LISON 4

Kin ki i Deus?

JINTIS ta adora manga di deusis. Ma Palabra di Deus fala ki i ten so un Deus di bardadi. El i uniku, i sta riba di tudu, i ka ta muri. I kumpu tudu kusas na seu ku tera, i danu vida. Pa kila, el so ki mersi no adorason.

Moises pega dus tagua di pedra ku tene Des Mandamentu — Lei dadu atraves di profeta Moises suma “palabra ku anjus fala”

Deus tene nomi. Si nomi i JEOVA. Deus ciga di fala sin pa Moises: “Asin ku bu na fala fijus di Israel: ‘[Jeova, NM] Deus di bo papes, Deus di Abraon, Deus di Isaki, Deus di Jakó, i mandan pa bos.’ Es i ña nomi pa sempri, es i ña lembransa pa tudu jorson na futuru.” (Saida 3:15) Nomi Jeova ojadu na Palabra di Deus mas di 7.000 bias. Salmu 83:18 fala sin aserka di Deus: “Abo son ku tene nomi di [Jeova, NM] bu sedu Deus ku ta rena riba di tudu mundu.”

Rolu antigu ku ojadu na mar mortu ku tene nomi di Deus distakadu — Rolu antigu ki ojadu na mar mortu tene nomi di Deus

Nin un pekadur ka ciga di oja Deus. Deus fala sin pa Moises: “Bu ka na pudi oja ña rostu, pabia kin ku oja ña rostu i ka na bibu.” (Saida 33:20) Deus ta vivi na seu i nin un pekadur ka pudi ojal. I mal kumpu un imaẑen, o un foto, o fasi kualker simbulu di Deus, i ora se dianti. Jeova Deus da es ordi atraves di profeta Moises: “Ka bu labra imaẑen pa bo, ku tene forma di kusa ku sta la riba na seu, nin li na tera, nin na yagu bas di con. Ka bu mpina pa elis, nin ka bu adora elis, pabia ami i SIÑOR bu Deus, ku ta ten siumi.” (Saida 20:2-5) Mas tardi, Deus fala sin atraves di profeta Isaias: “Ami i [Jeova, NM] es i ña nomi. N ka na da utru ña gloria, nin N ka na disa bonekas di po pa e ngabadu na ña konta.” — Isaias 42:8.

Sertu jintis ta fia na Deus. Ma e ta nkaral suma un algin ki no ka pudi ntindi, lunju di jintis, algin ki no dibi di medi en ves di ama. Ke ki bu pensa? Deus sta interesadu na bo? Bu pudi kunsil, te mesmu pertusi del? No jubi ke ki Palabra di Deus fala aserka di kualidadis di Deus.

Deus — Si spiritu santu ku si anjus

Kuma ki Deus ta kumpri si vontadi? Un di manera i manda si spiritu santu. Spiritu di Deus i ka un algin o un anju, ma i forsa ativu di Deus ki no ka pudi oja. Deus ta usa es spiritu o forsa ki ka tene limiti pa kumpri kualker kusa ki misti. Deus usa es forsa pa kumpu seu ku tera. “SIÑOR kumpu seu ku si palabra, ku si folgu i kumpu tudu strelas ku lua ku sol.” (Salmu 33:6) Kumsada 1:2 mostra ki oca tera inci di yagu, Deus staba na purpara tera pa pekaduris mora, ‘Spiritu di Deus na movimentaba riba di yagu.’ Deus usa si spiritu santu pa kumpu tudu tipu di vida na tera.

Deus tambi ta usa anjus pa kumpri si vontadi. Deus kumpu elis pa vivi ku el na seu. Anjus tene manga di puder. E ta leba noba di Deus i fasi utru tarbaju importanti. Suma isemplu, Palabra di Deus fala di Lei ki dadu atraves di profeta Moises suma “palabra ku anjus fala.” Tambi, anjus ta juda servus di Deus na tera. Na bardadi, Palabra di Deus coma anjus di “spiritus ku ta sirbi, ku Deus manda pa bin juda kilis ku na bin tene salbason.” — Ebreus 1:14; 2:2.