NO VIDA KRISTON

Nobu Feramenta pa Runion di Semana

Apartir di janeru di 2018, runion di semana na nklui notas di studu ku imaẑens ku videos basiadu na edison di studu di Tradução do Novo Mundo da Bíblia Sagrada (nwtsty) na internet, mesmu si i ka ten inda na bu lingua. Sin duvida es informason na minjoria bu purparason pa runion. Mas importanti, i pudi pertusiu mas di no Pape amorosu, Jeova!

NOTAS DI STUDU

Notas di studu ta omenta mas no ntindimentu di kultura, ẑeografia, ku di lingua na manga di versikulus di Biblia.

Mateus 12:20

Paviu ku na fuma: Un lampada ku ta usadu na kasa i ta fasidu ku lama dipus i ta incidu ku azeiti di olivera. Un paviu ta leba azeiti pa alimenta ŝama. Palabra gregu pa “paviu ku na fuma” pudi rifiri un paviu ku na fuma pabia brasa sta la, ma ŝama sta na rapati o i paga. Profesia di Isaias 42:3 falaba aserka di kompaŝon di Jesus, kuma i ka na paga ultimu faiska di speransa na jintis umildi i oprimidu.

Mateus 26:13

Na bardadi: Na gregu, a·menʹ, i un transliterason di ebraiku ʼa·menʹ, ku signifika “pa i sedu sin” o “ku sertesa.” Manga di bias Jesus usa es spreson antis di fasi un diklarason, un promesa, o un profesia, pa pudi nfatiza di kuma i bardadi, tambi i di konfiansa. I ta faladu kuma na livrus sagradu Jesus i uniku ku usa spreson “na bardadi” o amen. Ora ki ripitidu tras di n̈utru (a·menʹ a·menʹ), suma ki sta na ivanjeliu di Jon, palabras di Jesus ta traduzidu pa “N na konta bos bardadi”. — Jon 1:51.

IMAẐENS KU VIDEOS

Fotos, imaẑens, videos ku ka tene son, ku animasons ta ilustra manga di ditalis ku skirbidu na Biblia.

Betfajé, Monti di Olivera ku Jerusalen

Es video kurtu mostra kamiñu pa Jerusalen apartir di lesti, di tabanka ku sta na atual et-Tur — ku ta koruspundi Betfajé ku faladu del na Biblia — te na un di pontus mas altu di Monti di Olivera. Betânia sta na lesti di Betfajé na zona lesti di Monti di Olivera. Ora ke sta na Jerusalen, Jesus ku si disipulus kustumaba ta pasa noiti na Betânia, ku kunsidu aos pa sidadi di el-ʽAzariyeh. (El ʽEizariya), un nomi arabi ku signifika “Lugar di Lazaru.” Sin duvida e ta staba na kau di Marta, Maria ku Lazaru. (Mat 21:17; Mar 11:11; Luk 21:37; Jon 11:1) Ora ke na viaẑa di se kau pa Jerusalen, talves Jesus ta toma kamiñu suma kil ku mostradu na video. Na 9 di Nisan di 33 EK, oca Jesus toma burusiñu na Monti di Olivera pa Jerusalen, talves i fasil na Betfajé, i sigi kamiñu pa Jerusalen.

Strada di Betânia pa Betfajé
Betfajé
Monti di Olivera
Kobon di Sedron
Aria di Templu

Pregu na os di kalkañada

Es i un fotografia di representason di kalkañada umanu ku pregadu ku un pregu di feru ku tene 11.5 cm di kumprimentu. Es pregu na kalkañada ojadu na 1968, oca ke na koba na norti di Jerusalen, i di tempu di Romanus. Es i un prova di Arkioloẑia ku ta mostra kuma i pusivel ki pregus ta usaduba pa prega un algin na staka di madera. Es pregus i suma pregus ku tropas romanus usa pa prega Jesus Kristu na staka. Es pregu ojadu dentru di un kaŝa di pedra ku ta comadu ozuariu, nunde ku os seku di jintis ku muri ta pudu dipus ku kurpu kaba dana. Es ta indika kuma algin ku matadu na staka pudi dadu un koba di nteru. — Mat 27:35.