KAPITULU DUS
Biblia — un livru di Deus
Di kal manera ki Biblia diferenti di kualker utru livru?
Kuma ki Biblia pudi judau lida ku bu purblemas?
Ke ku manda bu pudi fia na profesias ku sta na Biblia?
1, 2. Di kal manera ku Biblia sedu un prenda di Deus ku ta da manga di kontentamentu?
BU na lembra di un bias ku bu risibi un bon prenda di un amigu intimu? Risibi es prenda ka ta disau so ku manga di kontentamentu ma tambi i ta toka bu korson. Na bardadi, un prenda ta mostra un kusa aserka di kin ku dau el — i da balur amizadi ku bo tene. Sin duvida, bu gardisi bu amigu pa si bon prenda.
2 Biblia i un prenda ku Deus danu, livru ki no pudi mostra gratidon pa rel. Es livru spesial ta revela kusas ku nunka no ka na oja na utru ladu. Pur izemplu, i ta falanu aserka di kriason di seu ku si strelas, Tera ku purmeru omi ku minjer. Biblia tene orientasons di konfiansa ku pudi judanu lida ku purblemas di vida i ku preokupasons. I ta splika kuma ki Deus na bin kumpri si intenson i tisi minjor kondisons na Tera. Na bardadi, Biblia i un prenda ku ta da manga di kontentamentu!
3. Manera ki Jeova danu Biblia ta mostra ke di si parti, i ke ku manda es ta toka no korson?
3 Biblia tambi i un prenda ku ta toka no korson, pabia i ta revela un kusa aserka di kin ku danu el, Jeova Deus. Manera ki danu es livru i prova di kuma, i misti pa no kunsil diritu. Na bardadi, Biblia pudi judau pertusi di Jeova.
4. Ke ki ta adimirau aserka di distribuison di Biblia?
4 Si bu tene un Biblia, sibi kuma, i ka abo son ku tenel. Biblia ntidu o parti del, publikadu na serka di 2.600 linguas, i mas di 90 pur sentu di jintis na mundu tenel. Na media, mas di un milyon di Biblias ta distribuidu kada sumana! I fasidu ja bilyons di Biblia ntidu o parti del. Na bardadi, i ka ten utru livru suma Biblia.
“Tradução do Novo Mundo da Bíblia Sagrada” sta dispunivel na manga di linguas
5. Di kal manera ku Biblia ‘nspiradu pa Deus’?
5 Alen di kila, Biblia ‘i nspiradu pa Deus.’ (Lei 2 Timótiu 3:16.) Di kal manera? Propi Biblia ruspundi: “Spiritu Santu ku leba omis pa e fala palabras ku bin di Deus.” (2 Pedru 1:21) Pur izemplu: Un omi garandi pudi pidi si fiju pa i skirbi un karta pa rel. Ki karta tene pensamentu ku orientason di omi garandi. Asin, es karta i ka di si fiju ma i di sil. Di mesmu manera, Biblia tene mensaẑen di Deus, i ka di pekaduris ku skirbil. Na bardadi, Biblia ntidu i “palabra di Deus.” — 1 Tesalonisensis 2:13.
BIBLIA TENE ARMONIA I IZATU
6, 7. Ke ku manda armonia di nformason ku sta na Biblia i mpresionanti?
6 Biblia kumsa skirbidu na 1513 A.E.K.a i kaba 1.600 anus dipus. Si skirbiduris vivi na diferenti tempu i e sedu di diferenti formason. Alguns seduba labraduris, piskaduris i bakiaduris. Utrus seduba profetas, juizis ku reis. Skirbidur di Ivanjeliu comadu Lukas seduba un mediku. Skirbiduris di Biblia seduba di diferenti formason, ma mesmu asin, Biblia tene armonia desdi kumsada te fin.b
7 Purmeru livru di Biblia kontanu kuma ku purblemas di pekadur kumsa. Ultimu livru mostra kuma ki tudu tera na bin torna un paraisu o jardin. Kada parti di Biblia ta judanu ntindi kal ki intenson di Deus i kuma ki i na bin kumpri. Armonia di Biblia i mpresionanti, i es ki no na speraba di un livru ku bin di Deus.
8. Da zemplus ku ta mostra ki Biblia i izatu na asuntu di siensia?
8 Biblia i izatu na asuntu di siensia. Te mesmu i tene nformason ku ka sibiduba ki tempu. Pur izemplu, livru di Sirmonias tene leis pa antigu Israel na asuntu di iẑieni ku tratamentu di duensas ku ta kamba. Nasons viziñu ka sibiba nada aserka des asuntu. Oca i tenba ideia eradu aserka di forma di Tera, Biblia falaba del suma un sirkulu o globu. (Isaias 40:22) Ku izatidon, Biblia falaba ki Tera pindradu “riba di nada.” (Jo 26:7) I bardadi ki Biblia i ka un livru di siensia. Ma ora ki fala di asuntu di siensia, i ta sedu izatu. I ka kila ku no na speraba di un livru ku bin di Deus?
9. (a) Di kal manera ku propi Biblia ta mostra kuma, i izatu i di konfiansa na asuntu di storia? (b) Pa bo, ke ki onestidadi di skirbiduris di Biblia ta mostra?
9 Biblia tambi i izatu i di konfiansa na asuntu di storia. Si relatus i spesifiku. E ka ta nklui so nomis di jintis ma tambi di se jorson.c Diferenti di kontaduris di storia di mundu, ki manga di bias ka ta fala di dirota di se povu, skirbiduris di Biblia seduba onestu, te mesmu e ta fala di se propi falias ku falias di se povu. Na livru di Biblia, comadu Numerus, skirbidur Moises admiti si propi eru gravi ku lebal na sedu kastigadu. (Numerus 20:2-12) Es onestidadi i difisil oja na utrus relatus di storia ma i ta ojadu na Biblia pabia i un livru ku bin di Deus.
UN LIVRU DI JIRESA PRATIKU
10. Ke ku manda i ka di adimira pa manera ku Biblia sedu un livru pratiku?
10 Suma Biblia i nspiradu pa Deus, i “ten purbitu pa nsina, pa raprindi, pa kuriẑi, pa mostra manera di yanda diritu.” (2 Timótiu 3:16) Na bardadi, Biblia i un livru pratiku. I ta mostra ntindimentu klaru di natureza di pekadur. I ka di adimira, pabia si Dunu, Jeova Deus i Kriadur! I ntindi no pensamentu ku no emosons mas di ki nos. Alen di kila, Jeova sibi ke ki no pirsisa del pa sedu filis. I sibi tambi kal kamiñu ku no dibi di ivita.
11, 12. (a) Kal asuntus ku Jesus falaba del na Sermon di Monti? (b) Kal utrus asuntus pratiku ku Biblia ta fala del, i ke ku manda si konsiju bali pa tudu tempu?
11 Jubi kombersa di Jesus, comadu di Sermon di Monti, ku sta na Mateus kapitulus 5 te 7. Ku si nsinu di kualidadi, Jesus papiaba di manga di asuntus, suma manera di konsigi filisidadi di bardadi, kuma ku no pudi rosolvi purblemas, kuma ku no pudi ora i kuma ku no dibi di nkara kusas matirial di bon manera. Palabras di Jesus i puderosu i pratiku aos suma manera ki seduba kontra i papial.
12 Alguns orientasons di Biblia ta fala di vida di familia, abitus di tarbaju i relasionamentu ku utrus. Orientasons di Biblia ta aplika pa tudu jintis, i si konsijus sempri ta benefisianu. Jiresa ku sta na Biblia resumidu na palabras di Deus atraves di profeta Isaias: “Ami i SIÑOR bu Deus, ku ta nsinau kusas mas minjor pa bo.” — Isaias 48:17.
UN LIVRU DI PROFESIA
Skirbidur di Biblia Isaias falaba di dirota di Babilonia
13. Kal nformasons ku Jeova nspira profeta Isaias pa i skirbi aserka di Babilonia?
13 Biblia tene manga di profesias, manga delis kumpri ja. Jubi un izemplu: Atraves di profeta Isaias, ku viviba na sekulu oitu A.E.K., Jeova kontaba ki sidadi di Babilonia na sedu distruidu. (Isaias 13:19; 14:22, 23) I daduba nformasons pa mostra kuma ki sidadi na konkistadu. Tropas na seka riu di Babilonia, i e na yentra na sidadi sin geria. Es i ka tudu. Te mesmu profesia di Isaias konta nomi di rei ku na konkistaba Babilonia — Siru. — Lei Isaias 44:27–45:2.
14, 15. Kuma ki alguns nformasons di profesia di Isaias aserka di Babilonia kumpri?
14 Serka di 200 anus mas tardi — na noiti di Otubru di 5/6, 539 A.E.K. — tropas monta pertu di Babilonia. Kin ku seduba se kumandanti? Un rei Persa comadu Siru. Situason staba prontu pa kumprimentu di un profesia garandi. Ma sera ki tropas di Siru na nvadi Babilonia sin geria, suma ki faladu?
15 Povu di Babilonia staba na un festa kil noiti, e staba na sinti suguru tras di se muras garandi. Na ki mumentu, Siru koba kanal pa disvia yagu di riu ku daba volta di sidadi. I ka tarda, yagu baŝa pa si tropas kamba riu i pertusi di muras di sidadi. Ma kuma ki tropas di Siru na pasa muras di Babilonia? Pa algun motivu, na ki noiti, ku falta di kuidadu, portons di sidadi disadu abertu!
16. (a) Ke ki Isaias fala aserka di kal ki na sedu fin di Babilonia? (b) Kuma ki profesia di Isaias ku fala ki Babilonia ka na moradu nel kumpri?
16 Aserka di Babilonia, i faladu: “Nunka mas ningin ka na mora nel, nin i ka na kumpudu mas; nin un algin di Arabia ka na mara si tenda la, ku fadi bakiaduris pa pui se karnel diskansa la.” (Isaias 13:20) Es profesia fala mas di ki so di dirota di un sidadi. I ta mostra ki Babilonia ka na moradu nel pa sempri. Bu pudi oja provas di kumprimentu des palabras. Kau ki ka moradu di antigu Babilonia — sta serka di 80 km na sul di Bagda, Iraki — i prova di kuma ke ki Jeova fala atraves di Isaias kumpri: “N na baril ku basora ku ta kaba ku tudu.” — Isaias 14:22, 23.d
Ruinas di Babilonia
17. Kuma ki kumprimentu di profesia di Biblia ta fortalisi no fe?
17 Sibi ki Biblia i un livru di profesia di konfiansa ta fortalisi fe, i ka bardadi? Na bardadi, si Jeova Deus kumpri si promesas ki fasi na pasadu, no tene tudu motivu di fia kuma, i na bin kumpri tambi si promesa di un paraisu na Tera. (Lei Numerus 23:19.) Na bardadi, no tene “speransa di vida ku ka ta kaba. Deus, ku ka ta konta mintida, falaba ja antis di kumsada di tempu, kuma i na danu e vida.” — Titu 1:2.e
“PALABRA DI DEUS I BIBU”
18. Kal diklarason puderosu ku apostulu Paulu fasi aserka di “palabra di Deus”?
18 Pa ke ki no kaba di konsidera nes kapitulu, i fika klaru ki, na bardadi, Biblia i un livru spesial. Ma, si balur bai alen di armonia ki tene, na asuntu di siensia, izatidon di storia, jiresa pratiku ku profesia di konfiansa. Apostulu Paulu skirbi: “Palabra di Deus i bibu i forti. I ta mas korta di ki spada di dus boka; i ta yentra te dentru di algin nunde ku alma ku spiritu ta rapati, te na metadi di juntamentu di os. I kapas di julga vontadi ku pensamentu di korson.” — Ebreus 4:12.
19, 20. (a) Kuma ki Biblia pudi judau izamina bu kabesa? (b) Kuma ku bu pudi mostra bu gratidon pa prenda spesial di Deus, ku sedu Biblia?
19 Lei “palabra,” o mensaẑen di Deus, na Biblia pudi muda no vida. I pudi judanu izamina no kabesa di un manera ku nunka no ciga di fasi. No pudi afirma ama Deus, ma kuma ku no ta reaẑi dianti di ke ki si Palabra nspiradu Biblia ta sina, na revela no propi pensamentus, te mesmu intensons di no korson.
20 Na bardadi Biblia i un livru ku bin di Deus. I un livru ku no dibi di lei, studa i gosta del. Bu pudi mostra bu gratidon pa es prenda di Deus si bu kontinua izamina si nformasons. Si bu fasil, bu na bin tene ntindimentu fundu di intenson di Deus pa pekaduris. Prosimu kapitulu na fala di kal ki intenson di Deus i kuma ki na bin kumpri.
a A.E.K. signifika “Antis di Era Kumun,” E.K. signifika “Era Kumun.” Alguns ta fala tambi “antis di Kristu” i “dipus di Kristu.”
b I ten jintis ku ta fala ki, sertus partis di Biblia ta kontraria utru parti, ma es afirmason ka tene prova. Jubi kapitulu 7 di livru A Bíblia — Palavra de Deus ou de Homem? publikadu pa Tustumuñas di Jeova, dispunivel na purtugis.
c Pur izemplu, jubi lista kompletu di jorson di Jesus skirbidu na Lukas 3:23-38.
d Pa mas nformason aserka di profesia di Biblia, jubi paẑinas 27- 29 di broŝura Um Livro para Todas as Pessoas, publikadu pa Tustumuñas di Jeova, dispunivel na purtugis.
e Distruison di Babilonia i so un izemplu di kumprimentu di profesia di Biblia. Utrus izemplus nklui distruison di Tiru ku Ninivi. (Ezekiel 26:1-5; Sofonias 2:13-15) Tambi, profesia di Daniel falaba di suseson di putensias mundial ku na bin dipus di Babilonia. Es nklui Medu-Persia ku Gresia. (Daniel 8:5-7, 20-22) Jubi Apendisi, “Jesus Kristu — Mesias purmitidu,” pa un konsiderason di manga di profesias Mesianiku ku kumpri na Jesus Kristu.