“Ngoang oh Limpoak nan At Mohngiong Laudsang Mahs”

E TEPIDA karakarda ni menseng en Nialem nan September 1922 ni aramas 8,000 pokonlahng nan ihmw laud ehu. Chairmano pakairki me erein prokram kesempwal wet, aramas akan kak pedoisang wasao, ahpw sohte mweimweiong en pwurehng pedolong loale.

Re koulki koul kan ni “Ahnsoun Koul oh Kapakap,” oh mwurin mwo, Joseph F. Rutherford kohdahla wasahn padahko. Pali laud en me rongorong ko kasikasik padahk me pahn wiawi. A aramas malaulau kei sohte kak mwohndi ahpw wie alialu. Me wia padahko kangoange irail en mwohndi oh rong. Ni padahko eh pahn tepida, re sohte tehk me likou laud ehu pirapirpene mwahu oh wie tentenek pohn koadoken moangerail ko.

Brother Rutherford koasoia duwen oaralapo “Wehin nanleng leledohr.” Erein awa ehu elep, uwen laud en ngileo, koaros nan ihmwo kak rong ni eh koasoia duwen soukohp en mahs ako ar sohte kin masepwehk ni ar kin pakairki Wehio me pahn ketido. Ni kaimwiseklahn padahko, e idek, “Kumwail kamehlele me Nanmwarki en lingan tepidahr eh kaunda?” Me wie rongorong ko ngihl laudida oh nda: “Ei!”

Brother Rutherford ngihl laud nda: “Sapwellimen Koht wasa lapalahpie seri kan, kumwail kohla wasahn kalohko! Kilang nanmwarkio kaundahr! Kumwail iei sapwellime sounkair kan. Eri, pakairki, pakairki, pakairki.”

Ni ahnsowohte likou me limilimpeneo kohpeseng oh kasalehda nting pwukat: “Pakairki Nanmwarkio oh Wehio.”

Ray Bopp nda, “Me rongorong ko uhdahn perenkihda met.” Anna Gardner nda me “rehu en ihmwo rerda ni aramas ako ar lopwolopw.” Fred Twarosh nda, “Me rongorong ko wiahkintehieu kesihnenda.” Evangelos Scouffas pil nda, “E mwomwen me manaman ehu kamwakid kiht en kesihnenda oh pilen masat ka kohda.”

Me tohto wasahn mihting tohrohro pakpakairkiseliher duwen rongamwahu en Wehio. Ahpw re pehm me met mie kahrepe kapw irail en wia doadoahk wet. Ethel Bennecoff koasoia me Tohnsukuhl en Paipel ko ahneki “ngoang oh limpoak nan [arail] mohngiong me laudsang mahs” ni arail kohla kalohk. Odessa Tuck, me ni ahnsowo sounpar 18, kohkohsang wasahn mihting tohrohro oh koasoanehdi teng en kapwaiada pahngoko “Ihs me pahn kohla?” E nda: “I sehse ia wasa de ia duwen de dahieu mwo. Ahpw ihte me I ese iei me I men duwehte Aiseia me nda: ‘Iet ngehi, Maing, komwi ketin poaroneiehla!’” (Isa. 6:8) Ralph Leffler nda, “Rahn kesempwal wet iei uhdahn ahnsou me doadoahkepen pakairki Wehio me rahnwet kohpesengehr nan sampah pwon tepida.”

Ihme kahrehda mihting tohrohro nan Cedar Point, Ohio nan pahr 1922 wia mwekid laud ehu nan poadopoad en sapwellimen Koht doadoahk! George Gangas nda, “Mihting tohrohro kahrehiong ie en dehr katihasang pil ehu mihting tohrohr.” Nin duwen me e taman, e saikinte wia met. Julia Wilcox ntingihedi: “I sohte kak kawehwehda peren me I ahneki ahnsou koaros me neitail sawasepen Paipel kan kin koasoia duwen Cedar Point pahr 1922. Ahnsou koaros I men nda, ‘Kalahngan en komwi, Siohwa, omw ketin mweidohng ie en iang mi wasao.’”

Ele tohto kitail rahnwet kin tamanda ahnsou kaperen kan ni mihting tohrohr kan me uhdahn sair atail mohngiong oh kahrehong kitail en ahneki ngoang oh limpoak ong atail Koht lapalap oh Nanmwarkio me e ketin idihada. Ni atail kin medemedewe soahng pwukat, met kin kamwakid kitail en nda, “Kalahngan en komwi, Siohwa, omw ketin mweidohng ie en iang mi wasao.”