IA DUWEN ATAIL KAK SOHLA KADAKADAUR KAILOK?

4 | Powehkihdi Kailok Sapwellimen Koht Sawas

Padahk en Paipel:

“Wahn sapwellimen Koht manaman iei limpoak, peren, popohl, kanengamah, kadek, kamwahu, pwoson, mpahi, kaunda pein emen.”—KALESIA 5:22, 23.

Ia Wehwehn Met:

Kitail kak uhdihsang kadakadaur kailok sang ni sapwellimen Koht sawas. Sapwellimen Koht manaman kak kihong kitail irair kan me kitail sohte douluhl kin ahneki. Eri kitail dehr nantihong pein powehdi kailok, kitail pahn pweida ma kitail likih sapwellimen Koht sawas. Ma kitail wia met, kitail kak ahneki soangen pepehmohte me wahnpoaron Pohl ahneki, ni eh ntingihedi: “I kakohng mehkoaros pwehki I ahneki kehl sang rehn me ketikihong ie manaman.” (Pilipai 4:13) Oh kitail pahn kak nda: “Sawasepei pahn pwarodo sang rehn KAUN-O.”—Melkahka 121:2.

Dahme Ke Kak Wia:

“Siohwa ketin wekidiehla sang ni aramas lemei men ong ni aramas popohl men.”—WALDO

Kapakapohng Siohwa, peki sapwellime manaman sang nan omw mohngiong. (Luk 11:13) Peki en ketin seweseiuk kasalehda irair mwahu kan. Onopki dahme Paipel mahsaniheki duwen irair kan me kak seweseiuk kihsang kailok me duwehte limpoak, popohl, kanengamah oh kaunda pein kowe. Kilang ia duwen omw kak kakairada irair pwukat nan omw mour. Oh patehng irail akan me kin nantihong ahneki irair pwukat. Soangen aramas pwukat kak “kamwakid [uhk] en kasalehda limpoak oh wiewia mwahu kan.”—Ipru 10:24; nting tikitik me mi pah.

Dahme Uhdahn Wiawi—WALDO

Powehdi Kailok Lemei

Waldo ahneki mour apwal ni eh kekeirda, met kahrehda e kin kailok. E koasoia: “I kin kalapw iang pei rehn irail akan me kin netiki wini en kasahliel kan . . . Ehu ahnsowo, pwihn ehu e kin uhwong ie pwain sounkamaramas men en kemeiehla, ahpw I pitila, mendahki ei doksinaipdi pak ehute.”

Waldo sohte perenki ni ahnsou me eh pwoudo tepida onop Paipel rehn Sounkadehdehn Siohwa kan. E koasoia: “I kailongki Sounkadehde kan, oh pak tohto I kin lokaia suwediong irail. Ahpw ahnsou koaros re kin sapeng ni popohl.”

Kedekedeo, Waldo pil tepida onop Paipel. E koasoia: “I apwalki kapwaiada dahme I sukusukuhlki. I medewe me I sohte mwahn pahn uhdihsang lingeringer oh lemei.” Ahpw mehkot ehu me e sukuhlkihsang nan Paipel me uhdahn sewese ih.

Waldo kawehwehda: “Ehu rahno, Alejandro me kin onop Paipel rehi peki I en wadek Kalesia 5:22, 23. . . . Alejandro kawehwehda me I sohte kak pein kakairada irair pwukat ahpw Koht pahn ketin sewese ie sang ni sapwellime manaman. Ire mehlel wet uhdahn wekidala ei madamadau!”

Waldo kak uhdihsang kailongki meteikan pwehki e likih sapwellimen Koht sawas. E koasoia: “Kisehi kan oh kompoakepahi en mahs kan sohte kamehlele uwen laud en ei wekila. Siohwa ketin wekidiehla sang ni aramas lemei men ong ni aramas popohl men.”