Un sigridu ku no sta kontenti pa kunsi

Sera ki algin ciga di kontau un kusa ki ka konta utru? — a Si rasposta i sin, nton, kila i un sigridu, pabia utru jintis ka sibil. Biblia fala di un “sigridu” ku bin di Deus. I comadu sigridu pabia jintis ka sibi del. Te mesmu anjus mistiba sibi mas del. Bu misti sibi es i kal sigridu? —

Deus kumpu purmeru omi ku purmeru minjer manga di tempu atras. Se nomi i Adon ku Eva. Deus daba elis un kau bonitu comadu jardin di Eden. Si Adon ku Eva obiba Deus, elis ku se fijus e na pudiba fasi tudu Tera sedu paraisu suma jardin. I e pudiba vivi na paraisu pa tudu tempu. Bu lembra ke ku Adon ku Eva fasi? —

Adon ku Eva ka obiba Deus, e ku manda no ka sta na vivi na paraisu aos. Ma Deus fala kuma i na bin fasi pa tudu Tera sedu bonitu, i kada kin na kontenti i vivi pa tudu tempu. Kuma ki na fasi kila? Ningin ka sibiba. Pa manga di tempu i seduba un sigridu pa jintis.

Oca Jesus bin pa Tera, i sina jintis ciu aserka des sigridu. I fala kuma i aserka di Renu di Deus. Jesus fala jintis pa e ora pa Renu bin. Renu na torna Tera un paraisu bonitu.

Bu misti kunsi es sigridu? — Lembra kuma so kilis ku ta obidisi Jeova ku na bin vivi na paraisu. Biblia ta falanu di manga di storias di omis ku minjeris ku obdisi Jeova. Bu misti sibi aserka delis? — Gosi no na jubi ba kin ki elis i kuma ki no pudi sedu suma elis?