Sera ki bu sta na purpara pa Memorial?

Ultimu Paskua ku Jesus fasi, na sedu un Paskua ku na tene importansia garandi. Suma i ka na tarda i na bin muri, i fasi aranẑu pa kume Paskua ku si apostulus i kumsa un nobu komemorason ku na ba ta fasidu kada anu, comadu Sia di Siñor. Pa kila, i manda Pedru ku Jon pa e bai purpara kau. (Luk 22:7-13; jubi imaẑen na kapa) Es ta lembrantanu nesesidadi di purpara pa Memorial ku na fasidu dia 27 di marsu. Sin duvida, kongregasons fasi aranẑu pa i ten orador, pon ku biñu, ku utrus kusas. Ma ke gora ku kada un di nos pudi fasi pa purpara pa Memorial?

Purpara bu korson. Lei i medita na leitura di Biblia ku programadu pa Memorial. Programa pudi ojadu na Examine as Escrituras Diariamente. Broŝura Ajuda pa Studa Palabra di Deus parti 16 (16-A ku 16-B), tene mas informason aserka di programa di leitura di Biblia pa Memorial. (Jubi tambi Manual pa Runion Vida ku Ministeriu di abril di 2020) Na Índice das Publicações da Torre de Vigia o na Guia de Pesquisa para Testemunhas de Jeová, familias pudi oja informason aserka di importansia di sakrifisiu di Jesus, pa papia del na se studu di Biblia na familia.

Kumbida utrus pa e bin mati. Tene un partisipason ativu na kampaña. Pensa na kilis ku bu pudi kumbida, suma pur izemplu, bu revisitas, antigus studantis di Biblia, kuñisidus ku bu parentis. Ansions dibi di sertifika pa kumbida kilis ki inativu. Lembra kuma si un algin ka mora na bu zona, bu pudi oja ora ku lugar ku Memorial na fasidu na zona ki mora nel, na jw.org, bai pa parti ASERKA DI NOS, dipus klika na “Komemorason.”

Kal utru kusa ku no pudi fasi mas pa purpara?