17-19.

Sises mahsanihong sapwellime wahnpoaron ko: “Kumwail iei kompoakepahi, ma kumwail kin wia dahme I padahkihong kumwail.” (Sohn 15:14) Pwehki soahng koaros me Sises kin ketin padahkihong aramas akan kohsang rehn Siohwa, Sises ketin kasalehda me kompoakepah iei aramas akan me kin kapwaiada dahme Koht mahsanih irail en wia. Ei, kompoakepahn Sises kan koaros kin poakohng Koht.

Ekei kompoakepahn Sounpadahk Lapalapo me e kin ketin keieu karanih iei sapwellime wahnpoaron kan me ke kak kilang nan kilel me mi nan pali 75. Irail kin iang ih seiloak oh sewese ih wia doadoahk en kalohk. Sises ketin doadoahngki pali laud en sapwellime ahnsou ong ohl pwukat. Irail kin konotpene. Irail kin mahmahsenihpene duwen Koht. Oh irail pil kin ketin wiapene soahng teikan. Ahpw pil tohto kompoakepahn Sises teikan. E pil kin kalapw ketiket rehrail oh irail kin sapwellimankipene ahnsou mwahu kan.

Ehu peneinei me Sises kin ketin perenki ket rehrail kin mi nan kahnimw kis en Pedani likin kahnimw laud en Serusalem. Ke tamataman ihs irail?— Irail iei Mery, Marda oh riara pwutak Lasarus. Sises kin ketin ekerki Lasarus kompoakepah. (Sohn 11:1, 5, 11) Kahrepen Sises eh ketin poakohng peneinei wet oh kin ketin perenkin irail iei pwehki irail poakohng Siohwa oh kin papah ih.

Met sohte wehwehki me Sises sohte kin ketin kadek ong aramas akan me sohte kin papah Koht. E pil kin ketin kadek ong irail. E pil kin ketila ni imwarail kan oh iang irail konot. Met kahrehiong ekei en nda me Sises ketin ‘kompoakepahnki sounrik daksis oh me dipan akan.’ (Madiu 11:19) Sises sohte ketila ni imwen aramas pwukat pwehki e kupwurki arail wiewia kan. E ketila rehrail pwehn kak ketin padahkihong irail duwen Siohwa. E ketin song en sewese irail en wekidekla sang arail wiewia suwed kan oh uhd papah Koht.

Met wiawi nan kahnimw en Seriko ehu rahno. Sises ketiketlahng Serusalem. Mie pokon en aramas ehu oh nan pokono mie ohl emen me adaneki Sakies. E men kilang Sises. Ahpw pwehki Sakies eh mwotomwot, e sohte kak kilang pwehki pokono. Ih eri tangala oh douda nin tuhke pwoat pwehn kak kilang mwahu Sises.

Ni Sises eh ketila ni tuhkeo, e ketin kilengda oh mahsanih: ‘Doudi mwadang, pwe rahnwet I pahn kohla rehmw ni imwomwo.’ Ahpw Sakies ohl kepwehpwe men me wiadahr soahng suwed kan. Dahme kahrehda Sises men ketila ni imwen soangen aramas suwed menet?—

Kaidehn pwehki Sises kupwurki mouren ohl menet. E ketila wasao pwehn koasoiaiong Sakies duwen Koht. E mwahngih uwen en Sakies eh nannanti en kak kilang ih. Eri e mwahngih me mwein Sakies pahn rong ih. Met wia ahnsou mwahu en ketin kasalehiong ih soangen mour dah me Koht kupwurki aramas en mourki.

Eri ia imwilahn met?— Sakies pwungki sapwellimen Sises padahk kan. E uhdahn koluhkihla eh kin pitih aramas akan oh e inoukihdi me e pahn kapwurehiong irail neirail mwohni kan me e kihsang irail. Ih eri wiahla sapwellimen Sises tohnpadahk. Mwurin mwo, Sakies wiahla kompoakepahn Sises.​—Luk 19:1-10.

Ma kitail kin idawehn mehn kahlemeng en Sounpadahk Lapalapo, kitail pahn kohla rehn aramas akan me kaidehn kompoakepatail?— Ei, kitail pahn kohla. Ahpw kitail sohte pahn kohla ni imwarail ko pwehki kitail pwungki arail wiewia kan. Oh kitail sohte pahn iang irail wia me suwed. Kitail pahn kohla rehrail pwe kitail en kak koasoiaiong irail duwen Koht.

Ahpw kompoakpatail kan me kitail kin keieu karanih iei irail kan me kitail pahn kihong atail ahnsou laud. Pwe irail en wia kompoakpatail mwahu kan, irail anahne wia aramas ekei me Koht kupwurki. Ekei mwein sehse ihs me Siohwa. Ahpw ma irail men sukuhlki duwen ih, kitail kak sewese irail. Oh ni arail pahn poakohngala Siohwa duwehte kitail, eri, kitail kak wiahla kompoakparail.

Mie pil ehu ahl en diar ma aramaso pahn wia kompoakpatail mwahu men. Tehk dahme e kin wia. E kin wia me suwed ong aramas teikan oh kin wiahki mehn kemenkouruhr? Met sohte pwung, kaidehn?— E kin kalapw lelohng nan apwal? Kitail sohte men iang ih lelohng nan kahpwal, kaidehn?— De e kin nsenki wia me suwed oh leme me e loalokong pwehki e sohte dierekda? Mehnda ma e pil sohte dierekda, ahpw Koht mwahngih dahme e wiahdao, kaidehn?— Ke leme soangen aramas me kin wia soahng pwukat pahn wia kompoakpatail mwahu kei?—

Menlau ale noumw Paipel en. Kita pahn kilang dahme e mahsanih me pid ia duwen kompoakepatail kan arail kak kamwakid atail mour. Iren Paipel wet iei 1 Korint irelaud 15 iretikitik 33. Ke diarehr?— E mahsanih: “Kaleke kumwail pitida pahn meteikan! Pwe ‘Werekiong aramas suwed kan e kin kauwehla tiahk mwahu.’” Met wehwehki me ma kitail kin iang aramas suwed, kitail pahn pil wiahla aramas suwed. Oh e pil mehlel me kompoakpatail mwahu kan kin sewese kitail en ahnekihla tiahk mwahu kan.

Kitail en dehr manokehla me Siohwa me keieu kesempwal nan atail mour. Kitail sohte men kauwehla atail kompoakepahnki ih, kaidehn?— Ihme kahrehda kitail anahne kanahieng pwe kitail en kompoakepahnki irail kante me kin poakohng Koht.