Soai Keieu: Dene Mehkot Soh Sansal Rehn Aramas Sohte Kin Mehla
Ia wasa me soai wet tepisang ie? Ehu pwuhk koasoia: “Kristian en mahs kei tepida alehda madamadau en mehn Krihk kan me dene Koht me ketikihong mehkot nan loalen aramas sangete ni ahnsou me e tepin wiawihda nan kapehden eh nohno. Dene mehwet sohte kin kak mehla.”—The New Encyclopædia Britannica (1988), Volume 11, pali 25.
Dahme Paipel mahsanih? “Ni ar kin mehla, re kin pwurehng wiepwella; oh ni ahnsowohte, ar koasoandi kan kin imwisekla.”—Melkahka 146:4.
Me pid kepikipikdahn tepin aramas, Paipel mahsanih: “KAUN-O Koht eri ketikihda nesen pwehl ehu sang nanpwel oh ketin wiahkihla war ehu me mwomwen aramas. E ahpw ketikihong ni waro angin mour; ni ahnsowohte mour [ni lokaiahn Ipru, neʹphesh] ahpw miehla ni paliweren aramaso.”—Senesis 2:7.
Lepin lokaia wet neʹphesh, me kawehwehdi “mour” kin wehwehki ‘emen me kin esingek.’ Ni ahnsou me Koht kapikada tepin ohl Adam, E sohte ketikihong loale mehkot me sohte kin mehla, ahpw E ketikihong ih angin mour. Esingek me kin kahrehda angin mour en mihmiehte. Ihme kahrehda nan Paipel ne’phesh kin wehwehki mouren aramaso pwon. Ma angin mouro me Koht ketikihda pahn kohsang rehn aramaso, e kin mehla.—Senesis 3:19; Esekiel 18:4.
Padahk me dene mie mehkot rehn aramas me sohte kin mehla kin kahrehda peidek tohto: Dahme kin wiawihong aramas ni ahnsou re mehla? Dahme kin wiawihong aramas suwed kan ni ahnsou re mehla? Irail akan me kose me irail Kristian kan alehdahr lamalam me dene mie mehkot rehn aramas me sohte kin mehla. Ihme kahrehda re pil anahne pwungkihla padahk me dene ehl wasahn kalokolok nan kisiniei.
Menlau pil tehk iren Paipel pwukat: Eklesiasdes 3:19; Wiewia 3:23
IRE MEHLEL:
Ni ahnsou me emen mehla, e solahr mie
[Kaokon nan Pali 4]
Doadoahk Soh Katepe
Nan pahr 1949, James Kidd, ohl emen me mahki sounpar 70 oh kin wia doadoahk en rapahki prons, salongala nan nahna kan en Arizona, nan Wehin Amerika. Sounpar kei mwuri, mwurin re kamanahla me e melahr, re diarada nein ohl menet nah kisinlikou en sohso me ntingkihdi pinsel, oh pil eh pai koaros me mi ni uwen tala lopw kei. Nan sohso wet, James kilelehdi ni sansal me nah mwohni kan koaros pahn kohwohng doadoahk en roporop pwehn diarada “mehn kadehde ma mie mehkot kin kohsang nan paliwar en aramas mwurin re mehla.”
Mwurinte mwo, irail soun roporop oh pil saintis kan daulih meh 100 audehda doaropwe kan pwehn doadoahngki mwohni wet. Erein sounpwong tohto, mie kopwung kan oh me kid kei kose me dene mie mehkot soh sansal me kin wie momour mwurin aramas kin mehla. Kedekedeo, sounkopwungo kihong mwohni ko rehn pwihn en roporop ndand riau. Ahpw mwurin sounpar 50 samwa, irail soun roporop pwukat saikinte diarada “mehn kadehde ma mie mehkot kin kohsang nan paliwar en aramas mwurin re mehla.”