Soai Kapahieu: Dene Koht Wiawihkihda Meh Silimen

Ia wasa me soai wet tepisang ie? Ehu pwuhk en Kadolik koasoia: “Madamadau ehu kak kohda me dene padahk duwen Koht wiawihkihda meh silimen tepida nan imwin pahr 300 samwa. Met kak mehlel . . . Padahk wet . . . sohte uhdahn teng, oh sohte alahlda rehn Kristian akan oh nan arail padahk kan mwohn pahr 300 samwa.”—New Catholic Encyclopedia (1967), Volume 14, pali 299.

Ehu pwuhk pil koasoia: “Pwihn en Nicaea tuhpene nan May 20, pahr 325. Constantine me katanga oh kawekaweidih tuhpene wet oh pein kihda . . . madamadau kesempwal me pid wehwehn Krais ong Koht, me ‘ih oh Sahmo ehute’ oh met mi nan koasoandi kan me tuhpene wet kihdahr. . . . Pwehki arail wauneki nanmwarkio, pisop ko koaros sainihla koasoandi wet mendahki me tohto rehrail sohte nohn pwungki. Ihte meh riemen me kahng iang sain.”—Encyclopædia Britannica (1970), Volume 6, pali 386.

Dahme Paipel mahsanih? “Stipen ahpw direkihla Ngehn Sarawi [“sapwellimen Koht manaman,” NW] oh saradahng nanleng oh udiahl sapwellimen Koht lingan oh pil Sises me ketiket ni palimaun en Koht. E ahpw nda, ‘Kumwail kilang! I kilangehr nanleng eh ritidahr oh pil Nein-Aramas eh ketiket ni palimaun en Koht!’”—Wiewia 7:55, 56.

Dahme met kasalehda? Ni en Stipen direkihla sapwellimen Koht manaman, e kilangada Sises “ketiket ni palimaun en Koht.” Eri, met kasalehda me Sises sohte wiahla Koht mwurin e iasada oh ketidahla nanleng, ahpw e wiahla emen ngehn tohrohr. E sohte pil kasalehda me mie emen tohrohr me mi limwahn Koht. Mendahki e kin nantihong rapahki ire kan nan Paipel me pahn utung padahk me Koht wiawihkihda meh silimen, kaunen en pelien lamalam en Dominican me adaneki Marie-Émile Boismard ntingihdi nan nah pwuhk: “Koasoi me dene mie Koht wiawihkihda meh silimen . . . sohte kak dierekda nan Kadehde Kapw.”–À l’aube du christianisme—La naissance des dogmes.

Constantine wiahda padahk wet pwehn kihsang saminimin me kin wiawi nan mwomwohdiso nan pahr 300 samwa. Ahpw padahk wet kin pil kahrehda ehu peidek: Ia duwe, Mery me neitikiehdi Sises iei “Inen Koht”?

Menlau pil tehk iren Paipel pwukat: Madiu 26:39; Sohn 14:28; 1 Korint 15:27, 28; Kolose 1:15, 16

IRE MEHLEL:

Padahk me Koht wiawihkihda meh silimen tepida nan pahr 300 samwa

[Kawehwehpen kilel kan nan ehu ehu pali 7]

Museo Bardini, Florence