IREN MEHN KASUKUHL 47
Ke Onopadahngehr Papidaisla?
Ke sukuhlkier soahng tohto duwen Siohwa ni omw onopki Paipel. Mwein mie soahng kei me ke wekidala nan omw mour pwe ken kapwaiada dahme ke sukuhlki. Ahpw mwein mie mehkot me kapweiekuhkedi sang omw inoukihong Siohwa omw mour oh papidaisla. Iren mehn kasukuhl wet pahn koasoia ekei soahng kan me kak kapweiekuhkedi sang papidaisla oh ia duwen omw kak powehdi mepwukat.
1. Ia uwen laud ke anahne esehla Paipel mwohn omw pahn papidaisla?
Pwe ken papidaisla, ke anahne “esehla loalokong pwung en me mehlel.” (1 Timoty 2:4) Met sohte wehwehki me mwohn omw papidaisla ke anahne ese pasapengpen peidek koaros duwen Paipel me aramas kakete idek rehmw. Pil Kristian kan me papidaisla wereilahr kin sukusukuhlkihte Paipel. (Kolose 1:9, 10) Ahpw ke anahne wehwehki tepin padahk en Paipel kan. Elder kan nan mwomwohdiso pahn seweseiuk ken esehda ma ke wehwehki de soh.
2. Soahng dah kan me ke anahne wia mwohn omw papidaisla?
Mwohn omw pahn papidaisla, ke anahne “koluhla oh wiliakapwala.” (Wadek Wiewia 3:19.) Met wehwehki me ke anahne nsensuwedkihla dihp kan me ke wiahda mahso oh peki Siohwa en ketin mahkohng uhk. Ke pil anahne uhdahn kesehla wiewia suwed kan oh koasoanehdi teng en momourki mour me kin kaperenda kupwuren Koht. Oh ke pil pahn tepida iang mihting kan oh iang mwomwohdiso kalohk.
3. Dahme kahrehda ken dehr mweidohng masak en kapweiekuhkedi?
Ekei kin masak me re sohte pahn kak wia dahme re inoukihong Siohwa. Mehlel, ekei pak ke pahn wiahda sapwung, pil ohl oh lih lelepek kan nan Paipel kin sapwungala. Ahpw Siohwa sohte ketin kasik sapwellime tohnkaudok kan ren unsek. (Wadek Melkahka 103:13, 14.) E ketin kupwurperenki ma ke kin wia uwen omw kak! E pahn ketin seweseiuk. Ni mehlel, Siohwa ketin kamehlelehiong kitail me sohte mehkot “pahn kak katohreikitailsang [sapwellime] limpoak.”—Wadek Rom 8:38, 39.
KALAUDEHLA OMW ESE MET
Kilang ia duwen omw kak powehdi soahng kan me kak kapweiekuhkedi sang papidaisla ni omw esehla mwahu duwen Siohwa oh ale sapwellime sawas.
4. Esehla mwahu duwen Siohwa
Ia uwen laud me ke anahne ese duwen Siohwa mwohn omw papidaisla? Ke anahne esehla mwahu ih pwe ken poakohng ih oh kin men kaperenda kupwure. Kilang KISIN KASDO pwe ken ese ia duwen tohnsukuhl en Paipel kan nan sampah pwon ar kin wia met. Mwuri koasoiapene peidek wet.
Dahme sewese ekei irail en onopadahng papidaisla?
Wadek Rom 12:2, oh mwuri koasoiapene peidek pwukat:
Mie mehkot ke kin peikasalki duwen dahme Paipel kin padahngki de ma Sounkadehdehn Siohwa kan kin padahngki me mehlel?
Ma mie, dahme ke kak wia?
5. Powehdi kahpwal kan me kakete kapweiekuhkedi sang papidaisla
Kitail koaros kin lelohng kahpwal kan ni atail kin pilada en inoukihong Siohwa atail mour oh papidaisla. Pwe ken kilang ehu karasepe, kilang KISIN KASDO, oh mwuri koasoiapene peidek pwukat.
Kahpwal dah kan me Narangerel anahne powehdi pwehn papah Siohwa?
Ia duwen eh poakohng Siohwa eh sewese ih en powehdi kahpwal pwukat?
Wadek Lepin Padahk 29:25 oh 2 Timoty 1:7, oh mwuri koasoiapene peidek wet:
Dahme kin kihong kitail eimah en powehdi kahpwal kan?
6. Likih sapwellimen Siohwa sawas
Siohwa pahn ketin seweseiuk ken kaperenda kupwure. Kilang KISIN KASDO, oh mwuri koasoiapene peidek pwukat.
Dahme kapweiekidihsang tohnsukuhl en Paipelo en papidaisla?
Dahme e sukuhlki me sewese ih en kalaudehla eh likih Siohwa?
Wadek Aiseia 41:10, 13, oh mwuri koasoiapene peidek wet:
Dahme kahrehda ke kak kamehlele me ke kak kapwaiada omw inou ong Siohwa?
7. Kalaudehla omw kin kalahnganki sapwellimen Siohwa limpoak
Omw kalaudehla omw kin medemedewe ia uwen laud Siohwa eh kin ketin poakohng uhk, ih pil uwen laud omw pahn kin kalahnganki oh men papah ih kohkohlahte. Wadek Melkahka 40:5, oh mwuri koasoiapene peidek wet:
Kapai dah kan sang rehn Siohwa me ke kin keieu kalahnganki?
Soukohp Seremaia kin poakohng Siohwa oh sapwellime mahsen, oh kin uhdahn kalahnganki pwais kaselel en papah Siohwa. E patohwan: “Sapwellimomwi mahsen wiahla peren oh nsenamwahu nan ei mohngiong, pwe I kin weuwa mwaromwi, Maing Siohwa Koht.” (Seremaia 15:16, NW) Sapengala peidek pwukat:
Dahme kahrehda en wia Sounkadehdehn Siohwa men iei pwais tohrohr ehu?
Ke men papidaisla oh wiahla emen Sounkadehdehn Siohwa?
Mie mehkot me ireiukasang ken papidaisla?
Dahme ke medewe ke anahne wia pwe ken kak papidaisla?
EKEI ARAMAS KIN NDA: “I sohte medewe I kak kapwaiada mehkoaros me I pahn inoukihda ni ei pahn papidaisla.”
Ke pil iang ahneki pepehm wet?
DAHME KE SUKUHLKIER
Ke kak powehdi soahng kan me kak kapweiekuhkedi sang papidaisla sang ni sapwellimen Siohwa sawas.
Kousapahl
Ia uwen laud ke anahne esehla Paipel mwohn omw pahn papidaisla?
Dahme ke anahne wekidala mwohn omw pahn papidaisla?
Dahme kahrehda ken dehr mweidohng masak en kapweiekuhkedi?
PIL TEHK
Medewehla dahme poahsoanpen omw pilipil en papidaisla.
Esehla ia duwen omw pahn powehdi kahpwal kan me kakete kapweiekuhkedi sang papidaisla.
“Dahme Irehdi Ie Sang Ei Pahn Papidaisla?” (Kahn Iroir, March 2019)
Kilang ia duwen ohl emen eh kak powehdi kahpwal laud kan pwehn papidaisla.
Nin tapio, ohl emen me adaneki Ataa pweiek en papidaisla. Kilang dahme kamwakid ih en kamehlele me e anahne papidaisla.