Sounkadehdehn Siohwa depe me ke kin ese? Ele ekei kiht kin wia mehn mpomw, iengomw tohndoadoahk, de pil iengomw tohnsukuhl. De mwein se kin koasoiaiong uhk duwen Paipel. Uhdahn ihs kiht, oh dahme kahrehda se kin ehukihong aramas akan dahme se kin kamehlele?

Kiht aramas kei me duwehte aramas koaros. Se kohsang soangsoangen wasa kan oh irair kan. Ekei kiht kin iang ehu pelien lamalam tohrohr mahs, oh ekei sohte kin kamehlele Koht mahs. Ahpw mwohn at wiahla Sounkadehdehn Siohwa kan, kiht koaros kin kihong ahnsou pwe sen onopki mwahu padahk kan en Paipel. (Wiewia 17:11) Se pwungki dahme se sukuhlki oh pein pilada sen kaudokiong Siohwa Koht.

Se kin paiekihda at onopki Paipel. Duwehte koaros, se pil kin ahneki kahpwal oh luwet akan. Ahpw sang at kin song en doadoahngki kaweid kan en Paipel rahn koaros, at irair en mour kin uhdahn mwahula. (Melkahka 128:1, 2) Ih ehu kahrepe me se kin ehukihong meteikan soahng mwahu kan me se kin sukuhlki sang nan Paipel.

Se kin momourki sapwellimen Koht koasoandi kan. Soangen koasoandi pwukat me Paipel kin padahngki kin sewese kiht sen nsenamwahu, wauneki meteikan, oh ahneki irair kan duwehte en mehlel oh kadek. Koasoandi pwukat kin sewese kiht sen ahneki madamadau pwung oh wia aramas pwerisek kei oh kin kangoange tiahk mwahu oh miniminpene en peneinei. Pwehki se kin kamehlele me “Koht sohte ketin lipilipilki aramas,” se wia peneinei ehu me kin miniminpene nan sampah pwon pwehki dahme se kin kamehlele, mendahki at wehi oh keinek wekpeseng. Mendahki emenemen kiht kin duwehte meteikan, se kin wia pwihnen aramas tohrohr ehu.​—Wiewia 4:13; 10:34, 35.

• Ia duwen Sounkadehdehn Siohwa kan ar kin duwehte meteikan?

• Dahme Sounkadehdehn Siohwa kan kin sukuhlki sang Paipel?

Aramas tohto kin medewe me Sounkadehdehn Siohwa kan iei eden pelien lamalam kapw ehu. Ahpw, tohtohsang sounpar 2,700 samwalahro, Paipel kasalehda me ladu kan en Koht mehlelo iei sapwellime “sounkadehde” kan. (Aiseia 43:10-12) Mwohn pahr 1931, se adaneki Tohnsukuhl kan en Paipel. Dahme kahrehda se alehda ahd wet Sounkadehdehn Siohwa kan?

Ahd wet kin kasansalehda duwen atail Koht. Nan tepin nting kan en Paipel mahso, mwaren Koht, Siohwa, kin pwarada pak kid kei. Nan kawehwehn Paipel tohto, re kin uhd wiliankihdi mwar wet lengileng kan me duwehte Kaun de Koht. Ahpw Koht mehlelo ketin kasalehiong Moses pein mwareo, Siohwa, de Iahweh, nin duwen ekei kawehwehn Paipel kin koasoia, oh E ketin mahsanih: “Ih mwarei en met kohkohlahte.” (Eksodus 3:14, 15. Menlau kilang nting tikitik kan me kileldi pah) Ni ahl wet, e ketin kasalehda duwen eh ketin weksang koht teikan koaros. Se kin perenki weuwa sapwellimen Koht mwar sarawi.

Ahd wet kin kawehwehda at pwukoa. Aramas en mahs akan, tepida sang ohl lelepek Eipel, kin kadehdehda duwen ar pwoson Siohwa. Erein sounpar tohto, Noha, Eipraam, Sara, Moses, Depit, oh pil meteikan kin wia kisehn sounkadehde pwukat me duwehte “depwek kalaimwun ehu.” (Ipru 11:4–12:1) Duwehte sounkadehde men nan mwoalen kopwung me kin kadehdehda duwen emen me sohte dipada, se kin koasoanehdi teng sen kadehdehda me mehlelo duwen at Koht.

Se kin kahlemengih Sises. Paipel kin kamwarehki Sises “sounkadehde loalopwoat oh mehlel.” (Kaudiahl 3:14) Pein Sises mahsanih me e ketin kahrehiong aramas akan ren esehla Koht iangahki mwareo oh kin “kadehdehda duwen me mehlel” duwen Koht. (Sohn 17:26; 18:37) Eri, irail kan me kin idawehn Krais ni mehlel, kin wiliandi Siohwa oh kahrehiong aramas akan ren esehla mwareo. Iei met me Sounkadehdehn Siohwa kan kin nantihong wiewia.

• Dahme kahrehda Tohnsukuhl kan en Paipel alehda ahd wet Sounkadehdehn Siohwa kan?

• Ia uwen werei me Siohwa ketin sapwellimaniki sounkadehde kan nin sampah?

• Ihs Sounkadehdehn Siohwa me keieu lapalap?

Paipel kohpadahr me mwurin pwoulahn Krais, sounpadahk likamw akan pahn pwarada nanpwungen tepin Kristian akan oh kasaminehla padahk mehlel en Paipel. (Wiewia 20:29, 30) Ih met me uhdahn wiawi mwuhr. Irail kapatahiong sapwellimen Sises padahk kan padahk en kaudok likamw akan, oh padahk en Kristian likamw eri miehla. (2 Timoty 4:3, 4) Ia duwen atail kak kamehlele me rahnwet kitail kin wehwehki ni pwung dahme Paipel uhdahn padahngki?

Lelehr ahnsou me Siohwa pahn ketin kasalehda padahk mehlel. E ketin kohpada me erein imwin ahnsou, irail kan “me kupwurokong me pahn dehdehki” padahk mehlel. (Daniel 12:9, 10) Nan pahr 1870, kisin pwihn ehu me kin raparapahki padahk mehlel esehda me padahk tohto en pelien lamalam sohte kin kohsang nan Paipel. Kahrehda, irail tepida rapahki wehwehn tepin padahk kan en Paipel, oh Siohwa ketin sewese irail ren wehwehki iren Paipel kan.

Aramas me ahneki mohngiong mehlel kin onop Paipel ni keneinei. Irail Tohnsukuhl en Paipel poadidi kan, me iei Sounkadehdehn Siohwa kan mahs, kin doadoahngki wiepen onop me se kin wie doadoahngki rahnwet. Irail kin koasoiapene ehuehu oaralap en Paipel. Ni arail kin lel ehu iren Paipel me re apwalki wehwehki, re kin rapahki iren Paipel teikan en kawehwehda. Ni ahnsou me irail kin pwungkipene ire ehu me kin pahrekiong iren Paipel teikan, irail kin ntingihedi. Sang ni arail mweidohng Paipel en kawehwehda ire kan, re pwurehng diarada padahk mehlel duwen mwaren Koht oh sapwellime Wehio, dahme e ketin kupwurki ong aramas oh sampah, irair en me melahr kan, oh koapworopwor en iasada. Arail rapahkihda padahk mehlel kasaledekirailsang padahk oh wiewia likamw tohto.​—Sohn 8:31, 32.

Mwohn pahr 1879, Tohnsukuhl en Paipel kan wehwehkihda me e lelehr ahnsou ren padahkihong aramas akan padahk mehlel. Ihme nan pahro, irail tepida wiahda kisin pwuhk me se pil kin doadoahngki rahnwet, Kahn Iroir Pakpakairki Wehin Siohwa. Met se kin ehukihong aramas padahk mehlel kan en Paipel nan sahpw 240 oh ni lokaia daulih 750. Ehdin padahk mehlel eh lella rehn aramas tohtohie!

• Mwurin pwoulahn Krais, dahme wiawihong padahk mehlel en Paipel?

• Dahme kahrehiong kiht sen kak pwurehng diarada padahk mehlel sang nan Mahsen en Koht?

Erein sounpar tohto, Sounkadehdehn Siohwa kan kin doadoahngki, wiahda, oh kihseli soangsoangen kawehwehn Paipel kan. Ahpw mwuhr, se diarada me mie anahn en wiahda kawehwe kapw me pahn sewese mwahu aramas ren “marainkihla me mehlel,” me iei kupwuren Koht ong aramas koaros. (1 Timoty 2:3, 4) Eri, nan pahr 1950, se tepida wiahda kawehwehn ekei pwuhk kan en Paipel ni lokaia kan me kitail kin doadoahngki ahnsou pwukat. Kawehwehn Paipel wet iei New World Translation. Paipel wet kin kawehwehdi ni pwung ni lokaia daulih 130.a

Anahne kawehwehn Paipel ehu me mengei en wehwehki. Lokaia kan kin wekiwekila oh nan kawehwehn Paipel tohto kin mie lokaia kan me sohte nohn sansal oh sohla kin kadoadoahk. Met kin apwal en wehwehki. Oh pil doaropwe en mahs kan me iren Paipel kan ntingdi ie dierekda kahrehda met sewese kitail en wehwehki mwahu lokaiahn Ipru, Aramaik, oh Krihk nan Paipel.

Anahne kawehwehn Paipel ehu me kin lelepek ong sapwellimen Koht mahsen. Sounkawehwehn Paipel kan anahne lelepek ong tepin mahsen kan me kohsang rehn Koht ahpw ren dehr kihsang de wekidala mahsen pwukat. Ahpw pali laud en kawehwe kan, re sohla kin doadoahngki mwaren Koht, Siohwa, nan Pwuhk Sarawi.

Anahne kawehwehn Paipel ehu me kin kalinganahla Meno me ketin wiahda. (2 Timoty 3:16) Nan kawehwehn New World Translation, mwaren Siohwa kapwurupwuriong wasa me e uhdahn kin pwarada ie mpen pak 7,000 nan doaropwe kan en Paipel me ntingdi mahsie me ehu sansalda pah. Pwehki sounpar tohto me re kin pwerisekiong wia roporop, met kahrehda eh kin kaperen en wadek Paipel wet pwehki e kin kasalehda ni sansal sapwellimen Koht madamadau. Sohte lipilipil ma ke naineki New World Translation ni pein omw lokaia de soh, se kangoange iuk ken wadek sapwellimen Siohwa mahsen rahn koaros.​—Sosua 1:8; Melkahka 1:2, 3.

• Dahme kahrehda se medewe me mie anahnepen ehu kawehwehn Paipel kapw?

• Dahme emen me men esehla kupwuren Koht anahne wia rahn koaros?