PURGUNTA 7
Kuma ku N pudi risisti preson pa fasi seksu?
KE KU BU NA FASIBA?
Imaẑina es sena: I fasi ja dus mis ku Ester kunsi Maikel, ma i sta suma si i kunsilba ja manga di tempu. E ta manda n̈utru mensaẑen tudu ora, e ta papia manga di oras na telefoni, i e pudi sibi ke ku utru na fala antis di kaba un frasi! Ma gosi Maikel misti mas di ki so kombersa.
Duranti dus mis, Maikel ku Ester ka fasi nada mas di ki so pega n̈utru mon i beja n̈utru un bokadu. Ester ka mistiba bai mas lunju. Ma i ka mistiba tambi pirdi Maikel. Ningin ka ciga di fasil sinti ben i spesial suma Maikel. ‘Alen di kila,’ i ta fala na si sintidu: ‘Ami ku Maikel no gosta di n̈utru . . . ’
Si bu tene idadi pa namora i bu staba na mesmu situason ku Ester, ke ku bu na fasiba dipus?
PENSA UN BOKADU!
Seksu i un prenda ku Deus da so pa jintis kasadu. Fasi seksu antis di kasa signifika abusa des prenda. I suma toma un ropa bonitu ku un algin patiu bu usal pa limpa con kel
Si bu disafia lei di natureza, suma lei di gravidadi, bu na sufri konsekuensia. Mesmu kusa na akontisi si bu disafia lei di moral, suma kil ku fala: “Sta libri di pekadu seksual.” — 1 Tesalonisensis 4:3.
Kal ki konsekuensias di disobdisi es mandamentu? Biblia fala: “Kil ku kai na pekadu seksual, i na peka kontra si propi kurpu.” (1 Koríntius 6:18) Sera ki i bardadi?
Piskisas mostra kuma manga di jovens ku fasi seksu antis di kasa ta bin oja un o alguns des konsekuensias.
TRISTESA. Manga di jovens ku fasi seksu antis di kasa bin fala mas tardi kuma e ripindi.
DISKUNFIANSA. Dipus di fasi seksu, kada parseru ta punta: ‘Ku kin mas ki fasi seksu kel?’
FRUSTRASON. Na fundu, manga di bajudas na pirfiriba un algin ku na proteẑi elis, i ka kin ku na splora elis. I manga di rapasis ka ta sinti atraidu pa bajudas ke fasiba ja seksu kel.
Konkluson: Si bu fasi seksu antis di kasa, bu ta sta na rapati balur di un kusa presiosu ku bu tene. (Romanus 1:24) Bu kurpu i muitu presiosu pa dal di un manera fasil!
Mostra kuma bu tene un personalidadi forti pa “sta libri di pekadu seksual.” (1 Tesalonisensis 4:3) Dipus, si un dia bu bin kasa, bu pudi fasi seksu. Bu na pudi apresial sin preokupason, ripindimentu, ku insuguransa ku ta bin di seksu antis di kasa. — Ditus 7:22, 23; 1 Koríntius 7:3.
KE KU BU PENSA?
Sera ki algin ku na bardadi amau, na pui na pirigu bu ben star fisiku ku emosional?
Sera ki algin ku na bardadi ta preokupa ku bo na tenta pui na pirigu bu amizadi ku Deus? — Ebreus 13:4.