“I Diaradahr Soahng Koaros me I Anahne”

EHU pwihn en palien roson mwahu (WHO) ripohtki me aramas tohtohsang rar 120 nan sampah pwon kin ahneki pahtou laud oh solahr ar koapworopwor. Ehuehu sounpar, aramas rar kin kemehla pein irail oh aramas me tohtohki nanpwungen rar 10 lel 20 kin song en kemehla pein irail. Ia duwe, mie sawas ong soangen aramas pwukat? Mie wiepen sawas en palien wini me kak katikala arail kahpwal. Irail pil kin anahne aramas akan me kak rong, wehwehki oh pil kak sewese irail ni arail pahn kasalehda arail pepehm kan. Patehng met, ekei me kin ahneki soangen kahpwal wet kin diarada sawas sang nan sawaspen Paipel kan me Sounkadehdehn Siohwa kan kin wiahda. Met sansalda nan kisinlikou ehu sang France.

“Rahn teiko, I kin pehm me solahr kahrepen ei kin momour. I kin kapakapohng Koht oh peki reh en mweidohng ie en mehla. Loaleiet ohla. I kin kapakap ni ngidingid ong Siohwa pwehn ale sawas.

“I pil tehk nan makasihn en Watchtower oh Awake!, oh pwuriamweikihla dahme I diarada loale! I kin wadek makasihn pwukat daulih sounpar 15, ahpw I ahpwtehn esehda me makasihn pwukat kin kihda kangoang laud oh pil kaperen en wadek. Makasihn pwukat kin kasalehda duwen limpoak, irair ehu me aramas tohto solahr kin kasalehda rahnwet. I diaradahr soahng koaros me I anahne.”

Paipel mahsanih: “KAUN-O kin ketiket mpen irail me nan kapehd tikitiklahr; oh kin ketin doarehla irail kan me kin sohla ar koapworopwor.” (Melkahka 34:18) Irail koaros me kin “nan kapehd tikitiklahr” oh “sohla ar koapworopwor” kak diarada mehn kangoang oh koapworopwor ong ahnsou kohkohdo me Paipel kin kasalehda. Sounkadehdehn Siohwa kan kin kihseli sawaspen Paipel kan pwehn sewese aramas akan en paiekihda kamweit pwukat sang rehn Koht.