10 Sedu algin di konfiansa

KE KI SIGNIFIKA

Algin di konfiansa ta gaña konfiansa di si papes, si amigus ku si patron. I ta sigi regras, i ta kumpri si purmesas, tambi i ta konta sempri bardadi.

PABIA KI IMPORTANTI

Manga di bias, mas konfiansa ke tene na bo, mas liberdadi e na dau.

“Minjor manera di gaña konfiansa di bu pape ku bu mame, i di mostra di kuma, abo i un algin maduru i responsavel, i ka so ora ku bu sta ku elis, ma tambi ora ku bu sta abo so.” — Sarahi.

PRINSIPIU DI BIBLIA: “Bo yanda diritu”. — 1 Pedru 2:12.

KE KU BU PUDI FASI

Si bu misti gaña mas konfiansa o rekupera konfiansa ku utrus teneba na bo, ali pasus ku pudi judau.

Sedu onestu. Mintida i kusa ku pudi pui algin lestu ku pirdi konfiansa na bo. Pa utru ladu, ora ku bu sedu klaru i onestu, prinsipalmenti ora ku bu yara, bu pudi gaña konfiansa di utrus.

“I fasil sedu onestu ora ku tudu kusas na kuri ben. Ma sedu onestu na kusas ku pudi dana bu reputason, na fin, na pui pa jintis mas tene konfiansa na bo.” — Caiman.

PRINSIPIU DI BIBLIA: “No misti fasi sempri kil ki diritu.” — Ebreus 13:18.

Sedu un algin di konfiansa. Sugundu un piskisa na Stadus Unidu, 78 pur sentu di kilis ku ta kontrata jintis pa tarbaju, fala kuma, ‘un di tris kusas ke mas ta buska na algin ke na kontrata, i pa i sedu algin di konfiansa.’ Aprindi sedu algin di konfiansa gosi, na bin judau ora ku bu sedu algin garandi.

“Na pape ku ña mame ta nota di kuma ami i un algin responsavel, ora ku N fasi ña tarbaju sin e lembrantan. Ora ku N toma inisiativa pa fasi kusa suma es, e mas ta tene konfiansa na mi.” — Sarah.

PRINSIPIU DI BIBLIA: ‘N fiansa kuma bu na fasi kil ku N pidiu. Bardadi N sibi kuma bu na fasi inda mas.’ — Filemon 21.

Sedu pasienti. I fasil pa jintis nota di kuma bu sta na kirsi fisikamenti, ma i ta toma tempu pa e rukuñisi kuma, bu sta na kirsi emosionalmenti i mentalmenti.

“Fasi bon kusa un bias, ka signifika di kuma bu na gaña konfiansa di bu pape ku bu mame o di utrus. Ma bu pudi gaña se konfiansa puku-puku, si bu kontinua sedu algin responsavel.” — Brandon.

PRINSIPIU DI BIBLIA: “Bo ten ku bisti un korson di . . . pasensa.” — Kolosensis 3:12.