IREN MEHN KASUKUHL 38
Kalahnganki Kisakis en Mour
Mie soahng kaselel tohto me kitail kak wia oh pereperen pwehki atail wie momour. Mehnda ma kitail kin lelohng kahpwal, mie soahng kan me kitail kak perenki nan mour. Ia duwen atail kak kasalehda me kitail kalahnganki kisakis en mour? Oh ia kahrepe keieu kesempwal kitail en kasalehda atail kalahngan?
1. Dahme kahrehda kitail anahne kalahnganki mour?
Kitail anahne kalahnganki mour pwe met kisakis ehu sang Samatail limpoako, Siohwa. Ih me “poahsoan en mour,” pwe e ketin kapikada mour koaros. (Melkahka 36:9) “Pein ih me ketikihong aramas koaros mour oh esingek oh pil soahng koaros.” (Wiewia 17:25, 28) Siohwa kin ketikihong kitail dahme kitail anahne pwe kitail en momour. Ahpw laudsang met, e pil ketin wiahiong kitail en perenki mour.—Wadek Wiewia 14:17.
2. Ia duwen atail kak kasalehiong Siohwa me kitail kalahnganki kisakis en mour?
Siohwa kin ketin kesempwalkin uhk sangete ahnsou me omw nohno liseiankinuhkada. Nan kapakap ehu me Siohwa ketikihdi nan sapwellime Mahsen, emen sapwellime ladu ko, Depit, patohwanohng ih: “Komw ketin mahsanihieier mwohn ei ipwidi.” (Melkahka 139:16) Siohwa uhdahn ketin kesempwalki omw mour. (Wadek Madiu 10:29-31.) E kin ketin kupwurtoutoukihla ma aramas emen pilada en kemehla emen aramas, de kemehla pein ih.a (Eksodus 20:13) Siohwa pil kin ketin kupwurtoutoukihla ma kitail kin soukautih oh kahrehiong atail mour en mihla nan keper de ma kitail sohte kin kanahieng mour en aramas teikan. Ni atail kin apwalih mwahu atail mour oh kesempwalki mour en meteikan, kitail kin kasalehda me kitail kalahnganki kisakis kesempwal en mour.
KALAUDEHLA OMW ESE MET
Medewe ekei soahng kan me ke kak wia pwehn kasalehda omw kalahnganki kisakis en mour.
3. Apwalih mwahu omw roson
Kristian kan me wiadahr inou ong Siohwa kin doadoahngki ar mour unsek pwehn papah ih. Met duwehte ar mweidala paliwararail kan nin duwen meirong ehu ong Koht. Wadek Rom 12:1, 2, oh mwuri koasoiapene peidek pwukat:
Dahme kahrehda ke anahne apwalih mwahu omw roson?
Dahme ke kak wia?
4. Kanahieng pwe ken dehr ohla de mehla
Paipel kin kangoangei kitail en soikala wiewia keper kan. Kilang KISIN KASDO pwe ken ese soahng kan me ke kak wia pwe ken dehr loiong kahpwal.
Wadek Lepin Padahk 22:3, oh mwuri koasoiapene ia duwen kowe oh meteikan kak soikala soahng keper kan . . .
nan imwamwail.
nan amwail wasahn doadoahk.
ni amwail mwadong.
ni amwail wiewia sidohsa de dake sidohsa.
5. Kesempwalki mour en seri me saikinte ipwidi
Depit kawehwehda me Siohwa kin ketin nsenohki soahng koaros me kin wiawi ni seri men eh kin wie kekeirda nan kapehden eh nohno. Wadek Melkahka 139:13-17, oh mwuri koasoiapene peidek wet:
Mwohn silangin Siohwa, mour en aramas emen kin tepida ni ahnsou me e ipwidi de ni ahnsou me nohnou liseianda?
Kosonned en Siohwa ong mehn Israel en mahs ako kin pere nohno kan oh neirail seri kan me saikinte ipwidi. Wadek Eksodus 21:22, 23 (NW)b oh mwuri koasoiapene peidek pwukat:
Ia sapwellimen Siohwa madamadau ong aramas emen me sapwungala kahrehda mehlahn seri men me saikinte ipwidi?
Ia sapwellime pepehm ma aramas emen pilada en wia met?c
Ia omw pepehm ong sapwellimen Koht madamadau?
Pil lih emen me kin kesempwalki mour mwein kakete pehm me ihte me pahn mwahu iei kauwehla eh liseian. Wadek Aiseia 41:10, oh mwuri koasoiapene peidek pwukat:
Ma meteikan song idingkihong lih emen en kauwehla eh liseian, ihs me e pahn peki sawas reh? Dahme kahrehda?
EKEI ARAMAS KIN NDA: “Lih akan ahneki pwuhng en pilada ma re pahn kauwehla ar liseian de soh, pwehki pein paliwararail met.”
Dahme kamehlelehiong uhk me Siohwa ketin kesempwalki mour en nohno men oh nah seri me saikinte ipwidi?
DAHME KE SUKUHLKIER
Paipel kin padahkihong kitail en poakohng, wauneki oh pere sapwellimen Siohwa kisakis en mour. Met kin pidada pein atail mour oh mour en meteikan.
Kousapahl
Dahme kahrehda Siohwa ketin kesempwalki mour en aramas akan?
Ia sapwellimen Siohwa pepehm ni aramas emen eh pilada en kemehla emen aramas de pein ih?
Dahme ke kalahnganki duwen kisakis en mour?
PIL TEHK
Ia duwen atail kak kalahngankihong Siohwa kisakis en mour?
Diarada pasapengpen peidek wet, Koht pahn ketin mahkohng lih emen me kauwehla eh liseian?
Kilang ia duwen sapwellimen Koht madamadau eh kak sewese kitail en pilada mwadong kan me sohte keper.
“‘Extreme Sports’—Should You Take the Risk?” (Awake!, October 8, 2000)
Ia duwen ma aramas emen medemedewe en kemehla pein ih? Tehk ia duwen Paipel eh kak sawas.
“I Want to Die—Can the Bible Help Me When I Have Suicidal Thoughts?” (Web article)
a Siohwa kin uhdahn ketin kesempwalki irail akan me nan kapehd tikitikla. (Melkahka 34:18) E ketin mwahngih me pepehm kamedek kan kak kahrehiong aramas emen en men mehla oh e ketin kupwurki sawas. Pwe ken kilang ia duwen sapwellime sawas eh kak sewese aramas emen en soikala madamadau wet, wadek oaralapet “I Want to Die—Can the Bible Help Me When I Have Suicidal Thoughts?” me kileldi nan Pil Tehk nan iren mehn kasukuhl wet.
b Eksodus 21:22, 23 (NW): “Ma ohl ekei peida oh re kamedekihala lih liseian men oh liho neitikla ahnsowohte ahpw sohte mehla wiawi, me kamedekihalao pahn anahne pwain ohlao. . . . Ahpw ma mehla wiawi, eri ke pahn wiliankihdi mour ong mour.”
c Irail akan me kauwehla liseian mahso en dehr nohn nsensuwedkihla met, pwe Siohwa kak ketin mahkohng irail. Pwehn kalaudehla omw wehwehki met, kilang oaralapet “What Does the Bible Say About Abortion?” me kileldi nan Pil Tehk nan iren mehn kasukuhl wet.