I Sukuhlkihdi en Kin Wauneki Lih akan oh Pein Ngehi

EI MOUR MAHS:

I ipwidi Mulhouse, paliepeng en palimesehn France, nan kahnimw ehu me wadawadki eh tiahk lemei. Soahng kan me I tamataman ni ei tikitik iei pei de akamai kan nanpwungen peneinei kan me kin kousoan wasao. Nan at peneinei, ohl akan kin mwamwahliki oh sohte nsenohki madamadau en lih akan. I tikida sukuhlki me ihte pwukoa en lih emen iei en mi nan wasahn kuk oh mwenge, apwahpwalih ohl akan oh seri kan.

Ei mour ni ei tikitiko apwal. Ni ahnsou me I sounpar eisek, ei pahpao mehla pwehki eh kin kamamsakau. Sounpar limau mwuri, emen rehn riei ohl me laud ko lusiamala. Nan pahrohte, I kilang emen kemehla emen kiseh nan akamai en peneinei ehu, oh I uhdahn pwuriamweikihla met. Kisehi kan padahkihong ie ia mwomwen ei pahn pei doadoahngki naip oh kesik ni ahnsou me anahn. Mwahnakapw men me ketihwo, I tepida wiahda pelipel tohto ni paliwereiet oh nim sakau.

Ni ei sounpar 16, I kin nimala pwoatol en pihru 10 de 15 nan rahn ehu, oh sohte pwand I tepida ale wini en kasahliel kan. Pwehn pwainda mehn kelitepw kan, I kin netikihla dipwisou mete kan oh kin pirap. Ni ei sounpar 17, I iangehr selidi nan imweteng. Patpene koaros, I alehdier kalokepen dipei sang mwoalen kopwung pahn pak 18 pwehki pirap oh tiahk lemei.

Erein ei sounpar 20 samwa, ei mour apwal sang mahso. I kak simoakehla pihs en maru lella 20 nan rahn ehu oh ale heroin oh wini en kasahliel teikan. Pak tohto, I kin kereniong mehkihla ei kin daulihala ale wini pwukat. I tepida netiki wini en kasahliel kan, kahrehda ahnsou koaros I kin weuwaseli naip oh kesik. Ehu pako, I song en kasikih ohl emen, ahpw paiete lehto pwurasang mete me mi ni eh katengo! Ni ahnsou me I sounpar 24, ei nohno mehla, oh ei lingeringer kin lalaudla. Ahnsou me aramas akan me alialu pohn ahl akan kin kilang ie kohkohdo irail kin masepwehkada oh kotehla ahlo. Pwehki pei, ni imwin wihk kan I kin kalapw pweidi ni pwolis sdeisin de kapidelong imwen wini pwe ei ohla kan en deideipene.

Ni ei sounpar 28, I pwopwoudida. Nin duwen omw ese ie, I sohte kin kasalehiong ei pwoudo wahu. I kin mwamwahliki, kauwe oh keme. Se sohte kin wiapene mehkot nin duwen pwopwoud ehu. I medewe me e itar I en kihongete mehn kapwat tohto me I pirapada. Mwuri, mehkot kapwuriamwei ehu wiawi. Ei pwoud tepida onopki Paipel rehn Sounkadehdehn Siohwa kan. Mwurin keieu en eh onop, e uhdihsang simoak, sohla men ale mwohni pirapada kan oh kapwurehdo eh mehn kapwat kan. I uhdahn lingeringer. I uhwong eh kin onop Paipel oh kin peukohng ediniei en sika ni meseo. I pil kin kauwe ih ong mehn mpat kan.

Ehu pwohngo, ni ei sakaula sehse dahme I wiewia, I isikada ihmw me se kin pwapwaino. Ei pwoudo doareiehla oh nei serepein me sounpar limauo sang nan kisinieio. Ahnsou me sakawo sarasang ie, I nsensuwedkihla dahme I wiahdao. I pehm me Koht sohte pahn kak ketin mahkohng ie. I tamanda ehu ahnsowo I rong padire men nda me aramas suwed pahn kohla nan ehl. Pil ei toahkteo ndahng ie: “Sohte omw koapworopwor! Ke sohte kak ale mahkpen dipomw.”

IA DUWEN PAIPEL EH WEKIDALA EI MOUR:

Mwurin imwato eh luldao, se keseula kousoan rehn ei pwoudo eh pahpa nohno. Ni ahnsou me Sounkadehde kan mwemweitdo rehn ei pwoudo, I idek rehrail, “Koht kak ketin mahkohng dipei kan koaros?” Irail kasalehiong ie sang nan Paipel 1 Korint 6:9-11. Ire pwukat kasalehda soangsoangen wiewia kan me Koht ketin kalahdeki, ahpw e pil kapatahiong: “Ekei kumwail iang mihmi ni soangen aramas pwukat mahso.” Koasoi wet kamehlelehiong ie me wekidekla kan kak wiawi. Eri Sounkadehde ko kamehlelehiong ie me Koht ketin poakohng ie ni ar kasalehiong ie 1 Sohn 4:8. I kehlailkihda ei rong met oh I peki Sounkadehde ko en onop Paipel rehi pak riau nan wihk ehu, oh I pil tepida iang towehda arail mihting en Kristian kan. I kin kaukaule kapakapohng Siohwa.

Erein sounpwong ehu, I koasoanehdi en kesehla wini en kasahliel kan oh sakau. I mwadangete kehnda me sohla soanamwahu nan paliwereiet! I lokolongki ouraman suwed kan, moang medek, nan kil medek, oh soumwahu teikan sang ei uhdihsang ale wini oh nim sakau. Ahpw, pil ni ahnsowohte, I pehm me Siohwa kin ketin kolokol pehi kat oh kakehlaka ie. Ei pepehm duwehte ahn wahnpoaron Pohl. Me pid sawas me Koht ketikihong ih, Pohl ntingihedi: “I kakohng mehkoaros sang ni manamano me e kin ketikihong ie.” (Pilipai 4:13, NW) Kedekedeo, I kakehr kesehla simoak sika.​—2 Korint 7:1.

Likin Paipel eh kin sewese ie en kaunda ei mour, e pil kamwahwihala mour en ei peneinei. Ei wiewia ong ei pwoud wekila. I tepida kasalehiong ei wauneki, oh kin ndaiong “menlau” oh “kalahngan en komwi.” I pil tepida apwalih nait serepeino duwehte pahpa men. Mwurin ei onopki Paipel sounpar ehu, I inoukihda ei mour ong Siohwa oh papidaisla ni ei alasang mehn kahlemeng en ei pwoud.

IA DUWEN EI PAIEKIHDA:

I uhdahn kamehlele me kaweid en Paipel kan kapitiehla. Pil tohn ei peneinei me sohte iang Sounkadehde kan pil pohnese me I kakete mehkihla wini kan me I kin doadoahngki de aramas peiong ie oh kemeiehla.

Ei mour en peneinei uhdahn wekila pwehki padahk en Paipel kan me kin kasalehda ei pwukoa kan nin duwen ohl pwopwoud men oh pahpa men. (Episos 5:25; 6:4) Se tepida wiapene soahng kan nin duwen peneinei ehu. Met, I sohla kin wiahki me en ei pwoud eh pwukoa iei en mihte nan wasahn kuk oh mwenge, ahpw I kin perenki utung ih nan eh doadoahk kan nin duwen emen me kin doadoahngki pali laud en eh ahnsou kalohki rongamwahwo. Oh e pil perenki utung ie nan ei pwukoa nin duwen emen elder nan mwomwohdiso.

Sapwellimen Siohwa limpoak oh mahk uhdahn kamwakid ei mour. I ahneki ineng kehlail en koasoia duwen sapwellime irair kan ong aramas akan me sohte ar koapworopwor, duwehte me tohto kin medewehiong ie mahso. I ese me mie ahn Paipel manaman en sewese aramas sohte lipilipil en diar mour mwakelekel oh katapan. Paipel sohte ihte padahkihong ie en kin poakohng oh wauneki meteikan, ohl oh lih akan, ahpw e pil mweidohng ie en wauneki pein ngehi.