Soai Kelimau: Dene Mery Iei Inen Koht
Ia wasa me soai wet tepisang ie? Ehu dikseneri koasoia: “Kawauwih inen Koht tepida laudla ahnsou me Mwomwohdiso en Kristian wiahla mwomwohdiso ehu pahn kaundahn Constantine oh ni ahnsou me irail me kaidehn Kristian iangala mwomwohdiso wet . . . Soahng kan me re kin kamehlele oh wia nan arail kaudok wiawihdahr pwehki erein sounpar kid kid kei re kin wia kaudok likamw en arail koht lih ‘nohno lapalap’ oh ‘meipwon en Koht.’”—The New Encyclopædia Britannica (1988), Volume 16, pali 326 oh 327.
Dahme Paipel mahsanih? “Komw pahn liseianda oh naitikihada pwutak emen me komw pahn ketikihong mware Sises. E pahn lapalap oh e pahn mwarenki Sapwellimen Koht, Wasa Lapalahpie . . . Ihme kahrehda seri sarawio pahn mwarenki Sapwellimen Koht.”—Luk 1:31-35.
Iren Paipel me kileldi powe kin kasalehda ni sansal me Mery iei inen “Sapwellimen Koht,” kaidehn Koht. Ia duwe, mehlel me Ih me “pahnlahng mwokon tikitikiong” kak itarohng nan kapehden Mery? (1 Nanmwarki kan 8:27) Sohte pak ehu Mery koasoia me ih me inen Koht. Padahk me dene Koht wiawihkihda meh silimen iei me kapingadahr ire mehlel duwen ihs Mery. Nan pahr 431, ni en Kaun Lapalap kan en Episos kahdanekihla Mery Theotokos (lepin lokaiahn Krihk me wehwehki “me naitikihada Koht”), de “Inen Koht,” met kahrehiong aramas akan en tepida kaudokiong Mery. Kahnimw en Episos, wasa me kaunen mwomwohdiso wet mi ie, kin wia arail wasahn kaudok oh kasarawih koht lih en kaparapar me adaneki Artemis erein sounpar epwiki kei.
Eri ih mwomwen soangen wiepen kaudok tohto me pid sansal en Artemis me “pwupwudihdo sang nanleng” eh kin wiahla kisehn kaudok ong Mery, me duwehte ahnsou me aramas akan kin kapar nin duwen pokon ehu. (Wiewia 19:35) Pil ehu me ekisekis pidelong nan padahk en Kristian iei doadoahngki sansal kan en Mery oh sansal teikan nan kaudok.
Menlau pil tehk iren Paipel pwukat: Madiu 13:53-56; Mark 3:31-35; Luk 11:27, 28
IRE MEHLEL:
Soai me dene Koht wiawihkihda meh silimen iei me tapiada tiahk en kaudok ong Mery me dene ih me Inen Koht oh met kin pouseweite kaudok ong koht lih me kin wiawi mahsie