Purguntas di kilis ku ta lei no publikasons
Kal ligason ku ten entri palabras ku sta na versikulu 6 ku 7 di Salmu 12?
Salmu 12:1-4 fala di kuma “kilis ki fiel e pirdi na metadi di jintis.” Dipus na Salmu 12:5-7 i fala sin:
“SIÑOR fala: ‘N na lanta gosi,
pabia frakus na kalkadu,
koitadis na jimi.
N na da elis ki suguransa ke dija.’
Palabras di SIÑOR i puru,
suma prata ku rifinadu na furnu di lama, i purifikadu seti bias.
SIÑOR, bu na guardanu,
bu na libranu de jintis pa sempri.”
Versikulu 5 fala di ke ku Deus na bin fasi pa jintis fraku. I na salba elis.
Versikulu 6 fala tambi di kuma “palabras di SIÑOR i puru, suma prata ku rifinadu.” Es ta mostra kuma ku no ta sinti ku palabras di Jeova. — Sal 18:30; 119:140.
Na alguns traduson di Biblia, Salmu 12:7 traduzidu des manera: “Bu na guarda elis”. Pabia di “palabras di SIÑOR” ku faladu del na versikulu ku sta antis, alguns ta pensa di kuma i signifika Deus na “guarda” si palabras. No sibi tambi di kuma Deus proteẑi Biblia, mesmu pa manga di sforsu ku jintis ku sta kontra Biblia fasi, pa kaba ku el i tuji utrus tenel. — Isa 40:8; 1 Ped 1:25.
Ma, Jeova guarda tambi jintis ku faladu del na versikulu 5, i juda i salba “frakus” ku kilis ku “kalkadu”, tambi i na kontinua fasil. — Jo 36:15; Sal 6:4; 31:1, 2; 54:7; 145:20.
Ma ke ku Jeova na guarda suma ki faladu na versikulu 7, jintis o si palabras? Ora ku no studa diritu es salmu i ta torna klaru di kuma i na fala di jintis.
Na kumsada di Salmu 12, Davi fala di servus fiel di Jeova ku jintis mau konta mintida kontra elis. Versikulu 3 mostra di kuma Jeova na bin aẑi kontra kilis ku ta papia mau kusas. Es salmu danu garantia di kuma, no pudi konfia di kuma Deus na aẑi, pa juda si povu pabia si palabras i puru.
Pa kila, kilis ku Jeova na guarda, ku faladu del na versikulu 7, i jintis ku kalkadu pa kilis ki mau.
Pabia ku alguns traduson di Biblia traduzi es versikulu asin: “Bu na guarda elis”? I pabia se traduson basia na kopias di konfiansa di Skrituras Ebraiku. Ma purmeru traduson di Skrituras Ebraiku pa Gregu usa es palabras: “I na guardanu” ku “i na libranu”. Asin, es versikulu riba mas pa asuntu di jintis fiel ku sedu fraku i ku kalkadu. E na libradu “de jintis”, ku sedu, jintis ku ta fasi ke ki mau. (Sal 12:7, 8) Na traduson di Skrituras Ebraiku pa lingua Aramaiku, versikulu 7 fala sin: “O SIÑOR, bu na libra justus, bu na guarda elis di jintis mau pa sempri.” Es danu utru prova di kuma Salmu 12:7 ka staba na fala di palabras di Deus.
Pa kila, es versikulu da speransa pa “kilis ki fiel”, di kuma Deus na bin aẑi.