Soai Kesiluh: Dene Aramas Mwahu Koaros Pahn Kohdahla Nanleng

Ia wasa me soai wet tepisang ie? Mwurin mehlahn sapwellimen Sises wahnpoaron ko, nin tepin pahr 200, irail tepin Pahpa en Mwomwohdiso kan ndandla. Ehu pwuhk en Kadolik kawehwehda duwen arail padahk kan: “Dahme irail kin keieu padahngki iei me mehkot soh sansal kin pedoisang nan paliwar en aramas mehlao oh mwurinte mehwet pahn lelohng soangen kamwakel kei me anahn, e pahn alehdi mour nsenamwahu nanleng.”—New Catholic Encyclopedia (2003) Volume 6, pali 687.

Dahme Paipel mahsanih? “Me pwung kan pahn koukousoan nan sahpwo oh re pahn sapwenikihla kohkohlahte.”—Mel. 37:29.

Mendahki Sises ketin inoukihong sapwellime tohnpadahko me e pahn ‘kaunopada dewerail’ nanleng, e kasalehda me kaidehn koaros me pwung kan pahn kohdahla wasao. (Sohn 3:13; 14:2, 3) E sou pil ketin loulouki me kupwuren Koht en wiawi “nin sampah duwen eh kin wiawi nanleng”? (Mad. 6:9, 10) Ni mehlel, keting riau me kin awiawih me pwung kan. Me malaulaute me pahn iang kaun nanleng rehn Krais ahpw pali moron en aramas pahn mour nin sampah kohkohlahte.—Kaudiahl 5:10.

Kedekedeo tepin mwomwohdiso wekidala arail madamadau duwen arail pwais nin sampah. Ia imwilahn met? Pwuhken The New Encyclopædia Britannica nda: “Pwihn en mwomwohdiso wet wekidala laud duwen padahk me pid Wehin Koht me aramas kin kasik.” Pwihn wet tepida kalaudehla arail manaman sang ni arail iang pidada palien politik kan oh soikala sapwellimen Sises kehkehlik ong sapwellime tohnpadahk kan me “kaidehn irail kisehn sampah.” (Sohn 15:19; 17:14-16; 18:36) Pahn kaundahn Kaun en Rom me adaneki Constantine, mwomwohdiso wet pil wekidala ekei arail padahk kan me duwehte ia mwomwen Koht.

Menlau pil tehk iren Paipel pwukat: Melkahka 37:29; Sohn 17:3; 2 Timoty 2:11, 12

IRE MEHLEL:

Pali moaron en aramas mwahu pahn mour kohkohlahte nin sampah, kaidehn nanleng

[Kawehwehpen kilel kan nan ehu ehu pali 6]

Art Resource, NY