Sera ki bu sibiba?

Kuma ku musika seduba importanti na antigu Israel?

MUSIKA seduba un parti importanti di kultura di israelitas. Biblia fala di manga di instrumentus di musika ku kilis ku ta kanta. Manga di parti di Biblia i kantigas. Suma pur isemplu, livru di Salmus, Kantiga di Salomon ku Miskiñu. Un livru aserka di vida na tempus bibliku, fala di kuma Biblia mostra di manera klaru di kuma, israelitas ta usaba musika na manga di atividadis di se vida di kada dia.

Musika na vida di kada dia. Israelitas ta toka i kanta pa mostra se sentimentu. (Isa 30:29) Minjeris ta toka tambriñas, e kanta kantigas ku kontentamentu i e ta baja duranti selebrasons. Suma pur isemplu, ora ki ten nobu rei ku mposadu, ora ku soldadus ngaña gera, i na festas pa adorason. (Ŝef 11:34; 1 Sam 18:​6, 7; 1 Re 1:​39, 40) Israelitas ta kanta tambi pa mostra se tristesa ora ku un algin muri. (2 Kron 35:25) Na bardadi, israelitas gosta di musika ciu dimas.

Musika na palasiu di rei. Reis di Israel gosta ciu di musika. Rei Saul coma Davi na si palasiu pa sirbil suma musiku. (1 Sam 16:​18, 23) Dipus, oca Davi sedu rei, i kumpu instrumentus di musika, i skirbi kantigas bonitu i organiza grupu di kantaduris pa kanta na templu di Jeova. (2 Kron 7:6; Am 6:5) Rei Salomon teneba kantaduris macu ku femia na si palasiu. — Ekl 2:8.

Musika na adorason. Mas importanti di tudu, israelitas ta usaba musika na se adorason. Na bardadi, i formadu 4 mil musikus na templu na Jerusalen. (1 Kron 23:5) E ta tokaba simbalus, violas, arpas ku kornetas. (2 Kron 5:12) E musikus ku tene spiriensia i ka unikus ku ta kantaba pa adora Jeova. Sin duvida, manga di israelitas ta kantaba kantigas di subida, ora ke na viaẑaba pa festivalis ku ta fasidu kada anu na Jerusalen. (Sal 120-134) Di akordu ku skirbiduris Judeus, israelitas ta kantaba alguns Salmua duranti sia di Paskua.

Musika kontinua sedu un kusa importanti pa povu di Deus. (Tiagu 5:13) No kantigas fasi parti di no adorason. (Ef 5:19) Musika ta uninu ku no ermons ku irmas. (Kol 3:16) I ta danu forsa ora ku no na pasa kasabi. (At 16:25) Musika i un manera bonitu di mostra di kuma, no tene fe na Jeova i no amal.