Sera ki bu lembra?
Sera ki bu lei ku kuidadu artigus di Sintinela des anu? Jubi si bu na pudi ruspundi es purguntas:
Ke ku ‘arnoba bu pensamentu’ signifika? (Rom 12:2)
I mas di ki so fasi bon kusas na bu vida. I nklui jubi ke ku no sedu pa dentru, fasi mudansas na no vida, i fasi tudu ku no pudi pa obdisi normas di Deus. — w23.01, paẑina 8 ku 9.
Kuma ku no pudi mostra ekilibriu ora ku no na oja kusas ku sta na pasa nes mundu?
No sta interesadu di oja kuma ku kusas ku sta na pasa aos na mundu ta kumpri profesias. En ves di tenta diviña ke ku na kontisi, kusa ku pudi tisi divison, i na sedu bon pa basia no kombersas na publikasons ku fasidu pa organizason di Jeova. (1 Kor 1:10) — w23.02, paẑina 16.
Kuma ku batismu di Jesus sedu diferenti ku di si sigiduris?
Jesus padidu na un nason dedikadu pa Deus, pa kila, i ka pirsisa di dedika si vida pa Jeova suma ku no ta fasi. Jesus sedu un omi perfeitu, sin pekadu. I ka pirsisa di ripindi di si pekadus. — w23.03, paẑina 5.
Kuma ku no pudi juda utrus kumenta na runions?
No pudi da kumentarius kurtu, kila na pirmiti pa utrus kumenta. No pudi tambi ivita papia di manga di pontus. Asin, i na ten kusas ku utrus pudi fala del. — w23.04, paẑina 23.
Ke ku “Kamiñu di Puresa” ku faladu del na Isaias 35:8 signifika?
Purmeru, es strada simboliku na rifiri kamiñu ku judeus toma di Babilonia pa se tera. Ke gora di no tempu? Manga di anus atras antis di 1919, kamiñu purparadu, ku sedu, i fasidu traduson i mpreson di Biblias i ku utrus kusas. Povu di Deus sta na yanda na “Kamiñu di Puresa” pa adora Jeova juntu, i pa bin risibi bensons di Renu. — w23.05, paẑina 15 te 19.
Kal konsiju ku Ditus kapitulu 9 da aserka di dus minjeris simboliku?
Ditus fala di ‘minjer tulu’ ku si konviti ta leba pa “koba di mortu” ku “jiresa” di bardadi ku komparadu ku un minjer, i si konviti ta leba pa “kamiñu di ntindimentu” ku vida. (Dit 9:1, 6, 13, 18) — w23.06, paẑina 22 te 24.
Kuma ku umildadi di Deus ku manera ki ka ta nsisti na si ideia notadu na manera ki lida ku Lo?
Jeova fala Lo pa i sai di Sodoma, i kuri pa montis. Oca Lo pidil pa i bai pa Zoar, Deus seta si pididu. — w23.07, paẑina 21.
Ke ku un minjer pudi fasi si kontra si omi ta jubi pornografia?
I dibi di lembra di kuma i ka tene kulpa. I dibi di konsentra na si amisadi ku Deus i pensa fundu na isemplus di minjeris ku Biblia fala del, ku staba disanimadu ma ku oca konsolu na mon di Jeova. I pudi juda si omi ivita situasons ku pudi tental. — w23.08, paẑina 14 te 17.
Kuma ku ntindimentu pudi judanu sedu mansu ora ku utrus disafia ke ku no fia nel?
No pudi oja ki purgunta o disafiu ku un algin lansa suma un manera di sibi ke ki ta pensa i ke ku ta preokupal. Asin, no na sta ben purparadu pa ruspundi di un manera mansu. — w23.09, paẑina 17.
Ke ku no pudi aprindi di Maria aserka di risibi forsa?
Oca ku Maria sibi di kuma i na sedu mame di Mesias, i risibi forsa di utrus. Gabriel ku Elizabeti da Maria nkoraẑamentu ku bin di Palabra di Deus. Anos tambi no pudi risibi forsa di no ermons na fe. — w23.10, paẑina 15.
Kuma ku Jeova pudi ruspundi no orasons?
I purmiti di kuma i na obi no orasons, tambi i ta pensa na kuma ku no orasons sta ligadu ku ke ki misti fasi. (Jer 29:12) Jeova pudi ruspundi mesmu pididus di diferentis manera, ma i na judanu sempri. — w23.11, paẑina 21 ku 22.
Romanus 5:2 fala di “speransa”, gosi pabia ki faladu mas del na versikulu 4?
Ora ku un algin obi bon noba i ta tene speransa di vivi na paraísu na Tera. Ma ora ki pasa kansera, i manti firmi i sinti fabur di Deus, si speransa ta sedu mas forti i ta pasa sedu un kusa ki da balur garandi. — w23.12, paẑina 12 ku 13.