Keper Ehu me Pahpa Nohno Koaros Anahne Ese
Heather oh Scott iei pwopwoud peren ehu me naineki pwutak roson emen me sounpar siluh.a Ira kin apwalih mwahu neira pwutako. Rahnpwukat, e sohte mengei en apwalih seri kan. E kin pidada soangsoangen kahpwal oh pwukoa tohto. Mie soahng tohto me kitail anahne padahkihong neitail seri kan! Heather oh Scott kin uhdahn nsenohki ara pwukoahn apwalih neira serio, ahpw mehlel me pid ara en pere neira serio sang keper en tiahk suwedih seri. Dahme kahrehda?
Heather nda: “Ahi pahpao sempoak oh kin kamamsakau. E kin uhdahn keme ie oh tiahk suwedih ngehi oh riei serepein tikitik ko.”b Me tohto kin pwungki me tiahk suwed wet kak kauwehla pepehm en aramas emen erein ahnsou reirei. Ihme kahrehda Heather koasoanehdi teng en pere nah pwutako! Scott pil ahneki pepehmohte en pere neira pwutako.
Pahpa nohno tohto kin pwunodki duwen kahpwal wet en tiahk suwedih seri. Mwein ele ke kin pil pwunodki met. Mwein ke sohte lelohng tiahk suwed wet duwehte Heather, ahpw mwein ke kin rong ripoht kan duwen reklahn tiahk kasaut wet. Wasa koaros nan sampah, pahpa nohno kan me kin nsenohki neirail seri kin pwuriamweikihla laud dahme kin wiawiong seri kan nan wasa me re mi ie.
Emen soun roporop me kin wia petehkpen kahpwal en tiahk suwedih seri ndahki uwen laudlahn tiahk wet “ehu wiewia me keieu kansensuwed nan atail ahnsou.” Met rohng kansensuwed ehu. Ahpw kekeirdahn tiahk wet kapwuriamwei? Soh, e sohte kapwuriamwei ong irail me onopki Paipel. Mahsen en Koht kawehwehda me kitail mi erein ahnsou apwal ehu me adaneki “imwin rahn akan,” ahnsou ehu me direkihla wiewia “lemei,” ni aramas kan pahn “roporop ong pein irail,” oh re pahn “sempoak.”—2 Timoty 3:1-5.
Tiahk suwedih seri wia kahpwal laud ehu. Mehlel, ekei pahpa nohno kin pwunodki laud ni arail medewe uwen suwed en aramas akan me kin rapahki seri pwe ren tiahk suwedih. Ahpw ia duwe, kahpwal wet nohn apwal ong pahpa nohno kan? De mie kahk mwahu kan me pahpa nohno kan kak wia pwehn pere neirail seri kan? Oaralap kan mwurin met pahn sapengala peidek pwukat.
a Ahd kan wekidekla
b Tiahk suwedih seri iei ni en aramas laud men kin kaitarala eh ineng en wia nsenen pwopwoud rehn seri men. Tiahk wet kalapw pidada dahme Paipel kin kahdaneki nenek, de por·neiʹa, me kak iangahki mwadongki dipwisoun kaparapar, wia nsenen pwopwoud, oh doadoahngki ewe oh wasahn kainen ong wia nsenen pwopwoud. Ekei tiahk suwed pwukat, me duwehte doahke dihdi, doadoahngki lokaia kasaut, kasalehiong seri kilel suwed, limwasahsa, kasale paliwar ni ahl me sohte konehng, iei me Paipel kahdaneki “tiahk samin,” de soangen tiahk samin koaros me aramas me solahr arail namenek kin “wia ni ngidingid.”—Kalesia 5:19-21; Episos 4:19.