Purguntas di kilis ku ta lei no publikasons
Kal tempu ku no na para prega bon noba?
Jesus fala: “E Bon Noba di renu i na kontadu na tudu mundu pa sedu tustumuñu pa tudu rasa. Dipus, fin ta ciga.” (Mat 24:14) Palabra gregu ku traduzidu pa “fin” nes versikulu, suma tambi na versikulu 6 ku 13, i palabra teʹlos. I na rifiri fin di mundu di Satanas, na Armajedon. (Apok 16:14, 16) Nton, no na kontinua prega bon noba te puku tempu antis di Armajedon. Es muda ntindimentu ku no teneba aserka des asuntu.
Antis no ntindiba di kuma no na para prega bon noba ora ku garandi tribulason kumsa ku ataki kontra Garandi Babilonia. (Apok 17:3, 5, 15, 16) No ta pensaba di kuma ora ku garandi tribulason kumsa, di manera simboliku i na sedu fin di “anu di fabur di SIÑOR,” ku sedu, Jeova ka na da mas jintis oportunidadi di obi bon noba. (Isa 61:2) No ta pensaba tambi di kuma, kilis ku na salva na garandi tribulason na mostraba ja di kuma e sirbi Jeova di manera fiel antis di garandi tribulason kumsa. No ta komparaba elis ku judeus ku salva na distruison di Jerusalen na 607 AEK. E jintis risibiba ja sinal pa salvason pabia e ta adora Jeova i e odia kusas nujenti. (Eze 5:11; 9:4) Ma, es komparason ka sta di akordu ku palabras di Jesus ku sta na Mateus 24:14, ku mostra di kuma, jintis pudi tene oportunidadi di obi bon noba puku tempu antis di fin di Armajedon.
Suma no tene ntindimentu mas klaru di Mateus 24:14, no pirsisa tambi di muda no ntindimentu aserka di ke ku no ta falaba di pregason ku parsi ku cuba di pedra di saraiva di Apokalipsi 16:21. Dipus di analisa es dus testu, i ojadu di kuma e tene informasons ku ta kompleta n̈utru. Di kal manera? Resposta sta na kuma ku jintis na reaẑi pa mensaẑen di Renu. Apostolu Paulu skirbi di kuma, pa “kilis ku na salba,” mensaẑen sedu bon noba i suma ‘purfumu ku ta da vida.’ Ma pa inimigus di Deus, mensaẑen i mau noba suma “un ceru fedi ku ta mata”. (2 Kor 2:15, 16) E jintis sta kontra mensaẑen di Renu, pabia mensaẑen ta mostra di kuma es mundu mau ke gosta del i ku na guvernadu pa Satanas na kabadu ku el nin i ka na tarda. — Jon 7:7; 1 Jon 2:17; 5:19.
Nota tambi di kuma, cuba di pedra di saraiva ku faladu del na Apokalipsi 16:21, i “garandi dimas.” Es signifika di kuma duranti garandi tribulason, tarbaju di pregason pudi sedu mas duru i diretu, nomi di Jeova na kunsidu di un manera ku nunka i ojadu. (Eze 39:7) Na ki tempu, dipus ku Garandi Babilonia kabadu ku el, sera ki i na ten alguns jintis ku na gosta di mensaẑen, suma si i sedu ceru sabi pa relis? I pudi kontisi. Talves e pudi lembra o sibi di kuma pa manga di anus Tustumuñas di Jeova kontaba ja di kuma riliẑion falsu na kabadu ku el.
Es parsi ku ke ku kontisi na antigu Ejitu dipus di 10 praga. Dipus di Jeova “mata tudu purmeru fijus di Ejitu” si povu “bai ku manga di jinti” ki ka israelitas. (Sai 12:12, 37, 38) Es stranjerus disidi bai ku povu di Jeova, oca ke oja di kuma tudu ke ku Moisés fala aserka di 10 praga kumpri.
Kualker algin ku bin pa Jeova dipus ku Garandi Babilonia kabadu kel na tene oportunidadi di fasi ben pa ermons di Kristu ku sta inda na Tera. (Mat 25:34-36, 40) Ma es oportunidadi di julgadu suma karnel na kaba puku antis di Armajedon kumsa, ora ku unjidus ku sobra na Tera bai pa seu.
Es ntindimentu mas klaru ta mostra amor garandi ku miserikordia di Jeova. Na bardadi i “ka misti pa ningin pirdi, ma pa tudu pudi ripindi.” — 2 Ped 3:9.