Bu na fasi vontadi di Jeova?

Obrigadu pa manera ku bu toma tempu pa izamina es broŝura pa pudi kunsi Tustumuñas di Jeova, pa kunsi no atividadis, i pa sibi kuma ku no organizason ta funsiona. No pensa kuma i judau identifikanu suma kilis ku sta na fasi vontadi di Jeova aos. No na insentivau kontinua aprindi aserka di Deus, konta utrus membrus di bu familia ku amigus aserka di ke ku bu sta na aprindi, i junta sempri ku nos na no runions. — Ebreus 10:​23-25.

Bu na diskubri ki, mas bu aprindi aserka di Jeova, mas bu na oja kuma ki amau di bardadi. Dipus bu na bin sedu motivadu fasi tudu ku bu pudi pa mostra bu amor pa rel. (1 Jon 4:​8-10, 19) Ma kuma ku bu pudi mostra amor pa Deus na bu manera di vivi? Ke ku manda obidisi si normas di moral i pa bu ben? I ke ku na judau pa bu misti fasi vontadi di Deus juntu ku nos? Kin ku ta studa Biblia ku bo na tene praser di judau oja respostas pa es purguntas, asin abo ku bu familia bo na pudi “fika sempri dentru di amor di Deus, . . . pa i da bos vida ku ka ta kaba.” — Judas 21.

No na kumbidau di tudu korson pa bu kontinua fasi progresu na kamiñu di bardadi atraves di studa livru ‘Fika Sempri na Amor di Deus’.