Aramas tohto solahr iang sarawi pwehki re sohte kin ale sawas pwehn diar pasapengpen peidek kesempwal kan nan mour de ale kamwaitparail. Eri, dahme kahrehda ke anahne iang towehda mihting en Kristian kan me Sounkadehdehn Siohwa kan kin koasoanehdi? Dahme ke pahn diar wasao?

Ke pahn diar peren en iang mi nanpwungen aramas me kin limpoak oh nsenohki meteikan. Tepin Kristian kan kin koasoandi pwe ren iang ehuehu mwomwohdiso, oh re kin wia mihting kan pwehn kaudok ong Koht, onopki iren Pwuhk Sarawi kan oh kangoange emenemen. (Ipru 10:24, 25) Pwehki arail kin kasalehda limpoak ni arail kin pokonpene, re pehm me re mi nanpwungen kompoakparail mehlel kan, me iei riarail Kristian kan. (2 Deselonika 1:3; 3 Sohn 14, 15) Se kin idawehn arail mehn kahlemeng oh ahneki soangen perenohte.

Ke pahn diar me ke kak sukuhlki duwen omw pahn doadoahngki kaweid kan en Paipel. Duwehte me kileldi nan Paipel, ohl, lih oh seri kan koaros kin pokonpene. Irail kan me koahiek en wia padahk kin doadoahngki Paipel pwehn sewese kitail en wehwehki duwen atail pahn doadoahngki kaweid kan en Paipel nan mour en ehuehu rahn. (Deuderonomi 31:12; Nehmaia 8:8) Koaros kak iang pasapeng oh koul, oh met kin mweidohng kitail en kasalehda atail koapworopwor en Kristian.​—Ipru 10:23.

Ke pahn diar me omw pwoson Koht pahn kehlailda. Wahnpoaron Pohl padahkihong ehu mwomwohdiso ahnsowo: “I kin anahne mehlel I en pwarowohng rehmwail, . . . kitail pahn sawaspene, amwail pwoson en sewese ie, oh ei pwoson en sewesei kumwail.” (Rom 1:11, 12) Ni atail mihting kan, atail kaukaule tuhwong iengetail Kristian kan kin kakehlaka atail pwoson oh atail koasoanehdi teng en mourki mour me pahrekiong kaweid kan en Paipel.

Ke sou iang towehda at mihting en mwomwohdiso me pahn wiawi wihket oh pein kilang mepwukat? Koaros pahn kasamwo iuk. Mihting koaros sohte isepe. Sohte dahlen meirong pahn wisikseli.

• Mehnia kahlemeng me atail mihting en mwomwohdiso kin alasang?

• Ia duwen atail kak paiekihda atail iang towehda mihting en Kristian kan?

Mehnda ma kitail kin alu nanwel de e kin keteu laud, kitail kin kaukaule iang towehda atail mihting en Kristian kan. Mendahki kahpwal kan en mour oh re kin pwangada mwurin doadoahk, dahme kahrehda Sounkadehdehn Siohwa kan kin nantihong werekiong iengerail kan?

E kin wia kamwahupatail. Pohl ntingihedi “nsenoh sawaspene” ni eh koasoia duwen irail me kitail kin werekiong nan mwomwohdiso. (Ipru 10:24) Lepin lokaia wet wehwehki me kitail anahne esehla emenemen. Eri, dahme Pohl koasoia kin kangoange kitail en kin nsenohki meteikan. Sang ni atail esehla iengetail Kristian kan, kitail diarada me ekei irail powehdier kahpwal kan me duwehte atail oh me re kak sewese kitail en pil pweida.

E kin kahrehda nanpwungatail en kehlailla. Ni atail mihting kan, kitail kin pokonpene rehn iengetail kan me wia kompoakepatail keren kan. Ekei pak, kitail kin pokonpene mwemweit, mwadong oh wia mehn kamweit kan me mwahu. Soangen kamwahu dah me atail werekpene kin kahrehda? Kitail kin sukuhlki en kalaudehla atail kesempwalki emenemen, oh met kin kakehlaka limpoak me mi nanpwungatail. Eri, ni ahnsou me iengetail kan kin lelohng kahpwal, kitail kin mwadang sewese irail pwehki nanpwungmwahu kehlail me kitail kin ahneki. (Lepin Padahk 17:17) Sang atail kin werekiong tohn atail mwomwohdiso koaros, kitail kin kasalehda me kitail kin ahneki “soangen nsenohteieu ong ni sawaspene.”​—1 Korint 12:25, 26.

Se kangoange iuk ken pilada en kompoakepahnki irail kan me kin wiewia kupwuren Koht. Ke pahn diarada soangen kompoakepah pwukat rehn Sounkadehdehn Siohwa kan. Menlau dehr mweidohng mehkot en kauhiukedihsang werekiong kiht.

• Dahme kahrehda e wia kamwahupatail en werekpene nan mihting kan?

• Iahd me ke men iang towehda at mihting pwehn eseikitalla?

Mie koul, kapakap, wadawad oh koasoipen iren Paipel kan nan mihting en tepin Kristian ko. (1 Korint 14:26) Ke kak kasik soahngohte nan atail mihting kan.

Kaweid kan kin kohsang Paipel oh kin kadoadoahk nan atail mour. Ni imwin wihk kan, ehuehu mwomwohdiso kin tuhpene pwehn rong ehu kapahrek en Paipel me kin reireiki minit 30 duwen Paipel eh kin pid atail mour oh atail ahnsou. Kitail koaros kin ale kangoang en iang pahkala neitail Paipel oh iang wadek. Mwurin kapahrek wet, mie Onop en “Kahn Iroir” me kin reireiki awa ehu, me koaros me towehda kak iang pasapeng nan iren onop en Kahn Iroir. Onop wet kin sewesei kitail en doadoahngki kaweid kan en Paipel nan atail mour. Mwomwohdiso koaros me daulih 110,000 nan sampah pwon kin onopki iren onop tehieu.

Kitail kin ale sawas pwehn kamwahwihala atail koahiek en padahk. Kitail pil kin tuhpene ehu soutik nan wihk kan ong prokram ehu me mie pali siluh, me adaneki Atail Mour en Kristian oh Kalohk. E poahsoandahsang Doaropwehn Kasukuhl en Mihting en Atail Mour oh Kalohk me kin wiawihda sounpwong koaros. Pali keieu en mihting wet, Soahng Kesempwal kan Sang Mahsen en Koht, kin sewese kitail en kalaudehla atail wehwehki ekei iren Paipel kan me tohnmwomwohdiso wadekehr mwohn mihting. Mwurin mwo, Ia Duwen Atail Pahn Kak Kamwahwihala Atail Koahiek nan Kalohk, kin mie kamwomwada kan duwen mwomwen atail kak doadoahngki Paipel oh koasoiong meteikan. Soukaweido kin tetehk pwehn sewese kamwahwihala atail wadawad oh koahiek en koasoakoasoi. (1 Timoty 4:13) Kaimwiseklahn pali, Momour nin Duwen Kristian kei, kin kasalehda kaweid kan oh ire mehlel kan en Paipel ong atail mour en ehuehu rahn. E kin mie peidek oh pasapeng oh koasoakoasoipene me kak kalaudehla atail wehwehki Paipel.

Ni omw pahn iang atail mihting kan, ke uhdahn pahn perenkihda kasukuhl en Paipel mwahu me ke pahn ale.​—Aiseia 54:13.

• Dahme ke kak kasik ken rong nan mihting en Sounkadehdehn Siohwa kan?

• Mehnia nanpwungen atail mihting en wihk kan me ke men iang towehda?

Ke kin kilang kilel kan nan pwuhk wet duwen Sounkadehdehn Siohwa kan ar likoumwahuda ni ar kin iang towehda ar mihting en mwomwohdiso kan? Dahme kahrehda kitail kin nsenohki atail likou oh mwomwatail?

Pwehn kasalehda wahu ong atail Koht. Mehlel me Koht sohte kin ketin kasawihte maslikin aramas. (1 Samuel 16:7) Ahpw ni atail kin kohpene pwehn kaudok ong Koht, kitail uhdahn men kasalehda wahu ong ih oh iengatail tohnkaudok kan. Ma kitail pahn uh mwohn sounkopwung men nan mwoalen kopwung, kitail pahn uhdahn nsenohki ma atail likou oh mwomwatail pahn kasalehda me kitail wauneki ih. Pil duwehte, atail likou oh mwomwatail ahnsoun mihting kan kin kasalehda me kitail wauneki “Sounkopwung en sampah pwon,” Siohwa Koht oh wasa me kitail kin kaudok ong ih.​—Senesis 18:25.

Pwehn kasalehda kaweid kan me kitail kin mourki. Paipel kin kangoange Kristian kan ren “likoumwahuda.” (1 Timoty 2:9, 10) “Likoumwahuda” kin wehwehki en dehr likawih soangen likou kan me nohn kapwatapwat oh pil kin kasalehda paliwar me pahn kahrehiong meteikan en kilang kitail. Met pil sewese kitail en pilada likou me mwahu ahpw sohte mwomw suwed de nohn daulihla. Ahpw kaweid pwukat pil mweidohng kitail en pilada soangsoangen likou kan oh kapwat kan. Atail kin mwomw mwahu oh likoumwahuda kak kalinganahla atail padahk duwen “atail Sounkomour” oh “kapingahki Koht.” (Taitus 2:10; 1 Piter 2:12) Sang ni atail kin likoumwahuda ong mihting kan, kitail kin kamwakid mwomwen ahn meteikan ar pahn kilangwohng kaudok ong Siohwa.

Mehnda ma sohte omw likou mwahu, se pahn perenkihte kasamwo iuk ken towehda mihting kan ni at Wasahn Kaudok. Kitail sohte anahne likawih likou pweilaud pwe mwomwatail en konehng, mwakelekel oh soandi mwahu.

• Ia uwen kesempwal mwomwen atail likou ni atail kin kaudokiong Koht?

• Mehnia kaweid me kin sewese atail pilipil ong likou oh kapwat?

Ma ke kin onopki Paipel rehn emen Sounkadehdehn Siohwa, mwein ke kin song en kaunopada iren onopo mwohn ehuehu onop. E pahn mwahu ken wia soahngohte mwohn omw pahn iang towehda mihting en mwomwohdiso pwe ken uhdahn paiekihda. Kitail pahn pweida mwahu ma kitail pahn ahnla wiahda koasoandi mwahu.

Koasoanehdi iahd oh ia wasa ken onop. Iahd me keieu mwahu ken onop? Nimensehngie, mwohn omw pahn tepida doadoahk de ni soutik mwurin noumw seri kan ar meirla? Mehnda ma ke sohte kak onop ahnsou reirei, koasoanehdi uwen ahnsou me ke pahn doadoahngki ong onop oh dehr mweidohng mehkot en kerempwa iuk. Rapahkihda ehu wasa me meleilei, oh kihsang soahng koaros me pahn kerempwa iuk ni omw pahn kakunla redio, TV, oh cell phone. Kapakap mwohn onop pahn sewese iuk ken katikala kapwunod en rahno pwe ken kak medemedewehte Mahsen en Koht.​—Pilipai 4:6, 7.

Lainihala oh kilelehdi ekei lokaia kan oh kaunopada iang pasapeng. Keieu, wehwehkihla mahs mouren iren onopo. Medewe duwen oaralap en iren onopo de irelaudo oh tehk ia duwen ehuehu sawasepen oaralap eh dokedoke oaralapo. Tehk kilel kan oh peidek en kousapahl kan me kin kasalehda ire kesempwal kan. Eri, wadek ehuehu parakrap oh rapahkihda pasapengpen peidek me kileldi. Rapahkihda oh wadek iren Paipel kan me kileldi oh medemedewe ia duwen ire pwukat ar kin utung audepen parakrapo. (Wiewia 17:11) Ahnsou me ke diar pasapengpen peideko, lainihala de kilelehdihte ekei lokaia kan me pahn kataman ong uhk pasapengo ni ahnsoun mihting. Eri, ni ahnsoun mihting, ke kak kihda pehmwen ma ke men oh wia pasapeng mwotomwot ehu ni pein omw lokaia.

Sang ni omw kin tehk soangsoangen ire kan me pahn pwarada nan ehuehu wihk ni mihting kan, ke pahn kapatahiong ire kapw kan dahme ke wehwehkier duwen Paipel duwehte omw kin nekidala kepwe nan “imwen nahk.”​—Madiu 13:51, 52.

• Soangen koasoandi dah me ke kak ahnla wia pwehn kaunopada ong mihting kan?

• Ia duwen omw kak kaunopada pein kowe pwehn wia pasapeng nan mihting?

Sangete mahs, Siohwa kin ketin kupwurki ehuehu peneinei ren doadoahngki ahnsou en ehupene pwehn kakehlaka arail nanpwungmwahu reh oh arail peneinei. (Deuderonomi 6:6, 7) Ihme kahrehda Sounkadehdehn Siohwa kan kin koasoanehdi ahnsou ehu nan ehuehu wihk pwehn wia arail kaudok en peneinei. Irail kin koasoiapene ni saledek soahng kan me re anahne me pidada arail nanpwungmwahu rehn Koht. Mehnda ma ke kin kelehpw, soangen ahnsou pwukat kak wia ahnsou mwahu ken karanih Koht, mwein onopki ehu oaralap en Paipel me ke pilada.

E wia ahnsoun karanihala Siohwa. Paipel mahsanih: “Kumwail keido mpen Koht, oh e pahn ketin keiong mpamwail.” (Seims 4:8) Kitail kin esehla mwahu Siohwa ni atail kin sukuhlki oaritik kan duwen soangen Koht dah men ih oh pil sapwellime wiewia kan sang nan sapwellime Mahsen, Paipel. Ehu ahl mengei ong omw peneinei en tapiada kaudok en peneinei iei en wadekpene Paipel ni ngihl laud, mwein idawehn koasoandi en wadawad en Paipel ong mihting en Atail Mour oh Kalohk. Koasoandi kak wiawihda pwe emenemen tohn omw peneinei en wadek ekei wasa nan Paipel, eri kumwail koaros kak koasoiapene dahme kumwail sukuhlki sang Paipel.

E wia ahnsoun karanihala omw peneinei. Ohl pwopwoud oh lih pwopwoud, oh pil pahpa nohno oh seri kan, kin kakehlaka nanpwungarail ni arail kin onop Paipel nin duwen peneinei ehu. E anahne wia ahnsou kaperen oh meleilei ehu, ahnsou ehu me tohn peneinei pwon kin kasikasik ehuehu wihk. Pahpa nohno kak medemedewe sounpar en neira seri kan oh pilada ire mwahu kan ren koasoiapene, mwein ire kan sang Kahn Iroir oh pwuhk teikan de sang nan neitail website, jw.org. Kumwail kak koasoia duwen kahpwal ehu me noumwail seri kan kin lelohng nan sukuhl oh ia duwen ar kak powehdi. Oh kumwail sou kilang prokram en JW Broadcasting (tv.jw.org) oh mwuri koasoiapene? Kumwail pil kak koulki koul kan me pahn wiawi nan mihting kan oh kang de nim mehkot mwurin kaudok en peneinei.

Soangen ahnsou tohrohr wet me kumwail kin doadoahngki ong kaudokiong Siohwa nin duwen peneinei ehu pahn sewese koaros nan peneinei ren perenki onop Mahsen en Koht, oh e uhdahn pahn ketin kapaiada amwail nannanti.—Melkahka 1:1-3.

• Dahme kahrehda kitail kin koasoanehdi ahnsou ong kaudok en peneinei?

• Ia duwen pahpa oh nohno ara kak wiahda ahnsoun kaudok en peneinei en kaperen ong koaros nan peneinei?

Dahme kahrehda aramas pwukat mesen perenki? Pwehki re iang towehda ehu rehn atail mihting tohrohr kan. Duwehte sapwellimen Koht ladu kan mahs ar kin ale kaweid en pokonpene pak siluh nan pahr ehu, kitail pil kin kasikasik en tuhpene ong atail mihting tohrohr kan. (Deuderonomi 16:16) Pahr koaros nan sampah pwon, mie atail mihting tohrohr siluh me reireiki rahn ehu, riau de siluh. Ia duwen atail kin paiekihda mihting tohrohr pwukat?

Mihting tohrohr pwukat kin kakehlahda nanpwungen Kristian kan. Duwehte mehn Israel kan ar kin perenki kapinga Siohwa “mwohn pokon en sapwellime aramas akan,” kitail pil kin perenki kaudokiong Siohwa nan mihting tohrohr kan. (Melkahka 26:12; 111:1) Mihting tohrohr pwukat kin kihong kitail ahnsou mwahu en tuhwong oh werekiong iengetail Sounkadehde kan sang mwomwohdiso teikan de sahpw teikan. Ni souwas, kitail kin mwengepene wasa me mihting tohrohr kan kin wiawi ie oh met kin kalaudehla atail peren en patehng riatail kan nan soangen ahnsou pwukat. (Wiewia 2:42) Nan mihting tohrohr pwukat, kitail kin pein kilang limpoak me kin kaminiminpene riatail Kristian kan nan sampah pwon.​—1 Piter 2:17.

Mihting tohrohr pwukat kin sewese kitail en kakairada atail nanpwungmwahu rehn Koht. Mehn Israel kan kin paiekihda arail “wehwehki” iren Paipel kan me kawehwehpe wiawi ong irail. (Nehmaia 8:8, 12) Kitail pil kin kesempwalki kaweid kan en Paipel me kitail kin ale sang ni mihting tohrohr kan. Ehuehu prokram kin poahsoankihda ehu iren Paipel. Sang padahk oh kamwomwada kan, kitail kin sukuhlki ia duwen atail pahn wia kupwuren Koht nan atail mour. Kitail kin ale mehn kangoang ni atail kin rong sang rehn irail kan me kin pweida ni arail kin powehdi kahpwal kan nan arail mouren Kristian nan ahnsou apwal pwukat. Nan ekei mihting tohrohr kan, mie sipai en aramas akan nan Paipel me kin kahrehda kitail en pehm me kitail mi ni ahnsowo oh e pil wia mehn kasukuhl mwahu ong kitail. Ni atail mihting tohrohr kan, e kin mie papidais ong irail kan me kin men kasalehda arail inou ong Koht.

• Dahme kahrehda mihting tohrohr kan kin wia ahnsou kaperen kei?

• Ia duwen omw kak paiekihda omw iang towehda mihting tohrohr kan?

Mwohnte eh pwoula, Sises mahsanih: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros​—a mwuri, imwin sampah ahpw pahn kohdo.” (Madiu 24:14) Ahpw ia duwen doadoahk en kalohk wet nan sampah pwon eh kak wiawi? Sang ni atail kin idawehn mehn kahlemeng me Sises ketikihda ni eh ketiket sampah.​—Luk 8:1.

Kitail kin song tuhwong aramas akan ni imwarail kan. Sises ketin padahkihong sapwellime tohnpadahk ko ren kalohki rongamwahwo sang ihmw lel ihmw. (Madiu 10:11-13; Wiewia 5:42) Sounkalohk kan ni mwehin wahnpoaron ko kin ale koasoandi ong wasa me re pahn kalohk ie. (Madiu 10:5, 6) Duwehte rahn pwukat, atail doadoahk en kalohk kin soandi mwahu oh kin mie wasahn kalohk kan ong ehuehu mwomwohdiso. Met kahrehda kitail en kak kapwaiada sapwellimen Sises kehkehlik en “kalohkiseli rongamwahu ong aramas akan” oh wia kadehde mwahu.​—Wiewia 10:42.

Kitail kin nantihong tuhwong aramas akan wasa koaros me kitail kak diar irail. Sises pil ketikihda mehn kahlemeng mwahu ni eh ketin kalohk ong aramas akan wasa me re kin kalapw mi ie, duwehte ni oaroahr de ni pwarer me irail kin idipil ie. (Mark 4:1; Sohn 4:5-15) Kitail pil kin koasoiaiong aramas akan duwen Paipel wasa koaros me kitail kak, duwehte nanial kan, wasahn pesines, wasahn mwemweit de ni atail kin doadoahngki delepwon. Kitail kin kalohk ong mehn mpatail kan, iengetail tohndoadoahk kan, iengetail tohnsukuhl kan oh kisehtail kan ni ahnsou me konehng. Soangen nannanti pwukat koaros kin kahrehiong aramas rar kei nan sampah pwon ren kak rong ‘rongamwahun sapwellimen Koht komour.’​—Melkahka 96:2.

Ke kak medewehda ekei aramas me ke men ehukihong rongamwahu en Wehin Koht oh dahme rohng wet pahn wia ong arail mour ahnsou kohkohdo? Dehr kelehpwiki koapworopwor wet ahpw ken ehukihong irail ni karuwaru!

• “Rongamwahu” dahieu me anahne lohkiseli?

• Ia duwen Sounkadehdehn Siohwa kan ar kin alasang wiepen kalohk me Sises ketin wia?

Lepin lokaia “pioneer” kin kalapw dokedoke emen me kin tiengla mahs oh wiahda ahl pwe meteikan en kak keid ie. Sises kin ketin duwehte pioneer men, pwehki e ketin pekederdo sampah pwe en ketin wia doadoahk en komour oh ketin wiahda ahl pwe aramas akan en kak keidla ie ong komour. (Madiu 20:28) Rahnwet, sapwellime tohnpadahk kan kin alasang ih sang ni arail kin doadoahngki uwen laud en ahnsou me re kakohng pwehn sewese aramas akan ren wiahla sapwellime tohnpadahk. (Madiu 28:19, 20) Ekei kin kak iang wia doadoahk me se kin kahdaneki doadoahk en pioneer.

Pioneer iei emen me kin doadoahngki pali laud en eh ahnsou ong kalohk. Sounkadehdehn Siohwa kan koaros kin wia sounkalohk en rongamwahwo. Ahpw ekei kin koasoanehdi arail mour pwehn papah nin duwen pioneer kan oh doadoahngki awa 70 nan kalohk ehuehu sounpwong. Pwehn wia met, me tohto kin katikala arail doadoahk en mwohni. Ekei kin pilipilda pwehn papah nin duwen pioneer tohrohr kan wasa me anahn en sounkalohk kin laud oh re kin doadoahngki awa 130 de laudsang nan kalohk ehuehu sounpwong. Pioneer kan kin itarki dahme re ahnekier oh kin kamehlele me Siohwa pahn ketikihong irail arail anahn kan. (Madiu 6:31-33; 1 Timoty 6:6-8) Irail kan me sohte kak wia pioneer ahnsou koaros mwein kak papah nin duwen sawaspen pioneer kan ni ahnsou me re kak oh kalaudehla arail doadoahk en kalohk ni arail doadoahngki awa 30 de 50 nan sounpwong ehu.

Pioneer men kin mwekidki limpoak ong Koht oh aramas. Duwehte Sises, kitail kin ese me aramas tohto uhdahn kin anahne esehla Koht oh kupwure kan. (Mark 6:34) Kitail ahneki padahk mehlel me kak sewese irail ahnsou wet oh me pahn kihong irail koapworopwor mehlel ong ahnsou kohkohdo. Limpoak ong mehn mpatail kin kamwakid pioneer men en doadoahngki eh ahnsou oh kehl pwehn sewese meteikan ren esehla rongamwahwo. (Madiu 22:39; 1 Deselonika 2:8) Met kin kakehlahda eh pwoson oh kahrehiong ih en karanihala Koht oh ahneki peren laud.​—Wiewia 20:35.

• Ia duwen omw kak kawehwehda pioneer men?

• Dahme kin kamwakid ekei en pioneer ahnsou koaros?

Kasukuhl sang rehn Koht kin wia kilelepen Sounkadehdehn Siohwa kan. Sukuhl tohrohr kan kin wiawihda ong irail kan me kin doadoahngki pali laud en arail ahnsou ong doadoahk en kalohki Wehio pwe ren kak uhdahn ‘kapwaiada arail pwukoa’ en kalohk.​—2 Timoty 4:5.

Sukuhl en Pioneer. Ni kaimwiseklahn tepin pahr en pioneer kapw men, e kin iang sukuhl ehu me kin reireiki rahn weneu me ele pahn wiawi ni ehu Wasahn Kaudok me karanih eh wasa. Kahrepen sukuhl wet iei en sewese pioneero en karanihala Siohwa, koahiekla nan soangsoangen wiepe koaros nan kalohk oh pousehlahte papah ni lelepek.

Sukuhl ong Sounkalohki Wehio kan. Sukuhl wet me kin reireiki sounpwong riau kin wiawihda pwehn kaiahnehda pioneer koahiek kan me kin perenki kohkohlahsang arail wasa oh papah nan wasa kan me anahne sawas. Arail mwekid kin kasalehda me irail kin nda, “Iet ngehi, Maing, komwi ketin poaroneiehla” ni arail kin kahlemengih Sounkalohki Rongamwahu me keieu lapalap me papah nin sampah, Sises Krais. (Aiseia 6:8; Sohn 7:29) En kosoula wasa dohsang arail wasa ele pahn wehwehki me irail anahne ahnla soangen mour me sohte nohk diren kepwe kan. Tiahk, karakar de lemwulemwur, oh mwenge ele pahn uhdahn weksang dahme irail kin ahn. Mwein irail pil anahne sukuhlki ehu lokaia tohrohr. Sukuhl wet kin sewese brother oh sister kiripw kan oh pwopwoud kan, nanpwungen sounpar 23 lel 65, en kakairada irair en Kristian kan me re pahn anahne nan arail pwukoa oh soangen koahiek kan me pahn sewese irail pwe Siohwa oh sapwellime pwihn en kak kalaudehla arail doadoahk.

Sukuhl en Paipel en Kilead. Ni lokaiahn Ipru, lepin lokaia wet “Kilead” kin pid “Kadehde.” Sang ahnsou me Sukuhl en Kilead tepida nan pahr 1943, tohtohsang meh 8,000 kesepwilsang sukuhl wet oh pekederla nin duwen misineri kei pwe ren wia kadehde ong “tohn sampah koaros” oh kin pweida mwahu. (Wiewia 13:47) Ahnsou me irail me kesepwilsang sukuhlo tepin lella Peru, sohte mwomwohdiso nan sahpwo. Ahpw met mie mwomwohdiso me tohtohsang 1,000. Ahnsou me atail misineri kan tepida doadoahk nan Sapan, malaulau sang Sounkadehdehn Siohwa ehk me mi nan sahpwo. Ahpw met tohtohsang meh 200,000. Sukuhl en Kilead me kin reireiki sounpwong limau kin pid onopki Mahsen en Koht ni keneinei. Irail kan me kin papah nin duwen pioneer tohrohr kan de misineri kan, de irail me kin papah ni ohpis en Sounkadehdehn Siohwa kan, de irail sounapwalih kan me kin seiloak, kin ale luhk ong sukuhl wet pwe ren ale kasukuhl mwahu pwehn sewese katengehdi oh kakehlakahda doadoahk en sampah pwon.

• Ia kahrepen Sukuhl en Pioneer?

• Sukuhl ong Sounkalohki Wehio kan kin wiawihda ong ihs?