Sohte kaun men me kin ale pweipwei nan at pwihn. Ahpw duwehte ahnsou me mwomwohdisohn tepin Kristian kan wiawihda, irail me konehng papah nin duwen sounapwalih kan kin idihdida pwe ren “wia silepen mwomwohdisohn Koht.” (Wiewia 20:28) Elder pwukat iei ohl poadidi kei me kin tiengla mwowe oh apwalih mwomwohdiso kaidehn ni mehnseiren, ahpw ni peren mwohn silangin Koht, kaidehn ni arail men ale pweipwei, ahpw ngoangki papah. (1 Piter 5:1-3) Soangen doadoahk dah kan me re kin wiahiong kitail?

Re kin apwalih oh pere kitail. Elder kan kin kihda kaweid sang Paipel oh sewese mwomwohdiso en kolokol nanpwungmwahu rehn Siohwa. Pwehki re ese me Koht me ketikihong irail pwukoa kesempwal wet, elder kan sohte kin kaunda sapwellime aramas akan, ahpw re kin sewese irail ren kehlail nan pwoson oh peren. (2 Korint 1:24) Duwehte silepen sihpw men eh kin pwerisek en apwalih emenemen nah sihpw, elder kan pil kin song en esehla emenemen tohnmwomwohdiso.​—Lepin Padahk 27:23.

Re kin padahkihong kitail duwen wia kupwuren Koht. Ehuehu wihk, elder kan kin wia mihting kan en mwomwohdiso pwehn kakehlaka atail pwoson. (Wiewia 15:32) Ohl poadidi pwukat pil kin tiengla mwowe nan doadoahk en kalohk oh re kin iang kitail oh kasukuhlih kitail nan soangen wiepen kalohk koaros.

Re kin kangoange emenemen kitail. Pwe irail en sewese emenemen kitail en kakehlaka atail nanpwungmwahu rehn Siohwa, elder kan mwein kak kohdo ni imwatail kan pwehn koasoiong kitail de koasoiong kitail nan Wasahn Kaudok pwehn kihda sawas oh kamweitih kitail sang nan iren Paipel kan.​—Seims 5:14, 15.

Patehng arail doadoahk nan mwomwohdiso, pali laud en elder kan pil ahneki doadoahk en mwohni oh kin apwalih pwukoa en arail peneinei me anahne arail ahnsou. Brother pwerisek pwukat kin warohng atail wahu.​—1 Deselonika 5:12, 13.

• Ia pwukoa en elder kan nan mwomwohdiso?

• Ni ahl dah kei me elder kan kin kasalehda arail nsenohki emenemen kitail?

Paipel kin kawehwehda pwihn en ohl Kristian riau me kin apwalih pwukoa kan nan mwomwohdiso me iei “sounkaweid [“sounapwalih,” NW] akan oh sounsawas akan.” (Pilipai 1:1) Nan pali laud en mwomwohdiso, kin mie ekei elder kan oh sounsawas kan me kin papah. Soangen doadoahk dah me sounsawas kan kin wia ong kitail?

Re kin sewese pwihnen elder kan. Ekei sounsawas kan me pwulopwul a ekei mah. Irail koaros ahneki nanpwungmwahu kehlail rehn Siohwa oh re kin wia aramas likilik kei oh kin uhdahn kanahieng arail kin wia arail doadoahk. Re kin apwalih doadoahk kesempwal ong mwomwohdiso oh Wasahn Kaudok me sohte kin pidada padahk oh doadoahk en silepen mwomwohdiso. Met kin mweidohng elder kan ren kak doadoahngki arail ahnsou laud ong padahk oh wia pwukoahn silepen mwomwohdiso.

Re kin wia doadoahk kan me anahn. Ekei sounsawas kan kin ale pwukoahn sewese tohn mihting kan oh kasamwo koaros me kohdo iang mihting. Ele ekei kin apwalih keseng oh microphone ape, pwuhk kan, mwohni en mwomwohdiso oh wasahn kalohk ong tohnmwomwohdiso kan. Irail pil kin sewese apwalih arail Wasahn Kaudok. Mwein elder kan pahn peki rehrail en sewese me mah kan. Sounsawas kan kin perenki wia doadoahk sohte lipilipil me kohwong irail, oh mwomwohdiso kin wauneki irail pwehki arail doadoahk laud oh perenki wia met.​—1 Timoty 3:13.

Re kin wia mehn kahlemeng mwahu nin duwen Kristian kan. Sounsawas kan kin pilipilda pwehki arail kin kasalehda irair en Kristian kan. Ni arail kin wia padahk kan nan mihting, re kin kakehlaka atail pwoson. Ni arail kin wia mehn kahlemeng mwahu nan doadoahk en kalohk, re kin sewese kitail en kalaudehla atail ngoangki kalohk. Pwehki arail kin miniminiong pwihn en elder kan, re kin sewese mwomwohdiso en peren oh minimin. (Episos 4:16) Mwuhr ele irail pil pahn kakehr papah nin duwen elder kan.

• Soangen ohl dah kei sounsawas kan?

• Ia duwen sounsawas kan ar kin sewese mwomwohdiso en soandi mwahu?

Palien Paipel ni Lokaiahn Krihk kin kalapw koasoia duwen Parnapas oh wahnpoaron Pohl. Ohl pwukat kin papah nin duwen sounapwalih kei me kin seiloak oh kin mwemweitla ni mwomwohdiso kan en tepin Kristian ko. Dahme kahrehda? Ira kin uhdahn nsenohki irair en riara Kristian ako. Pohl koasoia me e men “pwurala oh tuhwong me pwoson akan” pwehn ese irarail. E kin perenki seiloak mwail epwiki kei pwehn kohla rehrail oh kakehlailih irail. (Wiewia 15:36) Ih me atail sounapwalih kan me kin seiloak kin men wia rahnwet.

Re kin kohdo pwe ren kangoange kitail. Sounapwalih me kin seiloak kin mwemweitla ni mwomwohdiso kan pak riau nan pahr ehu oh mihmi rehn ehuehu mwomwohdiso wihk ehu. Kitail kak paiekihda laud arail koahiek kan oh pil arail pwoud, ma re pwopwoud. Irail kin nantihong esehla me pwulopwul oh me mah kan oh re kin men iang kitail nan kalohk oh onop en Paipel kan. Sounapwalih pwukat kin iang elder kan oh mwemweitla rehn tohnmwomwohdiso kan oh koasoiong irail, oh re pil kin wia padahk ni mihting oh mihting tohrohr kan me kin kangoange oh kakehlaka kitail.​—Wiewia 15:35.

Re kin kasalehda me re kin nsenohki koaros. Sounapwalih kan me kin seiloak kin uhdahn nsenohki irair en mwomwohdiso kan. Irail kin tuhwong elder kan oh sounsawas kan pwehn koasoia kekeirdahn mwomwohdiso oh kihong irail sawas kan ong apwalih arail pwukoa kan. Re kin sewese pioneer kan pwe ren kak pweida nan arail doadoahk en kalohk oh re pil kin perenki esehla me kapw kan oh rong duwen kekeirda me re wiahda nan padahk mehlel. Emenemen brother pwukat kin perenki toukihda pein ih nin duwen iengetail tohndoadoahk ong kamwahupatail. (2 Korint 8:23) Kitail anahne kahlemengih arail pwoson oh arail kin poadidi ong Koht.​—Ipru 13:7.

• Ia kahrepen sounapwalih kan me kin seiloak ar kin mwemweitla ni mwomwohdiso kan?

• Ia duwen omw kak paiekihda arail kin mwemweitdo rehtail?

Ni ahnsou me kahpwal laud kin wiawi, Sounkadehdehn Siohwa kan kin mwadang tepida doadoahk pwehn sewese riarail kan me lelohng kahpwalo. Soangen nanti wet kin kasalehda atail limpoak mehlel ong emenemen. (Sohn 13:34, 35; 1 Sohn 3:17, 18) Ia duwen atail kin sawas?

Kitail kin sawaskihda mwohni. Ahnsou me lehk laud wiawi nan Sudia, tepin Kristian akan nan Andiok kadaralahng riarail Kristian ko nan Sudia mwohni. (Wiewia 11:27-30) Pil duwehte met, ni atail kin rong me riatail kan nan ekei wasa nan sampah kin lelohng kahpwal, atail mwomwohdiso kin kadarala sawas en mwohni me emenemen kihda pwehn alehda dipwisou ong irail kan me uhdahn anahne.​—2 Korint 8:13-15.

Kitail kin kihda sawas me anahn. Elder kan me mi wasa me apwal wiawi kin rapahkihda emenemen tohnmwomwohdiso pwehn tehk ma koaros mwamwahute. Ehu pwihn kin koasoanehdi mwenge, pihl en nimpil mwakelekel, likou, wasahn wendi oh pil sawas en palien wini. Sounkadehdehn Siohwa tohto me koahiek kin pein toukihda neirail mwohni oh kohla oh iang doadoahk en sawas oh kamwahwihala ihmw oh Wasahn Kaudok kan me ohla. Miniminpene me kitail ahneki nin duwen pwihn ehu oh koahiek me kitail alehdi sang atail doadoahkpene kin kahrehiong kitail en mwadang kihpene sawas kan oh tohndoadoahk kan ahnsou me anahn. Mendahki kitail kin sewese “irail kan me kisehn atail pwoson,” kitail pil kin sewese meteikan ma kak, sohte lipilipil mehnia pelien lamalam.​—Kalesia 6:10.

Kitail kin doadoahngki Paipel pwehn kansenamwahwih irail. Irail kan me lelohng kahpwal uhdahn anahne emen en kansenamwahwih irail. Soangen ahnsou pwukat, kitail kin ale kehl sang rehn Siohwa, “Koht me pwarer en kansenamwahu koaros.” (2 Korint 1:3, 4) Kitail kin perenki ehukihong irail me mi nan kahpwal inou en Paipel kan oh sewese irail ren kamehlele me kereniongehr Wehin Koht pahn kaimwisekala kahpwal koaros me kin kahrehda medek oh lokolok.​—Kaudiahl 21:4.

• Dahme kahrehda Sounkadehdehn Siohwa kan kak mwadang kihda sawas ni ahnsoun kahpwal laud kan?

• Ia duwen atail kin kansenamwahwih irail kan me kin lelohng kahpwal?

Mwohnte Sises eh ketin pwoula, e mahmahsaniong sapwellime tohnpadahk pahmeno, Piter, Seims, Sohn oh Andru. Ni Sises eh ketin kohpada duwen kilel en eh ketier nan imwin rahn akan, e ketikihda peidek kesempwal ehu: “Ihs me uhdahn ladu lelepek oh loalokong me eh soumas idihada pohn sounpapah kan pwe en kihong irail kanarail mwenge ni ahnsou me konehng?” (Mad. 24:3, 45, NW; Mark 13:3, 4) Sises ketin kamehlelehiong sapwellime tohnpadahk ko me nin duwen arail “mwohnsapw,” e pahn ketin idihada irail ko me pahn kaukaule kihda padahk mehlel en Paipel me duwehte mehn ketihnain ong sapwellime tohnpadahk kan erein ahnsoun imwin rahn akan. Ihs me iang wia ladu wet?

E wia kisin pwihn ehu en sapwellimen Sises tohnpadahk keidi kan. Pwihn me Kin Apwalih Mwomwohdiso en Sounkadehdehn Siohwa kan nan Sampah Pwon kin papah nin duwen “laduwo.” E kin kihong iengerail tohnkaudok en Siohwa padahk mehlel me duwehte mehn ketihnain ni ahnsou me konehng. Kitail kin koapworopworki ladu lelepek wet en kin kihkihong kitail atail “kisin tungoal ni ahnsou me konehng.”​—Luk 12:42.

E kin apwalih tohnpeneinei en Koht. (1 Timoty 3:15) Sises ketikihong laduwo pwukoa kesempwal kan en apwalih doadoahk en sapwellimen Siohwa pwihn nin sampah me iei apwalih dipwisou kan, kaukaweid doadoahk en kalohk oh padapadahkih kitail sang mwomwohdiso kan. Eri, pwehn kihong kitail dahme kitail anahne ni ahnsou me kitail anahne, “ladu lelepek oh loalokong” kin kihda padahk mehlel sang ni eh kin wiahda pwuhk kan me kitail kin doadoahngki nan atail kalohk, oh pil sang prokram kan me kin wiawi nan atail mihting kan oh mihting tohrohr kan.

Laduwo kin lelepek ong padahk mehlel kan en Paipel oh eh pwukoa doadoahk en kalohki rongamwahu, oh e pil kin loalokong ong apwalih mwahu soahng koaros me Krais ketin padahkihong en apwalih nin sampah. (Wiewia 10:42) Siohwa kin ketin kahrehiong aramas tohto en wiahla sapwellime sounkadehde kan oh kin ketin sewese ladu lelepek oh loalokong en kihda padahk mehlel tohto.​—Aiseia 60:22; 65:13.

• Ihs me Sises ketin idihada pwehn kihong sapwellime tohnpadahk kan mehn ketihnain?

• Ni ahl dah kei me laduwo kin lelepek oh loalokong?

Ni mwehin tepin Kristian kan, kisin pwihn en “wahnpoaron ko oh me mah kan” nan Serusalem kin wiahda pilipil kesempwal kan ong mwomwohdisohn Kristian keidi kan koaros. (Wiewia 15:2) Ni arail kin koasoiapene dahme Paipel kin mahsanih oh idawehn kaweid en sapwellimen Koht manaman, re kin wiahda pilipil me koaros pwungkihdahr. (Wiewia 15:25) Wiepe wet kin pil kadoadoahk rahnwet.

Koht kin ketin doadoahngki pwihn wet pwehn wia kupwure. Brother keidi kan me kin papah nin duwen Pwihn me Kin Apwalih Mwomwohdiso nan Sampah Pwon, kin uhdahn nsenohki Mahsen en Koht oh ahneki koahiek en koasoanehdi ia duwen atail doadoahk eh pahn wiawi oh apwalihala peidek kan me pid atail kaudok. Irail kin tuhpene ehuehu wihk pwehn koasoiapene anahn en riatail kan nan sampah pwon. Duwehte ni mwehin tepin Kristian kan, pwihno kin kihda kaweid kan me poahsoankihda Paipel sang ni eh kin doadoahngki kisinlikou kan, sounapwalih kan me kin seiloak oh meteikan. Met kin sewese sapwellimen Koht aramas akan ren miniminpene nan arail madamadau oh wiewia kan. (Wiewia 16:4, 5) Pwihno kin apwalih kaunopadahn padahk kan, kangoange koaros en kin mwohneki mahs doadoahk en kalohk oh pil apwalih idihdahn brother kan ong soangsoangen pwukoa kan.

E kin mwekidki kaweid en sapwellimen Koht manaman. Pwihn me Kin Apwalih Mwomwohdiso nan Sampah Pwon kin rapahki kaweid sang rehn Siohwa, Wasa Lapalahpie oh pil Sises me Tapwin mwomwohdiso. (1 Korint 11:3; Episos 5:23) Tohn pwihn wet sohte kin medewe me irail wia kaunen sapwellimen Koht aramas akan. Irail iangahki Kristian keidi koaros “kin idawehn Sihmpwulo [Sises] wasa koaros me e pahn kin ketila ie.” (Kaudiahl 14:4) Pwihno kin uhdahn kalahnganki atail kin kapakapki irail oh arail doadoahk.

• Ihs me kin apwalih mwomwohdiso pwon ni mwehin tepin Kristian kan?

• Ia duwen Pwihn me Kin Apwalih Mwomwohdiso nan Sampah Pwon eh kin rapahki sapwellimen Koht kaweid?

Pedel iei ahden Ipru ehu me wehwehki ‘Tehnpas en Koht.’ (Senesis 28:17, 19) Ahd wet konehng ihmw kan me Sounkadehdehn Siohwa kan kin wiahda nan sahpw tohto nan sampah me kin kaweid oh apwalih doadoahk en kalohk. Pwihn me Kin Apwalih Mwomwohdiso nan Sampah Pwon kin doadoahk nan poasen kaun en Sounkadehdehn Siohwa kan nan New York, Amerika, oh e kin apwalih doadoahk en ohpis en Sounkadehdehn Siohwa kan nan sahpw tohto. Nin duwen pwihn ehu, irail me kin doadoahk nan ihmw pwukat kin adaneki tohnpeneinei en Pedel. Duwehte peneinei ehu, re kin kousoanpene, doadoahkpene, mwengepene oh onopkipene Paipel ni minimin.​—Melkahka 133:1.

Wasa tohrohr ehu me tohnpeneinei kin toukihda pein irail. Nan Pedel koaros, mie ohl oh lih Kristian kan me kin toukihda pein irail pwehn wia kupwuren Koht oh wia doadoahk en Wehio ahnsou koaros. (Madiu 6:33) Sohte emen irail kin ale pweinen arail doadoahk, ahpw koaros kin mie arail wasahn wendi oh kenerail mwenge oh pil kisin sawas en mwohni ong pein arail anahn akan. Irail koaros me mi Pedel mie arail doadoahk, sohte lipilipil ma nan ohpis, wasahn wia mwenge de wasahn mwenge. Ekei kin doadoahk nan wasahn wiahda pwuhk kan de kamwakel nan ihmw, lopwolopw, apwalih oh kamwahwihala ihmw de soahng teikan.

Wasa ehu me kin kedirepwki doadoahk kan me kin sewese doadoahk en kalohki Wehio. Kahrepe me keieu kesempwal en Pedel koaros iei ren sewese aramas tohto ni uwen me re kak pwe ren esehla padahk mehlel en Paipel. Kisin pwuhk wet iei ehu karasepen met. E ntingdi sang ni kaweid en Pwihn me Kin Apwalih Mwomwohdiso nan Sampah Pwon, pekederpeseng nan computer ong pwihn en kawehwe epwiki kei nan sampah, wiawihda ni misihn kan me inenen pitipit en wiahda pwuhk nan ekei Pedel kan, oh pekederlahng mwomwohdiso daulih 110,000. Nan ehuehu doadoahk pwukat, tohnpeneinei en Pedel kin utung doadoahk me keieu kesempwal iei kalohki rongamwahu.​—Mark 13:10.

• Ihs me kin doadoahk nan Pedel, oh dahme kin wiawi pwehn apwalih irail?

• Doadoahk kesempwal dahieu me doadoahk en ehuehu Pedel kin utung?

Tohnpeneinei en Pedel kin doadoahk nan soangsoangen pali kan oh apwalih doadoahk en kalohk nan ehu sahpw de ekei sahpw kan. Mwein ekei kin doadoahk nan pwihn en kawehwe kan, wasahn wiahda pwuhk kan, wasahn nekidala pwuhk kan, wasahn wiahda keseng oh kasdo kan de apwalih soahng teikan nan arail wasa.

Pwihn me Kin Apwalih Ohpis en Sounkadehdehn Siohwa kan. Pwihn wet kin wiawihkihda elder koahiek silimen de tohtohsang. Pwihn me Kin Apwalih Mwomwohdiso nan Sampah Pwon kin kihong irail pwukoa en apwalih doadoahk kan nan arail ohpiso. Pwihn me Kin Apwalih Ohpis en Sounkadehdehn Siohwa kan kin kehsehkin Pwihn me Kin Apwalih Mwomwohdiso nan Sampah Pwon duwen kekeirdahn doadoahk me wiawi nan arail wasa oh kahpwal kan me kakete pwarada. Met kin sewese Pwihn me Kin Apwalih Mwomwohdiso nan Sampah Pwon en koasoanehdi oaralap kan me anahn nan pwuhk kan, oh ni mihting kan oh mihting tohrohr kan me pahn wiawi ahnsou kohkohdo. Wiliepen Pwihn me Kin Apwalih Mwomwohdiso nan Sampah Pwon kin pekederla ni ohpis pwukat oh kihong Pwihn me kin Apwalih Ohpis pwukat kaweid pwe ren apwalih arail pwukoa kan. (Lepin Padahk 11:14) Prokram tohrohr ehu me iangahki padahk ehu sang wiliepen poasen kaun kin wiawi pwehn kangoange koaros me kin mi pahn epwelpen ohpiso.

Sawas kin kohwong mwomwohdiso kan. Brother kan me ahneki pwukoa nan ohpiso kin kamanahla wiawihdahn mwomwohdiso kapw. Brother pwukat pil kin kaweid doadoahk en pioneer kan, misineri kan, oh sounapwalih kan me kin seiloak me kin doadoahk pahn epwelpen ohpiso. Re kin koasoanehdi mihting tohrohr kan, apwalih kauwada Wasahn Kaudok kapw kan, oh tehk pwuhk kan en pekederlahng mwomwohdiso kan me anahne. Doadoahk koaros me wiawihda nan ohpiso kin sewese doadoahk en kalohk en pweida ni soandi mwahu.​—1 Korint 14:33, 40.

• Ia duwen Pwihn me Kin Apwalih Ohpis en Sounkadehdehn Siohwa kan eh kin sewese Pwihn me Kin Apwalih Mwomwohdiso nan Sampah Pwon?

• Soangen pwukoa dah kan me ohpis en Sounkadehdehn Siohwa kan kin apwalihala?

Pwe sen wia uwen at kak en kalohki “rongamwahu” ong “wehi koaros, kadaudok koaros, lokaia koaros, oh sahpw koaros,” se kin wiahda pwuhk kan ni lokaia tohtohsang 750. (Kaudiahl 14:6) Ia duwen at kin kapwaiada doadoahk apwal wet? Se kin wia met sang ni sawas en pwihn en sounnting kan me kohsang soangsoangen wasa kan oh pil pwihn en sounkawehwe poadidi kan. Irail koaros Sounkadehdehn Siohwa kan.

Audepen pwuhk kan kin tepin ntingdi ni lokaiahn wai. Pwihn me Kin Apwalih Mwomwohdiso nan Sampah Pwon kin apwalih doadoahk en Pali en Nting nan poasen kaun en Sounkadehdehn Siohwa kan. Pali wet kin koasoanehdi doadoahk en sounnting kan me kin doadoahk ni poasen kaun en Sounkadehdehn Siohwa kan oh ni ohpis en Sounkadehdehn Siohwa kan nan ekei wasa kan. Doadoahngki sounnting kan me kohsang soangsoangen wasa kan kin mweidohng kiht sen ntingihdi oaralap kan me kin kamwakid aramas akan sang soangsoangen tiahk kan pwe ren perenki wadek neitail pwuhk kan.

Audepen pwuhko kin pekederlahng sounkawehwe kan. Mwurin petehkpen oh kamanamanlahn audepen pwuhko, e kin pekederpeseng nan computer ong pwihn en kawehwe kan nan sampah pwon pwe ren kawehwe audepe kan. Re kin nantihong pilada lepin lokaia kan me pwung me pahn pahrekiong lokaiahn wai oh pwungiong pein arail lokaia.​—Eklesiasdes 12:10.

Computer kan kin kamwadangahla doadoahk. Computer sohte kak wiliandi sounnting oh sounkawehwe kan. Ahpw arail doadoahk kak mwadang ma re doadoahngki computer. Sounkadehdehn Siohwa kan wiahda ehu prokram me adaneki Multilanguage Electronic Publishing System (MEPS). Prokram wet kahrehda ren kak daipihdi nting kan ni lokaia epwiki kei oh e pil kin koasoanehdi nting kan oh kilel kan nan wasa kan me konehng oh kaunopadahng print.

Dahme kahrehda se kin nanti wia soahng pwukat koaros pil ong lokaia kan me aramas kid keite kin doadoahngki? Pwehki Siohwa ketin kupwurki “aramas koaros en ale komourparail oh marainkihla me mehlel.”​—1 Timoty 2:3, 4.

• Soangen doadoahk dah kan kin pidada ntingdahn neitail pwuhk kan?

• Dahme kahrehda se kin kawehwehdi neitail pwuhk kan nan soangsoangen lokaia tohto kan?

At pwihn kin wiahda oh kihpeseng Paipel oh pwuhk rar kei ni soh isepe sounpar koaros. Se kin kauwada oh apwalih Wasahn Kaudok kan oh ohpis kan en Sounkadehdehn Siohwa kan. Se kin apwalih tohn Pedel oh misineri kid kei, oh pil kin kihda sawas ni ahnsoun kahpwal laud kan. Eri, mwein ke kin medewe, ‘Ia wasa mwohni kohsang ie pwehn apwalih soahng pwukat koaros?’

Se sohte kin ale eisek kis ehu, de iding aramas en kihda mwohni de wahseli dahlen meirong. Mendahki pweinen apwalih at doadoahk pweilaud, se sohte kin peki mwohni. Daulih sounpar epwiki samwalahro, keriaun Kahn Iroir me wiawihda koasoia me at pwihn kamehlele me Siohwa me kin ketin utung at doadoahk oh at pwihn “sohte pahn peki mwohni sang rehn aramas,” oh se sohte kin wia.​—Madiu 10:8.

Sawas en mwohni me aramas akan pein toukihda kin sewese at doadoahk. Aramas tohto kin kalahnganki at doadoahk en kasukuhl en Paipel oh kihda arail sawas. Sounkadehdehn Siohwa kan kin perenki kihda arail ahnsou, kehl, mwohni oh dipwisou kan pwehn wia kupwuren Koht nan sampah pwon. (1 Kronikel 29:9) Nan Wasahn Kaudok oh wasahn mihting tohrohr kan, mie koakon en meirong me irail kan me men kihda arail sawas kak kohla kihong loale. Oh emen pil kak kihda sawas nan atail website, jw.org. Pali laud en sawas kin kohsang aramas me sohte kepwehpwe, me duwehte liohdi semwehmweo me Sises ketin kapingahki eh kihdi kisin sens toantoal riau nan dewen meirong nan tehnpas sarawio. (Luk 21:1-4) Eri, emenemen kak “katohrehsang ekis mwohni” pwehn kihda “duwen me e koasoanedier nan kapehde.”​—1 Korint 16:2; 2 Korint 9:7.

Se kamehlele me Siohwa pahn ketin pousehlahte kamwakid mohngiong en irail me men wauneki ih sang arail kihda dipwisou kesempwal kan pwehn utung doadoahk en Wehio pwe kupwure en pweida.​—Lepin Padahk 3:9.

• Dahme kahrehiong at pwihn en weksang pelien lamalam teikan?

• Ia duwen sawas en mwohni me aramas akan toukihda eh kin kadoadoahk?

Padahk en Paipel me kin kalapw wiawi nan Wasahn Kaudok en Sounkadehdehn Siohwa kan kin pidada Wehin Koht, me iei oaralap me Sises ketin kalohki.​—Luk 8:1.

Re wia wasahn kaudok mehlel nan atail wasahn kousoan. Wasahn Kaudok kan iei wasa me Sounkadehdehn Siohwa kan kin koasoanehdi arail doadoahk en kalohk nan arail wasa. (Madiu 24:14) Uwen laud oh mwomwen Wasahn Kaudok pwukat kin wekpeseng, ahpw koaros sohte kin nohn diren kapwat de sohte nohn laud. Mwomwohdiso tohto sang ehu kin kalapw doadoahngki ehu Wasahn Kaudok. Sounpar kan me ahpwtehn nek, se kauwadahr Wasahn Kaudok kapw nen kei (meh limau rahn ehu) pwehn apwalih tohtohlahn sounkalohk kan oh mwomwohdiso kan. Ia duwen met eh kak wiawi?​—Madiu 19:26.

Re kin wiawihkihda sawas en mwohni me aramas pein toukihda. Sawas en mwohni pwukat kin pekederlahng ohpis en Sounkadehdehn Siohwa kan pwe ren kihong mwomwohdiso kan me anahne kauwada de onehda Wasahn Kaudok kan.

Irail me kin toukihda pein irail oh kohsang soangsoangen wasa kan kin kauwada Wasahn Kaudok kan. Nan sahpw tohto, re koasoanehdier Pwihn en Kauwada Wasahn Kaudok kan. Pwihn en soun kauwada Wasahn Kaudok kan oh irail me kin toukihda pein irail pwehn sawas kin keseu sang ehu mwomwohdiso ong ehu mwomwohdiso nan sahpwo, iangahki wasa doh kan, pwehn sewese mwomwohdiso kan en kauwada arail Wasahn Kaudok kan. Nan sahpw teikan, Sounkadehde koahiek kan kin idihdida pwehn apwalih koukoudahn oh onohndahn Wasahn Kaudok kan nan wasa kan me koasoandi ren apwalih. Mendahki me tohto me koahiek en wia ihmw kin toukihda pein irail ni wasa koaros me Wasahn Kaudok kin kokouda ie, pali laud en irail me toukihda pein irail iei tohnmwomwohdiso en wasao. Sapwellimen Siohwa manaman oh nanti laud en sapwellime aramas akan kin kahrehiong soahng pwukat koaros en pweida.​—Melkahka 127:1; Kolose 3:23.

• Ia duwen koukoudahn Wasahn Kaudok kan nan sampah pwon eh kak wiawi?

Wasahn Kaudok en Sounkadehdehn Siohwa kan koaros kin pidada mwaren Koht me sarawi. Ihme kahrehda, kitail kin pehm me atail iang apwalih Wasahn Kaudok pwe en mwakelekel, mwomw mwahu oh soandi mwahu kin wia pwais kaselel ehu oh kisehn atail kaudok me kesempwal. Koaros kak iang.

Iang sawas en kamwakel mwurin mihting. Mwurin ehuehu mihting, tohnmwomwohdiso kan kin perenki wia kisin kamwakel pwe Wasahn Kaudok en soandi mwahu. Koasoandi en kamwakele Wasahn Kaudok pwon kin kaukaule wiawi. Elder men de sounsawas men kin koasoanehdi doadoahk wet ni eh kin idawehn soahng kan me kileldi en wiawi. Ma anahnepe mie, emenemen kin iang sawas en koakoahk oh dahlimwih taht pil wasa teikan, kainenehla sehr kan, kamwakelehki imwen kainen wini kan, widen wenihmwtok oh kilahs en irongen, kesehla kihd, de kamwakele liki. Pak ehu de tohtohsang nan sounpar ehu, rahn ehu kin koasoandi ong kamwakel laud. Sang ni atail mweidohng neitail seri kan en iang wia ekei doadoahk pwukat, kitail kin padahkihong irail ren wauneki atail wasahn kaudok.​—Eklesiasdes 5:1.

Iang sawas en kamwahwihala wasa de dipwisou kan. Sounpar koaros, dou pisetik kin wiawi loale oh likin Wasahn Kaudok. Sang dou wet, doadoahk en apwalih kin kaukaule wiawi pwe Wasahn Kaudok en soandi mwahu oh pwe en dehr doadoahngkihla mwahl mwohni. (2 Kronikel 24:13; 34:10) Wasahn Kaudok me mwakelekel oh soandi mwahu kin wia wasa ehu me warohng atail kin kaudok ong Koht. Ni atail kin iang doadoahk wet, kitail kin kasalehda me kitail kin poakohng Siohwa oh wauneki atail wasahn kaudok. (Melkahka 122:1) Met kin wia kadehde mwahu ong aramas akan wasao.​—2 Korint 6:3.

• Dahme kahrehda kitail en dehr soukautih ong atail wasahn kaudok?

• Soangen koasoandi dah kan me kin wiawi pwe Wasahn Kaudok en mwakelekel?

Ke men wia roporop pwehn kalaudehla omw wehwehki Paipel? Ke men esehla duwen ehu iren Paipel, aramas men, wasa ehu, de mehkot me kileldi nan Paipel? De mie pak me ke kin medewe ma Mahsen en Koht kak apwalihala iren kapwunod ehu me ke ahneki? Eri, ke kak doadoahngki Library en Wasahn Kaudok.

E kin kihda mehn sawas kan ong roporop. Mwein ke sohte naineki sawaspen Paipel koaros me Sounkadehdehn Siohwa kan wiahda ni omw lokaia. Ahpw nan library en Wasahn Kaudok, mie pali laud en pwuhk kapw kan. Mwein pil mie soangsoangen kawehwehn Paipel kan, dikseneri mwahu kan oh pwuhk teikan me kak sewese atail roporop. Ke kak doadoahngki libraryo mwohn de mwurin mihting kan. Ma mie computer, Watchtower Library pahn mi loale. Prokram wet kin audaudki neitail pwuhk tohto oh e kin mengei en wia roporop sang ni omw pahn rapahki oaralap ehu, lepin lokaia ehu de iren Paipel ehu.

E kin wia sawas ong tohnsukuhl kan me kin iang Mihting en Atail Mour oh Kalohk. Ke kak doadoahngki library en Wasahn Kaudok ni omw pahn kaunopada omw padahk kan. Sounapwalih en Mihting en Atail Mour oh Kalohk kin pwukoahki apwalih library. E pwukoahki en tehk mwahu ma mie pwuhk kapw kan oh e kin soandi mwahu. Ih de me kin onop Paipel rehmw kak kasalehiong uhk ia duwen omw pahn diar dahme ke anahne. Ahpw sohte pwuhk ehu nan library pahn wisiksang nan Wasahn Kaudok. Kitail pil men kanahieng atail doadoahngki pwuhk pwukat oh dehr ntingih loale.

Paipel kin kawehwehda me pwe kitail en uhdahn esehla Koht, kitail anahne ngoangki wia met “rasehng me kin rapahki silper de takai kesempwal me rir kan.” (Lepin Padahk 2:1-5) Library en Wasahn Kaudok kak seweseiuk ken tepida wia omw roporop.

• Soangen mehn sawas dah kan ong roporop me mi nan library en Wasahn Kaudok?

• Ihs me kak seweseiuk ken doadoahngki library ni ahl me keieu mwahu?

Sises Krais mahsanihong sapwellime tohnpadahk ko: “Amwail marain en sansal mwohn aramas akan pwe re en kilang amwail wiewia mwahu kan oh kapikapingahki Samamwail me ketiket nanleng.” (Madiu 5:16) Pwehn wia met, se kin doadoahngki soangen dipwisou kan nan rahnwet iangahki Internet. Nait website, jw.org, iei Web site me se kin doadoahngki me kin kihda ire kan me pid dahme Sounkadehdehn Siohwa kan kin kamehlele oh arail wiewia kan. Dahme e kin kasalehda?

Pasapeng kan sang Paipel ong peidek kan me aramas kin kalapw idek. Ke kak diarada pasapeng kan ong ekei peidek kesempwal kan me aramas kin idek. Karasepe, kisin doaropwe kan, Lokolok Pahn Imwisekla? oh Me Melahr akan Uhdahn Kak Pwurehng Mourda? kin wiawihda ni lokaia tohtohsang 600. Ke pil kak diarada New World Translation ni lokaia tohtohsang 130 oh sawaspen Paipel tohto, iangahki pwuhken Dahme Paipel Uhdahn Padahngki? oh Kahn Iroir oh Awake! kapw kan. Ke kak wadek de rong tohtohn pwuhk pwukat nan Internet de download dahme ke men rong de wadek nan MP3, PDF de EPUB. Ke pil kak print ekei pali en pwuhk pwukat pwehn ehukihong emen me perenki wadek ni pein eh lokaia! Kasdo kan pil kin wiawihda ni soangsoangen lokaia tohto ong irail kan me sohte kak rong. Ke kak download wadawad en Paipel me wiawi ni mwomwen sipai, sipai kan en Paipel, oh keseng kaselel kan pwe ken kak perenki rong.

Ire kan me pid Sounkadehdehn Siohwa kan. Ke pil kak diar rohng kapw kan me ke kak wadek oh kisin kasdo kan duwen at doadoahk nan sampah pwon, soahng kan me wiawi me pidada Sounkadehdehn Siohwa kan, oh at doadoahk en sewese irail kan me kin lelohng kahpwal kan. Ke kak diar pakair kan me pid mihting tohrohr kan me pahn wiawi oh ia duwen omw kak lokaialahng ohpis en Sounkadehdehn Siohwa kan.

Ni ahl pwukat, se kin kasansalehda marain en padahk mehlel lella wasa doh kan nan sampah. Aramas nan wasa koaros iangahki Antarctica kin paiekihda marain wet. Se kin kapakapki mahsen en Siohwa “en wonlahte mwowe oh mwadang lohkseli” nan sampah pwon pwehn kalinganahla Koht.​—2 Deselonika 3:1.

• Ia duwen jw.org eh kin sewese aramas tohto ren sukuhlki padahk mehlel en Paipel?

• Dahme ke men rapahki nan nait website?