Ke ki Dia di Julgamentu?

KUMA ku bu ta imaẑina dia di julgamentu? Manga di jintis ta pensa kuma bilyons di almas na lebadu un pur un, dianti di tronu di Deus. La, kada kin na julgadu. Alguns na abensuadu ku vida na gloria i utrus na kondenadu pa sufrimentu ku ka ta kaba. Ma, Biblia fala des tempu di un manera diferenti. Palabra di Deus fala del nau suma un tempu meduñu, ma suma un tempu di speransa nunde ku pekaduris na torna perfeitu suma na kumsada.

Na Apokalipsi 20:11, 12, Apostulu Jon fala sin aserka di Dia di Julgamentu: “N oja un garandi tronu branku, ku kil ku sta sintadu nel. Tera ku seu kuri si dianti. I ka tenba ja lugar pa elis. N oja mortus, garandis ku pikininus, sikidu dianti di tronu. Librus yabridu. I yabri mas utru libru, kil ku tene nomi di bibus. Mortus julgadu pa kusas ku skirbidu na ki librus, konformi kusas ke fasi.” Kin ki Juiz ku faladu del li?

Jeova Deus i Juiz mas garandi di pekaduris. Ma, i da utru tarbaju di julga. Sugundu Atus 17:31, apostulu Paulu fala ki Deus “marka un dia ki na bin julga mundu ku justisa, na mon di un omi ki distina pa i fasil.” Es Juiz ku kujidu i Jesus Kristu ku resusitadu. (Jon 5:22) Ma, kal tempu ku Dia di Julgamentu na kumsa? Kantu tempu ki na dura?

Livru di Apokalipsi mostra kuma, ki Dia di Julgamentu na kumsa dipus di gera di Armajedon, ora ki sistema di Satanas na Tera na bin distruidu.a (Apokalipsi 16:14, 16; 19:19–20:3) Dipus di Armajedon, Satanas ku si dimonius na bin ficadu na un abismu pa mil anus. Na kil tempu, 144.000 ku na sta na seu, na bin sedu juizis i e na “rena ku Kristu mil anu.” (Apokalipsi 14:1-3; 20:1-4; Romanus 8:17) Dia di Julgamentu i ka un akontisimentu rapidu ku na dura so 24 oras. I na dura mil anus.

Na ki piriudu di mil anus, Jesus Kristu na “julga bibus ku mortus.” (2 Timótiu 4:1) “Bibus” na sedu “garandi multidon” ku na salba na Armajedon. (Apokalipsi 7:9-17) Apostulu Jon oja tambi “mortus . . . sikidu dianti di tronu” di julgamentu. Suma ki Jesus purmiti, mortus na bin resusitadu. (Jon 5:28, 29; Atus 24:15) Ma, julgamentu di tudu jintis na bin basia na ke?

Sugundu vison di apostulu Jon, “librus yabridu,” i “mortus julgadu pa kusas ku skirbidu na ki librus, konformi kusas ke fasi.” (Apokalipsi 20:12) Sera ki es librus i riẑistu di kusas ku jintis fasiba? Nau, julgamentu ka na basia na kusas ku jintis fasiba antis de muri. Kuma ku no sibi kila? Biblia fala: “Kil ku muri i sta ja libri di pekadu.” (Romanus 6:7) Asin, kilis ku na resusitadu na volta vivi livri di tudu pekadus ke fasiba. Pa kila, librus na trata di normas ku Deus na bin da. Pa vivi pa sempri, tantu kilis ku salba na Armajedon suma kilis ku resusitadu, ten di bin obdisi mandamentus di Deus, kila na nklui kualker normas nobu ku Jeova pudi revela na mil anus. Asin, jintis na bin julgadu basiadu na ke ke fasi duranti Dia di julgamentu.

Dia di Julgamentu na da bilyons di jintis opurtunidadi pa purmeru bias di aprindi aserka di vontadi di Deus i vivi na armonia kel. Es signifika ki, i na kumsa un tarbaju garandi di nsinu. Na bardadi, ‘jintis ku mora na mundu na sina yanda diritu.’ (Isaias 26:9) Ma, i ka tudu jintis ku na misti vivi na armonia ku vontadi di Deus. Isaias 26:10 fala: “Nin si omis mau e mostradu fabur, e ka ta nsina yanda diritu. Mesmu na tera nunde ku jintis ta yanda diritu, elis e ta fasi mal. E ka ta rikuñisi garandesa di SIÑOR.” Es jintis mau na kabadu kel pa sempri duranti Dia di Julgamentu. — Isaias 65:20.

Na fin di Dia di Julgamentu, kilis ku salba na “torna bibu” na sintidu kompletu, suma jintis perfeitu. (Apokalipsi 20:5) Asin, na Dia di Julgamentu, pekaduris na torna perfeitu suma na kumsada. (1 Koríntius 15:24-28) Dipus, un prova final na fasidu. Satanas na largadu di si prison, i na disadu tenta disvia jintis pa ultimu bias. (Apokalipsi 20:3, 7-10) Kilis ku rizistil na bin risibi kumprimentu kompletu di promesa di Biblia: “Justus na yarda ki tera, e na mora nel pa sempri.” (Salmu 37:29) Na bardadi, Dia di Julgamentu na sedu un benson pa tudu jintis fiel!