Tudu sufrimentu pertu kaba!

Duranti bu vida, talves bu ciga di punta: “Pabia di ke ki i ten manga di sufrimentu?” Manga di anus, pekaduris sufri ciu pabia di gera, pobresa, disastri, krimi, injustisa, duensa, ku mortu. Na sen anus ku pasa i ten mas sufrimentu di ki nunka. Sera ki es tudu na bin kaba?

Rasposta di konsolu i sin, i nin i ka na tarda! Palabra di Deus, Biblia fala: “Jintis mau na disparsi . . . Ma jintis mansu na yarda tera, e na kontenti ku garandi pas.” Pa kantu tempu ke na vivi? “Justus na yarda ki tera, e na mora nel pa sempri.” — Salmu 37:10, 11, 29.

Dipus ki Deus kaba ku maus i ku sufrimentu, tera na transformadu na un paraisu. Asin jintis na bin vivi pa tudu tempu ku bon saudi i ku fi­lisidadi. Palabra di Deus fala: “[Deus] na limpa tudu larma na se uju. Mortu ka na ten mas, nin tristesa, nin cur, nin dur.” — Apokalipsi 21:​4.

Nes nobu mundu, ate mesmu mortus na lantandadu pa vivi i risibi es bensons: “I ten ku ten un resureison di mortu di bons ku maus.” (Atus 24:15) I pabia des ku Jesus Kristu fala kil kriminosu aripindidu ku tene fe nel: “Bu na sta ku mi la na Paraísu.” — Lukas 23:43.

Ke ku manda sufrimentu kumsa?

Suma Deus mistiba pa pekaduris tene es futuru minjor, pabia di ke ki i disa sufrimentu kumsa? Pabia di ke ki i disal te aos?

Oca Deus kumpu Adon ku Eva, i kumpu elis ku un kurpu i pensamentu perfeitu. I pui elis na un jardin o paraisu dipus i da elis un bon tarbaju pa fasi. Biblia fala sin: “Deus oja tudu ki fasi, i kontenti ku el.” (Kumsada 1:​31) Se obdisiba Deus e na padiba fijus perfeitu, i tera na torna un paraisu, nunde ki jintis na viviba pa tudu tempu ku pas i filisidadi.

Deus da Adon ku Eva un prenda garandi ku sedu liberdadi di kuji ke ki sertu o eradu, ku fasi parti di vida di pekaduris. Deus ka kumpu elis suma un robo. Ma, e na kontinuaba na filisidadi ora ke usa ki liberdadi di manera sertu — ku sedu obdisi lei di Deus. Deus fala: “Ami i Siñor bu Deus, ku ta nsinau kusas mas minjor pa bo, ku ta giau na kamiñu ku bu dibi di yanda.” (Isaias 48:17) Usa ki liberdadi di mau manera i na rusulta na disgrasa, pabia pekaduris ka kumpudu pa tene susesu se lunjusi di Deus. Biblia fala: “Vida di omi i ka di sil; i ka pudi gia si pasus.” — Jeremias 10:23.

No purmeru papes pensaba kuma e pudi lunjusi di Deus i na mesmu tempu tene susesu, ma i ka kila ki bin sedu. Asin, oca e nega orientason di Deus, el i ka pirmiti pa e kontinua perfeitu. Logu, puku puku e kumsa ku beju i dipus e muri. Suma anos i se fiju no yarda se pekadu ku mortu. — Romanus 5:12.

Diritu di guverna i asuntu prinsipal

Pabia di ke ku Deus ka kaba ku Adon ku Eva i kumsa ku utrus kasadus? Pabia di kuma si diritu di guverna i disafiadu. Asuntu i es ba: Kin ku ten diritu di guverna, i leis di kin ku sta sertu? Inda mas, sera ki pekaduris na sai minjor si e ka guvernadu pa Deus? Da tempu pa pekaduris guverna se kabesa ku liberdadi total, na pirmiti pa i fika klaru si kontra Deus ki dibi di guverna elis o elis ki dibi guverna se kabesa. Tempu ku Deus da i sufisienti pa pekaduris tenta tudu tipu di guvernu suma esis: Pulitiku, sosial, ekonomiku i riliẑiosu, mas sin orientason di Deus.

Kal ki sedu rusultadu? Milyaris di anus di storia di pekaduris ta mostra ki sufrimentu konti-nua na rena kada bias mas. Na sekulu pasadu, pekaduris pasa pior sufrimentu. Milyons di jintis matadu na Sugunda Gera Mundial. Mas di 100 milyons di jintis muri na geras. Krimi ku violensia pajiga. Abusu di droga toma konta di mundu. Duensas ku ta kamba na ora di ten kontinua na lastra. Manga di jintis ta muri kada anu pabia di fomi ku duensa. Komportamentu ku vida na familia kontinua na piora na tudu lugar. Nin un guvernu ka tene suluson pa tudu es purbulemas. I nin un delis ka konsigi kaba ku bejusa, duensa ku mortu.

Situason di pekadur i suma kil ki Biblia falaba ja pa es tempu ku no na vivi. Palabra di Deus comal di “fin de tempu” nunde ki “i na bin dias di kansera.” I suma ki Biblia fala ‘jinti mau, nganadur, sta na pasa di mal pa pior.’ — 2 Timótiu 3:​1-5, 13.

Tudu sufrimentu pertu kaba

Tudu sinal ta mostra ki fin tristi di guvernu di pekaduris sin orientason di Deus sta pertu. I fika klaru ki nin un guvernu di pekaduris ki lunjisi di Deus ka tene susesu. So guvernu di Deus ki pudi tisi pas, filisidadi, bon saudi i vida pa tudu tempu. Tempu ku Jeova pirmiti pa maldadi ku sufrimentu ten, i pertu kaba. Nin i ka na tarda, Deus na miti na asuntus di pekaduris i kaba ku tudu kusas des mundu.

Biblia falaba ja: “Ma na tempu di ki reis [gu­vernus di pekaduris aos] Deus di seu na lantanda utru renu [na seu] ku nunka ka na danadu. . . . I na kebra-kebra tudu utru renus, i kaba ku elis [guvernus di aos]. Ki renu na firmantadu diritu pa sempri.” (Daniel 2:44) Prova di kuma Jeova tene diritu di guverna atraves di si Renu ku sta na seu i nsinu prinsipal di Biblia. Oca i na papia di sinal di “fin de tempu,” Jesus fala: “E Bon Noba di renu i na kontadu na tudu mundu pa sedu tustumuñu pa tudu rasa. Dipus, fin ta ciga.” — Mateus 24:14.

Ora ku fin ciga, kin ku na salba? Biblia ruspundi: “Kilis ku sedu retu, ku ka ten kulpa, e na fika ntidu ne tera, ma jinti mau na rinkadu na tera.” (Ditus 2:​21, 22) Retus i kilis ku aprindi aserka di Jeova i e fasi si vontadi. Jesus Kristu fala: “Vida ku ka ta kaba i es: Pa tudu jinti kunsiu, abo son, uniku Deus di bardadi, ku Jesus Kristu, kil ku bu manda.” (Jon 17:3) Na bardadi, “E mundu na pasa . . . , ma kil ku na fasi vontadi di Deus i na fika pa sempri.” — 1 Jon 2:17.

Si i ka ten utru indikason, testus di Biblia tiradu di traduson di Biblia (1998), Bíblia no crioulo da Guiné-Bissau publicada como BIBLIA.