Oaralap me keieu kesempwal nan Paipel iei Wehin Koht. Siohwa pahn ketin doadoahngki Wehi wet pwehn kapwaiada dahme e ketin kupwurki ong sampah sangete nin tapio. Dahkot Wehin Koht? Ia duwen atail ese me e wie kakaun ni ahnsou wet? Dahme Wehio kapwaiadahr? Oh dahme e pahn wia ni ahnsou kohkohdo? Iren mehn kasukuhl wet oh meh riau mwurin met pahn sapengala peidek pwukat.

1. Dahkot Wehin Koht oh ihs me Nanmwarkien Wehio?

Wehio iei koperment ehu me Siohwa Koht ketin kauwada. Sises Krais me wia Nanmwarkien Wehio, oh e kin ketin kakaun sang nanleng. (Madiu 4:17; Sohn 18:36) Paipel mahsaniheki Sises: “E pahn ketin kaunda . . . nin duwen Nanmwarki men kohkohlahte.” (Luk 1:32, 33) Nin duwen Nanmwarkien Wehin Koht, Sises pahn ketin kaunda aramas koaros nin sampah.

2. Ihs me pahn iang Sises kaunda?

Sises sohte pahn ketin kelehpw kakaun. Aramas akan “sang keinek koaros oh lokaia koaros oh aramas koaros oh wehi koaros . . . pahn kaunda sampah nin duwen nanmwarki kei.” (Kaudiahl 5:9, 10) Meh depe me pahn iang Sises kakaun? Sangete ni ahnsou me Sises ketidihdo sampah, Kristian rar kei wiahla sapwellime tohnpadahk. Ahpw mehte 144,000 me kohdahla nanleng pwehn iang Sises kaunda. (Wadek Kaudiahl 14:1-4.) Kristian teikan koaros nin sampah pahn wiahla towe mehlel en Wehio.​—Melkahka 37:29.

3. Dahme kahrehda Wehin Koht mwahusang koperment en aramas?

Mehnda ma kaun akan kin song wiahda mehkot mwahu, re sohte ahneki manaman en wia soahng koaros me re men wia. Oh kaun akan me kin kohdo mwurirail mweinele kin roporop ong pein irail oh sohte kin men sewese aramas akan. Ahpw sohte me pahn wiliandi Sises me wia Kaunen Wehin Koht. Koht ketin ‘kauwadahr mwehi ehu me sohte imwi.’ (Daniel 2:​44) Sises pahn ketin kaunda sampah pwon, oh e sohte pahn ketin lipilipilki aramas. E me limpoak, kadek oh pwung pahrek, oh e pahn ketin padahkihong aramas akan ren kasalepene limpoak, kadek oh pwung pahrek.​—Wadek Aiseia 11:9.

4. Koperment kehlail ehu pahn kaunda sampah pwon

Sises sapwellimanki manaman en kaunda me laudsang kaun koaros nan poadopoad. Wadek Madiu 28:18, oh mwuri koasoiapene peidek wet:

• Ia duwen sapwellimen Sises manaman en kaunda eh siksang en kaunen koperment koaros manaman?

Koperment en aramas akan kin kalapw wekila, oh ehuehu koperment kin kaun ekeite wasa nin sampah. A ia duwen Wehin Koht? Wadek Daniel 7:14, oh mwuri koasoiapene peidek pwukat:

• Dahme kahrehda e mwahu me Wehin Koht “sohte pahn imwisekla”?

• Dahme kahrehda e mwahu me Wehin Koht pahn kaunda sampah pwon?

5. Koperment en aramas anahne wilialihda

Dahme kahrehda Wehin Koht anahne wiliandi koperment en aramas akan? Kilang KISIN KASDO, oh mwuri koasoiapene peidek wet.

KISIN KASDO: Dahkot Wehin Koht?​—Excerpt (1:41)

• Dahme kin wiawi pwehki kaundahn aramas?

Wadek Eklesiasdes 8:9, oh mwuri koasoiapene peidek pwukat:

• Ke medewe Wehin Koht anahne wiliandi koperment en aramas akan? Dahme kahrehda?

6. Kaun akan nan Wehin Koht kin wehwehkin kitail

Pwehki mie pak me atail Nanmwarkio, Sises, ketin momour nin duwen aramas emen, e kak “ketin wehwehki atail luwet akan.” (Ipru 4:15) Siohwa ketin pilada ohl oh lih lelepek meh 144,000 “sang keinek koaros oh lokaia koaros oh aramas koaros oh wehi koaros” ren iang Sises kakaun.​—Kaudiahl 5:9.

• E sou kansenamwahu ong uhk me Sises oh koaros me pahn iang ih kaunda kin wehwehki atail pepehm oh kahpwal kan? Dahme kahrehda?

7. Kosonned en Wehin Koht mwahusang kosonned en koperment

Koperment kan kin kauwada kosonned kan me re medewe pahn mwahu oh pere tohnwehi kan. Pil mie kosonned en Wehin Koht me towe kan anahne idawehn. Wadek 1 Korint 6:9-11, oh mwuri koasoiapene peidek pwukat:

• Ia omw madamadau duwen mwomwen sampah ma koaros kin peikiong sapwellimen Koht kosonned kan me pid wiewia?a

• Siohwa ketin kasik tohn Wehio en peikiong kosonned pwukat, ke medewe met konehng? Dahme kahrehda?

• Dahme kasalehda me aramas akan me sohte kin peikiong kosonned pwukat kak wekila?​—Kilang iretikitik 11.

DAHME KE SUKUHLKIER

Wehin Koht uhdahn koperment ehu me mi nanleng oh e pahn kaunda sampah pwon.

Kousapahl

• Ihs irail akan me pahn wia kaunen Wehin Koht?

• Dahme kahrehda Wehin Koht mwahusang koperment en aramas?

• Ia ekei soahng kan me Siohwa ketin kasik tohn Wehio en wia?

PIL TEHK

Medewe dahme Sises ketin padahngki duwen ia wasa me Wehio pahn mi ie.

“Is the Kingdom of God in Your Heart?” (Web article)

Dahme kahrehda Sounkadehdehn Siohwa kan kin pilada en loalopwoatohng Wehin Koht a kaidehn kaundahn aramas?

Devoted to God’s Kingdom 1:​43

Tehk dahme Paipel kin kasalehda duwen meh 144,000 me Siohwa ketin pilada ren iang Sises kakaun.

“Who Go to Heaven?” (Web article)

Dahme kamehlelehiong lih emen me selidi, me Koht kelehpw me kak ketikihdo pwuhng pahrek nin sampah?

“How I Found the Answer to Injustice” (Awake!, November 2011)

Wehin Koht tepida kakaun nanleng nan pahr 1914. Ih pil ahnsowo me imwin rahn en kaundahn aramas akan tepida. Ia duwen atail ese met? Kitail pahn kilang dahme Paipel kohpada oh dahme wiewiawi nin sampah oh mwomwen mwekid en aramas akan sangete pahr 1914.

1. Dahme Paipel kohpada?

Nan Paipel, pwuhken Daniel kasalehda me Wehin Koht pahn tepida kakaun ni imwin ahnsou ehu me kin adaneki “sounpar isuh [ahnsou isuh, NW].” (Daniel 4:16, 17) Sounpar epwiki kei mwuri, Sises mahsaniheki ahnsowo nin duwen “ahnsou me kileldier ong wehi kan,” oh e ketin padahngki me met saikinte imwisekla ahnsowo. (Luk 21:24) Kitail pahn tehkpene me ahnsou isuhwo imwisekla nan pahr 1914.

2. Dahme wiewiawi nin sampah oh ia mwomwen wiewiahn aramas akan sang pahr 1914?

Sapwellimen Sises tohnpadahk ko kalelapak reh: “Ia pahn kilel en omwi ketier oh imwin koasoandi en mwehi wet?” (Madiu 24:3) Sises ketin sapeng irail ni eh ketin kohpada soahng tohto me pahn wiawi mwurin eh tepida kakaun nanleng nin duwen Nanmwarkien Wehin Koht. Ekei soahng pwukat kin duwehte mahwen, lehk lapalap oh rerrer en sahpw. (Wadek Madiu 24:7.) Paipel pil kohpada me en aramas akan wiewia “ni imwin rahn akan” pahn kahrehiong mour en “apwal.” (2 Timoty 3:1-5) Irair pwukat oh wiewia pwukat uhdahn sansalda sangete pahr 1914.

3. Dahme kahrehda sampah suwedla douluhl sangete ahnsou me Wehin Koht tepida kakaun?

Mwurinte Sises eh ketin wiahla Nanmwarkien Wehin Koht, e ahpw ketila mahweniong Sehdan oh ngehn suwed kan nanleng. Sehdan eri lohdi nan mahweno. Paipel mahsanih me “e lekdekdiong nin sampah iangahki nah tohnleng kan.” (Kaudiahl 12:9, 10, 12) Sehdan uhdahn lingeringer pwehki e ese me e pahn kamwomwmwomwla. Eri e kin kahrehda medek oh lokolok nan sampah pwon. Met sewesei kitail en wehwehki ia kahrepen sampah eh uhdahn suwedla! Wehin Koht pahn kamwahwihala kahpwal pwukat koaros.

KALAUDEHLA OMW ESE MET

4. Kokohp en Paipel me dokedoke pahr 1914

KISIN KASDO: God’s Kingdom Began Ruling in 1914 (5:02)

Koht ketin kahrehiong Nanmwarki Nepukadnesar en Papilon en mahs, en ouramankihda kokohp ehu. Ouramano oh kawehwe me Daniel wiahda kasalehda me met dokedoke kaundahn Nepukadnesar oh pil Wehin Koht.​—Wadek Daniel 4:17.a

Wadek Daniel 4:20-26, oh mwuri doadoahngki koakon wet pwehn sapengala peidek pwukat:

• (A) Dahme Nepukadnesar kilangada nan eh ouramano?​—Kilang iretikitik 20 oh 21.

• (B) Dahme pahn wiawihong tuhkeo?​—Kilang iretikitik 23.

• (C) Dahme pahn wiawi ni imwin “sounpar isuh [“ahnsou isuh,” NW]”?​—Kilang iretikitik 26.

Ia Duwen Ouraman en Tuhkeo Eh Dokedoke Wehin Koht

KOKOHP (Daniel 4:20-36)

Kaunda

(A) Tuhke lapala pwoat

Uhdi kaunda

(B) “Pelehdihsang tuhkehn” oh en mihmihki “erein sounpar isuh [ahnsou isuh, NW]”

Pwurehng kaunda

(C) “Komw pahn ketin pwurehng wiahla nanmwarki”

Nan keieun pweidahn kokohp wet . . .

• (D) Ihs me tuhkeo kin karasahiong?​—Kilang iretikitik 22.

• (E) Ia duwen eh kaunda eh uhdi?​—Wadek Daniel 4:29-33.

• (F) Dahme wiawihong Nepukadnesar ni imwin “sounpar isuh”?​—Wadek Daniel 4:34-36.

KEIEUN PWEIDA

Kaunda

(D) Nepukadnesar, Nanmwarkien Papilon

Uhdi kaunda

(E) Mwurin pahr 606 Mwohn Krais, Nepukadnesar iahkala oh sohte kak kakaunki erein sounpar isuh

Pwurehng kaunda

(F) Nepukadnesar mwahula oh tepida pwurehng kakaun

Nan keriaun pweidahn kokohp wet  . . .

• (G) Ihs me tuhkeo kin karasahiong?​—Wadek 1 Kronikel 29:23.

• (H) Iahd me arail kaunda uhdi? Ia duwen atail ese me re sohte wie kakaun ahnsou me Sises ketiket nin sampah?​—Wadek Luk 21:24.

• (I) Iahd oh ia wasa me kaunda wet kapwurupwurodo?

KERIAUN PWEIDA

Kaunda

(G) Nanmwarkien Israel kan me kin wiliandi kaundahn Koht

Uhdi kaunda

(H) Serusalem ohla, sohte nanmwarkien Israel me kakaun erein sounpar 2,520

Pwurehng kaunda

(I) Sises ketin tepida kakaun nanleng nin duwen Nanmwarkien Wehin Koht

5. Sampah wekila sangete pahr 1914

Kilang KISIN KASDO.

KISIN KASDO: The World Has Changed Since 1914 (1:10)

Sises ketin kohpada ia pahn mwomwen sampah mwurin eh wiahla Nanmwarki. Wadek Luk 21:9-11, oh mwuri koasoiapene peidek wet:

• Ke kin kilang de rong soahng pwukat?

Wahnpoaron Pohl kawehwehda mwomwen aramas akan ni imwin rahn akan. Wadek 2 Timoty 3:1-5, oh mwuri koasoiapene peidek wet:

• Ke kin kilang aramas akan kin wia soahng pwukat rahnwet?

6. Kaundahn Wehin Koht anahne kamwakid kitail

Wadek Madiu 24:3, 14, oh mwuri koasoiapene peidek pwukat:

• Doadoahk kesempwal dahieu me kasalehda me Wehin Koht kin kakaun ni ahnsou wet?

• Ia duwen omw kak iang doadoahk wet?

Wehin Koht kin kakaun ahnsou wet, oh ahnsou me e pahn kaunda sampah pwon kerendohr. Wadek Ipru 10:24, 25, oh mwuri koasoiapene peidek wet:

• Dahme emenemen kitail anahne wia ni atail kilang me “rahno kerendohr”?

DAHME KE SUKUHLKIER

Kokohp en Paipel oh irair en sampah wet kin kadehdehda me Wehin Koht kin kakaun ni ahnsou wet. Kitail kin kasalehda me kitail kamehlele met ni atail kin kalohki oh iang towehda mihting en mwomwohdiso kan.

Kousapahl

• Dahme wiawi ni kaimwiseklahn ahnsou isuhwo me kokohpda nan pwuhken Daniel?

• Dahme kamehlelehiong uhk me Wehin Koht tepida kakaun nan pahr 1914?

• Ia duwen omw kak kasalehda me ke kamehlele me Wehio kin kakaun ni ahnsou wet?

PIL TEHK

Tehk dahme soupoad kan oh meteikan koasoiahki duwen wekilahn irair en sampah sang pahr 1914.

“When Morals Declined Dramatically” (Awake!, April 2007)

Wadek ia duwen kokohp me mi nan Madiu 24:14 eh kamwakid mouren ohl emen.

“I Perenki Iakiu Laudsang Soahng Teikan Koaros!” (Kahn Iroir No. 3 2017)

Ia duwen atail ese me kokohp me kileldi nan Daniel irelaud 4 kin dokedoke Wehin Koht?

“Iahd me Wehin Koht Tepida Kakaun?​—Pali 1” (Atail Doadoahk ong Wehio, October 2014)

Dahme kasalehda me ahnsou isuh me kileldi nan Daniel irelaud 4 imwisekla nan pahr 1914?

“Iahd me Wehin Koht Tepida Kakaun?​—Pali 2” (Atail Doadoahk ong Wehio, October 2014)

Wehin Koht tepidahr kakaun. Ni ahnsou keren e pahn wiahda wekidekla laud kan nin sampah. Kitail pahn tehkpene ekei soahng mwahu kan me ke kak kasikasik sang kaundahn Wehio.

1. Ia duwen Wehin Koht eh pahn kapwurehdo popohl oh pwung pahrek nin sampah?

Sises, me wia Nanmwarkien Wehin Koht pahn ketin kasohrehla aramas suwed oh koperment suwed kan ni mahwen en Armakedon. (Kaudiahl 16:14, 16) Ni ahnsowo, inoun Paipel wet uhdahn pahn pweida: “Ahnsou keren aramas suwed kan pahn sohrala.” (Melkahka 37:10) Sises pahn ketin doadoahngki Wehio pwehn uhdahn kahrehiong wasa koaros nin sampah en mie popohl oh pwung pahrek.​—Wadek Aiseia 11:4.

2. Ia pahn mwomwen mour ni ahnsou me kupwuren Koht pahn pweida nin sampah?

Pahn kaundahn Wehin Koht “me pwung kan pahn koukousoan nan sahpwo oh re pahn sapwenikihla [“mour,” NW] kohkohlahte.” (Melkahka 37:29) Medewehla momour nan sampah ehu me aramas koaros kin pwung, poakohng Siohwa oh kin poakpene! Sohte me pahn soumwahuda oh koaros pahn mour kohkohlahte.

3. Dahme Wehin Koht pahn wia mwurin me suwed kan ar kasohrala?

Mwurin me suwed kan ar pahn kasohrala, Sises pahn ketin kaunda nin duwen Nanmwarki erein sounpar 1,000. Erein ahnsowo, ih oh ienge meh 144,000 ko pahn sewese aramas akan nin sampah ren unsekla. Ni imwin sounpar kido, sampah pwon pahn wiahla paradais kaselel ehu oh aramas koaros pahn nsenamwahu pwehki ar kin peikiong sapwellimen Siohwa kosonned kan. Mwurin mwo, Sises pahn patohwan kapwurelahng Wehio rehn Semeo, Siohwa. ‘Mwaren Siohwa [pahn] sarawihla’ ni ahl ehu me saikinte wiawi sangete mahso. (Madiu 6:9, 10) Met pahn kadehdehda me Siohwa ketin wia Kaun mwahu men me kin ketin nsenohki sapwellime kan. Siohwa eri pahn ketin kasohrehla Sehdan, ngehn suwed kan oh meteikan me pilada ren uhwong sapwellime kaunda. (Kaudiahl 20:7-10) Wehin Koht pahn kihsang kahpwal en sampah koaros kohkohlahte.

KALAUDEHLA OMW ESE MET

4. Wehin Koht pahn katokehdi koperment en aramas akan

Paipel mahsanih: “Ekei aramas ahneki manaman, a ekei kin wie lokolok pahn ar manaman.” (Eklesiasdes 8:9) Siohwa pahn ketin doadoahngki sapwellime Wehio pwehn katokehdi soahng kan me kohsang wiewia sapahrek.

Wadek Daniel 2:44 oh 2 Deselonika 1:6-8, oh mwuri koasoiapene peidek pwukat:

• Dahme Siohwa oh sapwellime Ohlo, Sises, pahn ketin wiahiong kaunen aramas akan oh me kin utung irail?

• Ni omw medewe dahme ke sukuhlkier duwen Siohwa oh Sises, ke kamehlele me sapwellimara wiewia kan pahn pwung oh pahrek?

5. Sises ketin wia Nanmwarki mwahu men

Nin duwen Nanmwarkien Wehin Koht, Sises pahn ketin sewese aramas akan nin sampah ni soangen ahl tohto. Kilang KISIN KASDO pwe ken kilang ia duwen Sises eh ketin kasalehdahr me e kupwurki sewese aramas akan oh me Koht ketikihongehr manaman en wia met.

KISIN KASDO: Jesus Showed What the Kingdom Will Accomplish (1:13)

Soahng kan me Sises ketin wiahda nin sampah kasalehda dahme Wehin Koht pahn wia. Mehnia rehn kapai pwukat me ke keieu kasikasik? Wadek iren Paipel kan me koasoia duwen kapai pwukat.

6. Wehin Koht pahn wahdo ahnsou kaselel ehu ni ahnsou kohkohdo

KISIN KASDO: A Glimpse Into a Wonderful Future (4:38)

Wadek Melkahka 145:15, 16, oh mwuri koasoiapene peidek wet:

• Ia omw pepehm ni omw ese me Siohwa pahn ketin ‘kaitarala en me momour kan anahn koaros’?

DAHME KE SUKUHLKIER

Wehin Koht pahn kapwaiada dahme Koht ketin kupwurki wia. Wehio pahn kaparadaisihala sampah pwon oh aramas mwahu kan me kin kaudokiong Siohwa pahn koukousoan loale kohkohlahte.

Kousapahl

• Ia duwen Wehin Koht eh pahn kasarawihala mwaren Siohwa?

• Dahme kahrehda kitail kak kamehlele me Wehin Koht pahn kapwaiada inoun Paipel kan?

• Nanpwungen soahng mwahu kan me Wehio pahn wahdo, mehnia me ke keieu kasikasik?

PIL TEHK

Kilang dahkot Armakedon.

“What Is the Battle of Armageddon?” (Web article)

Tehk soahng kan me pahn wiawi erein ahnsowo me Sises ketin kahdaneki “kahn kamakam kowahlap”—Madiu 24:21.

“What Is the Great Tribulation?” (Web article)

Kilang ia duwen peneinei kan ar kak medewehla ar pahn mihmihpene nan Paradais.

See Yourself in Paradise (1:50)

Kilang ia duwen ohl emen me kin uhwong koperment eh diarada pasapeng me e raparapahki nan oaralap me koasoia “I Was Troubled by Many Questions.”

“The Bible Changes Lives” (The Watchtower, January 1, 2012)